கோவிட் பாதிப்பு... மாறும் முதலீட்டாளர்கள்! - என்ன வகை மாற்றங்கள்..?

கோ விட்-19 தொற்றுநோய் அனைவரின் இயல்பு வாழ்க்கையைப் பாதித்துள்ளது. நம் நிதி் சார்ந்த முன்னுரிமைகள் மற்றும் முதலீட்டுக் கருத்துகளை மறுபரிசீலனை செய்ய நம்மில் பெரும்பாலானவர்களைக் கட்டாயப்படுத்தியுள்ளது. . நடப்பு 2020-ம் ஆண்டின் முதல் பாதியில், இந்தியப் பங்குச் சந்தை இதுவரை இல்லாத அளவுக்கு புதிய உச்சநிலைக்கு உயர்ந்ததைக் கண்டோம். அதே நேரத்தில், இந்தக் காலகட்டத்தில் கடந்த 10 ஆண்டுகளில் இல்லாத அளவுக்கு வீழ்ச்சியையும் நாம் கண்டோம்.

. இத்தகைய நிலை முதலீட்டாளர்கள் அனைவருக்கும் புதியது என்பதால், முதலீட்டாளர்கள் கஷ்டப்பட்டுச் சம்பாதித்த பணத்தை இழக்கும் ரிஸ்க்கில் இருக்கும்போது குழப்பமடைவது இயற்கையான விஷயம்தான். பங்குச் சந்தை தொடர்பான பொதுவான விதிமுறைகளைக் கடைப்பிடிக்கும் ஏராளமான முதலீட்டாளர்கள், பங்குச் சந்தையின் ஏற்ற இறக்கத்துக்கு ஏற்றவாறு தங்கள் முதலீட்டை மாற்றியமைத்துக் கொள்கிறார்கள்.

கொரோனாவுக்குப் பிந்தைய முதலீட்டு உலகம் இப்படித்தான் இருக்கும் என உத்தரவாதம் எதையும் அளிக்க முடியாது என்றாலும், நாம் முதலீடு செய்யும்போது கவனிக்க வேண்டிய சில விஷயங்களைத் தெரிந்துகொண்டால், நாம் இழப்பில் சிக்காமல் இருக்க வாய்ப்புண்டு. அப்படிப்பட்ட விஷயங்களில் ஒருசிலவற்றை இங்கே விரிவாகப் பார்ப்போம்.

. நிர்வாகத் தரம் - நிறுவனத்தின் மிகப்பெரிய சொத்து!

தரமான நிர்வாகத் திறன் குறித்த முக்கியத்துவத்தை இந்த 2020–ம் ஆண்டில் நம்மால் தெளிவாகவே புரிந்துகொள்ள முடிந்திருக்கிறது. தரமான நிர்வாகத் திறன் கொண்ட நிறுவனங்களில் முதலீடு செய்திருந்த முதலீட்டாளர்கள் சந்தை வீழ்ச்சியில் குறைந்த இறக்கத்தையே எதிர்கொண்டனர். எனவே, தரமான நிர்வாகம் மூலம் நிறுவனங்கள் மீண்டும் வலுவாக வளர்ச்சி பெறும் என்று நம்பிக்கை கொள்ளலாம்.

. அதிகளவிலான நிச்சயமற்ற தன்மை கொண்ட முதலீட்டு உலகில், தரமான முதலீடுகள் முதலீட்டாளரின் போர்ட் ஃபோலியோவைப் பாதுகாத்தன என்பதுதான் உண்மை. இந்த போர்ட்ஃபோலியோவில் உள்ள பங்குகளின் குறைந்த பீட்டா பண்புகளின் (lower beta attributes) காரணமாக, இறக்கத்திலிருந்து மீண்டுவரும்போது மெதுவாக மீண்டுவருவதாக இருக்கும். ஆனால், ஏற்றத்தின் போக்கில் வந்தபின் மீண்டும் ஏறத் தொடங்கிவிடும். எனவே, இனிவரும் காலங்களில் முதலீட்டுக்குப் பங்குகளைத் தேர்வு செய்யும்போது, நிறுவனத்தின் மேலாண்மைத் தரத்தை முதலீட்டாளர்கள் கவனிப்பது மிக அவசியம்.

நடுத்தரக் கால கண்ணோட்டத்தில் கூடுதல் கவனம்!

கோவிட் பரவலால் உலகப் பொருளாதாரம் மற்றும் பங்குச் சந்தைகள் இதற்கு முன் இல்லாத வகையில் மந்தநிலையில் மூழ்கியதால், முதலீட்டாளர்களிடையே குழப்பம் அதிகமாக இருந்தது. சந்தை தொடர்ந்து வீழ்ச்சியைச் சந்தித்ததால், முதலீட்டாளர்கள் நஷ்டத்துடன் வெளியேற வேண்டிய கட்டாயத்தில் இருந்தனர். மத்திய அரசால் எடுக்கப்பட்ட சில நிவாரண நடவடிக்கைகளால் முதலீட்டாளர்கள் சந்திக்க வேண்டிய நஷ்டம் சற்றே குறைந்தது. எதிர்காலப் பொருளாதாரம் குறித்த நம்பிக்கை காரணமாக வீழ்ச்சியிலிருந்து உடனே எழுந்து மீண்டுவந்திருக்கிறது பங்குச் சந்தை.

. இருப்பினும், முதலீட்டாளர்கள் எப்போதும் எச்சரிக்கையாக இருக்க வேண்டும் என்ற பாடத்தைச் சரியாகவே புரிந்துகொண்டார்கள். குறுகியகாலத்தைவிட நடுத்தரக் காலத்தில் கூடுதல் கவனம் செலுத்த வேண்டும் என்பதையும் அறிந்துகொண்டார்கள்.

