`இவற்றில் எதுவும் நடக்கலாம்!' - ஐ.பி.ஓ முதலீடு பற்றி தெரிந்துகொள்ள வேண்டிய 5 விஷயங்கள்

புதிய பங்கு வெளியீடு பற்றி வாரன் பஃபெட், ``எப்போது பங்கு வெளியிட வேண்டும் என்பதை நிறுவனம் முடிவு செய்யும். அது முதலீட்டாளருக்கு சாதகமாக இருக்க வேண்டும் என்று அவசியமில்லை" எனச் சொல்வார்.

பங்குகளை பொது மக்களுக்கு வெளியிட முடிவு செய்த நிறுவனம், சரியான நேரத்துக்குக் காத்திருக்கும். பங்கு வெளியீட்டுக்கு அதிகபட்ச விலை கிடைக்கும் சூழ்நிலை இருந்தால்தான் பங்குகளை வெளியிட முன்வரும். அதனால்தான் பெரும்பாலான ஐ.பி.ஓ-க்கள் பங்குச் சந்தை உச்சநிலையில் இருக்கும்போது வெளி வருகின்றன. 2020 ஏப்ரல்-ஜூன் மாதங்களில் கொரோனா காரணமாக நாடு முழுவதும் ஊரடங்கு அமல்படுத்தப்பட்டதால் பங்குச்சந்தை பாதிக்கப்பட்டு இருந்தது. அச்சமயம் பங்கு வெளியீடு எதுவும் நடை பெறவில்லை. ஊரடங்கு படிப்படியாகத் தளர்க்கப்பட்டு பங்குச் சந்தை புத்துயிர் பெற்ற பிறகு, செப்டம்பர் முதல் இதுவரை சுமார் 10 ஐ.பி.ஓ-க்கள் வந்துள்ளன.

மேற்கூறிய காரணங்கள் பல இருந்தாலும், ஐ.பி.ஓ-க்கள் ஏன் முதலீட்டாளர்கள் மத்தியில் பிரபலமாக உள்ளன? காரணம் ஐ.பி.ஓ கம்பெனி பங்குச் சந்தையில் அனுமதிக்கப்பட்டவுடன் கிடைக்கும் லாபம். இதை லிஸ்டிங் கெயின்ஸ் (listing gains) என்பார்கள்.

பல முதலீட்டாளர்கள் இக்குறுகிய லாபத்தை மட்டுமே கருத்தில் கொண்டு ஐ.பி.ஓ-வுக்கு விண்ணப்பம் செய்கின்றனர். (உ.ம்.) ஹேப்பியஸ்ட் மைண்ட் டெக்னாலஜிஸ் நிறுவனத்தின் சமீபத்திய ஐ.பி.ஓ-க்கு 151 மடங்கு அதிக ஆதரவு பெற்றது. ரூ.166-க்கு வெளியிடப்பட்ட பங்கு, பங்குச் சந்தையில் பட்டியலிடப்பட்ட முதல் நாள் ரூ.371-க்கு அதிகரித்தது. இதனால், மிக குறுகிய காலத்தில் 124% லாபம் கிடைத்தது.

சில பங்குகளில் இத்தகைய பெரிய ஆதாயம் கிடைப்பதால், பெரும்பாலான முதலீட்டாளர்கள் ஒவ்வோர் ஐ.பி.ஓ-வையும் விரைவான லாபத்துக்கான `லாட்டரிச் சீட்டு' என்று எண்ணுகின்றனர். ``விரைவாகப் பணக்காரர் ஆகிவிட வேண்டும்” என்ற இத்தகைய அணுகுமுறையை ஐ.பி.ஓ வரவிருக்கும் நிறுவனங்கள், அவற்றின் முதலீட்டாளர்கள், முதலீட்டு வங்கியாளர்கள் மற்றும் தரகர்கள் திறமையாகப் பயன்படுத்திக் கொள்கிறார்கள்.

ஹேப்பியஸ்ட் மைண்ட் டெக்னாலஜிஸ் போன்ற ஐ.பி.ஓ-க்கள் அதிக அளவில் வரவேற்பைப் பெற்று, பங்குச் சந்தையின் ஆரம்ப நாளிலேயே கணிசமான லாபத்தையும் ஈட்டித் தருகின்றன. அத்தகைய ஐ.பி.ஓ-வில் பங்கு ஒதுக்கீடு பெறுவதற்கான வாய்ப்பு மிகவும் குறைவு; விண்ணப்பதாரருக்கு பங்குகள் ஒதுக்கப்பட்டாலும், ஒதுக்கப்பட்ட பங்குகளின் எண்ணிக்கையும் குறைவாகவே இருக்கும்.

எனவே, குவியும் விண்ணப்பங்கள் அதிகமாய் இருந்தால், பங்கு கிடைக்கும் வாய்ப்பும், அவ்வாறு ஒதுக்கப்படும் பங்குகளின் எண்ணிக்கையும், விற்பனை லாபமும் குறைவாகவே இருக்கும்.

எல்லா ஐ.பி.ஓ-க்களும் மகத்தான வரவேற்பைப் பெறுவதில்லை. சிலவற்றுக்கு குறைந்த வரவேற்புதான் கிடைக்கிறது. சில தோல்வி அடைகின்றன. இத்தகைய ஐ.பி.ஓ பங்குகள் முதல் நாளிலிருந்தே ஐ.பி.ஓ விலைக்கும் குறைவாகவே பங்குச் சந்தையில் விலை போகின்றன. (உ.ம்) யு.டி.ஐ.

ஏ.எம்.சி சமீபத்தில் ஓஃப்ஸ் முறையில் ஐ.பி.ஓ செய்தது. ஒரு பங்கின் விலை ரூ.554. குவிந்த விண்ணப்பங்கள் 230% மட்டுமே. முதல் நாளன்று இப்பங்கு ரூ.490-க்கு தொடங்கி ரூ.477-க்கு முடிந்தது. முதல் நாள் இழப்பு ஒரு பங்குக்கு ரூ.77. முதலீடு செய்யப்பட்ட தொகையில் 14% இழப்பு. யு.டி.ஐ. ஏ.எம்.சி. இதுவரை ஐ.பி.ஓ விலையைத் தாண்டவில்லை!

இதேபோல், 2019-ம் ஆண்டில் ஸ்டெர்லிங் & வில்சன் சோலார் ஐ.பி.ஓ ஒரு பங்குக்கு ரூ.780 என்ற விலையில் வந்தது. இதற்கு 0.92 மடங்கு மட்டுமே விண்ணப்பங்கள் வந்தன. முதல் நாள் இது ரூ.700-ல் தொடங்கி ரூ.725 க்கு முடிந்தது. இதன் விளைவாக ஒரு பங்குக்கு ரூ.55 (7% முதலீடு) இழப்பு ஏற்பட்டது. இப்பங்கின் தற்போதைய விலை ரூ.220 மட்டுமே. இந்தப் பங்கின் அதிகபட்ச விலை ஐ.பி.ஓ விலையைவிடக் குறைவானதே!

எனவே அடுத்தமுறை ஐ.பி.ஓ-வில் மொத்தமாக முதலீடு செய்யலாம் என நினைக்கும்போது இந்த விஷயங்களை எல்லாம் கவனத்தில் கொண்டு முடிவு எடுங்கள்.