Published:Updated:

ஷேர்லக்: சிக்கலாகும் குறைந்த வட்டி வீட்டுக் கடன்கள்!

ஷேர்லக்: சிக்கலாகும் குறைந்த வட்டி வீட்டுக் கடன்கள்!
பிரீமியம் ஸ்டோரி
ஷேர்லக்: சிக்கலாகும் குறைந்த வட்டி வீட்டுக் கடன்கள்!

ஓவியம்: அரஸ்

ஷேர்லக்: சிக்கலாகும் குறைந்த வட்டி வீட்டுக் கடன்கள்!

ஓவியம்: அரஸ்

Published:Updated:
ஷேர்லக்: சிக்கலாகும் குறைந்த வட்டி வீட்டுக் கடன்கள்!
பிரீமியம் ஸ்டோரி
ஷேர்லக்: சிக்கலாகும் குறைந்த வட்டி வீட்டுக் கடன்கள்!

‘‘பொங்கலுக்கு பெங்களூருக்குப் போறேன்’’ என வித்தியாசமான காரணத்தைச் சொல்லிவிட்டு, ‘‘போனிலே செய்திகளைத் தந்து விடுகிறேனே’’ என்றார் ஷேர்லக். சரியென்று கேள்விகளைக் கேட்க ஆரம்பித்தோம்.  

ஷேர்லக்: சிக்கலாகும் குறைந்த வட்டி வீட்டுக் கடன்கள்!

ரிலையன்ஸ் நிப்பான் மியூச்சுவல் ஃபண்ட் பட்டியலான மூன்றே மாதங்களில் டிவிடெண்ட் அறிவிக்கப்போகிறதே?

‘‘ரிலையன்ஸ் நிப்பான் லைஃப் அஸெட் மேனெஜ்மென்ட் நிறுவனம், வரும் ஜனவரி 16-ம் தேதி இயக்குநர்கள் குழுவைக் கூட்டவிருக்கிறது. இந்தக் கூட்டத்தில், தனது பங்குதாரர்களுக்கு டிவிடெண்ட் வழங்கும் முடிவை எடுக்கவிருக்கிறது. கடந்த அக்டோபரில்தான் ஐ.பி.ஓ வெளியிட்டு சந்தையில் பட்டியலானது இந்தப் பங்கு. டிவிடெண்ட் வழங்கும் முடிவை எடுக்கக் காரணம், கடந்த டிசம்பர் காலாண்டில் இந்த நிறுவனம் நல்ல லாபம் சம்பாதித்திருப்பதே. டிவிடெண்ட் அறிவிப்பதன் மூலம் அதன் பங்கின் மீதும் முதலீட்டாளர்களின் கவனம் அதிகரிக்கும் என்கிறார்கள்.’’

சவுத் இந்தியன் பேங்க் காலாண்டு முடிவு எப்படி இருக்கிறது?


‘‘கடந்த டிசம்பர் காலாண்டில் இந்த வங்கியின் நிகர லாபம், முந்தைய நிதியாண்டின் இதே காலாண்டைக் காட்டிலும் சற்று வளர்ச்சி கண்டிருக்கிறது. 2016-17-ம் நிதியாண்டின் டிசம்பர் காலாண்டில் ரூ.111 கோடி நிகர லாபம் ஈட்டியிருந்த இந்த வங்கி, தற்போது ரூ.115 கோடி நிகர லாபம் ஈட்டியிருக்கிறது. இந்த வளர்ச்சிக்குக் காரணம், அதன் ஒட்டுமொத்த பிசினஸ் செயல்பாட்டில் முன்னேற்றம் ஏற்பட்டிருப்பதுதான். வாராக் கடன் அளவையும் கட்டுக்குள் வைத்திருக்கக் கடும் முயற்சி எடுத்திருக்கிறது. இதன் மொத்த பிசினஸ் மதிப்பு ரூ.11,729 கோடி அதிகரித்து, ரூ.1.20 லட்சம் கோடியாக உயர்ந்திருக்கிறது. இதனை அடுத்து பங்கின் விலை ஏற ஆரம்பித்திருக்கிறது.’’

குறைந்த வட்டி வீட்டுக் கடன், வங்கிகளின் அடுத்த பிரச்னையாகும் போலிருக்கிறதே?

‘‘ரியல் எஸ்டேட் துறை சமீப காலமாக அழுத்தத்திலிருந்து வந்தது. இந்த நிலையில், வீட்டுக் கடன் வட்டி விகிதங்களைக் குறைப்பது, சலுகைகள் கொடுப்பது என்று வீட்டுக் கடன் பிசினஸை அதிகரிக்கும் முயற்சிகளில் வங்கிகளும், நிதி நிறுவனங்களும் ஈடுபட்டு வந்தன. இதனால், வீட்டுக் கடன்கள் குறைவான செலவில் சந்தையில் கிடைத்து வந்தன. ஆனால், ஏற்கெனவே வங்கி களுக்கு வாராக் கடன் பிரச்னையாக இருந்துவந்த நிலையில், வீட்டுக் கடன் மூலம் புதிதாகப் பிரச்னை வரப்போவதாக மூடிஸ் மற்றும் இக்ரா ரேட்டிங் நிறுவனங்கள் அறிக்கை வெளியிட்டிருக் கின்றன.

பிரச்னைகளுக்கான காரணங்களையும் அவை கூறியிருக்கின்றன. நிறுவனங்களிடையே இருக்கும் போட்டியினால் ஏற்படும் அழுத்தம் மற்றும் சுயதொழில் செய்பவர்களுக்கு அதிகமாகக் கடன் வழங்கியிருப்பது ஆகிய இரண்டும் வீட்டுக் கடன் வழங்குவதில் பிரச்னையை உண்டாக்கலாம் என இந்த அறிக்கை சொல்கிறது. இதனால் வீட்டுக் கடன் பிரிவிலும் வாராக் கடன் அதிகரிப்பதற்கான வாய்ப்புகள் உருவாகலாம் என்பது லேட்டஸ்ட் குண்டு.’’

2018-ல் சந்தை நன்றாகச் செயல்படும் என்று கூறப்பட்டு வரும் நிலையில், சுவிஸ் தரகு நிறுவனமான யு.பி.எஸ் மட்டும் முரணாக அறிக்கை வெளியிட்டு இருக்கிறதே?


‘‘2018-ல் இந்தியச் சந்தைகள் சிறப்பாக இருக்கும் என்றும், 2018 இறுதிக்குள் நிஃப்டி புள்ளிகள்    11500-யைத் தொடும் என்றும் பல்வேறு சந்தை ஆய்வு நிறுவனங்களும் அனலிஸ்ட்டுகளும் தெரிவித்திருந்தார்கள். இந்த நிலையில், சுவிட்சர் லாந்தைச் சேர்ந்த தரகு நிறுவனமான யு.பி.எஸ்., இந்தியச் சந்தைகளின் வளர்ச்சி எதிர்பார்த்தது போல் இருக்காது என்று கூறியிருக்கிறது. 2018 இறுதியிலும் நிஃப்டி தற்போது இருக்கும் 10500 என்ற நிலையில்தான் இருக்கும் என்கிறது. சந்தை வளர்ச்சி முன்னர் கணிக்கப்பட்ட அளவுக்கு இருக்காது என்றும் தெரிவித்துள்ளது.

இந்திய ஜி.டி.பி தற்போதிருக்கும் 6.6 சதவிகிதத் திலிருந்து 2018-19-ல் 7.4 சதவிகிதமாக வளர்ச்சி யடையும் என்றும் தெரிவித்துள்ளது. இருந்தாலும், நம்முடைய சந்தை ஏற்கெனவே அதன் உச்சத்தை அடைந்துவிட்டதால், தற்போதிருக்கும் உச்ச நிலைக்குள்தான் ஏற்ற இறக்கத்துடன் வர்த்தகமாகும் என்று கூறியுள்ளது. எனவே, முதலீட்டாளர்கள் கவனமாக இருப்பதும் அவசியம். அதே நேரத்தில், நல்ல நிறுவனப் பங்குகளைத் தேர்வு செய்து முதலீடு செய்வதன் மூலம், சந்தையைவிட அதிக வருமானம் பெற வாய்ப்புள்ளது என்கிறார்கள் முன்னணி அனலிஸ்ட்கள்.’’
 
சில்லறை வர்த்தக நிறுவனப் பங்குகள் விலை உயர்ந்திருக்கின்றனவே?

‘‘மாண்ட் கார்லோ, சோடியக் மற்றும் இந்தியன் டெரைன் உள்ளிட்ட பெரும்பாலான சில்லறை வர்த்தக நிறுவனங்களின் பங்குகள் விலை ஒரே நாளில் 10% வரை உயர்ந்திருக்கின்றன. மத்திய அரசு சில்லறை வர்த்தகத்தில் அந்நிய நேரடி முதலீட்டை (எஃப்.டி.ஐ) அதிகரிப்பதற்கான முயற்சியில் இறங்கியிருப்பதுதான் இதற்குக் காரணம். இதன்மூலம் சிங்கிள் பிராண்ட் ரீடெய்ல் பிசினஸ்களில் அந்நிய நேரடி முதலீட்டுக்கு இருந்த தடைகளை யெல்லாம் நீங்கியிருக்கிறது.

இதனால், சில்லறை வர்த்தக நிறுவனங்களின் பங்கு விலைகள் ஏற்றம் கண்டிருக்கின்றன. ஏர் இந்தியா நிறுவனத்திலும் 49 சதவிகித அந்நிய நேரடி முதலீட்டை அனுமதிக்க அரசு முடிவு செய்திருக்கிறது. ரியல் எஸ்டேட் புரோக்கிங் சர்வீசஸ் நிறுவனத்தில் 100 சதவிகித அந்நிய நேரடி முதலீட்டை அனுமதித்துள்ளது. இப்படி பல வகைகளிலும் அந்நிய நேரடி முதலீட்டை அதிகரிக்க வழிசெய்ததால், சில்லறை வர்த்தகத் துறை நல்ல வளர்ச்சியடையும் என்று எதிர்பார்க் கப்படுகிறது.’’

நிறுவனங்களின் குறைந்தபட்ச மார்க்கெட் கேபிட்டலைசேஷனை செபி நிர்ணயிக்க இருக்கிறதே?

‘‘பங்குச் சந்தையில் பட்டியலான நிறுவனத்தின் குறைந்தபட்ச மார்க்கெட் கேபிட்டலைசேஷன் ரூ.10 கோடி இருக்க வேண்டும் என்று நிர்ணயிக்க செபி முடிவு செய்திருக்கிறது. இந்த மார்கெட் கேபிட்டலைசேஷன் கொண்ட நிறுவனங்கள், சந்தையில் தொடர்ந்து பட்டியலாகியிருக்க வேண்டும். இதனால் பென்னி ஸ்டாக்குகளை ஒழிக்க முடியும் என செபி கருதுகிறது.’’
 
வரும் வாரங்களில் இந்தியப் பங்குச் சந்தையின் போக்கு எப்படியிருக்கும்?


‘‘காலாண்டு முடிவுகள் வரத் தொடங்கிவிட்டன. நிறுவனங்களின் முடிவுகள், மத்திய பட்ஜெட் தொடர்பான தகவல்கள் போன்றவையே அடுத்து வரும் வாரங்களில் சந்தையின் போக்கை நிர்ணயிக்கும் எனலாம்.’’ 

கவனிக்க வேண்டிய பங்குகள் ஏதாவது..?

“நீண்ட கால முதலீட்டுக்கு இன்ஃபோசிஸ், சி.டி.எஸ்.எல் பங்குகளைக் கவனிக்கலாம்’’ என்றவர் பொங்கல் வாழ்த்துகள் என்று சொல்லிவிட்டு போனை வைத்தார்.

அமைச்சர் ஜெயக்குமாருக்கு  வணிகர்களின் வேண்டுகோள்!

கடந்த ஆண்டு ஜூலை 1-ம் தேதி ஜி.எஸ்.டி அமலுக்கு வந்தது. அதற்குமுன் வாட் வரி, நுழைவு மற்றும் கலால் வரி கட்டி வாங்கிய பொருள்களுக்கான வரியை அரசிடமிருந்து திரும்பப் பெற முடியாமல் தவித்து வருகிறார்கள் வணிகர்கள். வாட் வரியைத் திரும்பப் பெற ட்ரான்1 படிவத்தைப் பூர்த்தி செய்து தர வேண்டும். ஆனால், இந்தப் படிவத்தைப் பூர்த்தி செய்து தருவதற்கான கடைசி தேதியை 2017 செப்டம்பர் என்று அறிவித்த மத்திய அரசு, பின்பு டிசம்பர் 27-ம் தேதி வரை நீட்டிக்கப்படுவதாக அறிவித்தது. பிறகு டிசம்பர் 31 வரை தாக்கல் செய்யலாம் என்று சொல்லிவிட்டு, திடீரென 27-ம் தேதி கடைசி என்று சொல்லிவிட்டது. இதனால் பலரும் ட்ரான் 1 படிவத்தைப் பூர்த்தி செய்து தாக்கல் செய்ய முடியாமலே போனது. பல ஆண்டுகள் கஷ்டப்பட்டு சேர்த்த பணம் இப்படி முடங்கிக் கிடக்கிறது. எங்களுக்கு இந்த பணத்தைத் திரும்பத் தர வருகிற 18-ம் தேதி நடக்கும் ஜி.எஸ்.டி கவுன்சில் கூட்டத்தில் முடிவெடுத்து அறிவிக்க வேண்டும் என்று கோரிக்கை வைக்கிறார்கள் பாதிக்கப்பட்ட வர்த்தர்கள். அமைச்சர் ஜெயக்குமார் இந்தப் பிரச்னையை ஜி.எஸ்.டி கவுன்சிலின் கவனத்துக்குக் கொண்டு செல்வாரா?