. நிறுவனப் பங்குகளில் முதலீடு செய்யும்போது முதலீட்டாளர்கள் தங்கள் முதலீட்டை நீண்டகால நோக்கில் அமைத்துக்கொள்ள வேண்டும். சந்தை இன்னும் இறங்கிவிடுமோ என்ற தவிப்பில் பங்குகளை விற்ற முதலீட்டாளர்கள் குறைந்த விலையில் பங்குகளை வாங்கிச் சேர்க்கும் வாய்ப்புகளை இழந்தார்கள். அதேபோல, எஸ்.ஐ.பி முறையில் முதலீடு செய்துவந்த முதலீட்டாளர்களும் தங்கள் முதலீட்டை நிறுத்தியதால், ‘ரூபாய் அடக்க விலை சராசரி’ (Rupee cost averaging) செய்யும் வாய்ப்பை இழந்தார்கள். இந்த இருவகை முதலீட்டாளர்களும் ஓர் உண்மையை அவசியம் உணர்ந்துகொள்ள வேண்டும். கரடிச் சந்தை என்பது என்றென்றும் நிலைத்திருக்க வாய்ப்பில்லை. இறங்கும் சந்தை மீண்டும் ஏறும் என்பதை மறக்காதீர்கள்.

ரிஸ்க் எடுக்கும் திறனை மறுசீரமைத்தல்!

கடந்தகால செயல்திறன் மற்றும் வருமானமானது, எதிர்காலத்தில் மீண்டும் அப்படியே கிடைக்கும் என்று எதிர்பார்க்க முடியாது என்பதை முதலீட்டாளர்கள் புரிந்துகொள்ள வேண்டும். பயம் மற்றும் நம்பிக்கையின்மை காரணமாக முதலீட்டாளர்கள் போர்ட்ஃபோலியோவில் எதிர்பாராத மற்றும் அவசர முடிவுகளை எடுக்கக்கூடும். சரியான புள்ளிவிவரங்கள், வருமானம் குறித்த தகவல்கள், முதலீட்டின் நோக்கம், பங்குச் சந்தையின் ஏற்ற இறக்கம் ஆகியவை குறித்து புரிந்துகொள்வதும் அதன்பின்னர், ரிஸ்க் எடுக்கும் திறனை மறுமதிப்பீடு செய்வதும் முக்கியம். ஒவ்வொரு முறையும் நம்மைத் தேடிவரும் ரிஸ்க்கும் ஒருவிதமாக இருக்கிறது. எனவே, ஒவ்வொரு ரிஸ்க்கையும் ஒரே மாதிரி நினைக்காமல், தனித்தனியாகப் பிரித்துப் பார்த்து முடிவெடுக்க வேண்டும்.

பிரித்து முதலீடு செய்வதே சரியான தீர்வு!

நம் முதலீட்டில் இருக்கும் ரிஸ்க்கைக் குறைக்க சிறந்த வழி முதலீட்டைப் பிரித்து மேற்கொள்வதாகும். தற்போதைய நிலையில் எந்தவொரு சொத்துப் பிரிவையும் தவிர்ப்பது சரியான வழியல்ல. முதலீட்டைப் பிரித்து செய்வது நம் போர்ட்ஃபோலியோவின் ரிஸ்க்கைக் குறைக்கிறது.

சில பங்கு சார்ந்த முதலீடுகள் மற்றும் கடன் சார்ந்த முதலீடுகள், நடுத்தரக் காலம் முதல் நீண்டகாலம் வரையில் கவர்ச்சிகரமான முதலீட்டு வாய்ப்புகளை வழங்குகின்றன. தற்போதைய சூழலைப் பொறுத்தவரை, முதலீட்டாளர்கள் தங்கள் முதலீட்டைச் சரியாக அஸெட் அலோகேஷன் செய்வதும், முதலீடுகளைப் பரவலாக வைத்திருப்பதும் (diversification) மிக அவசியம்.

அவசரகால நிதி அவசியம்!

தற்போதைய சூழல், அவசரகால நிதியின் முக்கியத்துவத்தை வெளிச்சம் போட்டுக் காட்டியிருக்கிறது. எளிதான பணப்புழக்கத்தை தொடர்ந்து பராமரிக்க ஒருவருக்கு அவசரகால நிதி மிக முக்கியம் என்பதை இப்போது முதலீட்டாளர்கள் முழுமையாகப் புரிந்து கொண்டுள்ளனர்.

கொரோனா வைரஸ் பரவல் இன்னும் எவ்வளவு காலத்துக்கு இருக்கும் என உறுதியாக தெரியாத உலகில் நாம் வாழ்ந்து கொண்டிருக்கிறோம். ஆனால், முதலீட்டில் நமக்கு ஏற்பட்ட பாதிப்பைச் சரிசெய்ய நமது முதலீடுகளை மீண்டும ் மறுமதிப்பீடு செய்ய வேண்டியிருக்கிறது. இதனால் நமது முதலீடு தொடர்பான அடிப்படை அம்சங்களை மாற்றியமைக்க வேண்டிய கட்டாயம் ஏற்பட்டுள்ளது. முதலீட்டாளர்கள் இதற்குமுன் இல்லாத அளவுக்கு மிகவும் எச்சரிக்கையாக இருக்க வேண்டும் என்பதை அவசியம் புரிந்துகொள்ள வேண்டும்.

கோவிட் பாதிப்பு... மாறும் முதலீட்டாளர்கள்! - என்ன வகை மாற்றங்கள்..?

நாணயம் விகடன் டீம்