Published:Updated:

ஷேர்லக்: என்.பி.எஃப்.சி பங்குகள்... வாங்கிக் குவிக்கும் எஃப்.ஐ.ஐ-க்கள்!

ஒட்டுமொத்த விகடனுக்கும் ஒரே ஷார்ட்கட்

Use App
ஷேர்லக்: என்.பி.எஃப்.சி பங்குகள்... வாங்கிக் குவிக்கும் எஃப்.ஐ.ஐ-க்கள்!
ஷேர்லக்: என்.பி.எஃப்.சி பங்குகள்... வாங்கிக் குவிக்கும் எஃப்.ஐ.ஐ-க்கள்!

ஓவியம் : அரஸ்

பிரீமியம் ஸ்டோரி
ஷேர்லக்: என்.பி.எஃப்.சி பங்குகள்... வாங்கிக் குவிக்கும் எஃப்.ஐ.ஐ-க்கள்!

முதல் நாளன்று ஷேர்லக் கேட்டுக்கொண்டபடி, நாம் கேள்விகளை அவருடைய வாட்ஸ்அப்க்கு அனுப்பி வைத்தோம். மும்பை யிலிருந்து அவர் தன்னுடைய பதில்களை மெயில்மூலம் அனுப்பி வைத்தார். இனி நம் கேள்விகளும் ஷேர்லக்கின் பதில்களும்...

பி.எஸ்.இ 500 நிறுவனங்கள் வழங்கியிருக்கும் டிவிடெண்ட் அளவு அதிகரித்திருக்கும் அதேசமயம், திரும்பப்பெறும் பங்குகளின் அளவும் அதிகரித்திருக்கிறதே?

“பல முன்னணி நிறுவனங்கள் சென்ற நிதியாண்டுக்கு இடைக் கால மற்றும் இறுதி டிவிடெண்டுகளை அறிவித்துள்ளன.    பி.எஸ்.இ 500 பட்டியலில் உள்ள நிறுவனங்கள், 2018-19-ம் நிதியாண்டில் ஒட்டுமொத்த அளவில் ரூ.1.64 லட்சம் கோடி டிவிடெண்ட் வழங்கியிருக்கின்றன. இதில் இடைக்கால டிவிடெண்டுகளும் அடங்கும். இறுதி டிவிடெண்டுகள் இன்னும் வழங்கப்படவில்லை. தற்போதைய டிவிடெண்ட் அளவானது 201-18-ம் நிதியாண்டைவிட 1.7% (ரூ.1.62 லட்சம் கோடி) அதிகமாகும்.

அதேசமயம், சென்ற நிதியாண்டில், பி.எஸ்.இ 500 நிறுவனங்கள் திரும்பப் பெற்ற பங்குகளின் அளவு 64% அதிகரித்திருக்கிறது. அதிக அளவு பங்குகள் திரும்பப் பெறப்பட்டாலும், வர்த்தகம் பெரும்பாலும் கரடியின் பிடியில் சிக்கியிருக்கிறது என்பது கவனிக்கத்தக்கது.”

வெளிநாட்டு நிதி நிறுவனங்கள்,  என்.பி.எஃப்.சி பங்குகளை வாங்கிக் குவிப்பதன் ரகசியம் என்ன?

‘‘கடந்த மே மாதத்தில், வெளிநாட்டு நிதி நிறுவனங்கள்     (எஃப்.ஐ.ஐ-க்கள்) ரூ.4,000 கோடி மதிப்பிலான வங்கிசாரா நிதி நிறுவனங்களின் (என்.பி.எஃப்.சி) பங்குகளை வாங்கியிருக்கிறார்கள். இதே மாதத்தில் துறைகள் வாரியான முதலீடுகளில், குறிப்பிட்ட 20 துறைகளில் அதிகமாகவும், 15 துறைகளில்  குறைவாகவும் முதலீடுகளை மேற்கொண்டிருக்கிறார்கள்.

வங்கிசாரா நிதி நிறுவனங்களைத் தவிர, வெளிநாட்டு முதலீட்டா ளர்கள் காப்பீடு மற்றும் மூலதனப் பொருள்கள் துறையில் அதிக முதலீடு செய்திருக்கிறார்கள். தவிர, வங்கி, ஆயில் அண்டு கேஸ், மீடியா மற்றும் கெமிக்கல் துறை சார்ந்த பங்குகளில் முதலீடு செய்வதிலும் வெளிநாட்டு முதலீட்டாளர்கள் அதிக கவனம் செலுத்துகிறார்கள். அதேசமயம், ஐ.டி மற்றும் பார்மா,  கட்டுமானம் மற்றும் ஆட்டோ துறை சார்ந்த பங்குகளில் முதலீடு செய்வதையும் குறைத்திருக் கிறார்கள்.

ஷேர்லக்: என்.பி.எஃப்.சி பங்குகள்... வாங்கிக் குவிக்கும் எஃப்.ஐ.ஐ-க்கள்!

வங்கிசாரா நிதி நிறுவனங்களில் பணப்புழக்க நெருக்கடி குறைவதற்கான எந்தவொரு அறிகுறியும் இல்லாதபோதும், நிஃப்டி 500 பங்குகளில் அவாஸ் ஃபைனான்ஷியர்ஸ் மற்றும் மணப்புரம் ஃபைனான்ஸ் மற்றும் கிரெடிட் ஆக்சஸ் கிராமீன் ஆகிய மூன்று நிறுவனங்களின் பங்குகள் சிறந்த செயல்திறன் கொண்ட பங்குகளாகத் தொடர்கின்றன. ஆவாஸ் ஃபைனான்ஷியர்ஸ் பங்குகள்  விலை கடந்த ஓராண்டில் 72.35% அதிகரித்திருக்கிறது. இதேபோல் மணப்புரம் ஃபைனான்ஸ் 53.51%, கிரெடிட் ஆக்சஸ் கிராமீன் 48.62% உயர்ந்தி ருக்கிறது. இதே காலகட்டத்தில் நிஃப்டி 7% மற்றும் சென்செக்ஸ் 7.7% மட்டுமே உயர்ந்துள்ளது.’’

இந்தியா மார்ட் ஐ.பி.ஓ வருவது பற்றி..?

“சிறிய மற்றும் நடுத்தர நிறுவனங்களை இலக்காகக் கொண்டு ஆன்லைன் வணிகத் தொடர்பு சேவைகளில் ஈடுபட்டுவரும் இந்தியா மார்ட் நிறுவனம், தனது விரிவாக்கத்துக்குத் தேவையான பகுதி நிதியைத் திரட்டும் வகையில் புதிய பங்குகள் வெளியிட முடிவு செய்துள்ளது. இதன்மூலம் ரூ.475.5 கோடியைத் திரட்ட முடிவு செய்துள்ளது. முக மதிப்பு ரூ.10 கொண்ட ஒரு பங்கின் வெளியீட்டு விலை ரூ.970-973-ஆக நிர்ணயம் செய்யப்பட்டுள்ளது. இந்தப் பங்கு வெளியீடு இந்த மாதம் 24-ம் தேதி தொடங்கி, 26-ம் தேதி முடிவடைகிறது.’’

அசோக் லேலாண்டு நிறுவனப் பங்கு விலையில் திடீர் சரிவு ஏற்பட்டதன் பின்னணி என்ன?

“அசோக் லேலாண்டு நிறுவனத்தின் பன்த் நகர் தொழிற்சாலை, 2019, ஜூன் 24 முதல் ஜூன் 29 வரை மூடப்படும் என்ற அறிவிப்பு வெளியிடப்பட்டது. இதன் எதிரொலியாகக் கடந்த வியாழனன்று அந்த நிறுவனத்தின் பங்கு விலையில் திடீரென சரிவு ஏற்பட்டது. நிறுவனத்தின் விற்பனைத் தேவை மற்றும் தயாரிப்பு இரண்டையும் சீர்ப்படுத்தி நிறுவனத்தின் உத்தியை வகுப்பதற்காகத் தொழிற்சாலை தற்காலிகமாக மூடப்பட்டதாகக் கூறப் பட்டது. அந்த அறிவிப்பால் முதலீட்டாளர் களிடையே ஏற்பட்ட குழப்பத்தில், அசோக் லேலாண்டு நிறுவனப் பங்கின் விலை 3% குறைந்தது.

