எஃப்டி, லிக்விட், டெப்ட் ஃபண்ட்...குறுகிய கால முதலீட்டுக்கு எது பெஸ்ட்?

ந ம்மில் பலருக்கு கையில் இருக்கும் கணிசமான அளவு பணம் உடனடியாக தேவைப்படாமல், சில வாரங்களோ அல்லது சில மாதங்களோ கழித்து தேவைப் படுவதாக இருக்கும். அதுவரை அந்தப் பணத்தை பாதுகாப்பாக வைத்திருப்பதுடன், கூடுதல் வருமானம் தந்தால் நன்றாக இருக்குமே என்பதுதான் பலரது எதிர்பார்ப்பு. எந்த வகையில் வைத்திருந்தால் கூடுதல் லாபம் கிடைக்கும்..?

. முதலீட்டுத் திட்டங்கள்!

. பெரும்பாலானவர்கள் குறுகிய காலத் தேவைக்கான பணத்தை வங்கி சேமிப்புக் கணக்கில் வைத்திருக்கிறார்கள். இது தவறு. ஏனெனில் வங்கிக் கணக்கில் 4 சதவிகிதம்தான் வட்டி கிடைக்கும். இதற்கு அடுத்து பலரும் ஃபிக்ஸட் டெபாசிட், லிக்விட் ஃபண்ட் மற்றும் கடன் ஃபண்டுகளையும் நாடுகிறார்கள். இவற்றில் எது பெஸ்ட்?

. ஃபிக்ஸட் டெபாசிட்!

. ஃபிக்ஸட் டெபாசிட் திட்டத்தைப் பொறுத்தவரை, குறிப்பிட்ட காலத்துக்கு நம் பணத்தை டெபாசிட் செய்து வைக்கலாம். இதில் ஒரு ஆண்டுக்கு 8 -8.50% வட்டி கிடைக்கும். இதிலிருந்து இடையில் பணத்தை எடுத்தால் வட்டி இழப்பு ஏற்படும்.

. அதாவது, ஒரு வருடத்துக்கு ஃபிக்ஸட் டெபாசிட் போட்டு அதை இடையில் எடுக்கும்போது வட்டி இழப்பு ஏற்படும். மேலும், இடைப்பட்ட காலத்தில் டெபாசிட்டை எடுத்ததற்கு அபராதமும் இருக்கும். இப்படி சில அசெளகரியங்கள் இதில் இருந்தாலும், வங்கிகளின் மீது உள்ள நற்பெயர் காரணமாக பெருபான்மை மக்களின் தேர்வாக இருக்கிறது வங்கி ஃபிக்ஸட் டெபாசிட்.

. லிக்விட் ஃபண்ட்!

. லிக்விட் ஃபண்ட் திட்டத்தில் எப்போது வேண்டுமானாலும் பணத்தை முதலீடு செய்யலாம். எப்போது வேண்டுமானாலும் அதைத் திரும்ப எடுக்க முடியும். இந்தத் திட்டங்களில் முதலீடு செய்யப்படும் தொகையானது நிதிச் சந்தையில் முதலீடு செய்யப்படும். முதலீடு செய்யப்படும் திட்டங்கள் மிகவும் குறுகிய காலத்தில் முதிர்வடையக் கூடியதாக இருக்கும். இதில் முதலீடு செய்யும் பணத்தை எவ்வளவு நாட்களுக்கு முதலீடு செய்து வைத்திருக்கிறீர்களோ, அதற்கேற்ப வருமானம் கிடைக்கும்.

. இதில் வங்கி ஃபிக்ஸட் டெபாசிட்டைவிடக் கூடுதலாக வருமானம் கிடைக்கும். அதாவது, லிக்விட் ஃபண்ட் வகையைச் சார்ந்த ஃபண்டுகளில் மிகச் சுமாரான ஃபண்டுகள்கூட 8.33 சதவிகிதத்துக்கு மேல் வருமானம் கொடுத்துள்ளது. அதுவே சிறந்த ஃபண்டுகள் 9 சதவிகிதத்துக்கு மேல் வருமானம் தந்துள்ளது.

. டெப்ட் பண்டுகள்!

. இந்தத் திட்டங்களில் முதலீடு செய்யப்படும் பணமானது அதிக ரிஸ்க் இல்லாத, நிரந்தர வருமானம் தரக்கூடிய அரசுப் பத்திரங்களில் முதலீடு செய்யப்படும். இதன் மூலம் கிடைக்கும் வருமானம் ஃபிக்ஸட் டெபாசிட், லிக்விட் ஃபண்டுகளைவிடக் கூடுதலாக இருக்கும். இந்த ஃபண்ட் வகை களில் சிலவற்றில் வெளியேறும் கட்டணம் இருக்கும். இதைக் கவனத்தில் வைத்துக்கொள்வது முக்கியம்.

. கடன் சார்ந்த ஃபண்டு கள் கடந்த ஒரு வருடத்தில் 10.06% வருமானம் தந்துள்ளது. ஆனால், சிறந்த ஃபண்டுகள் 12.33 சதவிகிதம் அளவுக்கு வருமானம் தந்துள்ளது.

. வரி!

. மேற்சொன்ன மூன்று வழிமுறைகளில் பணத்தைப் போட்டு வைக்கும்போது கிடைக்கும் லாபத்துக்கு வரி கட்ட வேண்டியிருக்கும். எஃப்.டி.யில் போடும் பணத்துக்கு வரி இல்லை என்றே பலரும் நினைக்கிறார்கள். ஆனால், அதற்கும் வரி உண்டு. லிக்விட் மற்றும் கடன் சார்ந்த ஃபண்டுகளில் முதலீடு செய்து மூன்று வருடங்களுக்குள் முதலீட்டை எடுக்கும்போது குறுகிய கால மூலதன ஆதாய வரி செலுத்த வேண்டியிருக்கும்.

. அதாவது, முதலீட்டின் மூலமாக கிடைக்கும் வருமானத்துக்கு வரி செலுத்த வேண்டியிருக்கும். கிடைக்கும் வருமானத்துக்கு ஒருவரது வருமான வரம்புக்குட்பட்டு வரி செலுத்த வேண்டியிருக்கும். குறுகிய காலத்துக்கு தேவைப்படாத பணத்தை எதில் முதலீடு செய்வது என தெரிந்திருக்குமே!

. இரா.ரூபாவதி

எஃப்டி, லிக்விட், டெப்ட் ஃபண்ட்...குறுகிய கால முதலீட்டுக்கு எது பெஸ்ட்?

Vikatan Correspondent