Published:Updated:

மனை, பழைய வீடு வாங்க வீட்டைப் புதுப்பிக்க கடன் கிடைக்குமா?

FAQ -ஹோம் லோன்: அடிக்கடி கேட்கப்படும் கேள்விகள்

பிரீமியம் ஸ்டோரி

சௌ.சிவக்குமார், நிறுவனர், Bestservicerealty.in

மனிதனின் அடிப்படைத் தேவைகள் மூன்று. உணவு, உடை, உறைவிடம். இதில் முதல் இரண்டுக்கும் கடன் வாங்க அவசியம் இல்லை. நம்மிடம் உள்ள பணத்துக்கு ஏற்ற மாதிரி வாங்க முடியும். ஆனால், வீடு வாங்க அதிக தொகை தேவைப்படுவதால் வீட்டுக் கடன் வாங்குவது தேவையான ஒன்றாக உள்ளது. ஒருவர் மொத்தமாகப் பணம் திரட்டி வீடு வாங்கத் திட்டமிட்டால், அதற்குள் அதன் விலை உயர்ந்துவிடுகிறது. அந்த வகையில் ஒருவருக்கு சொந்த வீடு வாங்க வீட்டுக் கடன் உதவுகிறது. சொந்த வீடு வாங்குபவர்களில் சுமார் 80 சதவிகிதத்தினர் வீட்டுக் கடன் மூலம்தான் வாங்கிறார்கள். வீட்டுக் கடன் குறித்து பலருக்கும் உள்ள சந்தேகங்களுக்கான பதில்கள்...

சௌ.சிவக்குமார் 
நிறுவனர், 
Bestservicerealty.in
சௌ.சிவக்குமார் நிறுவனர், Bestservicerealty.in

வீட்டுக் கடன் எங்கு கிடைக்கும்?

“வீட்டுக் கடனை வங்கிகள், நிதி நிறுவனங்கள், வீட்டு வசதி நிறுவனங்கள் வழங்கி வருகின்றன.”

எவற்றுக்கெல்லாம் வீட்டுக் கடன் கிடைக்கும்?

“புது வீடு வாங்க, வீடு கட்ட, பழைய வீடு வாங்க, கட்டிய அடுக்குமாடிக் குடியிருப்பு வாங்க, கட்டிக்கொண்டிருக்கும் அடுக்குமாடிக் குடியிருப்பு வாங்க, வீட்டைப் புதுப்பிக்க, கூடுதல் அறைகள் கட்ட எனப் பல வகைகளுக்கும் வீட்டுக் கடன் கிடைக்கும். இந்தக் கடன்களை அனைத்து வங்கிகள் (அரசு மற்றும் தனியார்), நிதி நிறுவனங்கள், வீட்டு வசதி நிறுவனங்கள் தாராளமாகக் கொடுக்கின்றன.”

மனை வாங்க கடன் கிடைக்குமா?

“ஒரு சில வங்கிகள், வீட்டு வசதி நிறுவனங்கள் வீட்டு மனை வாங்க கடன் கொடுக்கின்றன. இதற்கான வட்டி, வீட்டுக் கடனுக்கானதைவிட சிறிது அதிகமாக இருக்கும். சில வங்கிகள், நிறுவனங்கள் மனை வாங்கி, அதில் சுமார் இரண்டு ஆண்டுகளுக்குள் வீடு கட்ட வேண்டும் என்ற நிபந்தனையுடன் கடன் அளிக்கின்றன. முதலில் மனை வாங்க கடன் தருவார்கள். பிறகு, வீடு கட்ட கடன் தருவார்கள்.

இந்தக் கடனுக்கான வட்டி, வீட்டுக் கடனுக்கு உரியதாக இருக்கும். இரண்டு ஆண்டுகளுக்குள் வீடு கட்டவில்லை என்றால் கடனுக்கான வட்டியை அதிகரித்துவிடுவார்கள். சி.எம்.டி.ஏ மற்றும் டி.டி.சிபி அமைப்புகளின் அங்கீகாரம் உள்ள மனைகளுக்குத்தான் கடன் கிடைக்கும்.”

வீட்டுக் கடன்
வீட்டுக் கடன்

வீட்டுக் கடனுக்கான வட்டி எப்படி இருக்கும்?

“வீட்டுக் கடனுக்கு நிலையான வட்டி (Fixed), மாறுபடும் வட்டி (Floating) என்ற இரு முறையில் வட்டி இருக்கிறது. ஃபிக்ஸட் வட்டி முறையில் முதல் 2 அல்லது 3 ஆண்டுகளுக்கு வட்டி விகிதம் மாறாமல் இருக்கும். அதன் பிறகு அப்போது கடன் சந்தையில் என்ன வட்டிவிகிதம் இருக்கிறதோ, அதற்கு மாற்றப்படும். ஃப்ளோட்டிங் வட்டி முறையில் ரிசர்வ் வங்கியின் வட்டி விகித மாற்றத்துக்கு ஏற்ப கடனுக்கான வட்டி விகிதம் மாற்றத்துக்கு உட்படும். இந்த வட்டி விகிதம் பொதுவாக 3 மாதம், 6 மாதத்துக்கு ஒரு முறை அதிகரிக்கவோ, குறையவோ செய்யும்.

தற்போதைய சூழ்நிலையில் ஃப்ளோட்டிங் வட்டி 6.8% தொடங்கி 7.5% வரை உள்ளது. நிலையான வட்டி விகிதம் இதை விட 1 %- 2% அதிகமாக உள்ளது. அந்த வகையில், இப்போது ஃப்ளோட்டிங் விகிதத்தைத் தேர்வு செய்வது லாபகரமாக இருக்கும் எனலாம்.”

வீட்டுக் கடனைத் திருப்பிக் கட்டும் போது, அந்தத் தொகைக்கு எப்படி வரிச் சலுகை கிடைக்கும்?

“பணக்காரர்கள் கூட வீட்டுக் கடன் வாங்கித்தான் வீடு கட்ட ஆவலாக உள்ளனர். காரணம், அதற்குக் கிடைக்கும் வரிச் சலுகையாகும். வருமான வரி பிரிவு 80சி-யின் கீழ் நிபந்தனைக்கு உட்பட்டு நிதி ஆண்டில் கட்டும் அசலில் ரூ.1.5 லட்சம் வரைக்கும் வரிச் சலுகை இருக்கிறது. திரும்பக் கட்டும் கடனில் வட்டிக்கு நிதி ஆண்டில் ரூ.2 லட்சம் வரை வரிச் சலுகை இருக்கிறது.”

வீட்டுக் கடனை எத்தனை ஆண்டுகளில் திரும்பச் செலுத்த வேண்டும்?

“பொதுவாக, ஓராண்டு தொடங்கி 40 ஆண்டுகள் வரைக்கும் ஒருவரின் வயது மற்றும் தேவையைப் பொறுத்து வீட்டுக் கடனைத் திரும்பச் செலுத்தலாம்.”

வீட்டுக் கடனை பெண்கள் பெயரில் வாங்கினால், வட்டி விகிதத்தில் சலுகை ஏதாவது இருக்கிறதா?

“பெண்கள் பெயரில் அல்லது கணவருடன் சேர்ந்து பெண்கள் வீட்டுக் கடன் வாங்கினால், வட்டியில் சிறிய தள்ளுபடி கிடைக்கும். பொதுவாக, 0.05% வட்டி குறைவாக இருக்கும். நீண்ட காலத்தில் இது ஒரு பெரிய தொகையாக இருக்கும்.”

எவ்வளவு கடன் கிடைக்கும் என்பதை முன் கூட்டியே தெரிந்துகொள்ள முடியுமா..?

“இது ஒரு சிறப்பான உத்திதான். காரணம் வேலையில் இருப்பவர்களும் சுய தொழில் செய்பவர்களும் முன் கூட்டியே (pre approved loan) கடன் தொகை தெரிந்துவிடுவதால் அதற்கு ஏற்ப வீட்டைத் தேடுவது சுலபமாக இருக்கும். இதனால், நேரம் மற்றும் செலவு மிச்சப்படும்.”

செயலாக்கக் கட்டணம் (processing fees) ஏதாவது உண்டா?

“கடன் தொகையில் 0.5% அல்லது ரூ.10,000 முதல் ரூ.30,000 வரை இருக்கும். வங்கிகளைப் பொறுத்து இந்தக் கட்டணம் சற்று மாறுபடும்.”

வீட்டுக் கடன் வாங்க தேவையான ஆவணங்கள் எவை?

“சம்பளதாரர்களுக்கு, சமீபத்திய மூன்று மாத சம்பள விவரம், சமீபத்திய ஆறு மாத வங்கி ஸ்டேட்மென்ட், வரி கணக்கு தாக்கல் விவரம், பான் கார்டு, ஆதார் கார்டு, பணி நியமனக் கடிதம் ஆகியவை தேவைப்படும்.

சுயதொழில் செய்பவர்களுக்கு கடந்த மூன்று வருட வரிக் கணக்கு தாக்கல் அறிக்கை, ஓராண்டு வங்கி பரிவர்த்தனை விவரம், நிறுவனம் குறித்த விவரம் ஆகியவை தேவைப்படும். சொத்து தொடர்பான ஆவணங்கள் என்கிற போது இரு தரப்பினருக்கும் விற்பனைக்கான ஒப்பந்தம், கட்டுமான ஒப்பந்தம், தாய் பத்திரம், குறைந்தபட்சம் 30 வருட வில்லங்கச் சான்று, அங்கீகரிக்கப்பட்ட பிளான் மற்றும் 3 முதல் 5 மார்பளவு புகைப்படங்கள், ஏற்கெனவே உள்ள கடன்கள் பற்றிய விவரங்கள் தேவைப்படும். வழக்கறிஞர் ஒப்புதல் (legal opinion), இடமதிப்பு அறிக்கை (valuation report) ஆகியவை வேண்டும்.”

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு