Published:Updated:

கம்பெனி ஸ்கேன் : சிப்லா!

கம்பெனி ஸ்கேன் : சிப்லா!

கம்பெனி ஸ்கேன் : சிப்லா!

கம்பெனி ஸ்கேன் : சிப்லா!

Published:Updated:

இந்த வாரம் நாம் ஸ்கேனிங்குக்கு எடுத்துக்கொண்டுள்ள கம்பெனி, 1952-ம் வருடம் தி கெமிக்கல், இண்டஸ்ட்ரியல் அண்ட் பார்மாச் சூட்டிகல் லேபாரட்டரீஸ் என்ற பெயரில் ஆரம்பிக்கப்பட்டு, இன்றைக்கு சுருக்கமாக 'சிப்லா’ என்று அழைக்கப் படும் மருந்துகள் தயாரிக்கும் நிறுவனத்தை.

ஏறக்குறைய 34 இடங்களில் உற்பத்தி வசதியைக் கொண்டுள்ள இந்த நிறுவனத்தில் இருபதாயிரத்துக்கும் மேற்பட்ட பணியாளர்கள் வேலை பார்க்கின்றனர். அமெரிக்க எஃப்டிஏ, வேர்ல்டு ஹெல்த் ஆர்கனைசேஷன், யுனைடெட் கிங்டமின் மருந்துகள் மற்றும் மருத்துவ உபகரணங்கள் ஒழுங்குமுறை ஆணையம், ஆஸ்திரேலியாவின் நோய் தீர்க்கும் மருந்து நிர்வாக அமைப்பு, தென் ஆப்பிரிக்க மருந்துகள் ஒழுங்குமுறை ஆணையம், டேனிஷ் மருத்துவக் கழகம் மற்றும் கொலம்பியா, உகாண்டா, கனடா நாடுகளின் மருந்து மற்றும் மருத்துவ தர நிர்ணய கழகங்கள் போன்றவற்றின் அங்கீகாரத்தைப் பெற்றிருக்கிறது இந்த நிறுவனம்.

65 வகை நோய்களைக் குணப்படுத்த கொடுக்கப்படும் இரண்டாயிரம் வகை மருந்துகளைத் தயாரிக்கும் இந்த நிறுவனம், ஆக்டிவ் பார்மாச்சூட்டிகல் இன்கிரிடியன்ட்ஸ், மனிதர்கள் மற்றும் விலங்குகளுக்கான நோய் தீர்க்கும் மருந்துகளுக்கான ஃபார்முலேஷன்கள் மற்றும் நோயாளிகள் மருந்துகளை வாங்க மருத்துவருடைய பரிந்துரை சீட்டுகள் தேவைப்படாத மருந்துகள் (ஓடிசி மருந்துவகை) என பல்வேறு மருந்துகளின் தயாரிப்பில் இருக்கிறது.

ஒட்டுமொத்த விகடனுக்கும் ஒரே ஷார்ட்கட்!

கம்பெனி ஸ்கேன் : சிப்லா!

தொழில் எப்படி?

இந்திய மருந்து தயாரிப்பு மற்றும் விற்பனை ஏறக்குறைய 13 சதவிகித அளவுக்கான வளர்ச்சியைக் கண்டு வருகிறது. 2020-ல் அமெரிக்க டாலர் அளவீட்டில் ஏறக்குறைய 70 பில்லியன் அளவை எட்டுவதற்கு வாய்ப்புகள் இருக்கிறது. இந்திய மருந்து சந்தை ரூபாய் அளவில் உலக சந்தையின் விற்பனை மதிப்பில் 1.4 சதவிகிதத்தையும், எண்ணிக்கை அளவில் (வால்யூம்) உலகத்தின் விற்பனை வால்யூமில் ஏறக்குறைய 10 சதவிகித அளவையும் கொண்டுள்ளது. 

உயர்ந்துவரும் தனிநபர் வருமானம், வேகமாக வளர்ந்துவரும் நடுத்தரக் குடும்பங்களின் அளவு, அதிகமாகிக் கொண்டிருக்கும் உடல்நலத்துக்கான காப்பீடு எடுத்தல், நவீனமயப்படுத்துதல்/வேகமான விரிவாக்கம் இவற்றினால் மருந்து நிறுவனங்களின் விற்பனை அதிகரிக்கவே செய்யும். கடினமான தரக்கட்டுப்பாட்டு விதிகளை கடைப்பிடிப்பதன் மூலம் பெரிய அளவிலான வியாபார வளர்ச்சியைத் தருவதற்கு உலகச் சந்தையும் இருக்கிறது என்பதால் வியாபாரத்துக்கு பஞ்சமில்லை.
  
கம்பெனி எப்படி?

இந்திய மருந்து விற்பனை அளவில் ஏறக்குறைய ஐந்து சதவிகித பங்களிப்புடன் இரண்டாவது பெரிய மருந்து தயாரிப்பு நிறுவனமாக இருந்து வருகிறது சிப்லா. மருந்து வகைகளில் சுவாசம் சம்பந்தப்பட்ட மருந்துகள் சுமார் 25 சதவிகித அளவும், தொற்றுநோய் சம்பந்தப்பட்ட மருந்துகள் சுமார் 19%, இதய நோய் சம்பந்தப்பட்ட மருந்துகள் சுமார் 12%, கருத்தரிப்பு சம்பந்தப்பட்ட மருந்துகள் சுமார் 8% இந்திய விற்பனையில் பங்களிப்பைத் தந்துகொண்டிருக்கும் மருந்து வகைகளாகும்.

கம்பெனி ஸ்கேன் : சிப்லா!

ஏற்றுமதி வர்த்தகத்தில் இந்தியாவிலிருந்து சுமார் 170 நாடுகளுக்கு மருந்துகளை ஏற்றுமதி செய்யும் நிறுவனம் என்ற பெருமையைக் கொண்டிருக்கிறது. இருபது நோய் தீர்க்கும் மருந்துகள் தயாரிப்பில், உலகத்திலேயே முதல்முறையாக இந்த மருந்துகளை தயாரித்த நிறுவனம் என்ற பெருமையையும் கொண்டிருக்கிறது. நூற்றுக்கும் மேற்பட்ட காப்புரிமைகள், 139 ட்ரக் மாஸ்டர் ஃபைல்கள் என பல்வேறு காப்பீட்டு உரிமைகளைக் கொண்டிருக்கிறது.

மருந்து ஏற்றுமதி செய்யும் ஏனைய நிறுவனங்கள் எல்லாம் நேரடியாக அந்நிய சந்தையில் ஜெனரிக் சந்தையில் தங்களுடைய மருந்துகளை விற்க முயல்கின்றன. ஆனால், இந்த நிறுவனம் கான்ட்ராக்ட் தயாரிப்பு முறையில் உலகத்தில் உள்ள மற்ற முன்னணி ஜெனரிக் மருந்து நிறுவனங்களுக்காக ஜெனரிக் மருந்துகளை உற்பத்தி செய்து மொத்த விற்பனை செய்துவருகிறது. 

கம்பெனி ஸ்கேன் : சிப்லா!

சமீபத்தில் ஜெர்மனி மற்றும் சுவீடனில் சிப்லா அறிமுகம் செய்த சுவாசம் சம்பந்தப்பட்ட கோளாறுகளைத் தீர்க்க உதவும் ஜெனரிக் இன்ஹேலர்கள் மிகுந்த அளவில் விற்பனையாகி வருகிறது. ஜெர்மனியில் செரிடைட் என்ற பெயரிலும், அட்வைர் என்ற பெயரில் அமெரிக்காவிலும் இந்தவகை இன்ஹேலர்களை கிளாஸ்கோ ஸ்மித்லீன் நிறுவனம் மார்க்கெட்டிங் செய்து விற்பனை செய்து வருகிறது. ஏனைய ஐரோப்பிய நாடுகளில் அடுத்து வரும் ஆண்டுகளில் அறிமுகப்படுத்த இருக்கிறது. 
 
இந்த  நிறுவனம் அறிமுகப்படுத்தியுள்ள ஹெச்ஐவிக்கான மருந்துகளுக்கும் அடுத்த மூன்று முதல் ஐந்து வருடங்களில் நல்லதொரு தேவை இருக்கும். இதுபோன்ற நல்ல பல விஷயங்களை உள்ளடக்கிச் செயல்பட்டு வரும் இந்த நிறுவனம் எதிர்வரும் காலங்களில் நல்ல லாபம் சம்பாதிக்கும் வாய்ப்பு இருக்கிறது.

ரிஸ்க் ஏதும் உண்டா?

அமெரிக்க எஃப்டிஏ போன்ற அனைத்து அந்நிய நாடுகளிலும் இருக்கும் மருந்துக் கட்டுப்பாட்டு நிறுவனங்கள் தரும் சான்றிதழ். இந்தச் சான்றிதழைப் பெறுவதும் தக்கவைத்துக் கொள்வதற்கும் நிறையவே மெனக்கெட வேண்டியிருக்கும். அந்நிய நாடுகளில் இந்த வகையில் சோதனைகள் இருக்கிறது என்றால், இந்தியாவுக்குள் விற்பனை செய்யப்படும் மருந்து வகைகளில் அரசின் விலை நிர்ணய நிலைப்பாடு தரும் விலைக்கட்டுப்பாடு, லாபத்தை பதம் பார்க்கக்கூடிய ஒரு விஷயமாகவே இருக்கிறது.

கம்பெனி ஸ்கேன் : சிப்லா!

நல்ல பல நிகழ்வுகளை தன்னிடத்தே கொண்டுள்ள இந்த நிறுவனத்தின் பங்குகள் கடந்த ஒருமாத காலத்தில் மிக வேகமான ஏற்றத்தைச் சந்தித்துள்ளன. எனவே, இந்த நிறுவனத்தின் பங்குகளை ட்ராக் செய்துகொண்டேயிருந்து ஏதாவது ஓர் அசாதாரண சூழலில் சந்தையில் விலை கணிசமாக இறங்கும் போது நீண்ட கால முதலீட்டுக்காக வாங்கி முதலீட்டாளர்கள் தங்கள் போர்ட்ஃபோலியோவில் சேர்த்துக் கொள்ளலாம்.

- நாணயம் ஸ்கேனர்.

 (குறிப்பு: இந்தப் பகுதி இன்றைய விலையிலேயே வாங்க வேண்டிய பங்கு பரிந்துரை பகுதி அல்ல. இதில் சொல்லப்பட்டுள்ள பங்குகளை வாங்குவது முதலீட்டாளர்களின்தனிப்பட்ட முடிவாகும்)

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism