Published:Updated:

விற்காமல் கிடக்கும் வீடுகள்... விலை குறையாததற்குக் காரணங்கள்...!

விற்காமல் கிடக்கும் வீடுகள்...
பிரீமியம் ஸ்டோரி
News
விற்காமல் கிடக்கும் வீடுகள்...

பணமதிப்பு நீக்க நடவடிக்கையால் வீடுகளின் விற்பனை பெரிதும் தடைப்பட்ட சில மாதங்களிலேயே ஜி.எஸ்.டி வரி அறிமுகப்படுத்தப்பட்டது.

த்திய அமைச்சர் பியூஷ் கோயல், ரியல் எஸ்டேட் பில்டர்களுக்கு ஒரு வேண்டுகோள் விடுத்திருக்கிறார்... ‘‘லட்சக்கணக்கான வீடுகள் கட்டிமுடிக்கப்பட்டு பல ஆண்டுகளாக விற்காமல் கிடக்கின்றன. இந்த வீடுகளின் விலையைக் கொஞ்சம் குறைத்து விற்க முயற்சி செய்யுங்கள். இதன் மூலம் உங்களுக்குப் பணம் கிடைக்கும். இந்தப் பணத்தைக் கொண்டு புதிய ரியல் எஸ்டேட் திட்டங்களில் நீங்கள் இறங்கலாம்’’ என்பது அவர் விடுத்த வேண்டுகோள்.
விற்காமல் கிடக்கும் வீடுகள்... விலை குறையாததற்குக் காரணங்கள்...!

அமைச்சர் சொன்னதில் தவறில்லை..!

மத்திய அமைச்சர் இப்படியொரு வேண்டுகோள் விடுத்ததில் எந்தத் தவறும் இல்லை. இன்றைக்கு இந்தியா முழுக்கப் பல லட்சம் எண்ணிக்கையில் வீடுகள் கட்டி முடிக்கப்பட்டு, விற்கப்படாமல் கிடக்கின்றன. முக்கிய நகரங்களில் விற்கப்படாமல் கிடக்கும் ரூ.1.5 கோடிக்கு மேல் மதிப்புள்ள வீடுகளின் எண்ணிக்கையே பல ஆயிரங்கள் என்கிறது ஒரு புள்ளிவிவரம். (பார்க்க, அட்டவணை-1).

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz
விற்காமல் கிடக்கும் வீடுகள்... விலை குறையாததற்குக் காரணங்கள்...!

விற்கப்படாத நிலையில் பல லட்சம் வீடுகள் இருப்பதால், புதிதாக அறிவிக்கப்படும் ரியல் எஸ்டேட் திட்டங்களின் எண்ணிக்கை வெகுவாகக் குறைந்திருக்கிறது. அதாவது, 2018-ம் ஆண்டுடன் ஒப்பிட்டால், 2019-ம் ஆண்டில் புதிய ரியல் எஸ்டேட் திட்டங்களைத் தொடங்குவது 44% குறைந்திருக்கிறது (பார்க்க, அட்டவணை-2). அதாவது, நம் நாட்டின் முக்கியமான நகரங்களில் குறைந்தபட்சம் 9% முதல் அதிகபட்சம் 56% வரை விற்பனை குறைந்திருக்கிறது.

அரசாங்கத்துக்கு என்ன பிரச்னை?

இதனால் அரசாங்கத்துக்கு என்ன பிரச்னை இருக்கிறது... ஏற்கெனவே கட்டி முடிக்கப்பட்ட வீடுகள் விற்கப்படாத நிலையில் பல ஆயிரம் கோடி ரூபாய் அளவுக்கு முதலீடு முடங்கிக்கிடக்கிறது. உதாரணமாக, நம் நாட்டில் மொத்தம் 6.44 லட்சம் வீடுகள் (தனி மற்றும் அடுக்குமாடி வீடுகள்) கட்டப்பட்டுவரும் நிலையில், 78,000 வீடுகள் முழுவதுமாகக் கட்டி முடிக்கப்பட்டு, உடனடியாக விற்பனைக்குத் தயாராக உள்ளன. `இவற்றின் மதிப்பு மட்டுமே ரூ.65,950 கோடி’ என்கிறது சொத்து ஆலோசனை நிறுவனமான அனராக். தற்போது கட்டுமானம் நடந்துவரும் மொத்த வீடுகளில் இது வெறும் 12% மட்டுமே என்கிறபோது, மீதமுள்ள வீடுகளின் மதிப்பையும் கணக்கிட்டால் இந்தத் துறையில் சுமார் ரூ.2 லட்சம் கோடிக்குமேல் முதலீடு முடங்கிக் கிடக்கிறது.

உங்கள் அன்றாட தேவைகளின் அனைத்து பொருட்களையும் சிறந்த தள்ளுபடியில் வாங்க

VIKATAN DEALS

பல லட்சம் கோடி ரூபாய் முதலீடு இப்படி முடங்கிக் கிடப்பதால், வங்கிகளும் வங்கிசாரா நிதி நிறுவனங்களும் ரியல் எஸ்டேட் நிறுவனங்களுக்குத் தந்த கடன் திருப்பி வருவதில் சிக்கல் ஏற்பட்டு, வங்கிகளின் வாராக்கடன் ஏகத்துக்கும் அதிகரித்திருக்கிறது. (2016-ம் ஆண்டுக்குப் பிறகு வீட்டுக் கடன்களை நிர்வகிக்கும் நிதி நிறுவனங்களின் (HFL) வாராக்கடன்கள் ரூ.2 லட்சம் கோடியைத் தாண்டியுள்ளது). இதனால் புதிதாகக் கடன் வாங்க முடியாத நிலை ரியல் எஸ்டேட் பில்டர்களுக்கு ஏற்பட்டிருக்கிறது. ஏற்கெனவே கட்டி முடிக்கப்பட்ட வீடுகள் விற்பனையாகாத நிலையில், புதிதாக நடக்க வேண்டிய கட்டுமான வேலைகள் சுணக்கம் கண்டுள்ளன. இதன் காரணமாக, இரும்பு, சிமென்ட் மற்றும் கட்டடம் கட்டத் தேவையான கட்டுமானப் பொருள்களுக்கான தேவை கணிசமாகக் குறைந்திருக்கிறது. இதனால் பல லட்சம் பேருக்கும் வேலை கிடைப்பது குறைந்திருக்கிறது. வருமானம் குறைந்ததால், மக்கள் செலவு செய்வது குறைந்து, பொருளாதாரம் சுணக்கம் கண்டிருக்கிறது.

ரியல் எஸ்டேட்
ரியல் எஸ்டேட்

இதற்கெல்லாம் ஒரு தீர்வாகத்தான் கட்டிமுடிக்கப்பட்ட வீடுகளின் விலையைக் குறைத்து விற்கச் சொல்லியிருக்கிறார் மத்திய அமைச்சர் பியூஷ் கோயல்.

விலையைக் குறைக்க முடியாத காரணங்கள்..!

விற்கப்படாத வீடுகளின் விலையைக் குறைத்து விற்க முடியாத நிலையிலிருக்கின்றன ரியல் எஸ்டேட் நிறுவனங்கள். இதற்கான காரணங்கள் என்னென்ன?

அதிக விலையில் வாங்கிய நிலம்

2011-ம் ஆண்டுக்குப் பிறகு நிலம் வாங்கி, அடுக்குமாடிக் குடியிருப்புகளைக் கட்டத் தொடங்கிய ரியல் எஸ்டேட் நிறுவனங்கள் அதிக விலைக்கு நிலத்தை வாங்கியுள்ளன. பல நிறுவனங்களும் இதுபோல அதிக விலைக்கு நிலம் வாங்கியதால், அதிக விலை வைத்து விற்க வேண்டிய நிலையிலிருக்கின்றன. இதனால்தான் அதிக எண்ணிக்கையிலான அடுக்குமாடிக் குடியிருப்பு வீடுகள் விற்பனை ஆகாமல் இருக்கின்றன.

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

முன்பணம் பெற முடியவில்லை!

ஒரு காலத்தில் ரியல் எஸ்டேட் டெவலப்பர்கள் நிலத்தை வாங்கியவுடன், கொஞ்சம் சொந்தப் பணம், கொஞ்சம் கடன் பணம் எனப் போட்டு அடுக்குமாடிக் குடியிருப்பைக் கட்டத் தொடங்குவார்கள். அடுக்குமாடிக் குடியிருப்புகளுக்கான தேவை அப்போது அதிகமாக இருந்ததால், வீடு வாங்க விரும்புவோர் வீடு கட்டி முடிப்பதற்கு முன்பே முன்பணம் தந்துவிடுவார்கள். வீடு கட்டும் பணி தொடர்ந்து நடக்க இந்த முன்பணம் ரியல் எஸ்டேட் டெவலப்பர்களுக்கு மிகவும் உதவியாக இருந்தது. இவ்வாறு பெறப்பட்ட ரொக்கம் முதல் பணிக்கும், இரண்டாவது பணிக்குமான முதலீட்டு சங்கிலித் தொடர்பை ஏற்படுத்திவிட்டன. 2005-ம் ஆண்டு முதல் 2010-ம் ஆண்டு வரை சந்தையில் தேவை இருந்த காரணத்தால் எந்தச் சிக்கலும் வரவில்லை. 2011-ம் ஆண்டுக்குப் பிறகு வீடுகளின் விற்பனை குறைந்ததால், கட்டுமானப் பணிகள் தொய்வைச் சந்திக்க நேரிட்டன.

அடுக்குமாடி வீடு
அடுக்குமாடி வீடு

தற்போது முன்பணம் கொடுக்க யாருமே தயாராக இல்லை. தவிர, வீடு வாங்க விரும்புவோரிடமிருந்து முன்பணம் வாங்கினால், அதைக் கட்டடம் கட்ட மட்டுமே பயன்படுத்த வேண்டும். `வேறு எந்தக் காரணத்துக்கும் அந்தப் பணத்தைப் பயன்படுத்த முடியாது’ என்கிறது ரெரா அமைப்பு. எனவே, முன்பணம் பெறுவதில் பல நிறுவனங்கள் ஆர்வம் காட்டுவதில்லை.

சேமிப்பைக் குறைத்த வருமானம்!

கடந்த பத்து ஆண்டுகளில் கச்சா எண்ணெய் சராசரியைவிட மிக அதிகமாக இருந்ததால், அரசின் நிதிச்சுமை அதிகரித்தது. இதே காலத்தில், அமெரிக்க டாலரின் மதிப்பு உயர்ந்து, இந்திய ரூபாயின் மதிப்பு குறைந்தது. இதனால் அரசின் நிதிப் பற்றாக்குறை அதிகரித்து, பணவீக்கத்துக்கு ஒரு காரணமாகவும் அமைந்தது. சம்பாதிப்பதில் பெரும் பணம் செலவாகும் நிலையில், சொந்தமாக ஒரு வீட்டை வாங்க வேண்டும் என்ற எண்ணம் பலருக்கும் வரவே இல்லை.

அதிகரிக்காத நிலத்தின் மதிப்பு

2010-ம் ஆண்டு முதல் சென்னையிலும், 2012-க்குப் பிறகு தமிழகத்தின் பிற பகுதிகளிலும் நிலத்தின் மதிப்பு அதிகரிக்கவே இல்லை. 2001 முதல் 2010 வரையிலான பத்து ஆண்டுகளில் நிலத்தின் மதிப்பு பத்து மடங்கு அதிகரித்தது. அதேபோல இனியும் விலை உயரும், அதிக லாபம் கிடைக்கும் என்று எதிர்பார்த்து 2011-ம் ஆண்டு முதல் பலரும் நிலத்தில் முதலீடு செய்தார்கள். ஆனால், கடந்த 10 ஆண்டுகளில் நிலத்தின் மதிப்பு ஓரளவுக்கே உயர்ந்திருப்பதைக் கண்டு, முதலீட்டாளர்கள் ஏமாற்றத்தில் இருக்கின்றனர். பத்திரப்பதிவுக்கான கட்டணம் உயர்த்தப்பட்டது, கட்டுமானப் பணிகள் பாதியிலேயே நிறுத்தப்பட்டது போன்ற பல காரணங்களால், ரியல் எஸ்டேட்டில் மக்கள் முதலீடு செய்ய மறுத்ததாலேயே நிலத்தின் மதிப்பு அதிகரிக்கவில்லை.

அடுக்குமாடி வீடு
அடுக்குமாடி வீடு

கழுத்தை நெரித்த கடன்..!

அடுக்குமாடிக் குடியிருப்பு களுக்கான தேவை குறைந்து, வீடுகள் விற்பனை ஆகாததால், ரியல் எஸ்டேட் பில்டர்கள் வாங்கிய கடனைத் திருப்பிச் செலுத்த முடியாத நிலை ஏற்பட்டது. `ரியல் எஸ்டேட் நிறுவனங்களின் வாராக்கடன் மட்டுமே ரூ.70,000 கோடிக்குமேல் இருக்கும்’ என்று மதிப்பிடப்பட்டிருக்கிறது. வீடுகள் விற்பனை கணிசமாகக் குறைந்திருப்பதால், அசலையும் வட்டியையும் செலுத்த முடியாமல் தவிக்கின்றன ரியல் எஸ்டேட் நிறுவனங்கள்.

கட்டடங்கள் முழுமை பெறாத நிலையிலும், ஒரு சில நிறுவனங்கள் முழுமையாக முடித்த பிறகும் காலதாமதத்துக்கான வட்டியையும் சேர்த்து விற்பனை விலையாக அறிவித்தன. இந்த விலையை, வீடு வாங்க விரும்புபவர் மிக மிக அதிகமாக நினைப்பதால் பல வீடுகள் ‘அன் சோல்டு இன்வென்ட்ரி’-ஆக மாறியுள்ளன. வங்கிகள் ரியல் எஸ்டேட் நிறுவனங்களுக்கு மட்டுமல்லாமல், இந்தத் துறை சார்ந்த மற்ற நிறுவனங்களுக்கும் கடனுதவி செய்ததும், வங்கிகளுக்குப் பெரும் நிதிச்சுமையாக மாறியுள்ள நிலையில், புதிய கடன்களை வழங்க முனைப்புக் காட்டவில்லை

பணமதிப்பு நீக்கமும் ஜி.எஸ்.டி-யும்!

கட்டி முடிக்கப்பட்ட வீடுகள் விற்காமலிருப்பதற்கு இன்னொரு முக்கியமான காரணம், 2016-ம் ஆண்டு கொண்டுவரப்பட்ட பணமதிப்பு நீக்க நடவடிக்கையும், 2017-ம் ஆண்டு கொண்டு வரப்பட்ட ஜி.எஸ்.டி-யும்தான். பணமதிப்பு நீக்கத்துக்குப் பிறகு ரொக்கமாகப் பணம் கைமாறுவது தடுக்கப்பட்டதால், பலரும் வீடு வாங்கி, நிலத்தில் முதலீடு செய்யத் தயக்கம் காட்டினர்.பணமதிப்பு நீக்க நடவடிக்கையால் வீடுகளின் விற்பனை பெரிதும் தடைப்பட்ட சில மாதங்களிலேயே ஜி.எஸ்.டி வரி அறிமுகப்படுத்தப்பட்டது. வீடு கட்டும் நிறுவனங்கள் உள்ளீட்டு வரிமுறையைப் பயன்படுத்தும்போது, அதை நுகர்வோருக்குத் திருப்பிவிட முடியாத நிலை ஏற்படுகிறது. இதனால், கட்டுமானச் செலவினங்கள் அதிகரிக்கின்றன. இதுவும் அடுக்குமாடிக் குடியிருப்புகளின் விற்பனை விலையில் சேர்க்கப்படுவதால், விலை மேலும் அதிகரிக்கிறது.

ரியல் எஸ்டேட்
ரியல் எஸ்டேட்

வாங்கக்கூடிய விலையிலான வீடுகள்!

கட்டுமானத்துறையில் நீண்டகாலமாக தொய்வு காணப்படுவதை அறிந்து பல்வேறு நடவடிக்கைகளை எடுத்தது மத்திய அரசாங்கம். வாங்கக்கூடிய விலையிலான வீடுகளைக் கட்டித் தர வேண்டும் என்ற நோக்கில் பல சலுகைகள் தரப்பட்டதாலும் அடுக்குமாடிக் குடியிருப்பின் தேவை குறையவே செய்தது.

என்னதான் தீர்வு?

சிக்கல்களிலிருந்து ரியல் எஸ்டேட் துறை மீள வேண்டு மெனில் சில வழிமுறைகளைக் கையாளலாம்.

1. விற்காமல் இருக்கும் வீடுகளின் எண்ணிக்கையைக் குறைக்க வேண்டுமெனில், வீடு வாங்க நினைப்பவரின் வருமானப் பின்னணியை அறிந்து, கடன் அடைக்கும் காலத்தின் அளவை வங்கிகளின் ஒத்துழைப்புடன் நீட்டித்துத் தரலாம்.

2. குறிப்பிட்ட காலத்துக் குள்ளாக வீடுகளை வாங்குபவர்களுக்குப் பத்திரப்பதிவு செலவினங்களைத் தள்ளுபடி செய்தோ அல்லது சற்றுக் குறைத்தோ தருவதன் மூலம் `வீடு வாங்கலாம்’ என்ற எண்ணத்தில் இருப்பவர்கள் வீடு வாங்குவதற்கு வாய்ப்புண்டு.

3. அதிக உயரமான கட்டடங்களில் ஒவ்வொரு தளத்துக்கும் வித்தியாசமான விலை இருக்கும்பட்சத்தில் அவற்றைச் சமன்படுத்தி, பாகுபாடற்ற விலை நிர்ணயம் செய்யலாம்.

4. அடுக்குமாடிக் குடியிருப்பு வளாகத்தில் அத்தியாவசியத் தேவைக்கான வசதிகள் மட்டும் செய்து, மற்றவற்றைத் (நீச்சல்குளம், உடற்பயிற்சிக் கூடம் முதலியவை) தவிர்த்துவிடலாம்.

5. முக்கிய கட்டுமானப் பொருள்கள்மீது விதிக்கப்படும் ஜி.எஸ்.டி வரியைச் சற்றுத் தளர்த்தலாம்.

6. நிறுவனங்கள், வங்கிகளுடன் கலந்தாலோசித்து குறிப்பிட்ட காலத்துக்கு விலை தள்ளுபடி தந்து, வங்கிக்கடனை அடைக்க முயலலாம்.

இப்படிப் பல முயற்சிகளை மேற்கொள்வதன் மூலம் விற்காமல் இருக்கும் வீடுகளை விற்பதற்கான முயற்சிகளை மேற்கொள்ளலாம்.கடந்த சில ஆண்டுகளாகவே மோசமான நிலையிலிருக்கும் ரியல் எஸ்டேட் துறை, கொரோனாவுக்குப் பிறகு இன்னும் மோசமடைய வாய்ப்பிருப்பதாகச் சொல்லப்படுகிறது. நகர்ப்புறங்களில் புதிய வீடுகளுக்கான தேவை குறைந்து, புறநகர்களில் புதிய வீடுகளுக்கான தேவை ஏற்பட வாய்ப்புண்டு என்பதை கவனிக்க வேண்டும்.

புலம்பெயர்ந்து வந்த கட்டுமானத் தொழிலாளர்கள் மீண்டும் அவர்களின் ஊருக்கே சென்றுவிட்டதால், அதிக சம்பளம் தந்து கட்டடப் பணிகளை முடிக்க வேண்டிய நிர்பந்தம் ஏற்பட்டுள்ளது. சிமென்ட் (+10%), கம்பி  (+6%), மணல் (15%) எனக் கட்டுமானப் பொருள்களின் விலை அதிகரித்திருப்பது போன்ற காரணங்கள் வீடுகளின் விற்பனையை மேலும் தொய்வடையச் செய்யும் எனக் கருதப்படுகிறது.

ஆக, இந்தப் பிரச்னைக்குத் தீர்வு காணப்பட வேண்டுமெனில், ரியல் எஸ்டேட் பில்டர்களும் அரசும் சேர்ந்து செயல்பட்டால் மட்டுமே முடியும். இரு தரப்பினரும் சேர்ந்து செயல்பட நடவடிக்கை எடுக்கப்படும் என்று எதிர்பார்ப்போம்!

மத்திய அமைச்சரின் கருத்து தவறானது!

டாக்டர் ஆர்.குமார், தலைவர், நவீன் ஹவுஸிங்

விற்காமல் கிடக்கும் வீடுகள்... விலை குறையாததற்குக் காரணங்கள்...!

‘‘வீடுகளின் விலையைக் குறைக்கச் சொல்லும் மத்திய அமைச்சரின் கருத்து தவறானது. ஸ்டீல், சிமென்ட், நிலம் விலை குறைக்கப்படவில்லை. பத்திரப்பதிவு கட்டணம், கட்டுமானப் பொருள்கள் மீதான வரி, அப்ரூவல் கட்டணம், ரியல் எஸ்டேட் மீதான ஜி.எஸ்.டி என அரசுத் தரப்பில் எதையும் குறைக்காமல் ரியல் எஸ்டேட் விலையைக் குறைக்கச் சொல்வது என்ன நியாயம்?

ரியல் எஸ்டேட்
ரியல் எஸ்டேட்

கடந்த பத்து ஆண்டுகளில் ரியல் எஸ்டேட் விலை 40% அதிகரித்திருக்கிறது. ஆண்டுக்குச் சராசரியாக 4% மட்டுமே வளர்ச்சி. ஆனால், ரியல் எஸ்டேட் பில்டர்கள் வாங்கிய கடனுக்கு 13-18% வரை வட்டி செலுத்தியிருக்கிறார்கள். பொருளாதார மந்தநிலை மற்றும் கோவிட்-19 பாதிப்பால் அதிகம் பாதிக்கப்பட்டிருப்பது ரியல் எஸ்டேட்தான். இதில் விலையைக் குறைத்து விற்றால், நஷ்டம் இன்னும் அதிகமாகும். தற்போது தேவையைவிட அதிக எண்ணிக்கையில் வீடுகள் விற்பனைக்கு இருப்பதால், விலை ஏற்கெனவே கணிசமாகக் குறைந்துள்ளது. இந்த நிலையில், விலையை மேலும் குறைத்தால், கடும் பாதிப்பு ஏற்படும். வீடு விற்பனை அதிகரிக்க வேண்டுமென்றால் திருப்பிச் செலுத்தும் வீட்டுக் கடன் அசல் தொகை மற்றும் வட்டிக்கு முழுமையாக வரிச் சலுகை அளிக்க வேண்டும். வீட்டுக் கடன் வட்டியை இன்னும் குறைக்க வேண்டும்.”

ரியல் எஸ்டேட்
ரியல் எஸ்டேட்

‘‘விலையை மேலும் குறைக்க இயலாது..!’’

அருண், நிர்வாக இயக்குநர், காசா கிராண்ட்.

விற்காமல் கிடக்கும் வீடுகள்... விலை குறையாததற்குக் காரணங்கள்...!

‘‘தற்போது ரியல் எஸ்டேட் துறை மிகக் கடுமையான, பெரிய அளவிலான இழப்பைச் சந்தித்திருக்கிறது. கட்டுமானப் பணிக்கான பொருள்களின் விலை அதிகரிப்பு, கட்டுமானப் பணிகளை மேற்கொள்வதற்கான தொழிலாளர்கள் இல்லாதது என இந்தத் துறை தொடர்ந்து பல சிக்கல்களைச் சந்தித்துவருகிறது. இத்தகைய சூழலில், நாங்கள் ஏற்கெனவே மிகக் குறைந்த விலைக்கு வீடுகளை விற்கிறோம். இதற்கு மேலும் விலையைக் குறைக்க இயலும் என்று தோன்றவில்லை. சவால்கள் நிறைந்த இந்தக் காலகட்டத்தில் ஒருவரது வழக்கமான செலவினங்கள் மற்றும் கடன் பொறுப்புகளுக்கு எந்தச் சிரமத்தையும் தராமல் ஒரு வீட்டை வாங்குவதற்கான வழிகளை நாங்கள் எங்கள் வாடிக்கையாளர்களுக்குச் செய்து தருகிறோம். இதற்கும் மேலாக, ரியல் எஸ்டேட் துறைக்கான ஜி.எஸ்.டி விகிதத்தைக் குறைப்பது மற்றும் வீட்டுக் கடன்கள்மீது குறைவான வட்டி விகிதத்தை அமல்படுத்துவது போன்ற திட்டங்கள், இந்தத் துறை இப்போது எதிர்கொண்டு வரும் கடும் சவால்களிலிருந்தும், சிரமத்திலிருந்தும் விரைவாக மீண்டுவர உதவும்.’’

- சேனா சரவணன்