Published:Updated:

வீட்டுமனை... புதிய வீடு... பழைய வீடு... நில்... கவனி... வாங்கு..!

வீட்டுமனை
பிரீமியம் ஸ்டோரி
News
வீட்டுமனை

நீங்கள் பழைய வீட்டை வாங்கினாலும், அதற்கும் அப்ரூவ்டு பிளான் இருக்கிறதா எனக் கவனிக்க வேண்டும்!

ல வருட சேமிப்பை செலவழித்துதான் நாமெல்லாம் ஒரு சொத்து வாங்குவோம். அதுவும் போதவில்லை என்றால், கடன் வாங்கியாவது ஒரு சொத்தை வாங்குவோம். நம் மொத்த வாழ்க்கையிலும் சொத்து வாங்குதல் மிக முக்கியமான விஷயம் என்பதால் அது நிலமோ, ஃபிளாட்டோ, செகண்ட் ஹேண்ட் ஃபிளாட்டோ எது வாங்கினாலும், ஏமாறாமல் இருக்க எதிலெல்லாம் நாம் கவனமாக இருக்க வேண்டும் என்பதை அனைவரும் அவசியம் தெரிந்துகொள்ள வேண்டும்.

புரொமோட்டர் யார்?

சொத்து வாங்கும்போது கவனிக்க வேண்டிய விஷயங்கள் குறித்து நவீன் ஹவுஸிங் நிறுவனத்தின் நிர்வாக இயக்குநர் ஆர்.குமார் விரிவாக எடுத்துச் சொன்னார்.

வீட்டுமனை... புதிய வீடு... பழைய வீடு... நில்... கவனி... வாங்கு..!

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz

‘‘மனை அல்லது வீடு வாங்கும்போது ‘முதன்முதலாக நாமும் ஒரு சொத்து வாங்கப் போகிறோம்’ என்ற மகிழ்ச்சியில், ஜாக்கிரதை உணர்வைக் கோட்டைவிட்டுவிடுகிறோம். புதிதாக மனை அல்லது வீடு வாங்கப்போகிறீர்கள் என்றால், புரொமோட்டர்கள் அல்லது பில்டர்களின் கவர்ச்சியான விளம்பரங்களை நம்பி ரிஸ்க் எடுக்காதீர்கள்.

சென்னைக்கு மிக அருகில், 15 நிமிடத்தில் உங்கள் மனைக்குச் சென்றுவிடலாம் என்று விளம்பரம் செய்வார்கள். அந்த 15 நிமிடம் என்பது நடந்துபோனாலா, பேருந்தில் போனாலா, போக்குவரத்து நெரிசல் மிகுந்த நேரத்திலா, வண்டிகள் ஓடாத நள்ளிரவு நேரத்திலா என்பதை நீங்கள் கேட்டுத் தெளிவுபடுத்திக்கொள்ள வேண்டும்.

ரியல் எஸ்டேட் நிறுவனத்தின் புது காரில் ஞாயிற்றுக்கிழமை காலை நேரத்தில் போக்குவரத்தே இல்லாத சாலையில் அதிவேகத்தில் அழைத்துச் சென்று புறநகர்களில் இருக்கும் மனை மற்றும் வீடுகளைக் காட்டுவார்கள். ஆனால், இந்த இடத்தை சாதாரண நாளில் ஒருவர் போய்ச் சேர குறைந்தது ஒன்றரை மணி நேரம் ஆகக்கூடும்.

உங்கள் அன்றாட தேவைகளின் அனைத்து பொருட்களையும் சிறந்த தள்ளுபடியில் வாங்க

VIKATAN DEALS

ரெரா பதிவு அவசியம்...

500 சதுர மீட்டருக்கு மேலே இருக்கிற இடமோ, எட்டு வீடுகளுக்கு மேலே இருக்கிற குடியிருப்போ... எதுவென்றாலும், அந்தத் திட்டங்களை ரியல் எஸ்டேட் ரெகுலேட்டரி அத்தாரிட்டியில் (RERA) கண்டிப்பாக ரிஜிஸ்டர் செய்திருக்க வேண்டும். வீடு கட்டித் தரும் பில்டர்களிடம் அப்ரூவ்டு பிளான் இ்ருக்கிறதா என்று கேட்டு, சரிபார்க்க வேண்டும்.

வீட்டுமனை... புதிய வீடு... பழைய வீடு... நில்... கவனி... வாங்கு..!

வீட்டுமனை லே அவுட்டில் அங்கீகரிக்கப் பட்ட வீட்டுமனைகள் என்பார்கள். எங்கு அங்கீகரிக்கப்பட்டது என்பதைக் குறிப்பிட மாட்டார்கள். பஞ்சாயத்து அப்ரூவலா, டி.டி.சி.பி அப்ரூவலா அல்லது சி.எம்.டி.ஏ அப்ரூவலா என விவரமாகக் கேட்டுத் தெரிந்துகொள்ள வேண்டும்.

பஞ்சாயத்து அப்ரூவல் மனை, ஏற்கெனவே பதிவு செய்த மனையை இப்போது விற்கிறோம் என்றால் வாங்காதீர்கள். வீடு கட்டப் போகும்போது நீங்கள் அதிக செலவு செய்து, டி.டிசி.பி அல்லது சி.எம்.டி.ஏ அப்ரூவல் வாங்க வேண்டியிருக்கும்.

மனை விற்பனை விளம்பரங்களில் ரெரா ரிஜிஸ்ட்ரேஷன் நம்பர் குறிப்பிடப்பட்டிருக்க வேண்டும். அந்த ரிஜிஸ்ட்ரேஷன் நம்பரில் அவர்கள் குறிப்பிட்டிருக்கிற வீடு கட்டும் திட்டம்தான் நடந்துகொண்டிருக்க வேண்டும். ஒருவேளை, திட்டத்தில் மனைகள் விற்பதற்கு மட்டும் அப்ரூவல் கொடுத்திருக்க, பில்டர் அந்த இடத்தில் வீடு கட்டிக்கொண்டிருந்தால், அந்த பில்டரை நீங்கள் நம்பக்கூடாது.

மனை விற்பனைக்கான அல்லது வீடு விற்பனைக்கான விளம்பரத்தைப் பார்த்தீர்கள் என்றால், ரெராவின் வெப்சைட்டுக்குள் சென்று, நீங்கள் வாங்க விரும்புகிற இடம் ரெராவில் ரிஜிஸ்டர் ஆகியிருக்கிறதா, அந்தக் குறிப்பிட்ட புராஜெக்டுக்கான இடம்தான் விளம்பரத்தில் சொல்லப்பட்டிருக்கிறதா, ரெரா வெப்சைட்டில் இருக்கிற இடமும் விளம்பரத்தில் குறிப்பிட்டிருக்கிற இடமும் ஒன்றுதானா, ரிஜிஸ்ட்ரேஷன் ஒரு முகவரியிலும், புராஜெக்ட் நடப்பது (அடுக்குமாடி கட்டுவது) வேறு முகவரியிலும் என்றால், தவறு நடந்து கொண்டிருக்கிறது என்று அர்த்தம்.

குறிப்பிட்ட திட்டத்துக்கு ரெராவில் 10 மாடி வரை மட்டுமே கட்டுவதற்கு அப்ரூவல் கொடுத்திருக்க, பில்டர் 15 மாடி கட்டுவதாக விளம்பரம் கொடுத்தால் உஷாராகிவிடுங்கள். இத்தனை விவரங்களும் சரியாக இருந்தால்தான், அந்தச் சொத்தை சிக்கல் இல்லாமல் வாங்கும் நிலைக்கு வந்திருக்கிறீர்கள் என்று அர்த்தம்.

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

விலை வித்தியாசப்படுகிறதா..?

ஒரே ஏரியாவில் ஒரு பில்டர் ஒரு சதுர அடி ரூ.5,000 என்பார். இன்னொருவர் ரூ.6,000 என்பார். நாமும் ஒரு சதுர அடிக்கு ரூ.1,000 மிச்சம் என்று நினைத்து, விலை குறைவாகச் சொல்லும் பில்டரை நம்புவோம். குறைவான விலையைப் போட்டு விளம்பரப்படுத்துவது ஒரு மார்க்கெட்டிங் டெக்னிக்தான். நீங்கள் வீட்டுக்கான முன்பணம் தந்த பிறகு இந்தத் தொகை, அந்தத் தொகை என்று பணம் கேட்டுக்கொண்டே இருப்பார்கள். அல்லது அவர்கள் உங்களுக்குக் கட்டித் தருகிற வீட்டின் தரம் குறைவாக இருக்கும். அந்த வகையில் அந்த 1,000 ரூபாயை சரிசெய்துவிடுவார்கள். கொஞ்சம் அதிகம் செலவு செய்தாலும் நாம் வாங்கும் வீடு தரமாக இருக்க வேண்டும் என்பதை மனதில் கொள்ளுங்கள்.

வீட்டுமனை... புதிய வீடு... பழைய வீடு... நில்... கவனி... வாங்கு..!

கார்ப்பெட் ஏரியாவைக் கவனியுங்கள்!

கார்ப்பெட் ஏரியா எனப்படுகிற வீட்டின் உள் அளவுகளைப் பொறுத்துதான் வீட்டின் விலை நிர்ணயிக்கப்படும். ரெராவில் கார்ப்பெட் ஏரியா எவ்வளவு என்று குறிப்பட வேண்டும் என்று சட்டம் இருக்கிறது. நீங்கள் வாங்கவிருக்கிற 1,200 சதுர அடியை ஒரு சதுர அடிக்கான விலையால் (உதாரணமாக, ரூ.5,000) பெருக்கி, சம்பந்தப்பட்ட இடத்துக்கு ரெராவில் தரப்பட்டுள்ள கார்பெட் ஏரியாவால் வகுத்துப் பார்த்து வீட்டின் விலையை நீங்கள் தெரிந்து கொள்ளலாம். முக்கியமாக, கட்டுமான அப்ரூவல் பிளான் சரியாக இருக்கிறதா என்று பாருங்கள். இது சரியாக இல்லை என்றால், வீடு வாங்கிய பிறகு பிரச்னை வரலாம்.

சொன்ன நேரத்தில் வீடு..!

ஒரு வருடத்துக்குள் வீட்டைக் கட்டித் தருவதாகச் சொல்வார்கள். அதை நம்பி கடன் வாங்கி வீட்டை வாங்க முன்பதிவு செய்துவிடுவீர்கள். ஆனால், சொன்ன நாளில் வீட்டை ஒப்படைக்க மாட்டார்கள். புது வீட்டுக்கும் குடிபோக முடியாமல், ஒருபக்கம் வாடகை, இன்னொரு பக்கம் கடனுக்கு மாதத் தவணை (இ.எம்.ஐ) கட்டிக் கொண்டிருக்கும் நிலைக்குத் தள்ளப்படுவீர்கள். அதனால், நீங்கள் எந்த பில்டரிடம் வீடு வாங்க இருக்கிறீர்களோ, அவர் இதற்கு முன்னால் சொன்ன காலத்துக்குள் வீட்டைக் கட்டிக் கொடுத்திருக்கிறாரா என்பதை விசாரித்துத் தெரிந்துகொள்வது நல்லது.

கூடுதல் பணம் கேட்பார்கள்..!

‘1,000 சதுர அடியில்தான் உங்களுக்கு வீடு கட்டுவதாகச் சொல்லியிருந்தோம். இப்போது 100 சதுர அடி அதிகமாகக் கட்டிவிட்டோம். இதற்குக் கூடுதலாக நீங்கள் பணம் தர வேண்டும்’ என்று கேட்பார்கள். டிராயிங் போட்டது பில்டர், சி.எம்.டி-யில் அப்ரூவ் வாங்கியதும் அவர்தான், ரெராவில் ரிஜிஸ்டர் செய்ததும் அவரே. அப்படியிருக்க கூடுதலாக எப்படிக் கட்டுவார்? நிலம் என்ன வளரவா செய்யும்? முதலில் குறைவான விலை சொல்லிவிட்டு, பிறகு இப்படியெல்லாம் பணம் பறிப்பார்கள். பெரிய பெரிய நிறுவனங்களும் இதைச் செய்கின்றன என்பதால் கூடுதல் கவனம் தேவை.

புகார் இருக்கிறதா?

ரெரா வெப்சைட்டில் உங்களுக்கு வீடு கட்டித் தரவிருக்கிற பில்டர் மீது ஏதாவது புகார் இருக்கிறதா என்பதையும் பார்க்க வேண்டும்.

மேலே சொன்ன எல்லா விஷயங்களும் சரியாக இருந்து, பில்டர் கட்டடம் கட்ட ஆரம்பித்துவிட்டார் என்றால், பில்டிங் வேலை நடக்கும்போது அடிக்கடி நேரில் சென்று, கம்பிகள் அருகருகே நெருக்கமாகப் போடப் பட்டிருக்கிறதா, கம்பிகள் தரமாக இருக்கிறதா என்று பார்க்க வேண்டும். உங்கள் வீட்டின் தரத்தை நீங்களும் கண்காணிக்க வேண்டும். 10 மாடிக் கட்டடத்துக்குச் சில பில்டர்கள் நான்கு மாடிக் கட்டடத்துக்குப் போடுவதுபோல சின்ன காலம் போட்டுவிடுவார்கள். எனவே, ஒரு இன்ஜினீயரை அழைத்துச் சென்று ஆய்வு செய்து உறுதிப்படுத்திக் கொள்ளுங்கள்.

புது ஃபிளாட் வாங்கும்போது...

நீங்கள் ஃபிளாட் வாங்கவிருக்கிற நிறுவனத்தில் ஏற்கெனவே வாங்கியவர்களிடம் பேசிவிட்டு, பிறகு வாங்குங்கள். அப்போதுதான் அந்த நிறுவனத்தின் மீது நுகர்வோர் நீதிமன்றத்தில் யாராவது வழக்கு தொடர்ந் திருக்கிறார்களா என்பதைத் தெரிந்து கொள்ள முடியும்.

வீட்டுமனை... புதிய வீடு... பழைய வீடு... நில்... கவனி... வாங்கு..!

பில்டர்கள் தண்ணீரை வாங்கி வீடு கட்டிவிடுவார்கள். ஆனால், வீடு வாங்கியவர்கள் குழாயைத் திறந்தால் மஞ்சள் நிறத்தில் தண்ணீர் வரும். இதனால் வாழ்க்கை முழுக்க கஷ்டப்பட வேண்டியிருக்கும்.

நிலம் சரியாகப் பிரிக்கப்பட்டுள்ளதா?

அடுக்குமாடிக் குடியிருப்பைப் பொறுத்த வரை, கட்டுமான நிறுவனம் அதை நம்மிடம் ஒப்படைத்துவிட்டுச் செல்லும்போது அதனுடைய மூலப்பத்திரம், கட்டட வரைபடம், எலெக்ட்ரிக்கல் டிராயிங் ஆகியவற்றை வாங்கிக்கொள்ள மறக்காதீர்கள்.

ஓர் அடுக்குமாடிக் குடியிருப்பு 16,000 சதுர அடியில் கட்டப்படுகிறது என்றால், அந்த நிலம் அங்கு வீடு வாங்கிய அனைவருக்கும் சரியாகப் பிரித்துத் தரப்பட்டிருக்கிறதா என்பதை செக் செய்ய வேண்டும். பிரித்துத் தரப்படாத இடத்தை பில்டரின் வாரிசுகள் பிற்காலத்தில் சட்டப்படி சொந்தம் கொண்டாடலாம் என்பதால், இந்த விஷயத்தில் கவனமாக இருங்கள்.

பழைய வீட்டை வாங்கும்போது...

நீங்கள் பழைய வீட்டை வாங்கப்போகிறீர்கள் என்றாலும், அதற்கும் அப்ரூவ்டு பிளான் இருக்கிறதா, அதன்படி வீடு கட்டப்பட்டு இருக்கிறதா எனக் கவனிக்க வேண்டும். ஒருவேளை, விதிமுறைகளின்படி கட்டப் படவில்லை என்றால், பின்னாளில் வீட்டை இடிக்கிற நிலைகூட வரலாம். கட்டடத்தில் துருப்பிடித்த கம்பிகள் வெளியே தெரிகிறது என்றால், வீட்டின் தரம் சரியில்லை என்று அர்த்தம். விஷயம் தெரிந்த ஒரு இன்ஜினீயரை அழைத்துச் சென்று, கட்டடத்தின் உறுதித் தன்மை எப்படி இருக்கிறது, அதற்கான மதிப்பை எவ்வளவுக்குக் கணக்கிடலாம், இன்னும் என்னென்ன புதிய செலவுகளைச் செய்ய வேண்டியிருக்கும் என்பதையெல்லாம் கணக்கிட்டு பழைய வீட்டை வாங்குவது பற்றி முடிவெடுக்கலாம்.

13 ஆண்டுகளுக்கு வில்லங்கச் சான்றிதழ்!

பழைய வீட்டை வாங்கும்போது, பில்டருடன் போட்ட அக்ரிமென்ட்டில் வீட்டை விற்பவரின் பெயர் இருக்கிறதா, அப்ரூவல், சொத்தின் வரலாறு ஆகியவற்றைத் தெரிந்துகொண்டு பிறகு, வாங்க வேண்டும். இதேபோல, இன்னொருவரிடம் இருந்து நிலம் வாங்கு கிறீர்கள் என்றால், 13 வருடத்துக்கு வில்லங்கச் சான்றிதழ் போட்டுப் பார்த்துவிட்டு, வில்லங்கம் எதுவும் இருக்கிறதா என்பதை ஒரு வக்கீலுடன் கலந்து ஆலோசித்துவிட்டு வாங்க வேண்டும்.

வீட்டின் பத்திரத்தைப் பார்ப்பதோடு நின்றுவிடாமல், வீட்டை விற்பவர் யார், எந்தக் காரணத்துக்காக விற்கிறார், தண்ணீர் பிரச்னை இருக்கிறதா, வீட்டில் துர்மரணம் நிகழ்ந்திருக்கிறதா, அருகே டாஸ்மாக் கடை ஏதும் இருக்கிறதா என்று எல்லாக் கோணங்களிலும் ஆராய்ந்த பிறகே வாங்க வேண்டும்.

வங்கியில் விசாரிக்க வேண்டும்

வீட்டை விற்பவர் கடன் வாங்கிய வங்கி அல்லது நிதி நிறுவனத்துக்குச் சென்று, அவர் சரியாகக் கடன் தவணைகளைக் கட்டியிருக் கிறாரா என்று விசாரிப்பதுடன், நான் வீட்டை வாங்கினால் உங்களுக்கு ஆட்சேபனை இருக்கிறதா என்பதையும் நீங்கள் விசாரிக்க வேண்டும். வங்கி ஆட்சேபிக்கும்பட்சத்தில், அந்த வீட்டை நீங்கள் வாங்கவே கூடாது. அதேபோல, பழைய வீடு விற்பவர் வங்கிக்கு எவ்வளவு கட்டவேண்டும் என்பதையும் கேட்டுத் தெரிந்துகொள்வது அவசியம்.

ஃபிளாட்டின் மூலப்பத்திரம், நீங்கள் வாங்கும்போது கொடுக்கப்படப்போகிற பத்திரம் இரண்டையும் ஆய்வு செய்யும்போது இரண்டும் ஒன்றுபோல இருக்க வேண்டும். இத்தனையும் சரியாக இருந்தாலும் ஒன்றுக்கு இரண்டு சட்ட ஆலோசகரிடம் ஆலோசித்த பிறகே, சொத்தை வாங்குவது பற்றி முடிவெடுக்க வேண்டும்” என்றார்.

புதிய வீடோ, பழைய வீடோ அதை வாங்கும் முன் மேற்கண்ட வி ஷயங்கள் அனைத்தையும் மனதில்கொண்டு கவனமாகச் செயல்பட்டால், எப்போதும் நிம்மதிதான்!

வீட்டுமனை வாங்கப் போறீங்களா?

வீட்டுமனை வாங்கும்போது கவனிக்க வேண்டிய விஷயங்களைத் தமிழ்நாடு பில்டிங் அண்ட் புரொமோட்டர்ஸ் அசோசியேஷன் மாநிலத் தலைவர் பி.மணிசங்கரிடம் கேட்டோம். அவர் சொன்னதாவது...

வீட்டுமனை... புதிய வீடு... பழைய வீடு... நில்... கவனி... வாங்கு..!

‘‘நீங்கள் புறநகரில் வீட்டுமனை வாங்கப் போகிறீர்கள் என்றால், அந்த இடத்துக்கான பட்டா, அடங்கல், சிட்டா, ஃபீல்டு மேப் ஆகியவற்றை சட்ட ஆலோசகரிடம் காண்பித்து எந்த வில்லங்கமும் இல்லையென்று தெளிவான பிறகே வாங்க வேண்டும்.

சென்னையில் மனை வாங்கப்போகிறீர்கள் என்றால், பட்டாவின் பின்புறம் நிலத்தின் நீளம் மற்றும் அகலத்தை ஸ்கெட்ச் போட்டுத் தருவார்கள். இந்த நீள, அகல அளவுகள் பட்டாவில் ஒருமாதிரியும், பட்டாவின் பின்புறம் இருக்கிற ஸ்கெட்ச்சில் வேறு மாதிரியும் இருந்தால், பட்டாவில் இருக்கிற நிலத்தின் அளவுக்குத்தான் பணம் தர வேண்டும். டாக்குமென்ட்டில் இருக்கிற நிலத்தின் அளவுக்குப் பணம் தர வேண்டிய அவசியமில்லை. ஏனென்றால், பட்டாவில் இருக்கிற அளவுக்குத்தான் உங்களை வீடு கட்ட அனுமதிப்பார்கள்.

வீடு கட்ட மனை வாங்கும்போது, அருகே சுடுகாடு, பள்ளிக்கூடம், கல்யாண மண்டபம், தியேட்டர் ஆகியவை இல்லாமல் இருப்பது நலம். கல்யாண மண்டபமும் தியேட்டரும் இருப்பின் ஏற்படும் சத்தம் பிள்ளைகளின் படிப்பைக் கெடுக்கும். பள்ளிக்கூடம், தினம்தோறும் நெரிசல் மிகுந்த பகுதியாக இருக்கும். சுடுகாடோ இடையிடையே நெரிசல் மிகுந்த பகுதியாக மாறும். ஓர் அவசரத்துக்கு வீட்டைவிட்டு வெளியே போக முடியாமல் தவிக்க வேண்டிவரும்.

வீட்டுமனை... புதிய வீடு... பழைய வீடு... நில்... கவனி... வாங்கு..!

சொத்து வாங்கும்போது ஆள் மாறாட்டங்களால் ஏமாறுவதற்கு நிறைய வாய்ப்பிருக்கிறது. அதனால், நிலத்தை விற்பவரின் வீட்டு விலாசமும் பத்திரத்தில் குறிப்பிடப்பட்டிருக்கிற விலாசமும் ஒன்றாக இருக்கிறதா என்பதைக் கவனியுங்கள். கூடவே, அவருடைய ஆதார் கார்டில் இருக்கிற முகவரியையும் செக் செய்யுங்கள்.

நிலம் வாங்கும்போது, நீங்கள் வாங்கவிருக்கிற நிலத்தின் இரண்டு பக்கங்களிலும் கட்டப் பட்டிருக்கிற வீடுகளைக் கவனியுங்கள். உங்களிடம் ஒரு மாடி கட்ட மட்டுமே பணம் இருக்கலாம். ஆனால், நீங்கள் வாங்கவிருக்கிற நிலத்தின் இரு பக்கங்களிலும் மூன்று அடுக்கு வீடு இருந்தால், உங்கள் வீட்டுக்குக் காற்றோட்டம் கிடைக்காது.

வீடு கட்டுவதற்காக நீங்கள் நிலம் வாங்குகிற தெருவில் ஒரே நேரத்தில் எதிரும்புதிருமாக ஒரு லாரியும் ஒரு காரும் செல்ல முடியுமா என்பதைக் கவனித்த பிறகு வாங்குங்கள். இல்லையென்றால், டிராஃபிக்கில் சிக்கி தினம்தோறும் ஸ்கூல், காலேஜ் மற்றும் ஆபீஸ்க்கு தாமதமாகச் செல்ல வேண்டி வரலாம்.

சதுரம், செவ்வகமாக இல்லாமல் கோணலான நிலத்தை வாங்கினீர்கள் என்றால், வீடு கட்டும்போது வாஸ்து பிரச்னையில் ஆரம்பித்து, அதை விற்கும்போது அடிமாட்டு விலைக்குப் போவது வரை பல பிரச்னைகள் வரும்.

களிமண் மிகுந்த நிலத்தை, மண் பரிசோதனை செய்யாமல் ஏமாந்துபோய் வாங்கி வீடு கட்டினீர்கள் என்றால், வருடத்துக்கு ஒரு நூலிழை அளவுக்கு வீடு மண்ணுக்குள் இறங்குகிற ஆபத்தும் இருக்கிறது” என்றார்.

புதிய வீடோ, பழைய வீடோ அதை வாங்கும்முன் இந்த விஷயங்களை எல்லாம் மனதில்கொண்டு கவனமாக செயல்பட்டால், பிற்காலத்தில் நீங்கள் நிம்மதியாக இருக்கமுடியும் என்பதில் சந்தேகமில்லை.