Published:Updated:

வீட்டுக் கடன்...தகுதியை நிர்ணயிக்கும் 8 முக்கியமான காரணிகள்..!

வீட்டுக் கடன்
பிரீமியம் ஸ்டோரி
வீட்டுக் கடன்

கைகொடுக்கும் வீட்டுக் கடன்! - 2

வீட்டுக் கடன்...தகுதியை நிர்ணயிக்கும் 8 முக்கியமான காரணிகள்..!

கைகொடுக்கும் வீட்டுக் கடன்! - 2

Published:Updated:
வீட்டுக் கடன்
பிரீமியம் ஸ்டோரி
வீட்டுக் கடன்

கையில் பணம் இருக்கும்பட்சத்தில் நமது பட்ஜெட்டுக்கேற்ப, எந்த இடத்திலும் எந்த வீட்டையும் வாங்கிக்கொள்ள முடியும். ஆனால், வீட்டுக் கடன் மூலம் வீடு வாங்கும் போது, வீட்டை வாங்குபவருக்கு சில அடிப்படைத் தகுதிகள் இருக்க வேண்டும். முக்கியமாக, கீழ்க்காணும் எட்டு காரணிகள் தான் ஒருவருக்கு வீட்டுக் கடன் கிடைப்பதைத் தீர்மானிக்கின்றன. அந்தக் காரணிகள் பற்றி சற்று விரிவாகப் பார்ப்போம்.

எஸ்.கார்த்திகேயன், நிதி ஆலோசகர், 
https://winworthwealth.com/
எஸ்.கார்த்திகேயன், நிதி ஆலோசகர், https://winworthwealth.com/

1. வயது வரம்பு...

சில வங்கிகள் 18 வயதுக்கு மேற்பட்டவர் களுக்கு வீட்டுக் கடன் வழங்குகின்றன. சில வங்கிகள் 21 வயதுக்கு மேற்பட்டவர்களுக்கு மட்டும்தான் வீட்டுக் கடன் வழங்குகின்றன. சில தனியார் நிறுவனங்கள் 23 வயதுக்கு மேற்பட்டவர்களுக்குத்தான் வீட்டுக் கடன் வழங்குகின்றன.

இதேபோல், சில வங்கிகள் 60 வயதுக்குள் வீட்டுக் கடனை முழுவதுமாகத் திரும்பச் செலுத்திவிட வலியுறுத்துகின்றன. ஆனால், வீட்டுவசதி நிறுவனங்கள், நிதி நிறுவனங்கள் 62 வயது, 65 வயது, 70 வயது வரைக்கும்கூட வீட்டுக் கடனைத் திரும்பச் செலுத்துகிற மாதிரி கடன் வழங்குகின்றன.

பொதுவாக, தனிநபர் நிறுவனப் பணியாளர்களுக்கு 58 வயதுக் குள்ளும், அரசு ஊழியர்களுக்கு 60 வயதுக்குள்ளும், சுயதொழில் செய்பவர்களுக்கு 65 வயதுக்குள்ளும் வீட்டுக் கடனைத் திரும்பக் கட்டுவதுபோல் கடன்கள் வழங்கப்படுகின்றன. ஓய்வூதியம் பெரும் தகுதி உள்ளவர்களுக்கு 70 வயது வரும் வரையும் வீட்டுக் கடன் முடிவுறும் காலமாக ஏற்றுக்கொள்ளப்படும். மற்ற பொருளாதாரத் திட்டமிடல் சரியாக இருக்குமெனில், இந்த வாய்ப்பை முறையாகப் பயன்படுத்தலாம்.

பொதுவாக, இளம் வயது எனில், வீட்டுக் கடன் சுலபமாகக் கிடைத்துவிடும். பணி ஓய்வுக்கு நெருக்கமாக சுமார் 55 வயது என்கிற பட்சத்தில், வீட்டுக் கடன் கிடைப்பது கொஞ்சம் கஷ்டம்தான்.

2. வேலையின் நிலை...

பொதுவாக, வேலையில் சேர்ந்து மூன்று ஆண்டுகளுக்குப் பிறகு தான் வீட்டுக் கடன் வாங்க முடியும். சில வங்கிகள் தற்போதைய நிறுவனத்தில் குறைந்தபட்சம் இரண்டு ஆண்டுகளாகப் பணிபுரிந்து வர வேண்டும் என நிபந்தனை விதிக்கின்றன. அதுவும் நிரந்தரப் பணி எனில், பல வங்கிகளில் வீட்டுக் கடன் கிடைக்கும். அடுத்து, ஒருவர் வேலை பார்க்கும் நிறுவனம், முன்னணி நிறுவனமாக இருக்க வேண்டும் எனப் பெரும் பாலான வங்கிகள் எதிர்பார்க்கின்றன.

அடிக்கடி வேலை மாறுபவர்கள், நிரந்தரம் இல்லாத வேலையில் இருப்பவர்களுக்கு வீட்டுக் கடன் கிடைப்பது கஷ்டம். மேலும், பத்திரிகை நிருபர்கள், வழக்கறிஞர்கள் ஆகியோருக்கு வீட்டுக் கடன் கிடைப்பது கொஞ்சம் கஷ்டம்.

வீட்டுக் கடன்...தகுதியை நிர்ணயிக்கும் 8 முக்கியமான காரணிகள்..!

3. குறைந்தபட்ச வருமானம்...

வீட்டுக் கடன் வாங்குபவருக்கு குறைந்தபட்ச மாத சம்பளம் என்பது வங்கிகள், வீட்டு வசதி நிறுவனங்கள், நிதி நிறுவனங்களுக்கேற்ப மாறுபடும். டெல்லி, மும்பை போன்ற மிகப் பெரிய நகரங்களைச் சேர்ந்தவர்களுக்கு குறைந்த பட்ச மாதச் சம்பளம் ரூ.30,000 இருந்தால்தான் வீட்டுக் கடன் கிடைக்கும். இதர நகரங்களைச் சேர்ந்தவர்களுக்கு மாதச் சம்பளம் சுமார் ரூ.25,000-ஆக உள்ளது. இந்தச் சம்பளம் மாதம்தோறும் நிலையாக வந்துகொண்டிருப்பது அவசியமாகும்.

சுயதொழில் செய்பவர்களின் மாத வருமானம் ரூ.35,000 என வீட்டுக் கடன் வழங்கும் வங்கிகள் மற்றும் வீட்டுவசதி நிறுவனங்கள் எதிர்பார்க்கின்றன. சுயதொழில் செய்பவர்கள் குறைந்தது ஐந்து ஆண்டுகளாவது அவர்களின் தொழிலில் லாபம் சம்பாதிப்ப வராக இருக்க வேண்டும்.

(எவ்வளவு சம்பளம் வாங்குபவர்களுக்கு தோராயமாக எவ்வளவு வீட்டுக் கடன் கிடைக்கும் என்கிற விவரம் அட்டவணையில் தரப்பட்டுள்ள தைப் பார்க்கவும்)

வீட்டுக் கடன்...தகுதியை நிர்ணயிக்கும் 8 முக்கியமான காரணிகள்..!

4. கிரெடிட் ஸ்கோர்...

பொதுவாக, வீட்டுக் கடன் வாங்குதற்கு கிரெடிட் ஸ்கோர் 750 மற்றும் அதற்கு அதிகமாக இருக்க வேண்டும். சில வங்கிகள் கிரெடிட் ஸ்கோர் 700 இருந் தாலும், வீட்டுக் கடன் வழங்கு கின்றன. இதற்குக் குறைவாக இருந்தால் சற்று கூடுதலான வட்டியில் வீட்டு வசதி நிறுவ னங்கள் மற்றும் நிதி நிறுவனங் கள் கடன் வழங்குகின்றன.

கிரெடிட் ஸ்கோர் எவ்வளவு இருந்தால் வீட்டுக் கடன் வழங்கலாம் என்பது வங்கி, வீட்டு வசதி நிறுவனம், நிதி நிறுவனத்துக்கு இடையே வேறுபடுகிறது. பொதுத்துறை வங்கி என்றாலும் வங்கிக்கு வங்கி வேறுபடுகிறது.

குறைவான கிரெடிட் ஸ்கோர் என்பதால், ஒரு வங்கியில் வீட்டுக் கடன் கிடைக்கவில்லை என்பதற்காக அப்படியே விட்டுவிட வேண்டாம். வேறு வங்கி, வீட்டு வசதி நிறுவனம், நிதி நிறுவனத்தில் முயற்சி செய்யலாம்.

5. சொத்தின் நிலை மற்றும் மதிப்பு

பொதுவாக, நகர்ப்புறங்களில், புறநகர்களில் வீட்டின் மதிப்பு குறைந்தபட்சம் ரூ.10 லட்சம், ரூ.15 லட்சம் இருந்தால்தான் வீட்டுக் கடன் வழங்கின்றன. ஆனால், கிராமப்புறங்களில் பொதுத்துறை வங்கிகள் இதற்குக் குறைவாக வீட்டின் மதிப்பு இருந்தாலும் கடன் வழங்குகின்றன.

புதிய வீடு எனில், வீட்டுக் கடன் மிகச் சுலபமாக இருக்கும். பழைய வீடு அதுவும், மிகப் பழைய வீடு எனில், வீட்டைக் கடன் கொடுக்கும் வங்கிகியைச் சேர்ந்த பொறி யாளர்கள் ஆய்வு செய்துதான் கடன் கிடைப்பதை உறுதி செய் வார்கள். வீடு தொடர்பான ஆவணங்களில் எந்த வில்லங்கமும் இருக்கக் கூடாது. அப்போதுதான் கடன் கிடைக்கும்.

6. குடும்ப உறுப்பினர்களின் எண்ணிக்கை...

குடும்ப உறுப்பினர்களின் எண்ணிக்கை அதிகமாக இருந்தால், வீட்டுக் கடன் கிடைப்பதில் சிக்கல் இருக்கிறது. வீட்டுக் கடன் வாங்கப் போகிறவரை நம்பி எத்தனை பேர் சார்ந்திருக்கிறார்கள் என்பதைப் பொறுத்துதான் கடன் கிடைக்கும். அதிகம் பேர் சார்ந்திருந்தால், குடும்பச் செலவு அதிகமாக இருக்கும். வீட்டுக் கடன் மாதத் தவணையை சரியாகக் கட்டுவதில் சிக்கல் ஏற்படும் என வங்கிகள், வீட்டு வசதி நிறுவனங்கள் நினைக் கின்றன. கணவன், மனைவி, இரு பிள்ளைகள் எனில், வீட்டுக் கடன் கிடைப்பதில் சிக்கல் இருக்காது. கணவன், மனைவி, மூன்று பிள்ளைகள், கணவனின் அப்பா, அம்மா, கணவனின் தம்பி, தங்கை ஆகியோரைக் கொண்ட பெரிய குடும்பம் எனில், வீட்டுக் கடன் கிடைப்பதில் சற்று சிக்கல் இருக்க வாய்ப்புண்டு.

7. ஏற்கெனவே இருக்கும் கடன்கள்...

வீட்டுக் கடன் வாங்குபவருக்கு ஏற்கெனவே இருக்கும் சொத்துகள், கடன்கள் பற்றிய விவரங்களை வங்கிகள், வீட்டு வசதி நிறுவனங்கள் அறிந்துகொள்கின்றன. அதன் அடிப்படையில்தான் கடனை திரும்பச் செலுத்தும் தகுதியை நிர்ணயம் செய்கின்றன. ஒருவருக்கு அதிக சொத்துகள் இருக்கின்றன; வேறு கடன் எதுவும் இல்லை எனில், வீட்டுக் கடன் விரைந்தும் சுலபமாகவும் கிடைகும். அதே நேரத்தில், சொத்துகள் எதுவும் இல்லை; கிரெடிட் கார்டு கடன், கார் கடன், தனிநபர் கடன் எனப் பல கடன்கள் இருக்கின்றன. அவற்றுக்கே கணிசமான தொகை மாதம்தோறும் கட்ட செலவாகிவிடும் எனில், வீட்டுக் கடன் கிடைப்பது கஷ்டம். அப்படியே கிடைத் தாலும் கடன் தொகை குறைவாக இருக்கும்.

8. சேமிப்பு, முதலீட்டுப் பழக்கம்...

வீட்டுக் கடன் வாங்கப் போகிறவருக்கு சேமிப்பு மற்றும் முதலீடு செய்யும் பழக்கம் இருந்தால், சுலபமாக வீட்டுக் கடன் கிடைக்கும். உதாரணமாக, ஒருவரின் மாதச் சம்பளம் ரூ.80,000. அவர் சம்பளத்தில் ரூ.15,000-தான் மிச்சப்படுத்தி சேமிக்கிறார். இன்னொருவர் மாதச் சம்பளம் ரூ.50,000. அவர் சம்பளத்தில் ரூ.25,000 மிச்சப்படுத்தி முதலீடு செய்கிறார் எனில், ரூ.80,000 சம்பளம் வாங்குபவரை விட ரூ.50,000 சம்பளம் வாங்குபவருக்கே வீட்டுக் கடன் உறுதியாகக் கிடைக்கும்.

நீங்கள் வீட்டுக் கடன் வாங்கப்போகிறீர்கள் எனில், நீங்கள் வங்கிக் கணக்கு வைத்திருக்கும் வங்கியில் உங்களுக்கு எவ்வளவு வீட்டுக் கடன் கிடைக்கும் என்பதை விசாரிக்கலாமே!

(சொந்த வீட்டை வாங்குவோம்)

யாரெல்லாம் வீட்டுக் கடன் வாங்கலாம்?

மாதச் சம்பளம் வாங்கும் தனிநபர்கள், இந்துக் கூட்டுக் குடும்பத்தினர், சுயதொழில் செய்பவர்கள், வணிகம் செய்பவர்கள் என அனைத்துத் தரப்பினரும் வீட்டுக் கடன் வாங்க முடியும். ஆடிட்டர்கள், டாக்டர்கள், இன்ஜினீயர்கள், ஆசிரியர்களுக்கு பிரத்யேக திட்டங்கள் இருக்கின்றன.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism