Published:Updated:

கம்பெனி ஸ்கேன் : ஆர்பிட் எக்ஸ்போர்ட்ஸ்!

கம்பெனி ஸ்கேன் : ஆர்பிட் எக்ஸ்போர்ட்ஸ்!

கம்பெனி ஸ்கேன் : ஆர்பிட் எக்ஸ்போர்ட்ஸ்!

கம்பெனி ஸ்கேன் : ஆர்பிட் எக்ஸ்போர்ட்ஸ்!

Published:Updated:

இந்த வாரம் நாம் ஸ்கேனிங் செய்ய  எடுத்துக்கொண்டுள்ள கம்பெனி 1983-ல் ஒரு சிறிய துணி நெய்கின்ற நிறுவனமாக ஆரம்பிக்கப்பட்டு, இன்றைக்கு ஃபேன்சி துணி ரகங்கள் ஏற்றுமதியில் முன்னணி நிறுவனமாக இருக்கும் ஆர்பிட் எக்ஸ்போர்ட்ஸ் என்ற நிறுவனம். இந்திய அரசாங்கத்தால் அங்கீகரிக்கப்பட்ட ஒரு ஏற்றுமதி நிறுவனமாகும் இது.

பெண்கள் அணியும் டிசைனர் வகை ஆடைகளில் பயன்படுத்தப்படும் துணிகளை (ஹை எண்ட் ஃபேன்சி ஃபேப்ரிக்ஸ்) ஏற்றுமதி செய்கிறது இந்த நிறுவனம். ஜாரா, கேல்வின் கிளெயின், டிபென்ஹாம்ஸ் போன்ற உலகின் சிறந்த பிராண்டுகள் இந்த நிறுவனத்தின்  வாடிக்கையாளர்கள் ஆவார்கள். இந்தியாவிலிருந்து அதிக அளவில் கிறிஸ்துமஸ் ரிப்பன் மற்றும் ஏனைய பண்டிகைகளுக்கான துணிமணிகளை ஏற்றுமதி செய்யும் நிறுவனமாகவும் இது திகழ்ந்து வருகிறது. மிகவும் தனிச்சிறப்பு வாய்ந்த துணிமணிகளையும் ஃபேன்சி ஃபேப்ரிக்குகளையும் ஏற்றுமதி செய்வதால், நல்லதொரு  லாபத்தைப் பார்க்கும் வாய்ப்பை இந்த நிறுவனம் தன்வசம்  வைத்திருக்கிறது எனலாம்.

தயாரிப்புகள் என்னென்ன?

ஒட்டுமொத்த விகடனுக்கும் ஒரே ஷார்ட்கட்!

குறைந்த விலையில் பட்டைப் போன்றே தோற்றமும் உணர்வும் எடுப்பும் தரக்கூடிய பாக்ஸ் சில்க் எனப்படும் துணிமணிகளை வடிவமைத்து உற்பத்தி செய்து ஏற்றுமதி செய்கிறது இந்த நிறுவனம். ஆடைகளில் டிசைனை துணிகளுடன் இணைக்கும் ஜாக்குவார்ட் என்ற லேஸ் போன்ற துணிகளைத் தயாரித்து ஏற்றுமதி செய்கிறது.

கம்பெனி ஸ்கேன் :  ஆர்பிட் எக்ஸ்போர்ட்ஸ்!

இந்த நிறுவனத்திடம், இந்தியாவின் நெய்தல் தொழில் நுட்பமும் உலகளாவிய சந்தை அனுபவமும் இருப்பதால் நல்ல தரமான மற்றும் ஸ்டைலான ஜாக்குவார்ட்களைத் தயாரிக்க முடிகிறது. கிறிஸ்துமஸ் காலத்தில் அயல்நாட்டில் அணியும் டிசைனர் சாக்ஸ்கள், ட்ரி ஸ்கர்ட்கள், டேபிள் ரன்னர்கள் போன்றவற்றையும் தயாரித்து ஏற்றுமதி செய்கிறது இந்த நிறுவனம்.

தரத்தை அதிகமாக விரும்பும் நாடு களான அமெரிக்கா மற்றும் ஐரோப்பாவின் ரசனைக்கு ஏற்றாற்போல் மிகவும் தரம் மற்றும் கவர்ச்சிகரமான தோற்றம் கொண்ட டெனியர்ஸ், காட்டன், அக்ரிலிக் மற்றும் மெட்டாலிக் யார்ன்களைக் கொண்டு இந்த நிறுவனத்தின் தயாரிப்புகள் செய்யப் படுவதால் விற்பனை அமோகமாக இருக்கிறது எனலாம்.
ஏன் முதலீட்டுக்காக  பரிசீலிக்கலாம்?

இந்த நிறுவனம்  மூன்று முக்கியமான தயாரிப்புகளை ஏற்றுமதி செய்கிறது. ஃபேஷன் ஜாக்குவார்ட்ஸ், பாக்ஸ் சில்க், கிறிஸ்துமஸ் போன்ற பண்டிகைகள் மற்றும் எல்லாவிதமான கொண்டாட்டங் களுக்காகவும் பயன்படுத்தப்படும்  மேட்-அப்ஸ் என்ற வகைத் துணிமணி களே அவையாகும்.

கடந்த நிதியாண்டில் இந்த நிறுவனத்தின் உற்பத்தியில் பாதிக்கும் மேற்பட்ட அளவுக்கான துணிமணிகள் பிரைவேட் லேபிளாகவே விற்பனை செய்யப்பட்டுள்ளது குறிப்பிட்டுச் சொல்லக்கூடிய விஷயமாகும். ஏனென்றால், இதுபோன்ற விற்பனையில் லாபத்தின் அளவு சற்று அதிகமாக இருக்க வாய்ப்புள்ளது.

கம்பெனி ஸ்கேன் :  ஆர்பிட் எக்ஸ்போர்ட்ஸ்!

கம்பெனியின் மொத்த வருமானத்தில் மேட் அப்ஸ் விற்பனையின் அளவு ஏறக்குறைய 10%  இருந்தது. மீதமுள்ள 90 சதவிகிதமும் ஏனைய வகையறாக்களை மொத்த விற்பனை செய்ததில் கிடைத்த தாகும்.

இந்த நிறுவனத்தின் தனித்துவமே மிகவும் சிறப்பு வாய்ந்த தயாரிப்புகளை உற்பத்தி செய்வதேயாகும். ஒவ்வொரு பண்டிகை காலத்துக்கும் இந்த நிறுவனத்தின் டிசைன் ஸ்டுடியோ ஏறக்குறைய இரண்டாயிரம் புதிய டிசைன்களை உருவாக்குகிறது. ஒருமுறை உருவாக்கி உபயோகிக்கப்பட்ட டிசைன் மறுமுறை உபயோகிக்கப்படுவதே யில்லை எனலாம்.

அதேபோல், ஷோரூம் ஷெல்ஃபில் நீண்ட நாட்கள் இந்த டிசைன்கள் தங்குவதேயில்லை என்பதும் குறிப்பிடத்தக்க ஒரு விஷயமாகும். பெண்களுக்கான ஃபேன்சி ஃபேப்ரிக்குகளும், பண்டிகைகளுக்கான சிறப்பு உடைகளும் ஆதலால், இந்த வகை மேன்மையைத் தொடர்ந்து தக்கவைத்துக்கொண்டே இருப்பது இந்த நிறுவனத்துக்கு மிகவும் அவசியமான குணாதிசயமாகத் திகழ்கிறது.

இந்த நிறுவனத்தின் போட்டியாளர் களாக இத்தாலிய நிறுவனங்கள் பலவும் திகழ்ந்துவருகிறது. இருப்பினும் இந்த நிறுவனம் நல்லதொரு மார்க்கெட் ஷேரை தன்வசத்தே கொண்டுள்ளது. 

மேலும், தனது தயாரிப்புகளை நல்லதொரு பிரீமியம் விலையில் விற்றாலுமே ஏனைய இத்தாலிய போட்டி நிறுவனங்களின் தயாரிப்புகளை விட கணிசமான அளவு குறைந்த விற்பனை விலையிலேயே (போட்டியாளர்களைவிட இரண்டு அல்லது மூன்று மடங்கு விலை குறைவாக) இந்த நிறுவனத்தினால் தனது தயாரிப்புகளை விற்பனை செய்ய முடிகிறது எனலாம். இதனால் இந்த நிறுவனம் தனது மார்க்கெட் ஷேரை தக்கவைத்துக்கொள்ள முடியும் என உறுதியாகச் சொல்லலாம்.

கம்பெனி ஸ்கேன் :  ஆர்பிட் எக்ஸ்போர்ட்ஸ்!

இதையும் தாண்டி மூலப்பொருட் களின் விலை ஏற்றம் எதுவும் வந்தாலுமே அதை விலையை அதிகரிப்பதன் மூலம் சரிக்கட்டுவதற்கான சூழ்நிலையும் இந்த நிறுவனத்துக்கு இருக்கிறது என்பதையும் முதலீட்டாளர்கள் புரிந்துகொள்ள வேண்டும்.

தரம் மற்றும் டிசைனைப் பொறுத்தவரை, தனித்துவம் மிக்க நிறுவனமாக இருப்பதால் மிகவும் மதிப்புக்கூட்டப்பட்ட உடைகளையே தயாரித்து விற்பனை செய்துவருகிறது இந்த நிறுவனம். இப்படி உயரிய தனித்துவமிக்கப் பொருட்கள் தயாரிப்பில் இருப்பதாலேயே நல்லதொரு லாப சதவிகிதத்தைத் தக்கவைத்துக்கொண்டுள்ளது இந்த நிறுவனம்.

ஏனைய பொதுவான விலை குறைந்த ஆடை உற்பத்தி சந்தையில் போட்டி அதிகம் என்பதால் லாப விகிதமும் மிகக் குறைவாகவே இருப்பதால், வாய்ப்புகள் இருக்கிறபோதிலும் இந்த நிறுவனம் பிரீமியம் சந்தைக்கான உற்பத்தியை மட்டுமே செய்து விற்பனை செய்து வருகிறது.

கடந்த ஆண்டு வரை இந்த நிறுவனம் தனது மொத்த விற்பனையில் சுமார் 30 சதவிகித அளவிலான துணிகளையே சொந்தமாகத் தயாரித்து வந்தது. ஏனைய துணிவகைகளை கிட்டத்தட்ட 70 சதவிகிதம் அவுட்சோர்ஸ் செய்தே விற்பனை செய்துவருகிறது.  கடந்த ஆண்டில் பெரிய அளவிலான முதலீட்டை விரிவாக்கத்துக்காக ஒதுக்கி, அதற்கான கட்டுமானத்தைச் செய்துள்ளது இந்த நிறுவனம். இதன்மூலம் தனது உற்பத்தித்திறனை ஏறக்குறைய இரட்டிப்பாக்கிக் கொண்டுள்ளது.

கம்பெனி ஸ்கேன் :  ஆர்பிட் எக்ஸ்போர்ட்ஸ்!

நடப்பு நிதியாண்டில் சுமார் 40 சதவிகித அளவிலான துணிவகைகளையே இந்த நிறுவனம்  அவுட்சோர்ஸிங் மூலம் கொள்முதல் செய்து விற்றுவருகிறது.

இதிலும் இந்த நிறுவனம் மிகவும் கவனமாகச் செயல்பட்டுள்ளது. எப்படி எனில், அதிக மதிப்புக்கூட்டுதல் மற்றும் லாபம் அதிகமுள்ள துணிவகைகளையே இந்த விரிவாக்கத் திட்டத்தில் உற்பத்தி செய்ய, வசதிகளை ஏற்படுத்திக்கொண்டது. மீதமிருக்கும் 40 சதவிகித அளவு துணிமணிகள் (அவுட்சோர்ஸ் செய்யப்படுவது), குறைந்த லாபத்தைத் தரும் வகையறாவைச் சேர்ந்தவையேயாகும்.

இந்தியாவின் மொத்த ஏற்றுமதி வர்த்தகத்தில் ஏறக்குறைய 16 சதவிகித அளவை ஜவுளித்துறை தன்வசத்தே கொண்டுள்ளது. அதனால் அரசாங்கம் இந்தத் துறைக்கு பல்வேறு வகையான ஊக்கத்தொகைகளையும் உதவித்தொகைகளையும் வழங்கி வருகிறது. சென்ற ஆண்டு ஏறக்குறைய 45 மில்லியன் ரூபாய் அளவிலான ஊக்க மற்றும் உதவித்தொகையை அரசாங்கத்திடம் இருந்து பெற்றுள்ளது.

நல்ல ரிட்டர்ன் ஆன் ஈக்விட்டி சதவிகிதத்தையும், ஓரளவுக்கு  குறைந்த கடன் அளவினையும் கொண்டுள்ளது இந்த நிறுவனம் என்பது  குறிப்பிடத்தக்க தகவலாகும்.

ரிஸ்க் ஏதும் உண்டா?

முழுக்க முழுக்க ஏற்றுமதி செய்யும் நிறுவனம் என்பதால்,  அந்நிய செலாவணியின் மதிப்பு மாறுதல் என்பது பெரிய அளவில் லாபத்தைப் பாதிக்கும் வாய்ப்பாக இருக்கவே செய்கிறது.

ஏனைய பொருளாதாரச் சுணக்கம் மற்றும் போட்டியாளர்களின் விலை குறைப்பு போன்ற ரிஸ்க்குகளும் இந்த நிறுவனத்துக்கு இருக்கவே செய்கிறது எனலாம்.

கடந்த கால செயல்பாட்டையும் உற்பத்தி செய்து விற்பனை செய்துவரும் பொருட்களின் தரத்தையும் லாப அளவினையும் பார்க்கும்போது, இந்தப் பங்கை முதலீட்டாளர்கள் குறித்துவைத்துக் கொண்டு ட்ராக் செய்துவரலாம்.

சந்தையில் இறக்கம் வரும்போது நீண்ட முதலீட்டுக்காக, சிறியதொரு கம்பெனியாக இருப்பதால் குறைந்த எண்ணிக்கையில் வாங்கிப்போடலாம்.

- நாணயம் ஸ்கேனர்


(குறிப்பு: இந்தப் பகுதி இன்றைய விலையிலேயே  வாங்க வேண்டிய பங்கு பரிந்துரை பகுதி அல்ல. இதில் சொல்லப்பட்டுள்ள பங்குகளை வாங்குவது முதலீட்டாளர்களின் தனிப்பட்ட முடிவாகும்.)

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism