பிரீமியம் ஸ்டோரி

வீட்டுக் கடன் வாங்கி வீடு கட்டியவர்கள், சில ஆண்டுகளுக்குப் பிறகு, அந்த வீட்டில் சிலபல மாற்றங்களைச் செய்ய வேண்டும் எனில், பணத்துக்கு எங்கே போவது என்று கவலைப்படத் தேவையில்லை. வீட்டுக் கடன் வாங்கிய வங்கியிலேயே டாப் அப் கடன் (Top-up Loan) வாங்கி, வீட்டில் செய்ய வேண்டிய மாற்றங்களைச் செய்துகொள்ள முடியும். அது என்ன டாப் அப் கடன்..? விரிவாகப் பார்ப்போம்.

சௌ.சிவகுமார் 
நிறுவனர், 
www.bestservicerealty.in
சௌ.சிவகுமார் நிறுவனர், www.bestservicerealty.in

ஏற்கெனவே வீட்டுக் கடன் வாங்கியவர்கள், அந்த வீட்டின் மீது மேலும் கடன் வாங்குவது தான் டாப் அப் கடன். இந்தக் கடனை பொதுவாக, 18 வயது முதல் 70 வயதுக்கு உட்பட்டவர்கள் வாங்கிக்கொள்ளலாம். சில வங்கிகளில் இந்த வயது 21 முதல் 60-ஆக உள்ளது. வெளிநாட்டில் வசிக்கும் இந்தியர் (NRI) எனில், 23 முதல் 60 வயதாக இருக்க வேண்டும்.

இந்தக் கடனை எந்தக் காரணத்துக்கும் வாங்கலாம். வீட்டைப் புதுப்பிக்கவோ, வீட்டை அலங்கரிக்கவோ, வீட்டில் கூடுதல் வசதிகளை ஏற்படுத்தவோ இந்தக் கடனை வாங்கலாம். பிள்ளைகளின் கல்வி மற்றும் கல்யாணச் செலவுகள், தொழில் தொடங்க எனப் பல்வேறு காரணங்களுக்காக இந்தக் கடன் பணத்தைப் பயன்படுத்த முடியும். ஆனால், இப்படிச் செலவழிப்பதன் மூலம் வரிச் சலுகை கிடைக்காது. இந்தக் கடன் பணத்தை ஊகத்தின் அடிப்படையிலான செயல்களுக்குப் பயன்படுத்தக் கூடாது.

பணத் தேவைக்குக் கைகொடுக்கும் 
வீட்டுக் கடன் டாப்-அப்!

எவ்வளவு கிடைக்கும்?

ஏற்கெனவே வாங்கிய வீட்டுக் கடன் தொகைக்கு இணையாக டாப் அப் கடன் வாங்கலாம். அதற்கு உங்கள் சொத்தின் மதிப்பு மற்றும் சம்பளம் / வருமானம் பன்மடங்கு அதிகரித்திருக்க வேண்டும்.

சில வங்கிகள் அல்லது நிதி நிறுவனங்கள், ஏற்கெனவே வீட்டுக் கடனில் எவ்வளவு அடைத்திருக்கிறார்களோ, அதை டாப் அப் கடனாகக் கொடுக்கின்றன. ஏற்கெனவே வாங்கிய வீட்டுக் கடனைத்தொடர்ந்து சுமார் 1 - 2 ஆண்டுகள் கட்டி வரும் நிலையில் இந்த டாப் அப் கடனை வாங்க முடியும்.

இந்த டாப் அப் லோன் குறைந்தபட்சமாக ரூ.50,000, அதிகபட்சமாக ரூ.25 லட்சம் முதல் ரூ.50 லட்சம் வரை கிடைக்க வாய்ப்பு உண்டு. இது வங்கி, நிதி நிறுவனங்களைப் பொறுத்து மாறும். ஐ.சி.ஐ.சி.ஐ பேங்கில் அதிகபட்சம் ரூ.25 லட்சம் டாப் அப் கடன் என இருந்தாலும், ஹெச்.டி.எஃப்.சி-யில் இந்தக் கடன் தொகை ரூ.50 லட்சமாக இருக்கிறது.

மற்றக் கடன்களைவிட சிறந்ததா?

நுகர்வோர் கடன், தனிநபர் கடன் உள்ளிட்ட இதர கடன் களுடன் ஒப்பிடும்போது டாப் அப் கடன் சிறந்ததாக இருக்கிறது. இதில் கடனுக்கான வட்டி மிகக் குறைவு. (பார்க்க அட்டவணை) அதே நேரத்தில், வீட்டுக் கடனுக்கான வட்டியைவிட 1 - 2% வட்டி அதிகம்.

கடனைத் திரும்பச் செலுத்து வதற்கு இப்போதெல்லாம் மிக நீண்ட காலம் அனுமதிக்கப்படு கிறது. பொதுவாக, வீட்டுக் கடனைக் கட்டி முடிக்கும் காலம் வரைக்கும் டாப் அப் கடனையும் கட்டி முடிக்க அனு மதிக்கப்படும். 20-30 ஆண்டு கள்கூட திரும்பக் கட்டும் காலம் அனுமதிக்கப்படுகிறது. எஸ்.பி. ஐ-யில் டாப் அப் கடனைத் திரும்பச் செலுத்த 30 ஆண்டுகள் வரை அனுமதி உண்டு.

டாப் அப் லோனை ஓவர் டிராஃப்ட் என்கிற முறையில் வாங்கும்போது, பயன்படுத்திய கடன் தொகைக்கு மட்டும் வட்டி கட்டினால் போதும்.

எப்படி வாங்குவது?

வீட்டுக் கடன் வாங்குவது போலத்தான் இதுவும். புதிதாக சம்பளச் சான்றிதழ், வீட்டின் புதிய மதிப்பீட்டு அறிக்கை போன்றவற்றை வழங்க வேண்டும். சரியான ஆவணங்கள் இருக்கும்பட்சத்தில், இந்தக் கடனை 24 மணி நேரத்துக்குள் வழங்கிவிடுகின்றன. ஆன்லைன் மூலமும் விண்ணப்பித்து டாப் அப் கடனைப் பெற முடியும். இந்தக் கடனுக்கு வழக்கமான பரீசிலனைக் கட்டணம் உண்டு. சில வங்கிகளில் பரீசிலனைக் கட்டணம் ரூ.3,000 - ரூ.10,000 என்பது போல் இருக்கும். சில வங்கிகளில் கடன் தொகையில் சுமார் 0.5-1.5 சதவிகிதமாக இருக்கும்.

இந்தக் கடனைப் பெற பிரத்யேக விண்ணப்பப் படிவத்தை நிரப்பிக் கொடுக்க வேண்டும். அடையாளத்துக்கான ஆதாரம் மற்றும் முகவரிக்கான ஆதாரம் (பான் கார்டு, ரேஷன் கார்டு, டிரைவிங் லைசென்ஸ், ஆதார் கார்டு போன்றவை), மார்பளவு புகைப்படங்கள் மூன்று, கடந்த ஆறு மாத வங்கிக் கணக்குப் பரிவர்த்தனை, கேரன்டர் ஒருவரின் இரண்டு மார்பளவு புகைப்படங்கள் தேவைப்படும்.

டாப் அப் கடன் வாங்குபவரின் வயது, அவரின் திரும்பச் செலுத்தும் திறன், அவருக்கு இருக்கும் இதரக் கடன்கள், வீட்டுக் கடன் வாங்கிய சொத்தின் வயது, சொத்தின் தற்போதைய மதிப்பு, ஏற்கெனவே வாங்கிய வீட்டுக் கடன் தொகை மற்றும் கடன் முடியும் காலம் ஆகியவற்றைப் பொறுத்து டாப் கடன் தொகையும், திரும்பக் கட்டும் காலமும் அமையும். ஏற்கெனவே வாங்கிய கடன் மற்றும் வாங்கப் போகும் டாப் அப் கடன் சேர்ந்து சொத்தின் சந்தை மதிப்பில் 75% - 85%-க்குள் இருக்க வேண்டும் எனச் சில வங்கிகள், நிதி நிறுவனங்கள் நிபந்தனைகள் விதிக்கின்றன.

