Published:Updated:

சிக்கலில் எஸ்.ஆர்.இ.ஐ நிறுவனம்...என்னதான் நடக்கிறது..?

சிக்கல்

பிரீமியம் ஸ்டோரி

மிக அரிதாக எடுக்கும் நடவடிக் கையை சில நாள்களுக்கு முன் ரிசர்வ் வங்கி எடுத்தது. எஸ்.ஆர்.இ.ஐ (SREI ) நிறுவனத்தின் இயக்குநர் குழுவை ரிசர்வ் வங்கி கலைக்க உத்தரவிட்டதுடன், அந்த நிறுவனத்தை நடத்த மூவர் குழுவையும் பரிந்துரை செய்தது.

வி.விஜயகுமார் 
நிறுவனர், 
Zebuetrade.com
வி.விஜயகுமார் நிறுவனர், Zebuetrade.com

ஐ.எல்.எஃப்.எஸ் அடுத்து டி.ஹெச்.எஃப்.எல், தற்போது எஸ்.ஆர்.இ.ஐ என வங்கி அல்லாத நிதி நிறுவனங்கள் அடுத்தடுத்து சிக்கலில் மாட்டி வருகின்றன. இந்த நிறுவனம் கடந்த சில மாதங்களாகவே தவணை செலுத்துவதில் சிக்கல் இருந்ததாகத் தகவல்கள் வெளியாகின. கேர் ரேட்டிங் நிறுவனம் கடந்த மார்ச் மாதம் தர மதிப்பீட்டைக் குறைத்தது.

வங்கிகளுக்குச் சுமார் ரூ.28,000 கோடியும், இந்த நிறுவனத்தின் கடன் பத்திரங்களில் முதலீடு செய்தவர் களுக்கு ரூ.18,000 கோடியும், திரும்பத் தர முடியாத சிக்கலில் எஸ்.ஆர்.இ.ஐ நிறுவனம் இப்போது இருக்க, திவால் சட்ட நடைமுறைகளும் தொடங்க, ஆர்.பி.ஐ நடவடிக்கை எடுத்துள்ளது.

தொடர் நஷ்டம், நிறுவனத்தின் நெட்வொர்த் பெருமளவு சரிந்திருப்பது உள்ளிட்ட சூழலில் தவணை செலுத்த சிரமப்படும் நிறுவனம், ரிசர்வ் வங்கியின் இந்த நடவடிக்கையை அதிர்ச்சி அளிப்பதாகத் தெரிவித்திருக்கிறது. பலரும், இது ரிசர்வ் வங்கியின் அதிரடி நடவடிக்கையாகக் கருதினாலும், தற்போதைய சூழலில் இதை அப்படிக் கருத முடியாது. நிறுவனத்தின் நலன் மட்டுமல்லாமல் கடன் கொடுத்த வங்கிகள் மற்றும் கடன் பத்திரங்களில் முதலீடு செய்தவர்கள் என அனைத்து தரப்பினரையும் மனதில் கொண்டே ரிசர்வ் வங்கி நடவடிக்கை எடுத்திருக்கிறது.

சிக்கலில் எஸ்.ஆர்.இ.ஐ நிறுவனம்...என்னதான் நடக்கிறது..?

இந்த நிறுவனத்துக்குக் கடன் கொடுத்த வங்கிகள் மற்றும் முதலீட்டாளர்கள் கணிசமான தொகையை எப்படியும் இழக்க வேண்டியிருக்கும். அது எவ்வளவு தொகை இருக்கும், அந்தத் தொகை வங்கிகளுக்கும் முதலீட்டாளர்களுக்கும் எப்போது திரும்பக் கிடைக்கும் என்பது எவ்வளவு விரைவாக நடவடிக்கை எடுக்கிறோம் என்பதைப் பொறுத்தே இருக்கும்.

மேலும், வாராக்கடன் அதிகமாக இருக்கிறது; தவணையைச் செலுத்தவில்லை என்பதை மட்டுமே வைத்து ரிசர்வ் வங்கி இந்த நடவடிக்கையை எடுக்க வில்லை. ஐ.எல்.எஃப்.எஸ் சிக்கலுக்குப் பிறகு, வங்கிகள் மற்றும் வங்கி அல்லாத நிதி நிறுவனங்களில் ஆர்.பி.ஐ கூடுதல் கவனம் செலுத்தியது. கடந்த ஆண்டு நவம்பரிலேயே எஸ்.ஆர்.இ.ஐ குழும நிறுவனங்களில் சிறப்புத் தணிக்கைக்கு ரிசர்வ் வங்கி உத்தரவிட்டது. அதன் பிறகு, தற்போதுதான் இயக்குநர் குழுவைக் கலைக்கும் உத்தரவைப் பிறப்பித்திருக்கிறது. அதனால், இதை அதிரடி நடவடிக்கை என்று சொல்வதைவிட, உரிய அவகாசம் தந்து எடுக்கப்பட்ட, தேவையான நடவடிக்கை எனலாம்.

டி.ஹெச்.எஃப்.எல் மீது 2019-ம் ஆண்டு நடவடிக்கை தொடங்கப்பட்டது. ஆனால், சில மாதங்களுக்கு முன்புதான் பிரமல் குழுமத்துடன் டி.ஹெச்.எஃப்.எல் இணைக்கப்பட்டது. அதனால் விரைவாக நடவடிக்கைத் தொடங்கப்பட்டால்தான் அடுத்த ஆண்டிலாவது முதலீட்டாளர்களுக்கும் / வங்கி களுக்கும் திரும்பக் கிடைக்க வேண்டிய பணம் கிடைக்கும்.

பங்குச் சந்தை மற்றும் கடன் சந்தையில் பணம் சேர்க்க சிக்கலான விதிமுறைகள் எதுவும் இல்லை. எல்லாமே எளிமையான விதிமுறைகளே. ஆனால், குறுகிய காலத்தில் அதிக லாபத்துக்கு ஆசைப்பட்டால் முதலீட்டை இழக்க வேண்டியிருக்கும் என்பதற்கு இது மாதிரியான நிறுவனங்கள் நல்ல உதாரணம்.

கடன் சந்தையில் அதிக வருமானத்துக்கு ஆசைப்பட்டு ரிஸ்க் எடுக்கக் கூடாது. தர மதிப்பீட்டு நிறுவனங்கள் அந்த நொடி வரையிலான தர மதிப்பீட்டை மட்டுமே வழங்கும். புதிதாக சிக்கல் உருவானால், தரமதிப்பீட்டைக் குறைக்கவோ, ‘ஜங்க்’ என்னும் நிலைக்குக் கொண்டு செல்லவோ தயங்காது. எனவே, கடன் சந்தை முதலீடு ரிஸ்க் இல்லாதது எனக் கண்ணை மூடிக்கொண்டிருக்கக் கூடாது. அதில் செய்துள்ள முதலீட்டைத் தொடர்ந்து கண்காணிப்பது அவசியத்திலும் அவசியம்!

ஜீ - இன்வெஸ்கோ: முதலீட்டாளர்கள் புரிந்துகொள்ள வேண்டியது என்ன?

கோவிட் சிக்கலில் மாட்டிக்கொண்ட மற்றொரு குழுமம், ஜீ. சில வாரங்களுக்கு முன்பு சோனி நிறுவனத்துடன் இணைந்தது. ஜீ டி.வி-யில் அமெரிக்க முதலீட்டு நிறுவனமான இன்வெஸ்கோ வசம் 18% பங்குகள் உள்ளன. இந்த இணைப்புக்குப் பிறகு, சுபாஷ் சந்திராவுக்குப் போட்டி யிடாமல் இருப்பதற்காக 2% பங்குகள் வழங்கப்பட்டன. மொத்தமாக, நிறுவனர்களுக்கு 4% பங்குகள் தற்போது உள்ளன. அதிகபட்சம் 20% வரை உயர்த்திக்கொள்ள முடியும்.

ஆனால், இந்த இணைப்பு ஜீ குழும நிறுவனர்களுக்குக் கூடுதல் சாதகமாக இருக்கிறது. மற்ற பங்குதாரர்களுக்கு இழப்பு ஏற்படுகிறது. அதனால் தலைமைச் செயல் அதிகாரி புனித் கோயங்காவை நீக்க வேண்டும் என இன்வெஸ்கோ சட்டரீதியிலான நடவடிக்கை எடுத்திருக்கிறது.

ஆனால், முதலீட்டாளர்கள் தெரிந்துகொள்ள வேண்டியது, இதில் இருக்கும் கார்ப்பரேட் கவர்னன்ஸ் பிரச்னை. இந்தியாவில் முக்கியமான, முதலில் தொடங்கப்பட்ட நிறுவனம் இது. நிறுவனத்தைக் காப்பாற்றுவதற்காக நிறுவனர்கள் தங்களது பங்குகளை வெகுவாகக் குறைத்துக் கொண்டு நிறுவனத்தைக் காப்பாற்றியிருக்கிறார்கள். இல்லையெனில், தோல்வி அடைந்த நிறுவனங்களின் பட்டியலில் இதுவும் இருந்திருக்கும். இந்தக் கோணத்தில் பார்த்தால், இந்தப் பங்கில் முதலீடு செய்யலாம் என்பதுபோல் தோன்றும்.

ஆனால், நிறுவனத்தின் வளர்ச்சிக்காகப் பங்குகளை விற்பது வேறு, நிறுவனத்தில் ஏற்பட்ட சிக்கலைத் தீர்ப்பதற்காகப் பங்குகளை விற்பது வேறு. எனவே, இந்தப் பங்கில் முதலீடு செய்யாமலே இருக்கலாம் என்பதுபோல் தெரியும்.

ஒரு முதலீட்டாளர் நம்பிக்கையின் அடிப்படையில்தான் முதலீட்டைத் தொடங்குகிறார். மற்றொரு முதலீட்டாளர் அவருடைய தேவையைப் (போர்ட்ஃபோலியோ மாற்றி அமைத்தால், போதுமான வருமானம் கிடைத்தால், இனியும் முதலீட்டைத் தொடர வேண்டாம் என நினைத்தல்) பொறுத்து ஒரு பங்கிலிருந்து வெளியேறுகிறார். இந்த நிலையில், இனி நீங்கள் என்ன செய்யப்போகிறீர்கள் என்பதுதான் முக்கியமான விஷயம்!

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு