Published:Updated:

வீட்டுக் கடன் சுலபமாகக் கிடைக்க என்ன செய்ய வேண்டும்?

வீட்டுக் கடன்
பிரீமியம் ஸ்டோரி
News
வீட்டுக் கடன்

வீட்டுக் கடன்

சொந்த வீடு என்பது ஒருவரின் வாழ்நாள் கனவாக இருக்கிறது. இதைப் பெரும் பாலானோர் வீட்டுக் கடன் மூலம்தான் நிறைவேற்றிக்கொள்கிறார்கள். வங்கி / வீட்டு வசதி நிறுவனம் / நிதி நிறுவனம் பல்வேறு பரிசீலனைகளை மேற்கொண்ட பிறகுதான் வீட்டுக் கடனுக்கு ஒப்புதல் அளிக்கின்றன. ஏதாவது, ஒரு சிறிய தவறு காரணமாக வீட்டுக் கடன் கிடைக்காமல் போகவும், விண்ணப்பம் தள்ளுபடி ஆகவும் வாய்ப்பிருக்கிறது. இப்படி நடக்காமல் இருக்க நாம் என்னென்ன முன்னேற்பாடுகளைச் செய்ய வேண்டும் என்று பார்ப்போம்.

சௌ.சிவகுமார் 
நிறுவனர், 
www.bestservicerealty.in
சௌ.சிவகுமார் நிறுவனர், www.bestservicerealty.in

1. நல்ல நிதிநிலை...

வீட்டுக் கடனுக்கு விண்ணப்பிக்கும் முன் உங்கள் கைவசம் எவ்வளவு பணம் இருக்கிறது, எவ்வளவு பணம் திரட்ட முடியும், வீட்டுக் கடன் எவ்வளவு கிடைக்கும் (திரும்பச் செலுத்தும் திறன் மற்றும் வீட்டின் மதிப்பில் சுமார் 80%) என்பதை உறுதிப்படுத்திக்கொள்ள வேண்டும். அதற்கேற்ப வீட்டுக் கடன் வாங்குவதை முடிவு செய்ய வேண்டும்.

அது மட்டுமன்றி, பணி நிரந்தரம் செய்யப் பட்டு, மூன்று ஆண்டுகள் நிறைவு பெற்றிருக்க வேண்டும். சில நிறுவனங்கள் வீட்டுக் கடன் வாங்க ஒரு குறிப்பிட்டத் தொகையை சம்பள மாக வாங்க வேண்டும் என நிர்ணயித்துள்ளன. உதாரணமாக, நகரங்களில் மாதச் சம்பளம் குறைந்தது ரூ.25,000, கிராமப்புறங்களில் ரூ.20,000 என இருக்க வேண்டும். இது வங்கி மற்றும் நிதி நிறுவனங்களைப் பொறுத்து மாறுபடும். இந்த நிபந்தனைகள் உங்களுக்குப் பொருந்துகிறதா என்பதை உறுதிப்படுத்திக் கொண்ட பிறகு, விண்ணப்பத்தைப் பூர்த்தி செய்து தருவது நல்லது.

2. சரியான விவரங்கள், ஆவணங்கள்...

வீட்டுக் கடனுக்கு விண்ணப்பிக்கும்போது கொடுக்கும் விவரங்கள் (உதாரணம், சம்பளம்) மற்றும் ஆவணங்கள் மிகச் சரியாக இருக்க வேண்டும். இதில், ஏதாவது தவறு கண்டுபிடிக்கப் பட்டால் கண்டிப்பாக விண்ணப்பம் தள்ளுபடி செய்யப்பட வாய்ப்புண்டு. எனவே, சரியான ஆவணங்களைக் கொடுப்பது அவசியம்.

3. அதிக முன்பணம் போடுதல்...

வீட்டுக் கடன் வாங்குபவர் அவரின் கையில் இருந்து போடும் முன்பணம் (Down payment) அதிகமாக இருந்தால், வீட்டுக் கடன் சுலபமாகக் கிடைக்கும். பொதுவாக, வீட்டின் மதிப்பில் சுமார் 80% தொகைதான் கடனாகக் கிடைக்கும். மீதித் தொகையை கடன் வாங்குபவர் கையில் இருந்து போட வேண்டும். இந்தத் தொகை அதிகமாக இருந்தால், குறைவான தொகையைக் கடனாக வாங்கினால் போதும். அதேபோல், திரும்பக் கட்டும் தொகையும் (அசல் மற்றும் வட்டி) குறைவாக இருக்கும். அதிக அளவில் முன்பணம் செலுத்துபவர்களைக் குறைந்த ரிஸ்க் கொண்டவர்களாக வங்கிகள் கருதுகின்றன.

வீட்டுக் கடன் சுலபமாகக் கிடைக்க
என்ன செய்ய வேண்டும்?

4. நல்ல கிரெடிட் ஸ்கோர்...

இப்போதெல்லாம் ஒருவரின் கிரெடிட் ஸ்கோரைப் பார்த்துவிட்டுதான் நிறுவனங்கள் வீட்டுக் கடன் வழங்க ஒப்புதல் அளிக்கின்றன. கிரெடிட் ஸ்கோர் 750-க்குமேல் இருந்தால், சுலபமாக வீட்டுக் கடன் கிடைக்கும். ஒருவர் அவரின் கிரெடிட் ஸ்கோரை அதிகமாக வைத்துக்கொள்ள கிரெடிட் கார்டு கடன் உள்ளிட்ட அனைத்துக் கடன் தவணைகளையும் தொய்வு இல்லாமல் சரியான நேரத்தில் செலுத்தி வருவது அவசியம். பல்வேறு கடன்களைப் பெற விண்ணப்பங்களை அளிப்பது கிரெடிட் ஸ்கோரைக் குறைக்கும். எனவே, அவசியத் தேவைக்கு மட்டுமே கடனுக்கு விண்ணப்பிக்க வேண்டும்.

5. இணை விண்ணப்பதாரர்

வீட்டுக் கடனுக்கு விண்ணப்பிக்கும்போது ஒருவர் அவரின் தாய், தந்தை அல்லது துணைவரை (கணவன்/மனைவி) இணை விண்ணப்பதாரராக (Co-Applicant) சேர்த்துக்கொண்டால், சுலபமாகக் கடன் கிடைக்கும். அதாவது, இணை விண்ணப்பதாரரைச் சேர்க்கும்போது அவரின் வருமானமும் வீட்டுக் கடனுக்கான தகுதிக்குச் சேர்க்கப்படுவதால், கடன் தகுதி அதிகரித்துவிடும்.

பணிபுரியும் கணவன்-மனைவி இணைந்து கூட்டுக் கடனாக (Joint Loan) வாங்கும்பட்சத்தில் வீட்டுக் கடன் எளிதாகக் கிடைக்க வாய்ப்பிருக்கிறது. அதற்கு இருவருக்கும் கிரெடிட் ஸ்கோர் அதிகமாக இருக்க வேண்டும். கணவன் - மனைவி இணைந்து வீட்டுக் கடன் வாங்குவதால், வீட்டுக் கடன் வட்டியில் 0.25% சலுகை இருக்கிறது. மேலும், வரிச் சலுகைகள் (நிதி ஆண்டில் வட்டியில் ரூ.2 லட்சம், அசலில் ரூ.1.5 லட்சம்) இருவருக்கும் தனித் தனியே கிடைக்கும்.

6. கூடுதல் வருமானம்

உங்களுக்கு சம்பளம் தவிர, கூடுதல் வருமானம் இருக்கும் பட்சத்தில் அதிக தொகை கடன் கிடைப்பதுடன், விரைவாகவும் கடன் கிடைக்கும். கூடுதல் வருமானம் என்பது பகுதி நேர வேலை மூலமான வருமானம், வீட்டு வாடகை வருமானம் போன்றவையாக இருக்கலாம்.

7. நீண்ட கால கடன்

வீட்டுக் கடனை 25 ஆண்டுகள், 30 ஆண்டுகள் என நீண்ட காலத்தில் திரும்பச் செலுத்து வதாக இருந்தால், மாதத் தவணை குறைவாக இருக்கும். இது போன்ற சூழ்நிலையில் ஒருவர் வீட்டுக் கடனை சுலபமாக அடைக்க முடியும் என்பதால், சுலபமாகக் கடன் கிடைக்க வாய்ப்பிருக்கிறது.

8. அதிகரிக்கும் மாதத் தவணை

ஒருவரின் சம்பளம் அதிகரிக்க அதிகரிக்க வீட்டுக் கடன் தவணை அதிகரிக்கும் வசதியைப் பயன்படுத்தும்பட்சத்திலும் வீட்டுக் கடன் சுலபமாகக் கிடைக்கும். இந்த முறையில் ஆரம்ப ஆண்டுகளில் மாதத் தவணை குறைவாகவும், ஆண்டுகள் அதிகரிக்க அதிகரிக்க மாதத் தவணை அதிகமாகவும் இருக்கும்.

வேறு கடன்கள் இருக்கக் கூடாது..!

வீட்டுக் கடன் வாங்க விண்ணப்பிக்கும் முன் வேறு தனிநபர் கடன்கள், நகை அடமானக் கடன்கள் போன்றவை இருந்தால் அவற்றை அடைத்துவிடவும். இல்லை எனில், கிடைக்கும் கடன் தொகை குறைய வாய்ப்புள்ளது; பழைய கடன்களுக்கு அதிக மாதத் தவணை கட்டிவரும்பட்சத்தில், கடனைத் திரும்பக் கட்டும் தகுதி இல்லை என்று கடன் விண்ணப்பத்தைத் தள்ளுபடிகூட செய்ய வாய்ப்பு இருக்கிறது.

ஏற்கெனவே இருக்கும் சிறு கடன்களை அடைக்க வேறு கடன் வாங்குவதாக இருந்தால், உறவினர்கள், நண்பர்கள், அலுவலகத்தில் வாங்கலாம். அப்படி இல்லாமல், வங்கி, நிதி நிறுவனத்தில் வாங்கினால், அது வீட்டுக் கடன் நிறுவனத்துக்கு தெரிய வந்து விடும். அப்போது கடன் கிடைப்பதில் சிக்கல் ஏற்படும்.

அனைத்துக் கடன்களையும்விட வீட்டுக் கடன் வாங்குவது பல வகையில் நல்லது. வீட்டுக் கடனுக்கு மட்டும் தவணை செலுத்தும் நிலை இருப்பதும் நல்லது.