டாப் அப் கடன் பெறும்போது, திரும்பக் கட்டும் தகுதி குறைவாக இருக்கும்பட்சத்தில் இணை விண்ணப்பதாரர் அல்லது இணை கடன்தாரரைச் சேர்த்துக்கொள்ளலாம். இந்த இணை விண்ணப்ப தாரர் என்பவர் துணைவர் (கணவன்/மனைவி) அல்லது ரத்த உறவு கொண்ட குடும்ப உறுப்பினர்களாக இருக்கலாம்.

எல்.ஐ.சி ஹெச்.எஃப்.எல் போன்ற வீட்டு வசதி நிறுவனங்கள், வேறு ஒரு வங்கி அல்லது நிதி நிறுவனத்திலிருந்து வீட்டுக் கடனை மாற்றி வரும் பட்சத்தில், அவர்களுக்கு டாப் அப் கடன் தருகின்றன. இந்த நிறுவனத்தில் ஏற்கெனவே வீட்டுக் கடன் வாங்கியவர்களுக்கு டாப் அப் கடனுக்கான வட்டி தற்போது 8.5 சதவிகிதமாக உள்ளது. வேறு இடத்தில் இருந்து கடனை மாற்றிக்கொண்டு வந்தவர்களுக்கு டாப் அப் கடனுக்கான வட்டி 9% ஆகும்.

பணத் தேவைக்குக் கைகொடுக்கும் 
வீட்டுக் கடன் டாப்-அப்!

டாப் அப் கடனுக்கு வரிச் சலுகை உண்டா?

டாப் அப் கடன் வாங்கும் முன் வரிச் சலுகை குறித்து நீங்கள் தெளிவாகப் புரிந்துகொள்ள வேண்டும். வீட்டுக் கடன் மீது நீங்கள் டாப் அப் கடனை வீடு கட்டவோ, வீட்டைப் புதுப்பிக்கவோ, வீட்டை விரிவாக்கம் செய்யவோ, வீட்டைப் பழுது பார்க்கவோ வாங்கும்போது மட்டுமே திரும்பக் கட்டும் மாதத் தவணையில் வரிச் சலுகை கோர முடியும். அதுவும் திரும்பக் கட்டும் அசலுக்குக் கிடையாது. வட்டிக்கு மட்டும் உண்டு. குடியிருக்கும் வீடு எனில், நிதி ஆண்டில் ரூ.30,000 வரைக்கும் வரிச் சலுகை உண்டு.

வாடகைக்கு விடப்பட்ட வீடு எனில், வாடகையை வருமானமாக வரிக் கணக்கில் காட்டும்போது நிதி ஆண்டில் ரூ.2 லட்சம் வரை வரிச் சலுகை உண்டு. அதே நேரத்தில் ஒருவர் இந்த இரு சலுகைகளும் சேர்த்து நிதி ஆண்டில் அதிகபட்சம் ரூ.2 லட்சம்தான் வட்டிக்கு வரிச் சலுகை பெற முடியும்.

இதுவே டாப் அப் லோன் வாங்கி புது வீடு கட்டும்போது திரும்பக் கட்டும் அசல் மற்றும் வட்டியில் நிதி ஆண்டில் முறையே அதிகபட்சம் ரூ.1.5 லட்சம் மற்றும் ரூ.2 லட்சத்துக்கு வரிச் சலுகை பெற முடியும். இதற்கு வீடு கட்டிய தற்கான ரசீது மற்றும் ஆவணங்களை பாதுகாப்பாக வைத்திருப்பது முக்கியமானது.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு