கொரோனாவுக்குப் பிறகு வீடு விற்பனை அதிகரிக்கும்! - ‘கிரெடாய்’ எஸ்.ஸ்ரீதரன்

த மிழக ரியல் எஸ்டேட், கொரோனாவுக்குப் பிறகு கடுமையான மாற்றங்களைச் சந்தித்திருக்கிறது. . இந்த நிலையில் நாணயம் விகடன் வாசகர்கள் நாணயம் விகடன் ஃபேஸ்புக்கிலும் ட்விட்டரிலும் ரியல் எஸ்டேட் தொடர்பாகக் கேட்ட கேள்விகளுக்குப் பதிலளித்தார் இந்திய ரியல் எஸ்டேட் டெவலப்பர்கள் சங்கங்களின் கூட்டமைப்பான `கிரெடாய்’ (தமிழ்நாடு) சேர்மனும், நியூரி பிராப்பர்டீஸ் பிரைவேட் லிமிடெட் (Newry Properties Pvt Ltd) நிறுவனத்தின் நிர்வாக இயக்குநருமான எஸ்.ஸ்ரீதரன்.

. தற்போதைய நிலையில் ரியல் எஸ்டேட்டில் முதலீடு செய்வதென்றால் மனை, அடுக்குமாடிக் குடியிருப்பு, வணிகக் கட்டடம் - இவற்றில் எது லாபகரமாக இருக்கும்?

- கே.மோகன், சைதாப்பேட்டை, சென்னை-15

. “வீடு என்பது அவசியமான தேவை. அதைத் தாண்டி முதலீட்டு நோக்கில் அல்லது எதிர்காலத் தேவைக்கு (ஓய்வுக்காலத்தில் அல்லது பிள்ளைகள் வீடு கட்ட) மனை வாங்கினால் நீண்டகாலத்தில் விலை உயர்ந்து லாபம் தரும். வீட்டை வாங்கி வாடகைக்கு விட்டால் அதன் மூலம் கிடைக்கும் வருமானம் குறைவாக இருந்தாலும், நீண்டகாலத்தில் வீட்டின் விலை உயர்ந்து லாபம் தரும். வீடு வாங்குவதென்றால் அனைத்து வசதிகளும் வீட்டுக்கு உள்ளேயும், வீட்டுக்கு வெளியேயும் இருக்கின்றனவா எனப் பார்த்து வாங்குவது அதிக லாபம் தருவதாக இருக்கும்.

அதிக வருமானம் வேண்டுமெனில், வணிக வளாகங்களிலுள்ள கடைகளைக் குறிப்பிடலாம். இதற்கு மனை மற்றும் வீட்டைவிட அதிக முதலீடு தேவைப்படும். ஒருவரின் தேவை, வசதியைப் பொறுத்து எதில் முதலீடு செய்யலாம் என்ற முடிவை எடுக்க வேண்டும்.

. தமிழக ரியல் எஸ்டேட் வளர்ச்சிக்கு மத்திய, மாநில அரசுகள் அவசியம் செய்ய வேண்டியவை என்னென்ன?

- லஷ்மி பிரியா, ஓசூர்

. “மத்திய அரசிடம் நாங்கள் தொடர்ந்து கேட்டுக்கொண்டிருப்பது `கட்டுமானத்துறைக்கு தொழில்துறை அஸ்தஸ்து அளிக்க வேண்டும்’ என்பதுதான். இதன் மூலம் கட்டுமானத் திட்டங்களுக்கு எளிதில் வங்கிக் கடன் கிடைக்கும். ரியல் எஸ்டேட் துறைக்கு விதிக்கப்படும் ஜி.எஸ்.டியை உள்ளீட்டு வரியாக (இன்புட் டாக்ஸ்) திரும்பப் பெறும் பழைய நடைமுறையை மீண்டும் கொண்டுவர வேண்டும். மேலும், ரூ.45 லட்சத்துக்குக் கீழேயுள்ள வீடுகள்தான் `வாங்கக்கூடிய விலையிலான வீடுகள்’ (Affordable Houseing) என்ற பிரிவின் கீழ் வருகிறது. இந்த வீடுகளுக்கு ஜி.எஸ்.டி 1% எனக் குறைவாக விதிக்கப்பட்டிருக்கிறது. ஆனால் சென்னை, கோவை போன்ற பெரிய நகரங்களில் இந்த விலைக்கு எந்த வீடும் வாங்க முடியாது. எனவே, இந்த வரையறையை ரூ.75 லட்சமாக உயர்த்த வேண்டும். இதனால் வீடு வாங்குபவர்களுக்கு ஜி.எஸ்.டி 5%-க்கு பதிலாக 1%-ஆகச் செலவு குறையும்.

மாநில அரசிடம் கட்டுமானத்துக்குத் தேவையான அனைத்து ஒப்புதல்களையும் பெற ஒற்றைச் சாளர முறையில் (Single Window System) அனுமதி அளிக்க வேண்டும். இதனால் தாமதம் குறைந்து, வீட்டின் விலை குறையும்.

இந்தியாவிலே தமிழ்நாட்டில்தான் பத்திரப் பதிவுக் கட்டணம் அதிகம். மகாராஷ்டிரா, கர்நாடகா மாநிலங்களில் இது 4%, 5% எனக் குறைவாக உள்ளது. தமிழ்நாட்டில் 11% என மிக அதிகமாக இருக்கிறது. இதைக் குறைத்தால் வீடு வாங்குபவர்களின் சுமை வெகுவாகக் குறையும்.”

. பிற்காலத்தில் நல்ல விலை ஏறக்கூடிய வீட்டு மனைகளை எப்படித் தேர்ந்தெடுத்து வாங்குவது?

- பி.அருண் பாபு, ஆறுமுகநேரி

. “வீட்டு மனை வாங்குவதென்றால், அப்ரூவல் இருக்கிறதா, அந்த பிராஜெக்ட் ரெரா அமைப்பில் பதிவு செய்யப்பட்டிருக் கிறதா என்று பார்க்க வேண்டும். மனை அமைந்திருக்கும் இடம் மிக முக்கியம். உள்கட்டமைப்பு வசதிகள் குறிப்பாக, சாலை வசதி, தண்ணீர் வசதி ஆகியவை இருக்கின்றனவா என்று பார்க்க வேண்டும். பிரதான இடத்தில் மனை அமைந்திருந்து, இந்த வசதிகளெல்லாம் இருந்தால்தான் நீங்கள் வாங்கும் மனையின் விலை நன்றாக ஏறும்.”

. கடந்த சில ஆண்டுகளாக `சொத்துக் கண்காட்சி’ என்ற பிராப்பர்ட்டி ஃபேர்களுக்கு சிறு பில்டர்கள் ஏன் வருவதில்லை அல்லது அனுமதிப்பது இல்லையா?

- பிரகாஷ் தேவராஜ், முகநூல் மூலம்

. “தற்போது சொத்துக் கண்காட்சியைப் பலரும் நடத்துகிறார்கள். கிரெடாய் அமைப்பு நடத்துவது `ஃபேர்புரோ’ (Fairpro) என்ற ஒரு கண்காட்சி. அது ஆண்டுக்கு ஒரு முறைதான் நடக்கும். அதில் கிரெடாய் உறுப்பினராக இருக்கும் டெவலப்பர் / பில்டர் மட்டும்தான் அரங்கு அமைக்க முடியும். மற்றவர்கள் நடத்தும் சொத்துக் கண்காட்சிகளில் இந்தக் கட்டுபாடு இல்லை. யார் வேண்டுமானாலும் பங்கேற்று ஸ்டால் போடலாம்.”

. ரியல் எஸ்டேட் துறையைக் கட்டுப்படுத்தும் ரெரா சட்டத்தால் வீடுகளின் விலை அதிகரித்திருப்பதாகச் சொல்லப்படுவது உண்மையா?

- எஸ்.ஸ்ரீனிவாசன், செங்கல்பட்டு

. “ரெரா வந்ததால் பில்டர்களுக்கு சில கட்டுப்பாடுகள் வந்திருக்கின்றன. ஒரு புராஜெக்டுக்குத் திரட்டும் பணத்தை வேறு புராஜெக் டுக்கோ, வேறு மனை வாங்கிப் போடவோ பயன்படுத்த முடியாது. சொத்து வாங்குபவர்களைப் பாதுகாப்பதற்காக வந்த சட்டம் இது. இதனால் வீடு விலை உயர்ந்திருக்கிறது என்று சொல்ல முடியாது. இதற்கு முன்னர் பஞ்சாயத்து அப்ரூவல் மனைகளில் அகலமான சாலை, பூங்காவுக்கான இட ஒதுக்கீடு போன்றவை இருந்திருக்காது. ரெரா சட்டப்படி கட்டப்படும் அடுக்குமாடிக் குடியிருப்புகளில் இந்த வசதிகள் இருப்பதால், விலை சற்று அதிகமாக இருக்கலாமே ஒழிய, சந்தை நிலவரப்படிதான் விலை இருக்கும்.”

. ஏற்காடு போன்ற மலை வாழிடங்களில் வீடு வாங்கி நிரந்தரமாகக் குடியேற வேண்டும் என்பது ஆசை. அங்கு வீடு வாங்கும்போது கவனிக்க வேண்டிய அம்சங்கள் என்னென்ன?

- சங்கர்.டி, மெயில் மூலம்

. “நீங்கள் எங்கிருந்தாலும் இடத்தை நேரில் சென்று பார்க்காமல் வாங்கக் கூடாது. மலைப் பிரதேசங்களுக்கு என பிரத்யேகக் கட்டுப்பாடுகள் இருக்கின்றன. யாரிடம் மனை அல்லது வீடு வாங்கினாலும் அப்ரூவல் இருக்கிறதா என்பதை கவனித்து வாங்க வேண்டியது மிக அவசியம். சொத்துப் பத்திரங்களை வக்கீலிடம் காட்டி அவரின் கருத்தைக் கேட்டறிவது நல்லது.’’

. கொரோனா முடிந்த பிறகு வீடு வாங்கப்போகும் என்னைப் போன்ற நாணயம் விகடன் வாசகர்களுக்கு உங்களின் ஆலோசனை என்ன?

- ச.ரஞ்சித், மெயில் மூலம்

. “இந்த கொரோனாவால் இப்போது எல்லோருக்கும் வீடு முக்கியமானதாக மாறிவிட்டது. காரணம், இதற்கு முன்னர் வீட்டில் இருக்கும் நேரம் குறைவு. தூங்கும் நேரம்தான் அதிகமாக இருக்கும். இப்போது அப்படி இல்லை. வீடே அலுவலகமாக மாறியிருக்கிறது. வெளிநாடுகளில் இருக்கும் வாடகை வீடுகளில் பல்வேறு பிரச்னைகளைச் சந்தித்துவருகிறார்கள். என்.ஆர்.ஐ-கள் அங்கிருக்கும் பிரச்னைகளைப் பார்த்துவிட்டு இந்தியாவில் சொந்த வீடு வாங்கி இங்கே குடியேற விரும்புகிறார்கள். எனவே, அடுத்த இரண்டு, மூன்று மாதங்களில் வீடுகளுக்கான தேவை மிகவும் அதிகரிக்கும்.”

. கிரெடாய் அமைப்பு தமிழ்நாட்டில் எந்தெந்த நகரங்களில் இயங்கிவருகிறது. இது மனை, வீடு வாங்குபவர்களுக்கு எந்த வகையில் உதவி வருகிறது?

- ரமேஷ் குமார், கோயம்புத்தூர்

. “கிரெடாய் அமைப்பு தமிழ்நாட்டில் தற்போது சென்னை, மதுரை, கோயம்புத்தூர், திருச்சி ஆகிய மாவட்டங்களில் இயங்கிவருகிறது. திருநெல்வேலி, ஈரோடு, சேலம் ஆகிய மாவட்டங்களில் விரைவில் செயல்படவிருக்கிறது. கொரோனா பிரச்னை ஓரளவுக்கு நீங்கி, இயல்பான வாழ்க்கை நடக்கத் தொடங்கிய பிறகு இந்த நகரங்களில் கிரெடாய் செயல்படத் தொடங்கும். இது ஒரு தேசிய அமைப்பு. இந்தியா முழுக்க இயங்கி வருகிறது. ரியல் எஸ்டேட் துறை வளர்ச்சிக்குத் தேவையான விஷயங்களை பில்டர்களுக்கும் முதலீட்டாளர்களுக்கும் அளித்துவருகிறது.

கிரெடாய் அமைப்பில் உறுப்பினராக இருக்கும் டெவலப்பர்கள், பில்டர்கள் தரமான கட்டுமானம், அப்ரூவல் திட்டங்கள், சரியான நேரத்தில் டெலிவரி உள்ளிட்ட சட்ட திட்டங்களைப் பின்பற்றிச் செயல்பட வேண்டும். குறிப்பாக, ரியல் எஸ்டேட் ஒழுங்குமுறை ஆணையமான ரெராவில் பதிவு செய்துதான் புராஜெக்டுகளை மேற்கொள்ள வேண்டும். அந்த வகையில் கிரெடாய் அமைப்பில் உறுப்பினராக இருப்பவரிடம் மனை, வீடு வாங்கினால் சிக்கல் எதுவும் ஏற்படாமலிருக்க அதிக வாய்ப்பிருக்கிறது.”

. ஹெல்த் இன்ஷூரன்ஸ் குறித்து உங்கள் சந்தேகங்களுக்கு ஸ்டார் ஹெல்த் அண்ட் அலைடு இன்ஷூரன்ஸ் நிறுவனத்தின் நிர்வாக இயக்குநர் டாக்டர் எஸ்.பிரகாஷ் பதில் அளிக்கிறார்.

உங்கள் கேள்விகளை navdesk@vikatan.com என்ற இ-மெயிலுக்கு அனுப்பி வைக்கலாம்.

கொரோனாவுக்குப் பிறகு வீடு விற்பனை அதிகரிக்கும்! - ‘கிரெடாய்’ எஸ்.ஸ்ரீதரன்

சி.சரவணன்