அசோக் லேலாண்டு நிறுவனத்தின் பங்கு விலை கடந்த ஓராண்டில் 39.52% குறைந்துள் ளது. இந்த ஆண்டு தொடக்கத்திலிருந்து தற்போது வரை 19.26% குறைந்துள்ளது. 42 புரோக்கிங் நிறுவனங்களில் 20 நிறுவனங்கள், அசோக் லேலாண்டு நிறுவனப் பங்குகளை `வாங்கலாம்’ அல்லது `செயல்பாடு சிறப்பு’ என்றும், 12 நிறுவனங்கள் `வைத்திருக்கலாம்’ என்றும், மூன்று நிறுவனங்கள் `செயல்பாடு சரியில்லை’ என்றும், ஏழு நிறுவனங்கள், `விற்கவும்’ என்றும் குறிப்பிட்டுள்ளன. அசோக் லேலாண்டின் பங்கு விலை, கடந்த 50 நாள்களின் சராசரியைக் குறைந்துள்ளது.”

ஜெயின் இர்ரிகேஷன் சிஸ்டம்ஸ் பங்கு விலை தொடர்ந்து சரிந்து வருகிறதே?

“ஜெயின் இர்ரிகேஷன் சிஸ்டம்ஸ் நிறுவனத்தின் நீண்ட காலக் கடன் மதிப்பீட்டை இந்தியா ரேட்டிங்ஸ் நிறுவனம் குறைத்ததைத் தொடர்ந்து பங்கு விலையில் ஏற்பட்ட வீழ்ச்சி, கடந்த வியாழனன்று ஐந்தாவது நாளாகத் தொடர்ந்தது. மும்பை பங்குச் சந்தையில் இந்த நிறுவனத்தின் பங்கு விலை 17.26% வீழ்ச்சியடைந்து, கடந்த 52 வாரங்களில் குறைந்த அளவாக 16.30 ரூபாயை எட்டியது. இந்த நிறுவனத்துக்கு 4,900 கோடி ரூபாய் கடன் உள்ளது.’’

ஜெட் ஏர்வேஸ் நிறுவனப் பங்கு விலை தொடர்ந்து சரிந்துகொண்டே வருகிறதே?

“ஜெட் ஏர்வேஸ் நிறுவனத்துக்கு கடன் கொடுத்த வங்கிகள், அந்த நிறுவனத்தின் சொத்து மதிப்பைவிட வங்கிக் கடன் அதிகரித்துள்ளதாக ஸ்டேட் பேங்க் ஆஃப் இந்தியா தலைமையில் புகார்  கூறியுள்ளன. அதையடுத்து தொடர்ச்சியாக 14 நாள்களாக, ஜெட் ஏர்வேஸ் நிறுவனத்தின் பங்கு விலை இறங்கிவருகிறது. அந்த நிறுவனத்தின் பங்கு விலை 40.45 ரூபாயிலிருந்து 28.18 சதவிகிதம் சரிந்து 29.05 ரூபாயாக உள்ளது. இது, முன்னெப்போதும் இல்லாத விலைச்சரிவாகும். இதற்கு முன்னர், 18.17 சதவிகிதம் குறைந்து 33.10 ரூபாய் என்ற அளவுக்குச் சரிவை எட்டியிருக்கிறது.

ஜெட் ஏர்வேஸ் நிறுவனம் தரவேண்டிய 8,500 கோடி ரூபாயை மீட்பது குறித்து வங்கிகள் புகார் அளித்த மறுநாளில் பெருத்த சரிவு ஏற்பட்டது. அன்றைய தினம், வர்த்தக நாளின் இடையில், முன்னெப்போதும் இல்லாத பெரிய சரிவாக      53 சதவிகிதம் வரை குறைந்தது. பிறகு சந்தை நிறைவடையும்போது 41 சதவிகிதம் குறைந்து 40.45 ரூபாய்க்கு வர்த்தகமானது.”

இந்தியாவின் ஜி.டி.பி வளர்ச்சி குறையும் என ஃபிட்ச் ரேட்டிங் எச்சரித்திருக்கிறதே?

“சென்ற 2018-19-ம் நிதியாண்டின் முதல் காலாண்டில், நாட்டின் பொருளாதார வளர்ச்சி 8.2 சதவிகிதமாக அதிகரித்திருந்தது. செப்டம்பர் மாதத்துடன் நிறைவடைந்த இரண்டாவது காலாண்டில் 7.1 சதவிகிதமாகக் காணப்பட்டது. மூன்றாவது காலாண்டில் 6.6%  வளர்ச்சி கண்டது. படிப்படியாகக் குறைந்து இறுதி காலாண்டில் 5.8 சதவிகிதமாக இருக்கிறது.

நடப்பு நிதியாண்டிலும் இதே நிலை தொடரும் என்றும், நாட்டின் பொருளாதார வளர்ச்சி 6.6 சதவிகிதமாகக் குறையும் என்றும் ஃபிட்ச் ரேட்டிங் நிறுவனம் தெரிவித்திருக்கிறது. இந்த நிறுவனம் முன்னரே நாட்டின் பொருளாதார வளர்ச்சி 6.8 சதவிகிதமாக இருக்கும் என எச்சரித்திருந்தது. அதை மீண்டும் குறைத்து 6.6 சதவிகிதமாகக் பதிவு செய்திருக்கிறது.

வருகிற 2020-21-ம் நிதியாண்டில் இதன் வளர்ச்சி 7.1 சதவிகிதமாகவும், 2021-22-ம் நிதியாண்டில் 7 சதவிகிதமாகவும் இருக்கும் என ஃபிட்ச் ரேட்டிங் நிறுவனம் தெரிவித்துள்ளது” என்றவர், ‘‘திங்களன்று சென்னை வருகிறேன். அடுத்த வாரம் உம்மை நேரில் சந்திக்கிறேன்’’ என்று  பின்குறிப்புடன் மெயிலை முடித்திருந்தார்.

ஆதித்ய பிர்லா சன் லைஃப் பார்மா ஃபண்ட்!

தித்ய பிர்லா சன் லைஃப் பார்மா & ஹெல்த்கேர் ஃபண்ட் வெளியீடு தொடங்கி உள்ளது. ஓப்பன் எண்டட் ஈக்விட்டி திட்டமான இதில், ஜூலை 4 வரை முதலீடு செய்யலாம். குறைந்தபட்ச முதலீடு ரூ.1,000 செய்யப்படுகிறது.

ஆதித்ய பிர்லா சன் லைஃப் ஏ.எம்.சி லிமிடெட் நிறுவனத்தின் தலைமைச் செயல் அதிகாரி ஏ.பாலசுப்பிரமணியன் கூறும்போது, ‘‘கடந்த 2-3 ஆண்டுகள் தவிர, கடந்த 10 ஆண்டு காலத்தில் பார்மா மற்றும் ஹெல்த்கேர் துறை நல்ல செயல்திறனைக் கொண்டிருந்தது. வலுவான மீட்சிக்கு இந்தத் துறை இப்போது தயாராக உள்ளது. வரவிருக்கும் சந்தைச் சுழற்சி யில் முதலீடு செய்யும் வாய்ப்புள்ளது. மேலும், கவர்ச்சிகரமான பங்கு மதிப்பீடுகள் மற்றும் இந்தத் துறையின் வேகமான வளர்ச்சி போன்றவை சாதகமான அம்சங்கள்” என்றார்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு