Published:Updated:

உங்கள் கனவுகள் இங்கே காசாகும்!

உங்கள் கனவுகள் இங்கே காசாகும்!

உங்கள் கனவுகள் இங்கே காசாகும்!

உங்கள் கனவுகள் இங்கே காசாகும்!

Published:Updated:
4 - மியூச்சுவல் ஃபண்ட்
உங்கள் கனவுகள் இங்கே காசாகும்!
 

உங்கள் கனவுகள் இங்கே காசாகும்!

ஒட்டுமொத்த விகடனுக்கும் ஒரே ஷார்ட்கட்!

உங்கள் கனவுகள் இங்கே காசாகும்!

கா லையில் எழுந்தவுடன் காபி, டிபன்... எனக்கும் குழந்தைக்கும் வேண்டியதைச் செய்து, அலுவலகத்துக்கும் ஸ்கூலுக்கும் அனுப்புவது... அதன்பிறகு கொஞ்ச நேரம் சீரியல், தோழியருடன் அரட்டை... மதியம் குட்டித் தூக்கம்... மாலையில் குழந்தைகளுடன் கொஞ்சம் பொழுதுபோக்கு... திரும்பவும் சீரியல்கள்... தூக்கம்... என்று தினசரி பொழுதைக் கழிக்கும் என் மனைவிக்கு அந்த வாழ்க்கை கொஞ்சம் போரடித்துவிட்டது போலிருக்கிறது.

அதனால்தான், மியூச்சுவல் ஃபண்ட் துறை பற்றிச் சொல்ல ஆரம்பித்ததும் கிடுகிடுவென்று பிடித்துக்கொண்டு விட்டாள்.

என் மனைவி கேட்ட கேள்விக்கு வருகிறேன். ‘‘தியரி கிளாஸ் போதுமே... பிராக்டிகலாகக் கற்றுக் கொள்ளலாம். யாராவது, மியூச்சுவல் ஃபண்ட் ஏஜென்ட் இருந்தால் கைகாட்டுங்கள். எப்படி ஏஜென்ட் ஆவது என்று கற்றுக்கொள்கிறேன். உங்களுக்குத் தெரிந்த ஏஜென்ட் இருக்கிறார்களா?’’ என்று அவள் கேட்டதும், ‘‘என்ன... வாத்தியாரை மாத்திடலாம்னு பாக்கிறியா... ஏஜென்ட் ஆக கத்துக்கறதுக்கு முன்னே, முதல்ல அந்தத் திட்டத்தில் சேர்ந்து பாரு. ஒரு முதலீட்டாளர் அனுபவம் இருந்தால்தான் அவங்களை டீல் பண்ற ஏஜென்ட் ஆக முடியும். அந்த அனுபவம் முக்கியம் இல்லையா?’’ என்றபடி, என் அலுவலக அறிமுக நண்பரான மியூச்சுவல் ஃபண்ட் ஏஜென்ட்டின் நம்பரைக் கொடுத்தேன். தன் செல்போனில் டயல் செய்த என் மனைவி அவரை வீட்டுக்கு வரச் சொன்னாள்.

‘‘எப்போதுமே, ஒரே ஒரு நிறுவனத்தின் திட்டங்களில் மட்டும் டீல் செய்பவரைவிட, பல நிறுவனங்களின் திட்டங்களையும் டீல் செய்யும் ஏஜென்டைத் தேர்ந்தெடுப்பது, பல வழிகளில் நல்லது’’ என்றபடியே, அருகிலிருந்த குறிப்பு அட்டையில் சில கணக்குகளைப் போட்டு வைத்தேன். கிச்சனுக்குச் சென்று ஜூஸ் தயார் செய்துவிட்டு வெளியே வந்த என் மனைவி,

“ஏஜென்ட் வரும்வரை நீங்களே கிளாஸ் எடுங்கள்... மியூச்சுவல் ஃபண்டில் குறைந்தபட்சம் எவ்வளவு முதலீடு செய்யலாம்?” என்றாள் குறும்பாக.

‘‘சாதாரணமாக எந்த மியூச்சுவல் ஃபண்டிலும் துவக்கத்தில் குறைந்தபட்ச முதலீடு 5,000 ரூபாய். பின்னர் அதே கணக்கில் மாதாமாதமோ அவ்வப்போதோ 1,000 ரூபாய் அல்லது அதன் மடங்குகளில் முதலீடு செய்யலாம். சில திட்டங்களில் 100 ரூபாய் அல்லது அதன் மடங்குகளில்கூட கூடுதலாக விண்ணப்பிக்கும் வசதி உண்டு. ஆனால், முதலீட்டின் மீது வரிச்சேமிப்பு சலுகைகள் வழங்கும் மியூச்சுவல் ஃபண்ட்களில் எல்லாம் 500 ரூபாய்தான் குறைந்தபட்ச முதலீடு’’ என்று சொல்லிக்கொண்டு இருக்கும்போதே வீட்டு காலிங் பெல் ஒலித்தது.

‘‘அந்த ஏஜென்டாகத்தான் இருக்கும்’’ என்றபடி போய்க் கதவைத் திறந்தேன்.

முதுகில் பெரிய பையுடன், மலை ஏறும் வீரன் போல வந்து நின்றார் மியூச்சுவல் ஃபண்ட் நிறுவன ஏஜென்ட். குளிர்ச்சியான பழ ஜூஸ் தந்தோம்.

கையில் ஒரு விண்ணப்ப படிவத்தைத் தயாராக வைத்திருந்தார்.

‘‘நாளைக்கு ஏஜென்டானால் கஸ்டமர்களுக்கு பூர்த்திசெய்து கொடுக்கவேண்டுமல்லவா... நீயே படிவத்தைப் பூர்த்திசெய்..!’’ என்று சொல்லிவிட்டு நகர்ந்துகொண்டேன். விண்ணப்ப படிவத்தைப் பார்த்ததும் என் மனைவி சற்று மிரண்டுதான் போனாள். வழக்கமாகக் கேட்கப்படும் பெயர், வயது, விலாசம், தொலைபேசி எண், கூடவே இ\மெயில் விலாசம் இருந்தால் அது, பணம் செலுத்திய செக் எண், வங்கியின் பெயர், சேமிப்புக் கணக்கு எண் போன்ற தகவல்கள்தான் கேட்கப்பட்டிருந்தன. என் மனைவி பெயரில் தனியாக வங்கிக் கணக்கு துவக்கி வைத்திருந்தது வசதியாகப் போயிற்று.

ஒவ்வொன்றாகப் பூர்த்திசெய்ய ஆரம்பித்தவள், ஒரு இடத்தில் ‘பான் கார்ட் எண்’ என்ற இடத்தில் லேசாக யோசித்தாள். ‘‘ஐம்பதாயிரம் ரூபாய் அல்லது அதற்கு மேல் முதலீடு செய்தால்தான் ‘பான் கார்ட் எண்’ கொடுக்க வேண்டும். நாம் இப்போதைக்கு அந்த விவரம் கொடுக்கத் தேவையில்லை’’ என்றேன்.

உங்கள் கனவுகள் இங்கே காசாகும்!

ஆனால், உள்ளுக்குள் ‘வீட்டில் இருக்கும் இவளுக்கு எதற்கு பான் கார்ட்?’ என்று நினைத்தது எவ்வளவு தவறு என்பது புரிந்தது. ‘இப்போதைக்குத் தேவையில்லை’ என்ற சாக்கு போக்கைச் சொல்லி இனியும் தட்டிக் கழிக்காமல் உடனடியாக விண்ணப்பித்து வைக்கவேண்டும் என்று முடிவு செய்துகொண்டேன்.

‘பான் கார்ட்’ விண்ணப்பிக்க மொத்தமே வெறும் 70 ரூபாய்க்குள்தான் செலவாகும். ஒரு போட்டோ, அடையாள அட்டையின் நகல் மற்றும் வீட்டு விலாசத்துக்கான சான்று ஆகியவற்றுடன் இதற்கான யூ.டி.ஐ வங்கியின் கிளைக்குச் சென்று விண்ணப்பித்தால் சில நாட்களில் நம் வீடு தேடி வரும் பான் கார்ட்!

பான் கார்ட் பற்றிப் பேசிக்கொண்டே மியூச்சுவல் ஃபண்ட் ஏரியாவை விட்டு விலகிப் போய்விட்டேன் பாருங்கள்... ஐம்பதாயிரம் ரூபாய்க்கு மேல் மியூச்சுவல் ஃபண்டில் முதலீடு செய்தால், விண்ணப்பத்தோடு நம் அடையாள அட்டை மற்றும் விலாசத்துக்கான சான்றின் நகல் ஒன்றை இணைக்கும்படி கூறியிருப்பார்கள். கிராஸ் செய்யப்பட்ட காசோலை அல்லது டி.டி மூலமாகத்தான் பணத்தைச் செலுத்தவேண்டும். ரொக்கமாகச் செலுத்தமுடியாது. விண்ணப்ப படிவத்தில் வங்கியின் எம்.ஐ.சி.ஆர் கோட் எண் ணைக் குறிப்பிடச் சொல்லியிருப்பார்கள். செக்கின் கீழே, செக் நம்பருக்குப் பக்கத்தில் இருக்கும் ஒன்பது இலக்க எண்தான் இந்த எம்.ஐ.சி.ஆர் கோட் நம்பர்.

இத்திட்டத்தில் வரும் லாபத்தை டிவிடெண்டாகப் பிரித்துக் கொடுக்கும்போது, நேரடியாக உங்கள் வங்கிக் கணக்கில் அந்தத் தொகையைச் செலுத்துவதற்கு இந்தத் தகவல் உதவும்.

விண்ணப்ப படிவத்தை வாங்கிக்கொண்டு போன ஏஜென்ட், அடுத்தநாள் அக்னாலெட்ஜ்மென்ட் ஸ்லிப்பைக் கொடுக்க வந்தார். அதோடு சேர்த்து ஒரு கவரையும் திணித்தார். அதில் சில நூறு ரூபாய் நோட்டுகள் இருந்தன. ‘‘இது என்ன..?’’ என்றதும், ஒரு அசட்டுச் சிரிப்புடன், ‘‘ஃபார்மாலிட்டிதான் சார்...’’ என்றார்.

இதுபோன்ற முதலீட்டைக் கொண்டு வந்து சேர்த்ததற்காக மியூச்சுவல் ஃபண்ட் நிறுவனம் ஏஜென்ட்களுக்கு கமிஷன் கொடுக்கும். அந்த கமிஷனில் ஒருபகுதியை ஏஜென்ட்கள் முதலீட்டாளர்களுக்குக் கொடுப்பது வழக்கமாகி வருகிறது. அதாவது, அந்த ஏஜென்டைத் தேர்ந்தெடுத்த காரணத்துக்காகக் கொடுக்கப்படும் பரிசாம் இது! நிறைய பாலிசி பிடிக்க வேண்டும் என்பதற்காக, பாலிசிதாரரின் முதல் பிரீமியத்தை தானே கட்டும் இன்ஷூரன்ஸ் ஏஜென்ட்கள் போல இந்தக் கலாசாரமும் வளர்ந்துவருகிறது!

நான் அந்தப் பரிசை வாங்க மறுத்து, அவரை அனுப்பி வைத்தேன். ‘‘அவராக விருப்பப்பட்டு கொடுக்கும் பணத்தை ஏன் வேண்டாம் என்று சொன்னீர்கள்?’’ என்றாள்.

“இந்த மாதிரி ஏஜென்ட்களுக்கு நம்மைப் போன்றவர்கள் செய்யும் முதலீட்டின் மீது கிடைக்கும் கமிஷன்தான் வருமானம். சரியான முதலீட்டைத் தேர்ந்தெடுப்பதற்கு அவர்கள் வழங்கும் ஆலோசனைக்கும், மியூச்சுவல் ஃபண்ட் நிறுவனங்களுக்கும் முதலீட்டாளர்களுக்கும் இடையே பாலமாக இருந்து செய்யும் சேவைக்கும்தான் இந்தக் கட்டணம். அவர்கள் உழைப்புக்குக் கிடைத்த பலனில் நாம் பங்கு கேட்பது அநியாயமில்லையா... சட்டப்படியும் இது குற்றம். ஒருசில ஏஜென்ட்கள் இந்த மாதிரி சட்டத்துக்குப் புறம்பான காரியத்தில் ஈடுபடுவது உண்மைதான். ஆனால், இப்படி முதலீட்டாளர்களுக்கு கமிஷன் வழங்குவது தடைசெய்யப்பட்ட ஒன்று. மீறி யாராவது அப்படிச் செய்தால் அவர்கள் உரிமம் ரத்தாகக் கூட வாய்ப்பிருக்கிறது. நீயும் ஒரு மியூச்சுவல் ஃபண்ட் ஏஜென்ட் ஆகப் போகிறாய். அப்போது உன் கடுமையான உழைப்பில் ஈட்டிய பணத்தில் யாராவது பங்கு கேட்டால் கொடுப்பாயா?” எனப் பொரிந்து தள்ளிவிட்டேன்.

ஃப்ரிஜ்ஜில் இருந்து ஜில்லென்று தண்ணீர் கொண்டு வந்து கொடுத்தாள் என் மனைவி. கொஞ்சம் ஆசுவாசப்படுத்திக்கொண்டேன். ‘‘இந்த மாதிரி குறுக்கு வழிகளில் இறங்குவதை விட்டுவிட்டு, நம்மை நம்பிய முதலீட்டாளர்களுக்கு நல்ல ஆலோசனை வழங்குவதுதான் சரியானது. என்ன சரிதானே..!’’ என்றேன்.

‘‘நியாயமாகப் பார்த்தால் அந்த ஆலோசனைகளுக்கு சார்ஜே வசூலிக்கலாம். டாக்டரிடம் செக்-அப் பண்ணப் போனால், நோயில்லை என்று சொல்வதற்குக்கூட ஃபீஸ் வாங்கிக் கொள்கிறார். எல்லா கன்சல்டேஷனும் அப்படித்தானே...’’ என்றாள்.

‘‘நன்றாகச் சொன்னாய்! வெளிநாடுகளில் எல்லாம் முதலீடு சம்பந்தமாக ஆலோசனை வழங்குபவர்களுக்கு நாம் கட்டணம் செலுத்தவேண்டும். மெள்ள மெள்ள அந்த நிலை இங்கும் வர ஆரம்பித்திருக்கிறது. அவர்க ளுக்குரிய கட்டணத்தைச் செலுத்தினால்தான் நமக்கு பலனளிக்கும் திட்டங்களைப் பற்றிய ஆலோ சனைகளைச் சொல்வார்கள். இல்லையென்றால், அவர்களுக்கு நல்ல பலன் கிடைக்கும் திட்டங்களைத்தான் நம் தலையில் கட்டப் பார்ப்பார்கள்’’ என்றேன்.

விண்ணப்பித்த சில நாட்களில் மியூச்சுவல் ஃபண்ட் நிறுவனத்தில் இருந்து என் மனைவியின் பெயரில் ஒரு கவர் வந்தது.

அதைப் படிக்கப்படிக்க என் மனைவி கண்களில் சூரியகோடி பிரகாசம்...

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism