Published:Updated:

உங்கள் கனவுகள் இங்கே காசாகும்!

உங்கள் கனவுகள் இங்கே காசாகும்!

உங்கள் கனவுகள் இங்கே காசாகும்!

உங்கள் கனவுகள் இங்கே காசாகும்!

Published:Updated:
மியூச்சுவல் ஃபண்ட்
உங்கள் கனவுகள் இங்கே காசாகும்!
 

உங்கள் கனவுகள் இங்கே காசாகும்!

ஒட்டுமொத்த விகடனுக்கும் ஒரே ஷார்ட்கட்!

உங்கள் கனவுகள் இங்கே காசாகும்!

வி ண்ணப்பித்த சில நாட்களிலேயே மியூச்சுவல் ஃபண்ட் நிறுவனத்திடமிருந்து என் மனைவி பெயருக்கு ஒரு கவர் வந்தது. அதைப் பிரிக்காமல் அப்படியே கையில் கொடுத்தேன். ஆவலோடு பிரித்த என் மனைவிக்கு உள்ளே இருந்த ஸ்டேட்மென்ட்டைப் பார்த்தவுடன் ஒன்றும் புரியவில்லை. “ஷேர் சர்டிபிகேட் மாதிரி இருக்கும் என்று எதிர்பார்த்தேனே... இது ஏதோ அக்கவுன்ட் ஸ்டேட்மென்ட் எனப் போட்டிருக்கிறதே’’ என்றாள்.

விளக்க ஆரம்பித்தேன். ‘‘யூ.டி.ஐ மாஸ்டர் ஷேர், மாஸ்டர் கெயின், மார்கன் ஸ்டான்லி போன்ற க்ளோஸ் எண்டட் ஃபண்ட்கள் முன்பெல்லாம் சர்டிபிகேட் வடிவில் கொடுத்தது உண்மைதான். இவை குறிப்பிட்ட காலகெடுவுக்குப்பின் முதிர்வடையும் திட்டங்கள். திட்டகால முடிவுக்குப் பின்னரே, அவற்றைத் திரும்பப் பெற்றுக்கொண்டு பணம் கொடுப்பார்கள். இடையில் பணம் தேவைப்படுவோர் சந்தையில் விற்கவோ, வாங்கவோ ஏதுவாக யூனிட்கள் சர்டிபிகேட் வடிவில் வழங்கப்பட்டன. ஆனால், இப்போது வருவ தெல்லாம் பெரும்பாலும் காலவரையற்ற ஓப்பன் எண்டட் திட்டங்கள்தான் என்பதோடு, இவற்றை அந்நிறுவனங்களிடமே திரும்ப விற்றுக் காசாக்குவது எளிது என்பதால், நம் பெயரில் எவ்வளவு யூனிட் கள் வரவில் உள்ளன என்பதைக் குறிப்பிட்டு ஒரு அக்கவுன்ட் ஸ்டேட்மென்ட் கொடுக்கிறார்கள்.”

புரிந்துகொண்டு தலையாட்டியவள், ஸ்டேட்மென்டைத் திரும்பப் பார்த்துவிட்டு தேள்கொட்டியது போல அலறினாள். ‘‘நாம் கொடுத்தது 5,000 ரூபாய். பத்து ரூபாய் முக மதிப்பில் உள்ள 500 யூனிட்கள் நம் கணக்கில் வரவு வைத்திருக்க வேண்டுமல்லவா? ஆனால், பத்து யூனிட் குறைவாக உள்ளதே! எங்கே தப்பு நடந்ததுனு கேட்கணும்’’ என்றாள்.

மனைவின் குழப்பத்தை சுவாரஸ்யமாக ரசித்துக்கொண்டிருந்த நான், “இந்தக் குறைவுக்குக் காரணம் என்ட்ரி லோடு... அதாவது, இத்திட்டத்தில் சேர நாம் கொடுக்கும் நுழைவுக் கட்டணம். திட்டத்தை அறிமுகப்படுத்தும்போதும் அதன் பின்னரும் ஏற்படும் நிர்வாகச் செலவுகளையும் விளம்பரச் செலவுகளையும் சமாளிக்க போடப்படும் கட்டணம். பொதுவாக, இது ஒன்று முதல் இரண்டரை சதவிகிதம்வரை இருக்கலாம். சில நிறுவனங்கள் புதிய முதலீட்டாளர்களை உற்சாகப்படுத்தும் விதமாக, திட்டம் புதிதாகத் துவங்கும் காலகட்டத்தில் மட்டும் என்ட்ரி லோடே இல்லாமலும் கொடுப்பது உண்டு” என்றவாறே யூனிட்களின் எண்ணிக்கை குறைந்த ரகசியத்தை விளக்க ஆரம்பித்தேன்.

“என்ட்ரி லோடு காரணமாக வழங்கப்படும் யூனிட்களின் எண்ணிக்கை சற்றே குறைவாக இருக்கும். நாம் யூனிட்களை வாங்க வேண்டுமென்றால், அன்றைய என்.ஏ.வி-யில் ஒரு குறிப்பிட்ட சதவிகிதத்தை என்ட்ரி லோடு என்று எடுத்துக்கொள்வார்கள். அதனால் நம் முதலீட்டின் அளவு சற்றே குறைந்திருக்கும். என்ட்ரி லோடு போக மீதமுள்ள பணத்துக்கு, யூனிட்களை வழங்குவார்கள். புதிய வெளியீடுகளைப் பொறுத்த வரையில், யூனிட்களின் என்.ஏ.வி அதன் முக மதிப் பிலேயே எடுத்துக் கொள்ளப்பட்டு, அதில் இருந்து என்ட்ரி லோடு கழிக்கப்படும்.

உதாரணமாக, நாம் விண்ணப்பித்த ரூ.5,000-ல் 2% என்ட்ரி லோடுக்கான 100 ரூபாய் போக மீதமுள்ள 4,900 ரூபாய்க்கு 490 யூனிட்கள் கொடுத்திருக்கிறார்கள்.

“என்.எஃப்.ஓ (நியூ ஃபண்ட் ஆஃபர்) தவிர நடைமுறையில் உள்ள திட்டங்களுடைய யூனிட்களை வாங்கும்போது, அதன் என்.ஏ.வி-யை விட விலை அதிகமாக இருக்கும். பணத் தேவைக்காக நாம் யூனிட்களை அவர்களிடம் விற்கப்போனால், என்.ஏ.வி-யை விட சற்றே குறைவான விலையில் எடுத்துக் கொள்வார்கள். வாங்கிய தங்கத்தை அதே கடையில் திரும்ப விற்கப் போனால், அன்றைய விலையைவிட சற்று குறைவாகத் தானே தருவார்கள்? அதுபோலதான்...” என்றேன்.

‘‘இதற்கு எக்ஸிட் லோடு என்று பெயர். சரியா..? எப்படி என்ட்ரி லோடால் யூனிட்களின் எண்ணிக்கை குறைந்ததோ, அதேபோல எக்ஸிட் லோடால், திரும்பக் கிடைக்கும் பணமும் சற்றே குறைந்திருக்கும்’’ என்று புத்திசாலித்தனமாகக் கேட்டாள்.

‘‘கரெக்ட் இதுவும் இரண்டரை சதவிகிதம் வரை இருக்கலாம். எக்ஸிட் லோடு இல்லாத திட்டங்களும் உண்டு.

அடிக்கடி ஒரு திட்டத்தில் இருந்து அடுத்த திட்டத்துக்கு முதலீட்டாளர்கள் தாவுவதையும் இது தவிர்ப்பதோடு, நீண்ட கால நிலையான முதலீட்டைத் திட்டமிட நிறுவனங்களுக்கு உதவியாக இருக்கும்” என்று நான் சொல்லிக்கொண்டிருக்க, தலையணையை எடுத்து நெஞ்சோடு அணைத்துக்கொண்டு என் மனைவி கேட்டாள்.

“எல்லாம் சரி டியர்! என்.ஏ.வி என்றால் என்ன?”

“நெட் அசட் வேல்யூ அதாவது, நிகர சொத்து மதிப்பு! மியூச்சுவல் ஃபண்டின் அன்றைய தினத்தின் மொத்த சொத்து மதிப்பை, அத்திட்டத்தின் கீழ் உள்ள மொத்த யூனிட்களால் வகுத்தால், அதுதான் ஒரு யூனிட்டின் நிகர சொத்து மதிப்பு.

இது படிப்படியாக வளரவேண்டும் என்பதுதான் எல்லா திட்டங்களின் நோக்கமும். உன் லாபத்தைக் கணக்கிட வேண்டுமானால், வாங்கிய யூனிட்களின் எண்ணிக்கையை, என்.ஏ.வி-யுடன் பெருக்கி, கிடைக்கும் தொகையிலிருந்து உன் முதலீட்டை கழித்துப் பார்த்தால், லாபம் புலப்படும். என்.ஏ.வி\யின் ஏற்ற இறக்கம், பங்குச் சந்தை, ரிசர்வ் வங்கியின் வட்டி விகித ஏற்ற இறக்கம் போறவற்றைப் பொறுத்து மாறுபடும்’’ என்றேன்.

‘‘அதை எப்படிக் கண்காணிப்பது..?’’ என்றாள் என் மனைவி.

‘‘வீட்டு கம்ப்யூட்டரில் கேம்ஸ் விளையாடியது போக, சாட்டிங் பேரில் வெட்டி அரட்டை அடிச்சது போக, மீதி நேரம் இருந்தால் வாங்கிய மியூச்சுவல் ஃபண்ட் திட்டத்தின் நடவடிக்கை களைப் பார். வீட்டுக்கு வரும் பேப்பரில் ஏதாவது அதுபற்றிய செய்தி இருக்கிறதா என்று பார். தேடினால் எல்லாமே கிடைக்கும்.

நிறுவனங்கள் தங்கள் திட்டங்களின் செயல்பாடுகளை செய்தித்தாள்களில் காலாண்டறிக்கை யாக வெளியிடுகின்றன. தவிர, தாங்கள் முதலீடு செய்துள்ள பங்குகள் மற்றும் இதர முதலீடு பற்றிய முழு விவரங்களைத் வாடிக்கையாளர்களுக்கு அவ்வப்போது தனிப்பட்ட முறையிலும் தெரிவிப்பார்கள். மேலும் பல இணையதளங்கள் இந்த விவரங்களை ஒளிவுமறைவின்றி தருகின்றன. இதன்மூலம் மியூச்சுவல் ஃபண்ட், தனது பணத்தை எங்கு, எவ்வளவு முதலீடு செய்துள்ளது என்பதை அறியமுடியும்.’’ இதுபற்றி எல்லாம் எடுத்துச்சொன்னதும் ஆர்வமாகிவிட்டாள்.

‘‘அப்படின்னா, இதை கரெக்டா ஃபாலோ பண்ணினால் பங்குச் சந்தையில் ஒரு கலக்கு கலக்கலாம்னு சொல்லுங்க...’’ என்றாள் என் மனைவி.

‘‘எப்படிச் சொல்றே..?’’ என்றேன் புரியாமல்!

‘‘அது சஸ்பென்ஸ்!’’ என்று சொல்லிவிட்டு அழகுகாட்டிவிட்டு ஓடினாள்.

‘என்னவாக இருக்கும்?’ என்று யோசிக்க ஆரம்பித்தேன்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism