Published:Updated:

கொரோனா ஏற்படுத்திய மாற்றங்கள்! - பிசினஸ்... நிதி... முதலீடுகளில்..!

கொரோனா 
ஏற்படுத்திய 
மாற்றங்கள்
பிரீமியம் ஸ்டோரி
கொரோனா ஏற்படுத்திய மாற்றங்கள்

பொருளாதாரம் சரியாகும்வரை நிறுவனங்கள் பணத்தைப் பாதுகாப்பாக சேர்த்து வைக்கவே விரும்பும்.

கொரோனா ஏற்படுத்திய மாற்றங்கள்! - பிசினஸ்... நிதி... முதலீடுகளில்..!

பொருளாதாரம் சரியாகும்வரை நிறுவனங்கள் பணத்தைப் பாதுகாப்பாக சேர்த்து வைக்கவே விரும்பும்.

Published:Updated:
கொரோனா 
ஏற்படுத்திய 
மாற்றங்கள்
பிரீமியம் ஸ்டோரி
கொரோனா ஏற்படுத்திய மாற்றங்கள்
டிசம்பர் 2019-ல் சீனாவில் உருவான கொரோனா வைரஸ், இன்றைய தினத்தில் உலகம் முழுவதும் பரவி, பொருளாதாரத்தையும் மக்களையும் உருக்குலைய வைத்திருக்கிறது.

இந்த வைரஸ் கடந்த 100 ஆண்டுகளில் யாரும் கண்டிராத அளவுக்கு உலக அளவில் தாக்கத்தையும் பாதிப்பையும் ஏற்படுத்தியிருக்கிறது. இயற்கைச் சீற்றங்கள் நிகழும்போது சில நாடுகள் பாதிக்கப்படும். போர் நடக்கும்போதுகூட எல்லா நாடுகளும் பாதிக்கப்படாது. ஆனால், இப்போது கொரோனாநோய்த் தொற்றின் காரணமாக சிறுவர் முதல் பெரியவர் வரை, ஏழை முதல் பணக்காரர் வரை, சாதாரண மனிதன் முதல் அதிகாரத்தில் இருப்பவர் வரை அனைவரும் பாதிக்கப்பட்டிருக்கிறார்கள்.

கொரோனா ஏற்படுத்திய மாற்றங்கள்! - பிசினஸ்... நிதி... முதலீடுகளில்..!

ஒட்டுமொத்த விகடனுக்கும் ஒரே ஷார்ட்கட்!

உலக அளவில் குறிப்பிடத்தகுந்த மரணங்களை ஏற்படுத்தியிருக்கும் கொரோனா, எல்லோருக்குமே மனதளவில் பெரிய பாதிப்புகளையும் ஏற்படுத்தியிருக்கிறது. இதனால் மக்களின் அன்றாட வாழ்க்கை முறை பெரிய அளவில் மாற ஆரம்பித்துள்ளது. `வாழ்க்கை என்றால் என்ன?’ என்று பலரைச் சிந்திக்கவைத்துள்ளது. பணம், பதவி என ஓடிக்கொண்டிருந்தவர்களுக்கு ஓர் அதிர்ச்சி வைத்தியம் தந்திருக்கிறது. மாறிவரும் இந்த மனநிலை பொருளாதாரத்திலும், தனிநபர் வாழ்க்கையிலும் எப்படி மாற்றங்களை ஏற்படுத்திவருகிறது, பிசினஸ், நிதி மற்றும் முதலீடு தொடர்பான விஷயங்களில் என்னென்ன மாற்றங்கள் நிகழ்ந்து வருகின்றன, எதிர்காலத்தில் வாழ்க்கையின் போக்கு எப்படியிருக்கும் என்று பார்ப்போம்.

1. வீட்டிலிருந்தே வேலை (WFH – Work From Home): முன்பெல்லாம் இந்தியாவில் சில முக்கியமான வேலை செய்பவர்களுக்கும் அல்லது ஹெல்த்ரீதியான தேவையுள்ள ஒரு சில ஊழியர்களுக்கும் மட்டும் பிரத்யேகமாக வீட்டிலிருந்து வேலை செய்ய அனுமதி தரப்பட்டது. ஆனால், கொரோனாவுக்குப் பிறகு எந்தெந்த வேலையையெல்லாம் வீட்டிலிருந்து செய்ய முடியுமோ, அந்தந்த வேலைகளைச் செய்பவர்களையெல்லாம் வீட்டிலிருந்தே வேலை செய்யச் சொல்லி நிறுவனங்களே கட்டாயப்படுத்தின. வீட்டுக்கு கம்ப்யூட்டரைக் கொடுத்தனுப்பின. சில நிறுவனங்களோ கம்ப்யூட்டர் டேபிள், சேர் மற்றும் இன்டர்நெட் ரூட்டர் முதற்கொண்டு வாங்கிக் கொடுத்தன. பல ஐ.டி நிறுவனங்கள், ஊழியர்கள் வீட்டிலிருந்து வேலை செய்வதைத் தங்களது பிசினஸ் பிளானிங்கிலேயே கொண்டுவந்துவிட்டன. அலுவலக இடம் மிச்சமாவதுடன், மின்சாரம், உணவுச் செலவு எனப் பல செலவுகள் நிறுவனங்களுக்கு மிச்சமாகின்றன. டி.சி.எஸ்., ஹெச்.டி.எஃப்.சி போன்ற நிறுவனங்கள் வரும் நாள்களில் தங்களது ஊழியர்களில் ஒரு கணிசமான சதவிகிதத்தினர் வீட்டிலிருந்தே வேலை செய்வார்கள் எனக் கூறியுள்ளன. இதுபோல் பல நிறுவனங்கள் வீட்டிலிருந்தபடியே ஊழியர்களை வேலை செய்ய ஊக்குவிக்கும் என்பதில் சந்தேகமில்லை. இந்த டிரெண்ட் வரும் காலங்களில் அதிகரிக்கத்தான் வாய்ப்பிருக்கிறது.

விகடனின் அதிரடி ஆஃபர்!
தற்பொழுது ரூ.800 சேமியுங்கள்! ரூ.1749 மதிப்புள்ள 1 வருட டிஜிட்டல் சந்தா949 மட்டுமே! மிஸ் பண்ணிடாதீங்க!Get Offer

2.யூ.பி.எஸ்/ இன்டர்நெட்/ டெலிபோன் சேல்ஸ் அதிகரிக்கும்: வீட்டிலிருந்தே மக்கள் பலரும் வேலை செய்வதால், 24 மணி நேரமும் தங்களது கம்ப்யூட்டர்கள் மற்றும் ரூட்டர்கள் வேலை செய்வதற்குப் பலரும் யூ.பி.எஸ் வாங்குவார்கள். அதுபோல் பர்சனல் போன் ஒன்று, அலுவலக உபயோகத்துக்கு மற்றொன்று என போன் விற்பனை அதிகரிக்கும். இன்டர்நெட் இணைப்பு, ஆபீஸ் ஃபர்னிச்சர் எனப் புது செக்மெண்டுகளின் சேல்ஸ் உயரும்.

கொரோனா வைரஸ்
கொரோனா வைரஸ்

3. கார் மற்றும் இரு சக்கர வாகனங்கள் சேல்ஸ் அதிகரிப்பு: கொரோனாவுக்கு தடுப்பு ஊசி கண்டுபிடிக்கும்வரை பஸ், ரயில், விமானம் போன்றவற்றில் மக்கள் அவசியமிருந்தால் மட்டுமே பயணிப்பார்கள். முடிந்தவரை தங்கள் சொந்த வாகனங்களிலேயே பயணிக்க ஆசைப்படுவார்கள். இரண்டாம் / மூன்றாம் கட்ட நகரங்களில், உபயோகிக்கப்பட்ட இருசக்கர வாகனங்கள் விற்பனை அதிகரிப்பதாக இப்போதே தகவல்கள் வருகின்றன. இந்தப் போக்கு கொரோனாவுக்குப் பிறகும் தொடர வாய்ப்புகள் நிறையவே உள்ளன. ஏனென்றால், கூட்டம் கூடுகிறது என்றாலே பலர் மனதில், `நோய் தொற்றுமோ...’ என்ற பீதி நிரந்தரமாக உருவாகிவிட்டது.

4. பொது நிகழ்வுகள்/ ஆடம்பரத் திருமண வைபவங்கள் குறையும்: நமது பெருமையைப் பறைசாற்றிக்கொள்ள திருமண வைபவங்கள் ஒரு பெரிய வாய்ப்பாக இதுவரை இருந்தன. கொரோனா காலத்தில் 20 நபர்களை வைத்தே திருமணம் நடத்திப் பலர் பழகிவிட்டனர். இன்னும் சிலர் ஆன்லைனில் அனைவரும் பார்க்கும்படி விர்ச்சுவல் திருமணங்களை நடத்தினர். இது, பல குடும்பங்களுக்குச் செலவைக் குறைத்திருக்கிறது. பல மாதங்கள் பழகிவிட்ட மக்கள், இனிவரும் காலங்களிலும் ஆடம்பரமான திருமண நிகழ்வுகளையும் / சுப நிகழ்ச்சிகளையும் குறைத்துக்கொள்வார்கள். ஏனென்றால், திருமண நிகழ்வின் மூலம் தொற்று ஏற்பட்டால் அதை நடத்தியவர் மீது பழி விழும். இதற்கு பயந்தே பலரும் எளிமையான திருமணங்களை மேற்கொள்வார்கள். இது கலாசார மாறுதலுக்கு வழிவகுக்கும்.

5. விர்ச்சுவல் மீட்டிங்: ஜூம் (Zoom), கூகுள் மீட் போன்ற பல ஆப்ஸ் இந்த கொரோனா காலத்தில்தான் சாதாரண மக்களிடம் பிரபலமாகின. இனிவரும் காலங்களில் நேரடியாக யாரும் யாரையும் சந்திக்கச் செல்வது குறைந்துவிடும். இதுவரை ஒருவரையொருவர் சந்திப்பதற்குப் பெரு நகரங்களில் டிராஃபிக்கில் மாட்டி, சரியான நேரத்துக்குச் செல்வது மிகவும் சிரமமாக இருந்தது. மேலும் நேரம் விரயமானது. இனிமேல் மிக முக்கியமான சந்திப்புகளைத் தவிர விர்ச்சுவல் மீட்டிங் என்பதற்கு அனைவரும் கடந்த சில மாதங்களாகப் பழகிவிட்டனர். ஆகவே, இந்தப் போக்கும் இனிவரும் காலத்தில் அதிகரிக்கவே செய்யும். வாடிக்கையாளர் சந்திப்பிலிருந்து அனைத்துச் சந்திப்புகளையும் இனி இருந்த இடத்திலிருந்து செய்யத்தான் அனைவரும் ஆசைப்படுவர். டாக்டரிடம் ஆலோசனை பெறுவதுகூட விர்ச்சுவல் மீட்டிங் மூலமே இப்போது நடக்கிறது. இதனால் அலைச்சல் மிச்சமாவதுடன் உற்பத்தித்திறன் அதிகரித்து, செலவுகள் குறையும். சிறு நிறுவனங்கள் பெரிய நிறுவனங்களுக்கு ஈடாகப் போட்டி போட முடியும். அதே நேரத்தில், விர்ச்சுவல் மீட்டிங் நடத்தித்தரும் நிறுவனங்களுக்கு நல்ல பிசினஸ் கிடைக்கும். விர்ச்சுவல் மீட்டிங்கைத் தவிர்த்தால், இனி எல்லோரும் திண்டாட வேண்டியிருக்கும்.

6. போக்குவரத்து நெருக்கடி குறையும்: வீட்டிலிருந்து வேலை, விர்ச்சுவல் மீட்டிங் என டிரெண்டுகள் சூடுபிடிக்கும்போது, பெரு நகரங்களில் போக்குவரத்து நெரிசல் குறைய நல்ல வாய்ப்பிருக்கிறது. இதனால், பொதுப் போக்குவரத்து நெருக்கடி இல்லாமல் இருக்கும். ஆனால், சிலர் மட்டுமே இந்தப் போக்குவரத்தைப் பயன்படுத்துவதால், டிக்கெட் விலை அதிகரிக்க வாய்ப்புள்ளது.

கொரோனா வைரஸ்
கொரோனா வைரஸ்

7. வீடுகளில் ஆபீஸ் ரூம் என்பது கட்டாயம்: இதுவரை பெரிய வீடுகளில் ஆபீஸ் ரூம் ஒன்றை வைத்துக் கட்டினார்கள். ஆனால், இனிவரும் காலங்களில் அபார்ட்மென்ட் வீடுகளிலிருந்து தனிவீடு வரை ஆபீஸ் ரூம் என்பது கட்டாயமாகிவிடும். பிளானிங் லெவலிலேயே இதைக் கட்டாயமாக்கிவிடுவார்கள். வொயிட் காலர் ஊழியர்களுக்கும், புரொஃபஷனல்ஸ் மற்றும் சிறுதொழில் செய்பவர்களுக்கும், வீட்டில் ஆபீஸ் ரூம் என்பது கட்டாயமாகிவிடும். இதனால், வீட்டின் சராசரி பரப்பளவு கூடும். வீடு கட்டுவதற்கான செலவும் அதிகரிக்கும்.

8.ஹெல்த் இன்ஷூரன்ஸ்: ஹெல்த் இன்ஷூரன்ஸின் முக்கியத்துவத்தைப் பலருக்கும் இந்த கொரோனாநோய்த் தொற்று புரியவைத்திருக்கிறது. ஏற்கெனவே ஹெல்த் இன்ஷூரன்ஸ் எடுத்திருக்கும் பலரும் இப்போது தங்களுக்குப் போதுமான கவரேஜ் இருக்கிறதா என்று பரிசீலனை செய்து, அதிகப்படுத்திக்கொள்கிறார்கள். சிறு தொழில் நடத்தும் பலரும் தங்களது ஊழியர்களுக்கு ஹெல்த் இன்ஷூரன்ஸ் எடுத்துக் கொடுக்க முன்வருகிறார்கள். இதுவரை ஹெல்த் இன்ஷூரன்ஸ் பற்றி நினைத்திராத பலர் இப்போது அதன் முக்கியத்துவத்தை உணர்ந்து எடுக்க முன்வருகிறார்கள். கொரோனாநோய்த் தொற்றுக்கும் மருத்துவக் காப்பீடு மூலம் இழப்பீடு கிடைக்கும். இது போன்ற திடீர் நோய்கள் உருவாகும்போது, ஹெல்த் இன்ஷூரன்ஸ் இருப்பது ஒரு பெரிய மன தைரியத்தைக் கொடுக்கும். இதுவரை ஹெல்த் இன்ஷூரன்ஸை எடுக்காதவர்கள் இனி உடனே எடுப்பது அவசியம்.

9.லைஃப் இன்ஷூரன்ஸ்: டேர்ம் இன்ஷூரன்ஸ் என்பது சம்பாதிக்கும் ஒவ்வொருவருக்கும் அவசியம். மனித உயிரை நம் கண்ணுக்குத் தெரியாத ஒரு நுண்ணுயிர் மூலம் எவ்வளவு எளிதாக இழக்க முடியும் என்பதை கொரோனா அனைவருக்கும் உணர்த்திவிட்டது. அவ்வாறு உயிரிழப்பு நிகழும்போது, நம்மைச் சார்ந்தவர்களின் நிலை என்னவாகும் என்பதைச் சற்று யோசித்துப் பார்த்து, அனைவரும் டேர்ம் இன்ஷூரன்ஸை இனியாவது எடுப்பது இனி கட்டாயமாகும்.

10.பெரிய நகரங்களின் மவுசு குறையும்: பெரிய நகரங்களின் மவுசு பலதரப்பட்ட மக்களிடமும் ஏற்கெனவே குறைந்துவிட்டது. சமீபத்தில் வந்த ஒரு வாட்ஸ்அப் செய்தி இது - “ஒரு காலத்தில், ‘சென்னைக்குப் போ... எப்படியும் பிழைத்துக்கொள்ளலாம்’ என்பார்கள். ஆனால் இப்போது, ‘சென்னையை விட்டுப் போ, எப்படியும் பிழைத்துக் கொள்வாய்’ என்கிறார்கள்.”

வீட்டிலிருந்தே வேலை
வீட்டிலிருந்தே வேலை

பெரிய நகரங்களில் நல்ல வருவாய் இருந்தாலும், விலைவாசி ஏற்றம், நெருக்கடி, குடும்பத்தினருடன் தரமாக நேரத்தைச் செலவு செய்ய நேரம் இல்லாதிருப்பது, சிறிய வீடுகள் எனப் பல பிரச்னைகள் இருக்கின்றன. இந்த கொரோனாவுக்குப் பிறகு, `வாழ்க்கை என்றால் என்ன...’ என்று பலரை சிந்திக்க வைத்துள்ளது. ஆகவே, பெரிய நகரங்களின் மவுசு மக்களிடையே குறைய ஆரம்பித்திருக்கிறது.

இது ஒரு நல்ல மாற்றம்தான். இதை ஊக்குவிக்க நமது அரசாங்கங்கள் முனைப்பாகச் செயல்பட்டு, இரண்டாம் மற்றும் மூன்றாம் கட்ட நகரங்களில் தொழிற்சாலைகளையும், ஐ.டி நிறுவனங்களையும் பெரிய அளவில் உருவாக்க வேண்டும். அரசாங்கம் முனைப்பாகச் செயல்படவில்லையென்றால், சில ஆண்டுகள் கழித்துத் திரும்பவும் பெரிய நகரங்களை நோக்கிப் பலரும் பயணிக்கும் அவல நிலைதான் ஏற்படும்.

11. சுற்றுப்புறச் சூழல்: கொரோனா வுக்குப்பிறகு சுற்றுப்புறச் சூழல் மேம்பட் டிருப்பது மறுக்க முடியாத உண்மை. போக்கு வரத்து முற்றிலுமாக பல இடங்களில் நிறுத்தப்பட்டது. விமானங்கள் பறக்கவில்லை. சுற்றுலாப் பயணிகள் முற்றிலுமாக நின்றுவிட்டனர். விபத்துகள் வெகுவாகக் குறைந்ததுடன், விபத்தால் ஏற்படும் இறப்புகளும் குறைந்துள்ளன. மாசு குறைந்துள்ளது. இவையெல்லாம் பெரிய பொருளாதார இழப்புகளுடனும், பல்லாயிரக்கணக்கான வாழ்வாதார இழப்புகளுடனும் நிகழ்ந்துள்ளன. இந்தவித இழப்புகள் இல்லாமல், நாம் சுற்றுப்புறச் சூழலை மாசுபடாமல் வைத்துக்கொள்வதற்கு அரசாங்கம் உரிய கொள்கைகளைக் கொண்டுவர வேண்டும்.

12. வீட்டிலிருந்து வேலை செய்வதற்கு டாக்ஸ் தள்ளுபடி / வருடத்துக்கு 15 நாள்கள் வீட்டிலிருந்தே வேலை: மத்திய அரசாங்க ஊழியர்கள் வருடத்துக்கு 15 நாள்கள் தங்கள் விருப்பத்துக்கேற்ப வீட்டிலிருந்தே வேலை செய்ய பாலிசி தயாராகிக் கொண்டிருக்கிறது. இதுதவிர, பொதுவாகவே வீட்டிலிருந்தே வேலை செய்வதை ஊக்குவிக்க மத்திய அரசாங்கம் இனி வரும் பட்ஜெட்டுகளில், வரிச் சலுகை தர வாய்ப்பிருக்கிறது. வீட்டிலிருந்து வேலை செய்யும்போது ஏற்படும் செலவுகளை (தொலைபேசிச் சேவைகள், மின்சாரம், எழுதுபொருள்கள்) நிறுவனங்கள் ஏற்றுக்கொள்ள முன்வரும் என்று எதிர்பார்க்கலாம்.

13. கமர்ஷியல் ரியல் எஸ்டேட் அடி: வீட்டிலிருந்தே வேலை செய்யப் பலரும் ஆரம்பிக்கும்போது அலுவலகங்கள் நடத்த, குறைவான அளவிலேயே இடம் தேவைப்படும். பல நிறுவனங்கள் தங்களது அலுவலகங்களைச் சிறியதாக்கும். இதன் எதிரொலி, கமர்ஷியல் ரியல் எஸ்டேட்டில் இப்போதே தெளிவாகத் தெரிகிறது. தேவை என்பது ஏற்கெனவே வெகுவாகக் குறைந்துவிட்டது. பெரிய நிறுவனங்கள் பல, `அடுத்த ஒரு வருடத்துக்கு வீட்டிலிருந்தே வேலை’ என்பதை அறிவித்துவிட்டன. இந்தப் பழக்கம் இத்துடன் நிற்கப்போவதில்லை. டி.சி.எஸ் உட்பட பல நிறுவனங்களும் `வீட்டிலிருந்து வேலை’ என்பதைத் தங்கள் கார்ப்பரேட் பாலிசியில் கொண்டுவருகின்றன. ஆகவே, இனிவரும் நாள்களில் கமர்ஷியல் ரியல் எஸ்டேட்டுக்கு கஷ்ட காலம்தான். புதிதாக வீடு வாங்க நினைப்பவர்களுக்கு ஜாலிதான்!

இன்டர்நெட்/ டெலிபோன்
இன்டர்நெட்/ டெலிபோன்

14. குறைந்த வட்டியில் கடன்கள்: ஏற்கெனவே நமது பொருளாதாரம் கொஞ்சம் பிரச்னையில் இருந்தது. கொரோனா அதை அதளபாதாளத்துக்குக் கொண்டு சென்றுவிட்டது. கடன்களுக்குப் பெரிய அளவில் தேவை இல்லை. ஆனால், பொருள்களின் உற்பத்தியை அரசாங்கம் அதிகரித்துள்ளது. அதனால் வட்டி விகிதம் குறைந்துகொண்டே வருகிறது. அதிரடியாக எஸ்.பி.ஐ வங்கி வெறும் 7 சதவிகிதத்தில் தங்க நகைக் கடனை தங்களது ஹோம் லோன் வாடிக்கையாளர்களுக்கு அறிவித்துள்ளது. மற்றவர்களுக்கு 7.50% வருட வட்டி. குறுகியகாலக் கடனுக்கு இது மிகவும் கவர்ச்சிகரமான வட்டி விகிதம். எஸ்.பி.ஐ-யின் ஹோம் லோன் வட்டி விகிதம் 7.35 சதவிகிதத்திலிருந்து ஆரம்பிக்கிறது.

இதுபோல், வாகனக் கடன் மற்றும் பர்சனல் லோன் வட்டி விகிதங்களையும் வங்கிகள் குறைத்துள்ளன. கடன் வாங்குபவர்களுக்கு இது ஒரு சரியான வாய்ப்பு. வட்டி விகிதங்கள் இன்னும் சற்றுக் குறையும்போது, ஃப்ளோட்டிங் ரேட்டில் இருக்கும் கடனை ஃபிக்ஸட் ரேட்டாக மாற்றிக்கொள்ள வாடிக்கையாளர்கள் பரிசீலனை செய்யலாம்.

15. சிறு நகரங்களுக்கு மக்கள் குடியேற்றம்: இந்தப் பிரச்னையின்போது, பலர் தங்கள் சொந்தக் கிராமங்களுக்கும், நகரங்களுக்கும் பெரிய நகரங்களிலிருந்து செல்வதை நாம் அனைவரும் கண்கூடாகப் பார்த்துவருகிறோம். பெரு நகரங்களில் சமீபகாலங்களில் குடியேறி, தங்கள் சொந்த இடங்களுக்குத் திரும்பிச் சென்றவர்கள் திரும்பவும் பெரு நகரங்களுக்கு வர வேண்டுமா என்று யோசிக்கிறார்கள். ‘‘50% குறைவான வருமானம் கிடைத்தாலும் பரவாயில்லை, நான் சொந்த ஊரிலேயே இருந்துவிடுகிறேன்’’ என யோசிப்பவர்களும் உண்டு. ஆகவே, இனிவரும் காலங்களில் ‘ரிவர்ஸ் மைக்ரேஷன்’ (Reverse Migration) நடக்க வாய்ப்புள்ளது. கொரோனா போன்ற நிகழ்வுகள் எதிர்காலத்தில் மீண்டும் மீண்டும் வந்தால் என்ன செய்வது என்பது பலரையும் சிந்திக்க வைத்திருக்கிறது. ஏற்கெனவே பலரும் ஓய்வுக்காலத்தை சொந்த ஊரில்தான் கழிக்க வேண்டும் என ஆசைப்பட்டனர். கொரோனா அவர்களது ஆசையைத் துரிதப்படுத்தியுள்ளது. இந்த டிரெண்டால், கிராமங்களிலும் 2-ம்/ 3-ம்/ 4-ம் கட்ட நகரங்களிலும் வீடு கட்டுவது அதிகரிக்கும்.

16.நிறுவனங்கள் தங்கள் தலைமை அலுவலகத்தை டயர் 2 (Tier 2) நகரங்களுக்கு மாற்றுவது: இந்தியாவிலுள்ள மெஜாரிட்டி நிறுவனங்கள் தங்களது தலைமை அலுவலகத்தை மும்பை, டெல்லி, பெங்களூரு, சென்னை போன்ற பெரிய நகரங்களில்தான் வைத்துள்ளன. கொரோனாவுக்குப் பிறகு, பல நிறுவனங்கள் தங்கள் பிசினஸைத் தொடர்ந்து நடத்த பெரும் அவதிப்படுகின்றனர். இதன் விளைவாக, இரண்டாம்கட்ட நகரங்களில் அலுவலகம் ஒன்றைத் திறந்து, ஒரு பகுதி வேலைகளை அங்கு மாற்றிக்கொள்ளலாமா என சில நிறுவனங்கள் யோசித்துவருகின்றன. இன்றைய கம்யூனிகேஷன் உலகில், இது சாத்தியம்தான். இனிவரும் காலத்தில் இப்படிப் பலரும் யோசித்துச் செயல்பட வாய்ப்புள்ளது. இதை ஊக்குவிக்க மாநில அரசாங்கங்கள் தகுந்த நடவடிக்கை எடுக்க வேண்டும். தமிழ்நாடு, கோயம்புத்தூர், மதுரை, திருச்சி, சேலம் போன்ற நகரங்களுக்கு கார்ப்பரேட் நிறுவனங்கள் தங்களது அலுவலகங்களை மாற்ற வரிச் சலுகை போன்றவற்றை அறிவிக்க வேண்டும். இதற்காக உயர்மட்டக்குழு ஒன்றை உருவாக்கினால் பயனுள்ளதாக அமையும்.

இன்ஷூரன்ஸ்
இன்ஷூரன்ஸ்

17. குறையும் டிவிடெண்ட்: கொரோனா முடிந்து, பொருளா தாரம் சரியாகும் வரை நிறுவனங்கள் பணத்தைப் பாதுகாப் பாக சேர்த்து வைக்கவே விரும்பும். மேலும், வங்கிகள், நிதி நிறுவனங்கள் போன்ற வற்றுக்கு வாராக்கடன் அதிகரிக்கும். பொதுவாக, லாபங்கள் அனைத்து நிறுவனங் களுக்கும் குறையும். ஆகவே, நிறுவனங்கள் முழுவதுமாக டிவிடெண்டை நிறுத்தாவிட்டாலும், கணிசமாகக் குறைக்க வாய்ப்புண்டு. டிவி டெண்டை நம்பியுள்ள முதலீட்டாளர்களுக்கு இதனால் சற்று ஏமாற்றமே ஏற்படும்!

18. அதிகரிக்கும் தங்க நகைக் கடன் திருப்புதல்: கொரோனா பிரச்னையால் ஊரடங்கு முடிந்தவுடன் தங்க நகை அடமான கடனுக்கு அதிக தேவை என்று எதிர்பார்க்கப்பட்டது. ஆனால், புதிதாக அடமான கடன் பெறுவதற்கு பதிலாக, ஏற்கெனவே வைத்த நகைகளைத் திரும்பப் பெறுவது அதிகரித்துள்ளது. இதற்கு இரண்டு காரணங்களைச் சொல்லலாம். ஒன்று, உயரும் தங்கம் விலை; மற்றொன்று, மக்கள் வீட்டிலேயே இருப்பதால் செலவுகள் வெகுவாகக் குறைந்துள்ளன. கொரோனாவுக்குப் பிறகு சிக்கனமான வாழ்க்கை தொடரும்பட்சத்தில், பணம் இன்னும் மிச்சமாகும் என்று எதிர்பார்க்கலாம்.

19.ஜி.எஸ்.டி அதிகரிப்பு: ஜி.எஸ்.டி-யை அதிகரிக்கச் சொல்லி, தங்களது நிதிப் பற்றாக்குறையைச் சரிசெய்ய மாநிலங்களிடமிருந்து கோரிக்கைகள் வர ஆரம்பித்துள்ளன. ஆகவே, சில வகைப் பொருள்களின் வரி இன்னும் கொஞ்சம் அதிகரித்தாலும் ஆச்சர்யம் இல்லை.

20. ஆன்லைன் சேவைகள்தான் அல்டிமேட்: ஏற்கெனவே மத்திய அரசாங்க சட்டதிட்டங்கள் மற்றும் ஊக்குவிப்பால் ஆன்லைன் சேவைகள் அதிகரித்திருந்தன. அந்த டிரெண்டை இந்தக் கொரோனா இன்னும் முடுக்கிவிட்டிருக்கிறது. பல சேவைத் தொழில்கள் ஆன்லைனுக்கு மாறிவிட்டன. இந்த டிரெண்டைத் தொழில் செய்பவர்கள் தங்களுக்குச் சாதகமாகப் பயன்படுத்திக்கொள்ளவில்லையென்றால், தொழிலில் முன்னேறுவது கடினம்! பல அரசாங்க சேவைகளும் ஆன்லைனுக்கு மாற்றப்பட்டுவிட்டன. இன்னும் ஆன்லைன் சேவையைப் பயன்படுத்தாதவர்கள், சீக்கிரம் உபயோகிக்கக் கற்றுக்கொள்ளாவிட்டால் சிரமப்பட நேரிடும் என்பதே உண்மை!

ஆன்லைன் சேவை
ஆன்லைன் சேவை

21. பெருங்கூட்டம் சேர்க்கும் பிசினஸ்களுக்கு சங்கடம்தான்: கண்காட்சிகள் நடத்துபவர்கள், வணிக விழாக்கள், கிரிக்கெட், அவார்டு தரும் விழாக்கள், சினிமா சார்ந்த கூட்டங்கள் போன்ற அனைத்து தொழில்களுக்குமான டிரெண்டு மாறிவிட்டது. குறுகியகாலத்தில் இந்தத் தொழில்கள் நடத்தவே முடியாது என்றாலும், நீண்டகால அடிப்படையிலும் இந்தத் தொழில்களுக்கு இறங்குமுகம்தான். இவை அனைத்தும் ஆன்லைனுக்கு மாறுகின்றன. இந்த டிரெண்ட் மாற்றத்தை அறிந்து மாறிக்கொள்பவர்கள் பிழைத்துக்கொள்வார்கள்.

22. டூரிஸத்துக்கு அடி: சுற்றுலாவை மட்டுமே நம்பியிருந்த பல நாடுகளுக்கு கொரோனா ஒரு பெரிய இடி. இந்தியாவில் சுற்றுலாப் பயணிகளை அதிகமாக ஈர்க்கும் மாநிலங்களில் தமிழ்நாடு முதல் சில இடங்களில் உள்ளது. ஆக, நமக்கும் சுற்றுலா மூலம் கிடைக்கும் வருமானம் இனி குறையவே செய்யும். அதைச் சார்ந்த தொழிலில் உள்ளவர்களுக்கு அடுத்த சில மாதங்களுக்கு கடினம்தான். இந்தத் தொழிலிலுள்ளவர்கள் தங்களது உத்திகளை மாற்றியமைத்துக்கொள்ள வேண்டியது அவசியமாகிறது.

நாம் எதிர்பார்த்திராத ஏதோ ஒன்று நம் அனைவரின் வாழ்க்கையையும் சில நேரங்களில் புரட்டிப் போட்டுவிடுகிறது. அதுபோலத்தான் இந்த கொரோனாவும். இந்த நோய் நாம் நினைக்காத பல டிரெண்டுகளை உருவாக்கியுள்ளது. இந்த டிரெண்டுகளைத் தங்களுக்குச் சாதகமாக்கிக்கொள்பவர்கள் உயர்வார்கள். நீங்களும் இந்த டிரெண்டைப் புரிந்துகொண்டு, அதற்கேற்ப உங்கள் வாழ்க்கையை அமைத்துக்கொள்ளுங்கள்!