Published:Updated:

ஷேர்லக்: ஐபிஓ வரும் பொதுக் காப்பீடு நிறுவனங்கள்!

ஒட்டுமொத்த விகடனுக்கும் ஒரே ஷார்ட்கட்

Use App
ஷேர்லக்: ஐபிஓ வரும் பொதுக் காப்பீடு நிறுவனங்கள்!
ஷேர்லக்: ஐபிஓ வரும் பொதுக் காப்பீடு நிறுவனங்கள்!

ஷேர்லக்: ஐபிஓ வரும் பொதுக் காப்பீடு நிறுவனங்கள்!

பிரீமியம் ஸ்டோரி

‘‘வெற்றி வெற்றி’’ என்றபடி நம் கேபினுக்குள் நுழைந்தார் ஷேர்லக். ‘‘நீருமா..?’’ என்று நாம் ஆச்சர்யப்பட்டோம். ‘‘என்னைப் பொறுத்தவரை, ஜல்லிக்கட்டுக்கு ஆதரவான இந்தப் போராட்டத்தை கலாசார நோக்கில் மட்டும் பார்க்கவில்லை. பால் உள்பட நாம் அன்றாடம் பயன்படுத்தும் பல்வேறு பொருட்களின் மீது உலக நிறுவனங்கள் செலுத்தும் மறைமுகமாக ஆதிக்கத்தை எதிர்த்து, இந்திய நிறுவனங்களின் தயாரிப்புகளை முன்நிறுத்தும் ஒரு விஷயமாகவே பார்க்கிறேன். நமது நிறுவனங்களின் தயாரிப்புகளை நாம் பெருமளவில் பயன்படுத்தினால், தேவை இல்லாமல் பல பொருட்களை வெளிநாடுகளில் இருந்து இறக்குமதி செய்யவேண்டிய அவசியமே இருக்காது’’ என்ற அவரை ஆசுவாசப்படுத்தி, உட்கார வைத்து, ஏலக்காய் டீ கொடுத்தோம். 

‘‘கெயில் பங்கின் விலை இரண்டரை ஆண்டுகளில் இல்லாத அளவுக்கு உச்சத்தை எட்டி இருக்கிறதே?’’  என்றோம்.

‘‘அடுத்த வாரம் நடக்க உள்ள இயக்குநர் குழு கூட்டத்தில், கெயில் இந்தியா நிறுவனம் போனஸ் பங்குகள் மற்றும் நிதி திரட்டுவது குறித்து விவாதிக்க இருக்கிறது. இந்தத் தகவல் வெளியானதை அடுத்து கடந்த வியாழன் அன்று மட்டும் அந்த நிறுவனப் பங்கின் விலை 5% அதிகரித்து, கடந்த இரண்டரை வருடத்தில் இல்லாத அளவுக்கு ரூ.462-க்கு உயர்ந்துள்ளது’’ என்றார்.

ஷேர்லக்: ஐபிஓ வரும் பொதுக் காப்பீடு நிறுவனங்கள்!

‘‘ஹிந்துஸ்தான் ஆயில் எக்ஸ்புளோரேஷன் நிறுவனப் பங்கின் விலை ஒரே நாளில் 10% அதிகரித்துள்ளதே?’’ என்று விசாரித்தோம்.

‘‘அஸ்ஸாம் மாநிலம் குஷிசன் (Khusijan) பகுதியில் உள்ள எண்ணெய் கிணறுகளிலிருந்து  எடுக்கப்படும் எரிவாயுவை, 8 கி.மீ தொலைவுக்குக் குழாய் மூலம் எடுத்துச் செல்லும் திட்டத்துக்கு, வனத் துறையின் அனுமதி நீண்ட காலமாகக் கிடைக்காமல் இருந்தது. இது கடந்த வியாழன் அன்று கிடைத்ததை அடுத்து இந்தப் பங்கின் விலை 10.16% அதிகரித்து, ஓராண்டு உச்சமான ரூ.74.25-க்கு உயர்ந்துள்ளது’’ என்று விளக்கம் தந்தார்.

‘‘தனுகா அக்ரிடெக் பைபேக் செய்ய இருக்கிறதே!’’ என்று ஆச்சர்யம் காட்டினோம்.

‘‘தனுகா அக்ரிடெக் நிறுவனம், பங்குதாரர்கள் மற்றும் முதலீட்டாளர்களிடம் உள்ள 9.4 லட்சம் பங்குகளைத் திரும்ப வாங்கிக்கொள்ள முன்வந்துள்ளது. இதற்கான விண்ணப்பத்தை செபியிடம் சமர்ப்பித்துள்ளது.  பங்கு ஒன்றை     ரூ. 850-க்கு வாங்கத் திட்டமிட்டுள்ளது. இந்த விலை, கடந்த புதன் அன்று வர்த்தக முடிவில் இருந்த விலையைக் காட்டிலும் 11% அதிகம். இந்த ஆஃபர்  மூலம் அந்த நிறுவனத்துக்கு ரூ.79 கோடி செலவாகும். ஏற்கெனவே இந்த நிறுவன புரோமோட்டர்களிடம் 74.99% பங்குகள் கைவசம் உள்ளன. நிறுவனங்கள் பங்குகளை பைபேக் செய்வதற்குக் காரணம், அதன் மீதான மதிப்பைக் கூட்டுவதற்காகவே பைபேக் ஆஃபர்கள் மூலம் நிறுவனப் பங்கின் இபிஎஸ் உயரும்’’ என்று சொன்னார். 
‘‘காலாண்டு முடிவுகள் எப்படி வருகின்றன’’ என்று கேட்டோம். 

‘‘கலவையாகத்தான் வருகின்றன. கடந்த ஆண்டைக் காட்டிலும் இந்த டிசம்பர் காலாண்டில் எல்ஐசி ஹவுஸிங் ஃபைனான்ஸ் நிகர லாபம் 19% உயர்ந்திருக்கிறது.  இதற்குக் காரணம், அதன் வட்டி வரு மானம் அதிகரித்ததே. திவான் ஹவுஸிங் ஃபைனான்ஸ் நிறுவனத் தின் நிகர லாபமும் 31.7% அதிகரித்திருக்கிறது. காரணம், கடன் அளவு அதிகரித்ததும், வட்டி வருமானம் அதிகரித்ததும் தான். வாராக் கடனுக்கான ஒதுக்கீடு அதிகரிப்பு, நிகர வட்டி லாப வரம்பு குறைவு போன்றவற் றால் மூன்றாம் காலாண்டில், முன்னணித் தனியார் வங்கியான ஆக்ஸிஸ் வங்கியின் நிகர லாபம் 73% வீழ்ச்சி அடைந்துள்ளது. 

 நிகர வட்டி லாப வரம்பு அதிகரித்ததால், யெஸ் பேங்கின்  நிகர லாபம் 31% உயர்ந்துள்ளது. செயல்பாட்டு லாபம் உயர்ந்துள்ள தால், ஃபெடரல் பேங்கின் நிகர லாபம் 26% அதிகரித்துள்ளது. நிதி திரட்டும் செலவு குறைந்தது, நிலையான நிகர லாப வரம்பு, வாராக் கடன் வரவு போன்ற வற்றினால் லஷ்மிவிலாஸ் பேங்கின் நிகர லாபம் 70% உயர்ந்துள்ளது.

டிசம்பர் காலாண்டில் கனரா பேங்கின் நிகர லாபம் 279% அதிகரித்துள்ளது. இதர வருமானம் மற்றும் செயல்பாட்டு லாபம் அதிகரித்ததே இதற்குக் காரணம். அதே நேரத்தில், நிகர வாராக் கடன் 6.69 சதவிகிதத்தில் இருந்து 9.72 சதவிகிதமாக அதிகரித்துள்ளது’’ என்றார்.

‘‘இந்தியப் பங்குச் சந்தைகள் 69 கம்பெனிகளைக் கட்டுப்பாட்டு வர்த்தகப் பிரிவுக்குள் கொண்டு வந்துள்ளனவே?’’ என்று கேட்டோம்.

‘‘பங்குச் சந்தையின் மீதான மதிப்பு மற்றும் முதலீட்டாளர்களின் நம்பிக்கையைக் காக்கும் விதத்தில் ஊக வணிகம் (ஸ்பெகுலேஷன்) மற்றும் அதிக ஏற்ற இறக்கத்தை (வாலடைலிட்டி) கட்டுப்படுத்தவே  69 நிறுவனப் பங்குகளின் வர்த்தகத்தைக் கட்டுப்பாட்டுக்குள் கொண்டு வந்துள்ளன இந்தியப் பங்குச் சந்தைகள். பிஎஸ்இ-யில் 50 நிறுவனப் பங்குகளும், என்எஸ்இ-யில் 19 நிறுவனப் பங்குகளும் கட்டுப்பாட்டு வர்த்தகத்தில் கொண்டு வரப்பட்டுள்ளன. அவற்றில் அட்லஸ் சைக்கிள்ஸ் (ஹரியானா), ஹிந்துஸ்தான் ஆர்கானிக் கெமிக்கல்ஸ், ட்ரீ ஹவுஸ் எஜுகேஷன் அண்ட் அசசரீஸ், ஷிம்பாலி சுகர்ஸ் மற்றும் சுப்ரீம் டெக்ஸ் மார்ட் ஆகியவை அடக்கம்’’ என்று ஒரு பட்டியலை வாசித்தார்.
‘‘அரசுக்குச் சொந்தமான பொதுக் காப்பீடு நிறுவனப் பங்குகளை பங்குச் சந்தையில் பட்டியல் இட அமைச்சரவை ஒப்புதல் அளித்துள்ளதே?’’ என்றோம்.

‘‘நியூ இந்தியா அஷ்யூரன்ஸ், யுனைடெட் இந்தியா இன்ஷூரன்ஸ், ஓரியன்டல் இன்ஷுரன்ஸ், நேஷனல் இன்ஷூரன்ஸ் மற்றும் ஜெனரல் இன்ஷூரன்ஸ் கார்ப்பரேஷன் ஆகிய ஐந்து அரசு பொதுக் காப்பீடு நிறுவனங்களையும் பங்குச் சந்தையில் பட்டியலிட முடிவு செய்து, அதற்கு அமைச்சரவையிடம் ஒப்புதலும் கிடைத்துவிட்டது. இதன் மூலம் அரசு வைத்துள்ள பங்குகளைக் குறைத்துக்கொண்டு, நிதி திரட்ட முடியும்.  மொத்தம் ரூ.20,000 கோடிக்கு மேல் திரட்டப்படலாம். இது அரசு இன்ஷூரன்ஸ் நிறுவனங்களின் வளர்ச்சிக்கும் வழிவகுக்கும்’’ என்றவர் கிளம்பும் முன், ‘‘சந்தையின் போக்கு இனி எப்படி இருக்கும்?’’ என்கிற முக்கியமான கேள்வியினைக் கேட்டோம்.

‘‘அடுத்த ஒரு வார காலத்துக்கு சந்தையில் திடீர் ஏற்றம் வந்தால் ஆச்சர்யப்படுவதற்கில்லை. ட்ரம்ப் பதவியேற்பைக் காரணம் காட்டி இன்று சரிந்த சந்தை, பட்ஜெட்டை முன்வைத்து அடுத்த வாரத்தில் உயர்வதற்கு ஒரு வாய்ப்புண்டு. ஆனால், பட்ஜெட்டில் நீண்ட கால மூலதன ஆதாயத்துக்கு வரி விதிக்கப்பட்டால், சந்தை கடும் வீழ்ச்சியைச் சந்திக்க வாய்ப்பு இருப்பதை மறுக்க முடியாது.

ஆனாலும், இந்த ஏற்ற இறக்கத்தை நீண்ட கால முதலீட்டாளர்கள் பொருட்படுத்த வேண்டிய அவசியமே இல்லை. நல்ல அடிப்படை கொண்ட பங்குகளின் விலை இறங்கினால், யோசிக்காமல் வாங்கலாம். இது மாதிரியான நேரங்களில் பங்குச் சந்தையில் நேரடியாக முதலீடு செய்ய முடியாதவர்கள், குறைந்தபட்சம் மியூச்சுவல் ஃபண்டிலாவது முதலீடு செய்யலாம். பண மதிப்பு நீக்கம் காரணமாக இப்போது சுணங்கிக் கிடக்கும் நம் பொருளாதாரம், ஜூனுக்குப் பிறகு  வேகமெடுக்கும். அப்போது நிறுவனங்களின் லாபம் அதிகரித்து, சந்தை கணிசமாக உயரும். அப்போது பயன் அடையவேண்டும் எனில், இந்த  ஏற்றத்தாழ்வைப் பயன்படுத்திக்கொள்வதே சரி’’ என்றவர், ‘‘சரி, நான் மெரீனாவுக்குக் கிளம்புகிறேன்’’ என்று சொல்லிவிட்டுக் கிளம்பினார்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு