நடப்பு
பங்குச் சந்தை
Published:Updated:

பழைய வீடு வாங்கினால் லாபமா..? - பயனுள்ள டிப்ஸ்

வீடு
பிரீமியம் ஸ்டோரி
News
வீடு

பழைய வீடுகளையும் வீட்டுக் கடன் மூலம் வாங்கும்போது வருமான வரிச் சலுகை அளிக்கப்படுகிறது.

புது வீடுகளின் விற்பனை ஏற்கெனவே மந்தகதியில் இருந்துகொண்டிருக்க, பழைய வீடுகளின் விற்பனை தற்போது சூடுபிடித்திருக்கிறது. காரணம், கொரோனா ஏற்படுத்தியுள்ள பரபரப்பான சூழ்நிலை.

சென்னையில் பழைய வீடுகளை வாங்கிக் கொடுக்கும் விற்பனையில் ஈடுபட்டிருக்கும் பெஸ்ட் சர்வீஸ் ரியால்டி நிறுவனத்தின் உரிமையாளர் சிவக்குமார் இப்படிச் சொல்கிறார்...

பழைய வீடு
பழைய வீடு

பழைய வீட்டின் விலை குறைவு..!

‘‘கொரோனா வைரஸ் பரவலுக்குப் பிறகு இப்போதுவரைக்கும் சென்னையின் அனைத்துப் பகுதிகளிலும் பழைய அடுக்குமாடி வீடுகளின் விலை சதுர அடிக்கு சுமார் ரூ.1,000-ரூ.2,000 வரை குறைந்திருக்கிறது. இதனால் இரண்டு படுக்கை அறை வீடு வாங்கத் திட்டமிட்டிருப்பவர்கள் மூன்று படுக்கை அறை வீட்டை வாங்குகிறார்கள். சென்னை அசோக்நகரை எடுத்துக்கொண்டால், அடுக்குமாடிக் குடியிருப்பு ஒரு சதுர அடி 10,000 ரூபாய் என்றால், மறு விற்பனைக்கு வரும் 10 முதல் 15 ஆண்டுகள் பழைய அடுக்குமாடிக் குடியிருப்பு வீடுகள் விலை சதுர அடி ரூ.7,000 முதல் ரூ.8,000-ஆக உள்ளது’’ என்றவர், பழைய வீடுகளை மக்கள் இப்போது ஏன் வாங்க விரும்புகிறார்கள் என்பதற்கான காரணங்களை விளக்கிச் சொன்னார்.

பழைய வீட்டை வாங்குவது ஏன்?

‘‘பழைய வீடு வாங்குபவர்கள் முக்கியமாக நகருக்குள் வீடு கிடைக்கிறது என்பதை கவனிக்கிறார்கள். அடுத்து, அவர்களின் அலுவலகம், தரமான பள்ளிக்கூடம், இதர உள்கட்டமைப்பு வசதிகள் அருகிலேயே இருப்பதால் நகருக்குள் பழைய வீட்டை வாங்க விரும்புகிறார்கள். ஏற்கெனவே அவர்கள் வசிக்கும் பழக்கப்பட்ட பகுதிகளில் பழைய வீடு வாங்குவதைப் பெரும்பாலானோர் விரும்புகிறார்கள்.

பழைய வீட்டில் இன்னொரு வசதி உடனே குடியேற முடியும். குடிநீர் இணைப்பு, மின்சார இணைப்பு போன்றவற்றுக்கு அலையத் தேவையில்லை. பெயர் மட்டும் மாற்றம் செய்துகொண்டால் போதும். பல பழைய அடுக்குமாடி வீடுகளில் மாடுலர் கிச்சன் போன்றவை இருக்கின்றன. சிறிய தொகையைக் கொண்டு சில மராமத்து வேலைகள், புதிதாக பெயின்ட் அடிப்பது போன்றவற்றை மேற்கொண்டால் வீடு புதிதுபோல் காட்சியளிக்கும்” என்றார்.

வீடு
வீடு

இதே நிலைதான் கோவை, திருச்சி, சேலம், மதுரை போன்ற முக்கிய தமிழக நகரங்களில் காணப்படுகிறது.

பழைய வீடுகளுக்கு மவுசு!

சொத்து ஆலோசகர் அரசு அழகப்பனிடம் பேசினோம். ‘‘பழைய வீடு வாங்குவதில் உடனே குடியேறும் வசதி இருப்பதால், பெரும்பாலா னவர்கள் அதை விரும்புகிறார்கள். புது வீடு என்றால் பில்டர் எப்போது ஒப்படைப்பார் என்பது பெரிய கேள்விக்குறியாக மாறியிருக்கிறது. அதுவும் அண்மைக் காலத்தில் பொருளாதார மந்தநிலை, கொரோனா பரவல் போன்றவற்றால் ஏற்பட்டிருக்கும் பாதிப்பால், வீட்டை ஒப்படைக்கும் காலம் ஆறு மாதங்கள் முதல் ஒன்பது மாதங்கள் வரை ரியல் எஸ்டேட் ஒழுங்குமுறைச் சட்டமான ரெரா அனுமதிப்படியே தள்ளிப்போகிறது. இதனால், பழைய வீடு வாங்குபவர்களின் எண்ணிக்கை அதிகரித்து வருகிறது.

மேலும், பழைய வீடுகளில் மறு விற்பனை மதிப்பு நன்றாகவே இருக்கிறது. உதாரணமாக, சென்னை அண்ணாநகரில் 2011-ம் ஆண்டுவாக்கில் அடுக்குமாடிக் குடியிருப்பு சதுர அடி விலை சுமார் ரூ.6,000-ஆக இருந்தது. இப்போது 2020-ம் ஆண்டில் அதே பழைய வீட்டை சதுர அடி ரூ.10,000-க்கு விற்க முடியும். காரணம், நகரத்துக்குள் மனை விலை மிகவும் அதிகரித்திருப்பது. மேலும், இவ்வளவு நாளும் அந்த வீட்டில் குடியிருந்திருப்பார்கள் அல்லது வாடகைக்கு விட்டு அதன் மூலம் வருமானம் பார்த்திருப்பார்கள்’’ என்றவர், பழைய வீடு வாங்குபவர்களுக்குச் சில பயனுள்ள டிப்ஸ்களையும் வழங்கினார்.

சிவக்குமார், அழகப்பன்
சிவக்குமார், அழகப்பன்

எப்படி விலை நிர்ணயிப்பது?

‘‘பொதுவாக, பழைய வீடு வாங்கத் திட்டமிட்டிருப்பவர்கள், வாங்குவதுபோல் ஒரு முறையும் விற்பதுபோல் ஒரு முறையும் ஒரு ஏரியாவுக்குள் போய் விசாரிக்க வேண்டும். உதாரணமாக, உங்களிடம் ஒரு வீடு இருக்கிறது. அதை நீங்கள் விற்கப் போகிறீர்கள் என்றால், புரோக்கர்கள் ரூ.40 லட்சம் சொல்வார்கள். அதுவே நீங்கள் வாங்கப் போகிறீர்கள் என்றால் ரூ.60 லட்சம் சொல்வார்கள். இந்த இரண்டையும் கூட்டிக் கழித்து `அந்த வீட்டின் விலை சுமார் ரூ.50 லட்சம் இருக்கும்’ என மதிப்பிடலாம்.

பழைய வீடுகளைப் பொறுத்தவரை, வாகனங்கள்போல் அதிக தேய்மானம் இல்லை. வீடு வாங்கி 10, 15 வருடங்கள் கழித்து விற்றால், பத்திரச் செலவு மற்றும் இதர மேற்படிச் செலவுகள் சுமார் 14-15% போக நல்ல லாபம் கிடைக்கும். தற்போதைய நிலையில், வீடுகளின் விலை நன்றாக இறங்கியிருப்பதால் வாங்கி சுமார் 10, 15 ஆண்டுகள் கழித்து விற்றால், நல்ல லாபம் கிடைக்க வாய்ப்பிருக்கிறது என்பதாலும் கையில் அதிக பணம் வைத்திருப்பவர்கள் முதலீட்டு நோக்கில் பழைய வீடுகளைத் தேடி அலைவதைப் பார்க்க முடிகிறது. பழைய வீடுகளில் வாடகை வருமானம் என்பது உடனடியாகக் கிடைக்கக்கூடும். மேலும், பழைய அடுக்குமாடிக் குடியிருப்புக்கு என்ன விலை கொடுக்கலாம் என்பதற்கு ஃபார்முலா இருக்கிறது. அதாவது, பழைய அடுக்குமாடி வீடு எத்தனை ஆண்டுகள் பழையது என்பதைப் பொறுத்து அந்தப் பகுதியில் புதிய அடுக்குமாடி விலைக்கேற்ப தேய்மானத்தைக் கணக்கிட்டு ஓரளவுக்கு நியாயமான விலையை நிர்ணயித்துக்கொள்ள முடியும். உதாரணமாக, 10 ஆண்டுகள் பழைய வீடு என்றால், தற்போதைய புதிய வீட்டின் சந்தை விலையிலிருந்து 25% குறைவாக விலை நிர்ணயம் செய்யலாம். (பார்க்க அட்டணை).

பழைய வீடு  வாங்கினால்  லாபமா..? - பயனுள்ள டிப்ஸ்

தற்போது பழைய வீடுகளின் விலை குறைந்திருந்தாலும் வீட்டின் உரிமையாளர்கள் இஷ்டத்துக்கு விலை சொல்வதை நடைமுறையில் பார்க்க முடிகிறது. கையில் ரொக்கப் பணம் அல்லது வங்கிக் கடன் விரைந்து வாங்குவதற்கான சாத்தியக்கூறு இருந்தால் வீட்டின் விலையைக் குறைத்துக் கேட்க முடியும். உதாரணமாக, ஒரு வீட்டின் விலை ரூ.35 லட்சம் என்றால், சுமார் ரூ.28 லட்சத்துக்குப் பேசி முடிக்கலாம். தற்போது ரொக்கப் பணம் மற்றும் வேகமான கடன் என்பது முக்கிய அங்கமாக இருக்கிறது. வீடு விற்பவர்கள் அவசரத் தேவைக்குத்தான் விற்கிறார்கள். மகள் கல்யாணம், மகன் மேற்படிப்பு போன்றவற்றுக்காகத்தான் விற்க முன்வருகிறார்கள். உங்களால் ஒரு மாத காலத்துக்குள் பணம் தந்து பத்திரம் செய்துகொள்ள முடியும் என்றால் நன்றாக விலையைக் குறைத்து வாங்க முடியும்” என்றார்.

பழைய வீடு  வாங்கினால்  லாபமா..? - பயனுள்ள டிப்ஸ்

அடுக்குமாடிக் குடியிருப்புகளில் அதன் பிரிக்கப்படாத மனை எவ்வளவு (யூ.டி.எஸ்) இருக்கிறது என்பதைப் பொறுத்துத்தான் கடன் தொகை இருக்கும். இப்போது கட்டப்பட்டுவரும் புதிய அடுக்குமாடிக் குடியிருப்புகளில் `பிரிக்கப்படாத மனை’ என்கிற யூ.டி.எஸ் என்பது வீட்டின் பரப்பில் சுமார் 40 சதவிகிதமாக இருக்கிறது. இதுவே பழைய அடுக்குமாடிக் குடியிருப்புகள் எனில், 50-60 சதவிகிதமாக இருப்பதால், கடன் வாங்குவது எளிது.

வருமான வரிச் சலுகை

புதிய வீடுகளுக்கு அளிப்பதுபோல், பழைய வீடுகளையும் வீட்டுக் கடன் மூலம் வாங்கும் போது வருமான வரிச் சலுகை அளிக்கப்படுகிறது. நிதியாண்டில் நிபந்தனைக்கு உட்பட்டு திரும்பச் செலுத்தும் அசல் தொகையில் 80சி பிரிவின்கீழ் ரூ.1.5 லட்சம் மற்றும் 24 பிரிவின்கீழ் வட்டிக்கு ரூ.2 லட்சம் வரிச் சலுகை உண்டு.

வீடு வாங்க வேண்டும் என்று இத்தனை காலமும் துடித்துக்கொண்டிருந்தவர்கள் இப்போது ஓரளவுக்குக் குறைந்த விலையில் கிடைக்கும் பழைய வீடுகளை வாங்குவது புத்திசாலித்தனமான முடிவாக இருக்கும்!

குடும்பத்தில் கூடுதல் சந்தோஷம்!

பழைய வீடு  வாங்கினால்  லாபமா..? - பயனுள்ள டிப்ஸ்

சென்னை கோடம்பாக்கத்தைச் சேர்ந்த வெங்கடாசலம் அவரது மகனுக்காக பழைய வீடு ஒன்றை வாங்கியிருக்கிறார். இந்தப் பகுதியில் புதிய அடுக்குமாடிக் குடியிருப்பு சதுர அடி விலை ரூ.11,000 என்ற நிலையில், இவர் சதுர அடி 6,000 ரூபாய்க்கு 675 சதுர அடி கொண்ட இரண்டு படுக்கை அறை வீட்டை ரூ.35 லட்சத்துக்கு வாங்கியிருக்கிறார். பத்திரச் செலவு எல்லாம் சேர்ந்து சுமார் ரூ.42 லட்சத்துக்கு முடித்திருக்கிறார். இந்த வீடு 30 ஆண்டுகள் பழைய வீடு என்றாலும் தரமான கட்டுமானத்தில் இருக்கிறது. இதைப் புதுப்பிக்க ரூ.2 லட்சம் செலவு செய்திருக்கிறார். இந்த வீடு நல்ல அருமையான லொக்கேஷனில் அமைந்திருக்கிறது என்பதில் இந்தக் குடும்பத்துக்கு கூடுதல் சந்தோஷம்.

பழைய வீடுகளுக்கும் தாராள வீட்டுக் கடன்..!

பழைய வீடு  வாங்கினால்  லாபமா..? - பயனுள்ள டிப்ஸ்

ஸ்டேட் பேங்க் ஆஃப் இந்தியா - சென்னை தலைமை அலுவலகத்தின் ரியல் எஸ்டேட் & வீட்டு வசதி வாணிபப் பிரிவு துணைப் பொது மேலாளர் பா.மணிவாசகம் கூறும்போது, ‘’பழைய வீடுகள் வாங்க வங்கிகள் மற்றும் வீட்டு வசதி நிறுவனங்கள் தாராளமாக கடனுதவி செய்கின்றன. பழைய வீட்டின் மதிப்பில் சுமார் 80% வரை வீட்டுக் கடன் பெற முடியும். இந்தக் கடனுக்கான வட்டியும் புதிய வீடு வாங்குவதற்கான வட்டிதான். பழைய வீடு / அடுக்குமாடிக் குடியிருப்பு வாங்கும்போது வங்கிக் கடனுக்கு விண்ணப்பிக்க வேண்டுமெனில், சில நிபந்தனைகள் பூர்த்தி செய்யப்பட வேண்டும். சொத்தின்மீது எந்தவித வில்லங்கமும் இருக்கக் கூடாது; உரிய அரசாங்கத் திட்ட அனுமதியோடு (பில்டிங் அப்ரூவல்) வீடு கட்டப்பட்டிருக்க வேண்டும். வீட்டின் வயது அதிகபட்சம் 60 ஆண்டுகள் வரை இருக்கலாம். வீட்டின் கட்டுமானம் தரமானதாக இருப்பதோடு, வீடு வலிமையாக இருப்பது அவசியம். மேலும், வழக்கமான வீட்டுக் கடனுக்கு உள்ள நிபந்தனைகள் பழைய வீடு வாங்குவதற்கும் பொருந்தும்” என்றார்.