தொழில்முனைவோராக தூண்டும் புதிய சலுகைகள்! - உருவாகும் வாய்ப்புகள்..!

‘இ ப்போது தொழில் தொடங்கலாமா?’ எனத் தயக்கத்துடன் கேட்பவர்களுக்கு, ‘என்ன தொழில் தொடங்க வேண்டும் என்ற தெளிவு இருப்பவர்கள் எப்போது வேண்டுமாலும் தொழில் தொடங்கலாம்’ என்று பச்சைக்கொடி காட்டுகிறார்கள் தொழில் துறையில் ஜெயித்தவர்கள். . இந்த நிலையில், தொழில்முனைவோரை ஊக்குவிக்கும் முயற்சியாக, ‘ குறு, சிறு மற்றும் நடுத்தர’ தொழில் மேம்பாட்டுக்கான முந்தைய எம்.எஸ்.எம்.இ (Micro Small and Medium Enterprises) விதிமுறைளைத் தளர்த்தியும், சில சலுகைகளைச் சேர்த்தும் புதிய விதிமுறைகளைக் கொண்டுவந்திருக்கிறது மத்திய அரசு. 1.7.2020 முதல் நடைமுறைக்கு வந்துள்ள புதிய விதிகளைத் தெரிந்துகொள்ளும் முன், எம்.எஸ்.எம்.இ பற்றிய அடிப்படைச் செய்திகளைத் தெரிந்துகொள்வது அவசியம்.

. பொருளாதார வளர்ச்சியின் இழுவை இன்ஜின்..!

எம்.எஸ்.எம்.இ நிறுவனங்களை நமது பொருளாதார வளர்ச்சியின் இழுவை இன்ஜின் என்றே அழைக்கலாம். அந்த அளவுக்கு அவை பொருளாதாரத்தைத் தாங்கும் மிகப்பெரும் சக்தியாக இருக்கிறது.

மத்திய அரசின் 2018-19-ம் ஆண்டுக்கான அறிக்கையின்படி, செயல்பாட்டில் உள்ள எம்.எஸ்.எம்.இ நிறுவனங்களின் எண்ணிக்கை 6,08,41,245.

ஏறக்குறைய 12.4 கோடி பேருக்கு வேலைவாய்ப்பு அளிக்கும் துறை இது. அதாவது, மொத்தத் தொழில்துறை வேலைவாய்ப்பில் 45%.

நமது ஜி.டி.பி-யில் எம்.எஸ்.எம்.இ-யின் பங்களிப்பு 29.8%; ஏற்றுமதியில் பங்களிப்பு 50%.

எம்.எஸ்.எம்.இ நிறுவனங்கள் உற்பத்தி செய்யும் பொருள்களின் எண்ணிக்கை 6,000-க்கு மேற்பட்ட வகையானவை.

தொழில்முனைவோரில் 14% பெண்கள்.

இனி புதிய அறிவிப்புகள் என்னவென்று பார்க்கலாம்.

. பண வரையறை

முதலீட்டுத் தொகை ரூ.1 கோடியாகவும், வருட விற்பனைத் தொகை (Turnover) ரூ.5 கோடிக்கும் உட்பட்ட நிறுவனம், மிகச்சிறிய நிறுவனம் (Micro Enterprise) ஆகும்.

. ரூ.10 கோடி ரூபாய் வரை மூலதனமும், ரூ.50 கோடி வரை விற்பனைத் தொகையும் உள்ளவை சிறிய நிறுவனம் (Small enterprise) ஆகும்.

ரூ.50 கோடி முதலீட்டுடன் வருட விற்பனை ரூ.250 கோடிக்கு உட்பட்டிருந்தால், அவை நடுத்தர (Medium) நிறுவனம் ஆகும்.

முன்னதாக, உற்பத்தித் துறைக்கும், சேவைத் துறைக்கும் மூலதனத்திலும், வருடாந்தர விற்பனைத் தொகையிலும் வேறுபாடு இருந்தது. தற்போது, இரண்டுக்கும் ஒரே மாதிரியான பண வரம்புதான் இருக்கிறது.

ஒருவர் ஒன்றுக்கும் மேற்பட்ட உற்பத்தி அல்லது சேவைத்துறை நிறுவனத்தை நடத்தி வந்தாலும், அவை அனைத்தின் ஒட்டுமொத்த முதலீடு மற்றும் வருடாந்தர விற்பனைத் தொகையின் அடிப்படையிலேயே அவரது நிறுவனம் மிகச்சிறிய நிறுவனமா, சிறிய நிறுவனமா அல்லது நடுத்தர நிறுவனமா என்பது நிர்ணயிக்கப்படும். பணவரம்பு உயரும்போது மிகச்சிறிய நிறுவனம், சிறிய நிறுவனமாகவும், சிறிய நிறுவனம் நடுத்தர நிறுவனமாகவும் தரம் உயர்த்தப்படும்.

. எம்.எஸ்.எம்.இ நிறுவனத்தைப் பதிவு செய்வது எப்படி?

மிகச்சிறிய, சிறிய மற்றும் நடுத்தரமான நிறுவனத்தைத் தொடங்க நினைப்பவர்கள் உதயம் பதிவு (Udayam Registration Portal) வாயிலாகப் பதிவு செய்துகொள்ளலாம். பதிவு செய்யப்படும் நிறுவனம் உற்பத்தி சார்ந்ததாகவோ, சேவை (Service) சார்ந்ததாகவோ இருக்கலாம். பதிவுக் கட்டணம் கிடையாது. இடைத்தரகர்கள் யாரும் தேவையில்லை. கீழ்க்கண்ட தகவல்களைப் பதிவேற்றம் செய்தால் போதும்.

. நிறுவன உரிமையாளரின் பெயர், ஒன்றுக்கு மேற்பட்டோர் பங்குதாரர் எனில், நிர்வாகப் பங்குதாரர் (Managing partner) பெயர், கைபேசி எண், மின்னஞ்சல் முகவரி, ஆதார் எண், சமூகப் பிரிவு, பாலினம், மாற்றுத் திறனாளி விவரம், நிறுவனப் பெயர், தொடங்கும் தேதி, பான் எண், எந்திரத் தளவாடங்களுக்கான முதலீட்டுத் தொகை, ஊழியர் எண்ணிக்கை, நிறுவனம் இயக்கப்போகும் இடத்தின் முகவரி, நிறுவனத்தின் அலுவலக முகவரி, வங்கிக் கணக்கு விவரம் ஆகியவற்றைப் பதிவேற்றி, சுய பிரகடனம் (Self declaration) செய்தால் போதும். சான்றுகள் தேவையில்லை.

பல்வேறு உற்பத்தி அல்லது சேவை இருக்கலாம். உற்பத்தி மற்றும் சேவைத்துறை இணைந்தும் இருக்கலாம். என்றாலும், ஒரே ஒரு பதிவு போதும். இவ்வாறு பதிவு செய்தால், பதிவு எண் மற்றும் பதிவுக்கான மின் சான்று (E-certificate) வழங்கப் பட்டுவிடும்.

. யார் உதவுவார்கள்?

உதயம் பதிவு எண் பெறுதல் உள்ளிட்ட பல்வேறு சேவைகளுக்கு உதவிக்கரம் நீட்ட, எம்.எஸ்.எம்.இ அமைச்சகத்தின் பல்வேறு அலுவலகங்கள் செயல் படுகின்றன. இவை மட்டுமன்றி, தமிழகத்தில் மாவட்டத் தொழில் மையங்களும் ஒற்றைச் சாளர முறையில் உதவும்.

. பயன்களும் சலுகைகளும்

எம்.எஸ்.எம்.இ பதிவுபெற்ற குறு, சிறு நிறுவனங்கள் இணை பிணை (COLLATERAL SECURITY) இல்லாமலே வங்கிக் கடன் பெறலாம்.இதர நிறுவனங்களைவிட, எம்.எஸ்.எம்.இ பதிவு நிறுவனங்களுக்கு வங்கிக் கடனில் 1% வட்டிக் குறைப்பு

நிறுவனத்தின் தொடக்க ஆண்டுகளில் நேரடி வரியிலிருந்து விலக்கு அளிக்கப்படும். சில குறிப்பிட்ட இனங்களைச் சிறுதொழில் நிறுவனங்கள் மட்டுமே உற்பத்தி செய்வதற்கான ஒதுக்கீடு.

தொழில் மேம்பாட்டுக்கான மானியம், தொழில்நுட்ப மேம்பாட்டுக்கு மூலதனத்துடன் இணைக்கப்பட்ட கடன் திட்டத்தில் 15% மானியம் அளிக்கப்படும். தனி உரிமை (PATENTRICHT) பதிவு பெறுவதில் 50% மானியம்.

அரசு டெண்டர் பெறுவதில் முன்னுரிமை தரப்படுவதுடன், வர்த்தக நடவடிக்கைகளில் அனுமதி, உரிமம் பெறுதல் முதலானவற்றை எளிதாகப் பெறும் வசதி இந்த நிறுவனங்களுக்குத் தரப்படும். தவிர, டெண்டர் படிவத்தைக் கட்டணம் செலுத்தாமலே பெறலாம்.

இந்த வகை நிறுவனங்களுக்குப் பிணை (வைப்புத் தொகை) செலுத்துவதில் விலக்கு அளிக்கப்பட்டிருக்கிறது. மேலும், குறிப்பிட்ட பணவரம்பு வரை காப்புத்தொகை செலுத்த வேண்டியதில்லை.

மின் கட்டணச் சலுகை உண்டு என்பதுடன், நிறுவனத்தின் தொடக்க ஆண்டுகளில் கலால் வரி கிடையாது. வருட கொள்முதலில் 20% அளவுக்கு சிறு தொழில் நிறுவனங்களிடமே வாங்க வேண்டும் என மத்திய அரசு அமைச்சகம், அரசுத்துறை மற்றும் பொதுத்துறை நிறுவனங்களுக்கு உத்தரவு.

இந்த நிறுவனங்களுக்கென அவ்வப்போது, சில சிறப்புச் சலுகைகளும் அளிக்கப்படும். உதாரணமாக, சுயசார்பு இந்தியா திட்டத்தின் கீழ் சிறு தொழில் நிறுவனங்களுக்கு ரூ.3 லட்சம் கோடி வரை தற்போது கடன் வசதி அறிவிக்கப்பட்டுள்து. எம்.எஸ்.எம்.இ நிறுவனங்களைத் தொடங்கி நடத்துவதில் இத்தனை நல்ல அம்சங்கள் இருக்குபோது, இன்னும் என்ன யோசனை..? உடனே தொழிலைத் தொடங்கலாமே!

தொழில்முனைவோராக தூண்டும் புதிய சலுகைகள்! - உருவாகும் வாய்ப்புகள்..!

முகைதீன் சேக் தாவூது . ப