டைரக்ட் மியூச்சுவல் ஃபண்டு திட்டங்கள்... சிறு முதலீட்டாளர்கள் சீண்டாதது ஏன்?

##~## . மியூச்சுவல் ஃபண்டு முதலீட்டாளர்களுக்கு கூடுதல் லாபம் தரும் வகையில் நேரடியாக மியூச்சுவல் ஃபண்டுகளில் (டைரக்ட் ஃபண்டுகள்) முதலீடு செய்யும் திட்டத்தைக் கடந்த ஜனவரியில் கொண்டுவந்தது செபி. இந்தத் திட்டம் கொண்டுவந்து 10 மாதங்கள் முடிவடைந்தும் இதில் சிறு முதலீட்டாளர்கள் எந்த ஆர்வமும் காட்டாமல் இருக்கிறார்கள். இதற்கு என்ன காரணம் என்று மியூச்சுவல் ஃபண்டு நிறுவனங்களில் விசாரித்தோம்.

. டைரக்ட் மியூச்சுவல் ஃபண்டு திட்டத்தின் மூலமாக கடந்த செப்டம்பர்வரை, இந்தியா முழுவதும் 2.11 லட்சம் கோடி ரூபாய் முதலீடு செய்யப் பட்டுள்ளது. இது மியூச்சுவல் ஃபண்டு நிறுவனங்களின் மொத்த சொத்து மதிப்பில் 26%தான். ஆனால், இதிலும் வெறும் 3%தான் ஈக்விட்டி சார்ந்த ஃபண்டுகளில் முதலீடு செய்யப்பட்டுள்ளன. இதன் மதிப்பு 5,600 கோடி ரூபாய் என ஆஃம்பி தெரிவித்துள்ளது.

. டைரக்ட் மியூச்சுவல் ஃபண்டு திட்டம் என்பது முதலீட்டாளர்களுக்கு நீண்ட காலத்தில் அதிக லாபம் கிடைக்க வேண்டும் என்பதற்காகவே கொண்டுவரப்பட்டது. அதாவது, டைரக்ட் மியூச்சுவல் ஃபண்டுகளில் முதலீடு செய்யும்போது வழக்கமான ஃபண்டைவிட இதன் என்.ஏ.வி. மதிப்பு 0.5% கூடுதலாக இருக்கும். இதற்கு காரணம், நேரடியாக முதலீடு செய்யும்போது நிர்வாக கட்டணங்கள் குறைவாக இருக்கும். குறிப்பாக, ஏஜென்ட் கமிஷன் இருக்காது என்பதால் என்.ஏ.வி. மதிப்பு அதிகமாக இருக்கும்.

. இந்த நேரடி திட்டத்தில் பெரிய நிறுவனங்கள் தான் அதிக முதலீடு செய்துள்ளன. சிறு முதலீட்டாளர்களின் முதலீடு என்பது மிகக் குறைந்த அளவில் உள்ளது. இதற்கு முக்கிய காரணம், இத்திட்டம் குறித்த விழிப்பு உணர்வு போதிய அளவுக்கு இல்லை. மேலும், தங்களின் தேவைகளுக்கு ஏற்ற ஃபண்டு எது, அதன் வளர்ச்சி எப்படி இருக்கும் என்பது குறித்து எல்லாம் முதலீட்டாளர்களுக்கு தெரிவதில்லை. அதோடு பெரும்பாலான முதலீட்டாளர்கள் நிதி ஆலோசகர்கள் மூலமாகவே ஃபண்டுகளை தேர்வு செய்கிறார்கள். ஏதாவது சேவைக் குறைபாடு ஏன்றாலும் விநியோகஸ்தர்கள் அல்லது ஏஜென்ட்கள் அதை சரிசெய்து தந்துவிடுவார்கள்.

. ஆனால், டைரக்ட் மியூச்சுவல் ஃபண்டுகளில் இந்த வசதிகள் கிடைப்பதில்லை. தவிர, ஏஜென்ட்கள் மற்றும் விநியோகஸ்தர்கள் இத்திட்டத்தைப் பற்றி எதிர்மறையாகவே பேசி வருகின்றனர். பல சிறு முதலீட்டாளர்கள் இந்தத் திட்டத்தில் முதலீடு செய்ய ஆரம்பித்தால், அவர்களுக்கு கிடைக்கும் கமிஷன் கிடைக்காமல் போய்விடுமே என்கிற பயம்தான் இதற்கு காரணம்.

. டைரக்ட் மியூச்சுவல் ஃபண்டுகளில் முதலீடு செய்யவேண்டுமெனில் முதலீட்டாளர்கள் நேரடியாக மியூச்சுவல் ஃபண்டு நிறுவனத்தின் கிளை அலுவலகத்துக்குச் சென்று விண்ணப்பத்தைப் பூர்த்திசெய்து தரவேண்டும். இந்த விண்ணப்பத்தில் கேட்கப்பட்டிருக்கும் விவரங்களைப் பூர்த்திசெய்து முடிக்க குறைந்தது அரை மணி நேரம் ஆகும்.

. மேலும், கே.ஒய்.சி. பற்றிய விவரங்களைத் தரவேண்டும். முதல்முறை முதலீடு செய்பவர்கள் இந்த கே.ஒய்.சி. வாங்குவதில் பல சிக்கல்களைச் சந்திக்கவேண்டியிருக்கிறது. சில நிறுவனங்கள் கே.ஒய்.சி. வாங்கித் தருவதில் பெருந்தன்மையோடு உதவுகின்றன என்றாலும், எல்லா நிறுவனங்களும் அதைச் செய்வதில்லை.

. சிறு முதலீட்டாளர் யாரும் நேரடித் திட்டத்தில் ஆர்வம் காட்டுவதில்லை என்கிறார்கள் விநியோகஸ்தர்கள். சிறு முதலீட்டாளர்கள் மிகக் குறைவான தொகையை முதலீடு செய்கிறார்கள். அதனால் 0.5% என்பதை அவர்கள் பெரிய விஷயமாக எடுத்துக்கொள்வதில்லை என்கிறார்கள்.

. சிறு முதலீட்டாளர்களுக்கு நன்மை கிடைக்கும் என்று கொண்டுவந்த இந்தத் திட்டம், அவர்கள் ஏற்கக்கூடிய வகையில் இல்லை என்கிறபோது, தேவையான மாற்றங்களைச் செய்யவேண்டிய பொறுப்பு செபியைச் சேரும். செய்யுமா செபி..?

. - இரா.ரூபாவதி.

டைரக்ட் மியூச்சுவல் ஃபண்டு திட்டங்கள்... சிறு முதலீட்டாளர்கள் சீண்டாதது ஏன்?

Vikatan Correspondent