Published:Updated:

பட்ஜெட் எஃபெக்ட்... வளர்ச்சிக்கு வாய்ப்புள்ள துறைகள், பங்குகள்!

துறைகள்
பிரீமியம் ஸ்டோரி
News
துறைகள்

C O V E R S T O R Y - முதலீட்டாளர்களின் கவனத்துக்கு

ரெஜி தாமஸ், பங்குச் சந்தை நிபுணர்

நடப்பு 2021-22-ம் நிதி ஆண்டுக்கான பட்ஜெட் தாக்கல் செய்யப் பட்டுள்ளது. சுமார் ஓராண்டு காலம் கொரோனா வைரஸ் பரவல் காரணமாகப் பெரும் நெருக்கடியில் பொருளாதாரம் இருந்த சூழலில் தாக்கல் செய்யப்பட்டுள்ள இந்த மத்திய பட்ஜெட் எதிர்பார்த்தபடி இல்லையென்றாலும் முக்கியத்துவம் வாய்ந்த பட்ஜெட்டாக உள்ளது.

ரெஜி தாமஸ், 
பங்குச் சந்தை 
நிபுணர்
ரெஜி தாமஸ், பங்குச் சந்தை நிபுணர்

அடுத்த சில ஆண்டுகளுக்கான அரசு செலவினங்கள் குறித்த திட்ட வழிகாட்டுதலை வகுத்துள்ளதை இந்த பட்ஜெட்டில் முக்கியமாகக் கவனிக்க வேண்டும். இதில் நிதிப் பற்றாக்குறை குறித்தோ கடன் அதிகரிப்பது குறித்தோ மத்திய அரசு கவலைப்படவில்லை. அடுத்த ஐந்து ஆண்டுகளுக்கான நிதி ஒருங்கிணைப்புத் திட்டங்களை வகுத்திருக்கிறது மத்திய அரசாங்கம். 2025 - 26-ம் நிதி ஆண்டில் 4.5% நிதிப் பற்றாக்குறையை நிர்வகிக்கும் வகையில் இந்த நிதி ஒருங்கிணைப்பு திட்டமிடப்பட்டுள்ளது.

மேலும், பட்ஜெட் அறிவிப்புகள் முழுக்க முழுக்க அரசு பொருளாதார வளர்ச்சியைத் தொடர்ந்து ஊக்கப் படுத்துவதற்கு ஆதரவாகச் செயல்படும் மனநிலையில் இருப்பது தெளிவாகத் தெரிகிறது. கொரோனா பாதிப்பு ஏற்படுவதற்கு முன்பே கடந்த சில ஆண்டுகளாகவே பொருளாதார வளர்ச்சி மந்தமாக இருந்த நிலையில், கொரோனா பாதிப்புக்குப் பிறகு, சரிவு பலமடங்கு உயர்ந்தது. 2016-17-ம் நிதியாண்டில் அதிகபட்ச ஜி.டி.பி வளர்ச்சியாக 8.3% பதிவானது. அதன்பிறகு வளர்ச்சி குறைந்து, 2019-20-ம் நிதியாண்டில் ஜி.டி.பி 4.2 சதவிகிதமாகக் குறைந்தது. இது கொரோனா பாதிப்புக்குப் பிறகு, 2020-21-ம் நிதி ஆண்டில் மைனஸ் 7.7% என்ற நிலைக்குச் சரிந்தது. தற்போது மெல்ல மீண்டு வரும் பொருளாதாரம் 2021-22-ம் நிதியாண்டில் ஜி.டி.பி 11% எனும் அளவில் வளர்ச்சியடையும் எனக் கணிக்கப்பட்டுள்ளது.

அரசின் தற்போதைய கணக்கும் இதன் அடிப்படையில்தான் உள்ளது. அதாவது, அரசு கணிப்பின்படி வளர்ச்சி மீண்டும் சிறப்பாக வரும்பட்சத்தில், நாட்டின் கடன் அதிகரிப்போ, நிதிப் பற்றாக்குறையோ இருந்தாலும் ஜி.டி.பி வளர்ச்சி சிறப்பாக இருந்தால், வருவாய் உயர்ந்து அதன் மூலம் நிதி பற்றாக் குறையையும் கடனையும் சமநிலைக்குக் கொண்டு வர முடியும் என நினைக்கிறது.

துறைகள்
துறைகள்

அதிக மூலதனச் செலவினம்...

மத்திய அரசு தொடர்ந்து பொது செலவினத்தை அதிகரித்து வருகிறது. 2021-22-ம் நிதி ஆண்டுக்கு ரூ.34.83 லட்சம் கோடி மொத்த செலவினமாகக் கணித்துள்ளது. இது 2020-21-ம் நிதியாண்டு மதிப்பீட்டைக் காட்டிலும் 1% அதிகம் ஆகும். சொல்லப்போனால், மொத்த செலவினம் 2020-21-ம் நிதி ஆண்டிலேயே அதற்கு முந்தைய நிதி ஆண்டு மதிப்பான ரூ.26.86 லட்சம் கோடியைக் காட்டிலும் 22.45% உயர்ந்தது. அதேபோல், முக்கிய செலவினமான மூலதனச் செலவினமும் 2020-21-ம் நிதியாண்டில் 31% அதிகரித்தது.

தற்போது 2021-22-ம் நிதியாண்டுக்கான மூலதனச் செலவும் 26.11% உயர்ந்து, ரூ.5.54 லட்சம் கோடியாக உள்ளது. இந்த ஒதுக்கீடு முழுக்க முழுக்க உள்கட்டமைப்பு, துறைமுகம், சாலைப் போக்குவரத்து ஆகிய துறைகளில் கவனம் செலுத்த உள்ளது. இதன்மூலம் பெரிய அளவில் வேலைவாய்ப்பை உருவாக்க முடியும் என்பது அரசின் நோக்கமாக உள்ளது. மேலும், சுயசார்பு பாரதம் என்ற திட்டத்தை வலுப்படுத்த, உள்நாட்டு சந்தையைச் சிறப்பாகக் கட்டமைக்க இந்த பட்ஜெட்டில் அதிகம் கவனம் செலுத்தப்பட்டுள்ளது.

செயல்திறன் ஊக்குவிப்பு மற்றும் உற்பத்தி சார்ந்த ஊக்குவிப்புத் திட்டங்கள், பிரமாண்ட ஜவுளிப் பூங்காக்கள், சுகாதாரத்துறை மற்றும் கிராமப் புற வளர்ச்சி ஆகியவையும் அதிக கவனத்தில் எடுத்துக்கொள்ளப் பட்டுள்ளது.

மார்க்கெட்
மார்க்கெட்

நீண்டகால நிதி ஒருங்கிணைப்புத் திட்டம்...

மத்திய அரசு இந்த பட்ஜெட்டில் ஐந்து ஆண்டுகளுக் கான நிதி ஒருங்கிணைப்பு வழிகாட்டுதலை வகுத்துள்ளது. அதன்படி, 2025-26-ம் நிதி ஆண்டில் நிதிப் பற்றாக்குறையை 4.5 சதவிகிதமாக நிர்வகிக்க இலக்கு வைத்துள்ளது. 2020-21-ம் நிதி ஆண்டில் நிதிப் பற்றாக்குறை 9.5 சதவிகிதமாக உள்ளது. இது 2021-22-ம் நிதி ஆண்டில் ஜி.டி.பி-யில் 6.8 சதவிகிதமாக இருக்கும் எனக் கணிக்கப் பட்டுள்ளது. இது சர்வதேச நிதிப் பற்றாக்குறை அளவைக் காட்டிலும் அதிகம் ஆகும். மேலும், நிதிப் பற்றாக்குறை குறித்த புள்ளி விவரங்களும் சந்தை எதிர்பார்ப்புகளைக் காட்டிலும் அதிகமாக உள்ளன. பொருளாதாரத்தை மீட்பதில் அரசு அதிக கவனத்துடன் இருப்பது தெளிவாகத் தெரிகிறது. நாட்டின் பொதுக் கடன் அளவு அதிகரிக்கும் / சர்வதேச ரேட்டிங் நிறுவனங்களின் தர நிர்ணயம் பாதிக்கும் என்ற சூழல் ஏற்படும் என்பது தெரிந்தும் அரசு செலவினங்களை அதிகமாகத் திட்டமிட்டுள்ளது. அதே சமயம், கொரோனா பாதிப்பில் பாதாளத்தில் விழுந்த பொருளாதாரத்தை மீட்க அரசு செலவினம் மிக முக்கியத் தேவை என்பதையும் மறுக்க முடியாது.

பட்ஜெட்டில் புதிதாக என்ன இருக்கிறது?

இந்த பட்ஜெட்டில் மேம்பாட்டு நிதி நிறுவனம் மற்றும் கடன் சந்தைக்கு உதவும் பிரத்யேக வங்கி (கடன் மறுசீரமைப்பு வங்கி) ஆகியவை உருவாக்கப்பட்டுள்ளன.

மேம்பாட்டு நிதி நிறுவனம்...

பட்ஜெட்டில் ரூ.20,000 கோடி முதலீட்டில் மேம்பாட்டு நிதி நிறுவனம் ஒன்றை உருவாக்க அறிவிப்பு வெளியிடப்பட்டு உள்ளது. மேலும், அடுத்த மூன்று வருடங்களில் ரூ.5 லட்சம் கோடி கடன் வழங்க இலக்கு நிர்ணயிக் கப்பட்டுள்ளது. இந்தப் புதிய மேம்பாட்டு நிதி நிறுவனம் நீண்டகால உள்கட்டமைப்பு திட்டங்களுக்கு உதவும் வகையில் செயல்படும் எனத் தெரிகிறது. ஆனால், அது பெரிய அளவில் வெற்றியடைய சந்தையிலிருந்து நிதி ஆதாரம் கிடைப்பது மிகவும் அவசியமாக இருக்கும். அதிக மான திட்டங்களைச் செயல் படுத்த வேண்டும் எனில், அதிக நிதி ஆதாரம் தேவைப்படும். எனவே, இந்த மேம்பாட்டு நிதி நிறுவனமானது நீண்டகால அடிப்படையிலான நிதியைச் சந்தையிலிருந்து எப்படிப் பெறப் போகிறது என்று தெரியவில்லை.

மேலும் முந்தைய மேம்பாட்டு நிதி நிறுவன அமைப்பில் நடந்த தவறுகளிலிருந்து கற்றுக்கொண்டு, இந்தப் புதிய மேம்பாட்டு நிதி நிறுவனம் தனக்கான ரிஸ்க்கு களை எப்படி நிர்வகிக்க போகிறது என்ற உத்தி சார்ந்த தெளிவும் மிகவும் முக்கியம். ஏனெனில், சில துறைகளில் வாராக்கடன் என்பது மிகத் தீவிர பிரச்னையாக உள்ளது கவனிக்கத்தக்க ஒன்றாகும். இது சமயங்களில் மேம்பாட்டு நிதி நிறுவனத்துக்கே பெரும் தலைவலியாக மாறிவிடும்.

துறைகள்
துறைகள்

வாராக்கடன்களுக்கான வங்கி...

சொத்து மறுசீரமைப்பு நிறுவனம், சொத்து நிர்வகிப்பு நிறுவனம், மாற்று முதலீடு நிதி நிறுவனம் ஆகியவற்றின் கீழ் வாராக்கடன்களுக்கான பிரத்யேக வங்கி ஒன்றை அமைக்க பட்ஜெட்டில் அறிவிப்பு வெளியாகியுள்ளது. இது வங்கிகளின் வாராக்கடன்களைக் கைப்பற்றி நிர்வகித்து அவற்றை மீட்கும் பொறுப்பை செயல்படுத்தும் வங்கியாக இருக்கும். இதன்மூலம் வங்கிகளின் பல்வேறு செயல்பாடுகளில் உள்ள குறைகளைச் சரிசெய்ய இந்த வங்கி உதவியாக அமையலாம்.

தற்போது வங்கிகளின் மொத்த வாராக் கடன் 7% என்ற நிலையில் உள்ளது. இந்த ஆண்டு செப்டம்பரில் இது 15 சதவிகிதமாக உயர்வதற்கான வாய்ப்புள்ளதாக எதிர் பார்க்கப்படுகிறது. கொரோனா நெருக்கடி ஏற்கெனவே வங்கித் துறையில் பெரிய அழுத்தத்தை ஏற்படுத்தியுள்ளது. தற்போது அமைக்கப்படவுள்ள இந்த வாராக்கடன் வங்கியானது முக்கியத் துறைகளின் (மின் உற்பத்தித் துறை, சாலைப் போக்குவரத்துத் துறை மற்றும் பிற உள்கட்டமைப்பு துறைகள்) தேசிய சொத்துகளைப் பாதுகாக்கும் பெரிய பொறுப்பை ஏற்க உள்ளது. இந்தச் சொத்துகள் வங்கிகளுக்கும் நாட்டுக்கும் எதிர்காலத்தில் மிகப் பெரிய முக்கியத்துவம் வாய்ந்த சொத்துகளாக விளங்கக்கூடியவை.

கவர்ச்சிகரமான வரிச் சலுகை இல்லை...

இந்த ஆண்டு நிதி அமைச்சர் எந்தவித புதிய வரி விகிதங்களையும் பட்ஜெட்டில் அறிமுகப்படுத்த வில்லை. மேலும், ஸ்டார்ட் அப் மற்றும் குறைந்த விலை வீடு திட்டங் களுக்கான வரிச் சலுகைகளையும் ஊக்குவிப்புத் திட்டங்களையும் மேலும் ஓராண்டுக்கு நீட்டித்திருக் கிறார். குறிப்பாக, வரி நிர்வாக கட்டமைப்பை முறைப்படுத்துவதற் கான பல்வேறு முயற்சிகளும் இந்த பட்ஜெட்டில் எடுக்கப்பட்டுள்ளன. வரி நிர்வாகத்தில் வெளிப்படைத் தன்மையைக் கொண்டுவருவதற்கும், தொழில் தொடங்குவது எளிமை யாகவும், தேவையற்ற முறைகேடு களைக் குறைப்பதற்காகவும் முயற்சிகள் எடுக்கப்பட்டுள்ளன.

பரிசு, அன்பளிப்பாக வரும் வெளி நாட்டு நிதிகளுக்கு வரிச் சலுகை, சர்வதேச விமானக் குத்தகை நிறுவனங்களுக்கு வரிச் சலுகை; அதே போல், நீண்டகால நிலையான மூலதனப் பங்களிப்பு ஊக்குவிப் புக்காக சவரன் வெல்த் ஃபண்ட் மற்றும் பென்ஷன் ஃபண்ட் ஆகிய வற்றுக்கு வரிச் சலுகை வழங்க சில நிபந்தனைகளுடன் அரசு முடிவெடுத் துள்ளது. குறிப்பாக, உள்கட்டமைப்பு நிறுவனங்கள் சார்ந்த முதலீடுகளில் வரிச் சலுகை கோருபவர்களுக்கு சில நிபந்தனைகளுடன் வரிச்சலுகை வழங்கப்பட உள்ளது. மேலும், அந்நிய முதலீட்டாளர்களிடம் பெறப்படும் தற்போதைய டி.டி.எஸ் விகிதத்தை டி.டி.ஏ.ஏ விகிதங்களுக்கு இணையாக மாற்றியுள்ளதன் மூலம் அவர்கள் பலன் அடைவார்கள். இது டிவிடெண்ட், வட்டி வருமானம் ஆகியவற்றுக்கும் பொருந்தும்.

தனிநபர் வருமான வரி விகிதங்கள் குறைப்புக்கான எதிர்பார்ப்புகள் அதிகமாக இருந்த நிலையிலும், இதற்கான எந்த அறிவிப்பும் பட்ஜெட் உரையில் இடம்பெறவில்லை. வரி குறைப்போ, வரி விகிதங்களில் மாற்றமோ செய்யப்படவில்லை. இது வரிதாரர்களுக்குச் சற்று ஏமாற்றம் அளிப்பதாக அமைந்தது.

பட்ஜெட் எஃபெக்ட்... வளர்ச்சிக்கு வாய்ப்புள்ள  துறைகள், பங்குகள்!

பங்குச் சந்தையின் எதிர்வினை...

வழக்கமாக, தொழில் துறை மற்றும் பங்குச் சந்தையில் பட்ஜெட்டுக்கு பெரிய அளவில் உற்சாக வரவேற்பு இருக்கும். குறிப்பாக, இந்த பட்ஜெட்டில் சில முக்கிய அம்சங்கள் உள்ளன. * புதிய வரி ஏதும் இல்லை, வரி விகிதங்களில் மாற்றமில்லை. * வளர்ச்சியில் அதிக கவனம் செலுத்தப் பட்டுள்ளது; பொருளாதாரத்தை மீண்டும் வளர்ச்சியின் போக்கில் கொண்டுவர கவனம் செலுத்தப் பட்டுள்ளது. * வரி நிர்வாகக் கட்டமைப்பை மறுசீரமைக்க முயற்சி மேற்கொள்ளப்பட்டுள்ளது. * அந்நிய முதலீட்டாளர்கள் செலுத்தும் டி.டி.எஸ் விகிதங்கள் டி.டி.ஏ.ஏ-க்கு இணையாக வைக்கப்பட்டுள்ளன.

பட்ஜெட் தாக்கலுக்குப் பிறகு, பங்குச் சந்தை மிகச் சிறப்பாக ஏற்றம் கண்டதுடன், ஏற்றத்தின் போக்கையும் தக்க வைத்துக்கொண்டது. சென்செக்ஸ் பட்ஜெட் தாக்கல் செய்யப்பட்ட தினத்திலிருந்து இன்று வரையில் 5000 புள்ளிகள் ஏற்றம் கண்டிருக்கிறது. இது குறிப்பிடத்தக்க நிகழ்வு. மேலும், அந்நிய முதலீட்டாளர்கள் தொடர்ந்து பங்குகளை வாங்கிக் குவிப்பவர்களாகவே இருக்கிறார்கள். பிப்ரவரி 1 முதல் சுமார் ரூ.16,000 கோடிக்கு முதலீடு செய்திருக்கிறார்கள். பட்ஜெட் மீது அவர்கள் நம்பிக்கை கொண்டிருப் பதையே இது காட்டுகிறது. அதே சமயம், உள்நாட்டு முதலீட்டாளர்கள் தொடர்ந்து பங்குகளை விற்று வருகின்றனர். பிப்ரவரி 1 முதல் தற்போது வரை ரூ.5,250 கோடிக்கு பங்குகளை விற்றுள்ளனர்.

மார்க்கெட்
மார்க்கெட்

கவனிக்க வேண்டிய துறைகள் & பங்குகள்...

1. வேளாண் துறை; உரம், மைக்ரோ நீர் பாசனம் மற்றும் வேளாண் உள்கட்டமைப்பு: கொரமண்டல் இன்டர்நேஷனல், சாரதா கிராப்கெமிக்கல், யு.பி.எல்

2. ஆட்டோமொபைல், ஆட்டோமொபைல் உதிரிபாகங்கள்: எம் அண்ட் எம், மாருதி, ஜி.என்.ஏ ஆக்சில்ஸ், டி.வி.எஸ் மோட்டார், சுப்ரோஸ் (Subros)

3. மூலதனப் பொருள்கள் / உள்கட்டமைப்பு: எல் அண்ட் டி, கே.என்.ஆர் கன்ஸ்ட்ரக்‌ஷன்

4. சிமென்ட் / மெட்டல்: டால்மியா சிமென்ட், அல்ட்ராடெக், ஜே.கே லஷ்மி சிமென்ட், ஜிண்டால் ஸ்டீல் அண்ட் பவர், ஜே.எஸ்.டபிள்யூ ஸ்டீல்

5. ஆயுள் காப்பீடு: ஐ.சி.ஐ.சி.ஐ புரூடென்ஷியல், ஹெச்.டி.எஃப்.சி லைஃப்

6. எண்ணெய் மற்றும் எரிவாயு: ஐ.ஓ.சி.எல், ரிலையன்ஸ், குஜராத் கேஸ், பெட்ரோநெட் எல்.என்.ஜி.

ஆக இந்த பட்ஜெட்டில் உள்ள பெரிய சவால் எப்படி அறிவிப்புகள் அனைத்தும் செயலாக்கமாகப்போகிறது என்பதுதான். ஏனெனில், பட்ஜெட் பேரியல் பொருளாதாரக் காரணிகள் மீது தாக்கம் செலுத்துவதாக இருப்பதால், அறிவிப்புகளின் செயலாக்கமும் செயல்படுத்தும் வேகமும் முக்கியத்துவம் பெறுகின்றன. இந்த ஆண்டு நாட்டின் கடன் ஜி.டி.பி-யில் 90% உயரும் என்ற நிலையில் இருக்கிறது எனவே, நாமினல் ஜி.டி.பி 10% என்ற இலக்கை எட்ட வேண்டிய பொறுப்பு சம்பந்தப்பட்ட அனைத்துத் தரப்பினர் மீதும் ஏற்றப்பட்டுள்ளது. இந்த இலக்கு எட்டப் பட்டால்தான் கடன் ஒரு சமநிலைக்கு வரும். பின்னர், அதைக் குறைக்கவும் வழிபிறக்கும்.இந்த அடிப்படையில் பார்க்கும்போது பட்ஜெட் அறிவிப்புகளும் திட்டங்களும் எப்படிச் செயல்படுத்தப்படப்போகின்றன என்பது மிக முக்கியமானதாக உள்ளது.

பட்ஜெட் வகுத்துள்ள பாதை சரியாக இருக்கிறது; அது வெற்றியடைவது செயலாக்கத்தில் மட்டுமே அடங்கியிருக்கிறது.

தமிழில்: திவ்யா

பிட்ஸ்

ட்விட்டர் சேவைக்குப் போட்டியாகப் பயன்பாட்டுக்கு வந்திருக்கிறது ‘கூ’ (Koo) என்கிற மைக்ரோ ப்ளாக்கிங் தளம். கடந்த ஒன்பது மாதங்களில் சுமார் 30 லட்சம் பேர் இதை டவுன்லோடு செய்திருக் கிறார்களாம்!