Published:Updated:

ஹுக்தாமகி இந்தியா லிமிடெட்..! அறிவோம் பங்கு நிறுவனம்..!

ஹுக்தாமகி இந்தியா
பிரீமியம் ஸ்டோரி
ஹுக்தாமகி இந்தியா

K N O W Y O U R C O M P A N Y - (NSE SYMBOL: HUHTAMAKI BSE CODE: 509820)

ஹுக்தாமகி இந்தியா லிமிடெட்..! அறிவோம் பங்கு நிறுவனம்..!

K N O W Y O U R C O M P A N Y - (NSE SYMBOL: HUHTAMAKI BSE CODE: 509820)

Published:Updated:
ஹுக்தாமகி இந்தியா
பிரீமியம் ஸ்டோரி
ஹுக்தாமகி இந்தியா

ஹுக்தாமகி இந்தியா லிமிடெட் (Huhtamaki India Limited) நிறுவனம் கன்ஸ்யூமர் பேக்கேஜிங் மற்றும் டெக்ரேட்டிவ் லேபிளிங் தீர்வுகளை வழங்கிவரும் ஒரு நிறுவனமாகும். உணவுப் பொருள்கள் பேக்கேஜிங் துறையில் உலக அளவில் முன்னணி நிறுவனமாகத் திகழும் ஹுக்தாமகி ஓ.ஒய்.ஜே எனும் பின்லாந்தைச் சார்ந்த குழுமத்தின் ஓர் அங்கமாக இருக்கிறது ஹுக்தாமகி இந்தியா லிமிடெட் நிறுவனம்.

நிறுவனத்தின் வரலாறு...

1935-ம் ஆண்டில் தி பேப்பர் புராடக்ட்ஸ் என்ற பெயரில் ஆரம்பிக்கப்பட்ட இந்த நிறுவனம், 1999-ம் ஆண்டில் ஹுக்தாமகி பேக்கேஜிங் வேர்ல்டுவைட் குழுமத்தின் ஒரு பகுதியாக மாறியது. 1950-ம் ஆண்டில் பங்குகளை வெளியிட்ட தி பேப்பர் புராடக்ட்ஸ் லிமிடெட் நிறுவனம், மும்பை பங்குச் சந்தையில் பட்டியலிடப்பட்டது. 1960-ல் ஃப்ளெக்ஸிபிள் லேமினேட் பேக்கேஜிங் உற்பத்தி வசதியை மும்பைக்கு அருகே உள்ள தானேயில் நிறுவிய இந்த நிறுவனம், 1996-ம் ஆண்டில் சில்வாசாவில் தன்னுடைய இரண்டாவது ஃப்ளெக்ஸிபிள் லேமினேட் பேக்கேஜிங் உற்பத்தி மையத்தை நிறுவியது. இந்தக் குழுமம் இன்றைக்கு இந்திய அளவில் 18 உற்பத்தி மையங்களையும் ஐந்து வாடிக்கையாளர்கள் சேவை மையங் களையும் கொண்டு இயங்கிவருகிறது. வெப்டெக் லேபிள்ஸ் பிரைவேட் லிமிடெட், பாசிட்டிவ் பேக்கேஜிங் இண்டஸ்ட்ரீஸ் லிமிடெட் மற்றும் அஜந்தா லேபிள்ஸ் எனும் நிறுவனத்தின் இந்திய செயல்பாடுகள் போன்றவற்றைக் கையகப்படுத்தியது. இந்த நிறுவனம் வழங்கிவரும் ஃப்ளெக்ஸிபிள் பேக்கேஜிங் மற்றும் லேபிளிங் தீர்வுகளைத் தீவிரமாகப் பலப்படுத்தியுள்ளது.

1998-ம் ஆண்டில் தன்னுடைய மூன்றாவது ஃப்ளெக்ஸிபிள் லேமினேட் உற்பத்தி வசதியை நிறுவிய இந்த நிறுவனம், 2006-ம் ஆண்டில் ருத்ராப்பூர் என்னும் இடத்தில் தன்னுடைய நான்காவது ஃப்ளெக்ஸிபிள் லேமினேட் உற்பத்தி மையத்தை ஆரம்பித்தது. 2007-ம் ஆண்டில் தன்னுடைய சில்வாசா உற்பத்தி மையத்தில் உயர்ரக பவுச்சிங் பொருள்களை உற்பத்தி செய்யும் வசதியை நிறுவியது. 2010-ம் ஆண்டில் தானேயில் புதியதொரு உற்பத்தி மையத்தை நிறுவிய இந்த நிறுவனம், 2012-ம் ஆண்டில் பிரீமியம் ரக லேபிலிங் உற்பத்திப் பணியில் ஈடுபட்டு வந்த வெப்டெக் எனும் நிறுவனத்தைக் கையகப்படுத்தியதன் மூலம் தன்னை பேக்கேஜிங் மற்றும் லேபிளிங் துறையில் இந்தியாவில் இயங்கும் நிறுவனங்களுக்கு மத்தியில் முதல் நிலைக்கு உயர்த்திக்கொண்டது.

2014-ம் ஆண்டில் தன்னுடைய சில்வாசா உற்பத்தி மையத்தில் பெரியதொரு விரிவாக்கத்தைச் செய்தது இந்த நிறுவனம். அதே ஆண்டில் இந்த நிறுவனத்தின் பெயர் ஹுக்தாமகி பி.பி.எல் லிமிடெட் என்று பெயர் மாற்றம் செய்யப்பட்டது. 2015-ம் ஆண்டில் பாசிட்டிவ் பேக்கேஜிங் எனும் நிறுவனமும் ஹுக்தாமகி பி.பி.எல் லிமிடெட் நிறுவனத்தின் ஓர் அங்கமாக மாற்றப் பட்டது. கடந்த ஆண்டு நவம்பர் 11-ம் தேதியன்று இந்த நிறுவனத்தின் பெயர் ஹுக்தாமகி இந்தியா லிமிடெட் என்று மாற்றப்பட்டது.

ஹுக்தாமகி இந்தியா
ஹுக்தாமகி இந்தியா

நிறுவனத்தின் தயாரிப்புகள்...

இந்த நிறுவனத்தின் தயாரிப்புகள் என்று பார்த்தால், உணவுப் பொருள்கள் பேக்கேஜிங், குடிப்பதற் கான பானங்களுக்கான பேக்கேஜிங், செல்லப் பிராணிகளுக்கான உணவுப் பொருள்கள் பேக்கேஜிங், பற்பசை போன்றவற்றுக்கான பேக்கேஜிங் டியூப் லேமினேட்டுகள், மருந்துகள் மற்றும் களிம்புகளுக்கான டியூப் லேமினேட் பேக்கேஜிங், பர்சனல் கேர் பொருள்களுக்கான பேக்கேஜிங், ஃப்ளெக்ஸிபிள் பேக்கேஜிங் லேபிள்கள், ஏனைய வகை லேபில்கள், மறுசுழற்சி செய்யும் அளவுக்கான பேக்கேஜிங் தீர்வுகள் போன்றவற்றைச் செய்துவருகிறது.

உணவுப் பொருள்களுக்கான பேக்கேஜிங் தீர்வுகளில் பிஸ்கட்கள் மற்றும் ஏனைய சிறுதீனிக்கான திண் பண்டங்கள், சீரியல்கள், மிட்டாய்கள், சாக்லேட் போன்ற கன்ஃபெக்‌ஷனரி கள், பால் மற்றும் சிறார்களுக்கான உணவுவகைகள், ஐஸ்க்ரீம்கள், உடனடியாகத் தயாரித்து உண்ணும் அளவிலான ரெடி மீல்ஸ் ரகங்கள், சூப் மற்றும் சாஸ்களுக்கான பேக்கேஜிங்கை வழங்கி வருகிறது இந்த நிறுவனம்.

குடிக்கும் பானங்களில் காபி, ஜூஸ் மற்றும் ஆல்கஹால் அல்லாத குடிபானங்கள், பவுச்களில் விற்கப்படும் ஆல்கஹால் பானங்கள், பவுடர் வடிவில் விற்கப்படும் ஊட்டச்சத்து பானங்கள், டீத்தூள் போன்றவற்றுக்கான பேக்கேஜிங்கை வழங்கி வருகிறது இந்த நிறுவனம்.

ஹெல்த்கேர் மற்றும் பார்மா நிறுவனங்களுக்கான பேக்கேஜிங் தீர்வுகள் பிரிவில் திரவ வடிவ மருந்துகள், தைலங்கள், க்ரீம்கள், ஜெல் மற்றும் தோல் சிகிச்சைக்காக உபயோகிக்கப்படும் மருந்துகளுக்கான ட்யூப்களை உற்பத்தி செய்து தன் வாடிக்கையாளர்களுக்குத் தருகிறது. இதே பிரிவில் மருத்துவத் துறையில் உபயோகப்படுத்தப்படும் கருவி களுக்கான பேக்கேஜிங், படிக நிலை மற்றும் பொடிகளாக விற்கப்படும் மருந்துகளுக்கான பேக்கேஜிங் போன்றவற்றை உற்பத்தி செய்து விற்பனை செய்துவருகிறது இந்த நிறுவனம்.

ஏனைய தயாரிப்புகள் பிரிவில் டிஜிட்டல் பிரின்டிங், உலோகத்தின் மீது பெயரைப் பொறிக்கும் வசதி, சிறப்பு வகை பவுச்கள், வெப்பத்தை உள்ளே செல்லவிடாத வகையிலான பேக்கேஜிங், ஸ்டிக்கர்கள் போன்ற வற்றையும் உற்பத்தி செய்து தன்னுடைய வாடிக்கையாளர்களுக்கு வழங்கிவருகிறது.

மறுசுழற்சி செய்யும் வகையிலான பேக்கேஜிங் பொருள்கள் உற்பத்தியின் கீழ் காபி, உலர்ந்த ரக உணவுகள், பார்மா மற்றும் பர்சனல்கேர் பொருள்களுக்கான பேக்கேஜிங்களை உற்பத்தி செய்து விற்பனை செய்து வருகிறது இந்த நிறுவனம்.

பேக்கேஜிங் துறையில் சாதாரண வகை பேக்கேஜிங் என்பதிலிருந்து பேக்கேஜ் செய்யப்பட்ட பொருள் விற்பனைக்கு இருக்கும்போது அதுவே ஒரு விளம்பரமாக இருக்கும் அளவுக்கான தயாரிப்புகள் (இந்தியா கேட் பாஸ்மதி), பேக்கேஜ் செய்த பொருள்கள் கடினமான முறையில் கையாளப்படும்போது கிழிந்து விடாமல் இருக்க ஒரே பேக்கேஜில் இரண்டு பேக்கேஜிங் இருப்பதைப் போல் உருவாக்குதல் (bag-in-bag), ஏழு அடி உயரத்தில் இருந்து கீழே போட்டாலும் கிழியாத வகையிலான பேக்கேஜிங்குகள், ப்ரெய்லி எழுத்துகளைக் கொண்ட புத்தக வடிவிலான லேபிள் பேக்கேஜிங்கள், காகிதத்தால் செய்யப்பட்ட அதே சமயம், ஜிப்பர்களை (மீண்டும் மீண்டும் மூடித் திறக்கும் வண்ணம்) கொண்ட பேக்கேஜிங்குகள், தயாரிப்புகளை அதை அடிப்படையாக நுகரப்படும் அளவில் வெளியில் இருந்தே கண்டறியக்கூடிய விஷயங்களுடன் கூடிய பேக்கேஜ் செய்வதற்கான தயாரிப்புகளை வழங்குதல் (உதாரணத்துக்கு, காபி டிக்காஷனின் பேக்கிங் வடிவம் டபரா மற்றும் டம்ளர் வடிவில் அமைக்கப் பட்டிருத்தல்), ஹோலோகிராம் களுடன்கூடிய பேக்கேஜிங், பேக்கேஜிங்குக்குள் ஸ்டிக்கர்களை ஒட்டித் தரும் தயாரிப்புகள், வடை மாவை நேரடியாக சட்டியில் வடையாகப் பிழியும் வண்ணம் வடிவமைக்கப்பட ஸ்க்வீஸ் செய்யும் வகையிலான பேக்கேஜிங்குகள் போன்ற பல்வேறு விதமான நூதன தயாரிப்புகளை வாடிக்கையாளர் களின் தேவைக்கு இணங்க வெற்றி கரமாக வழங்கிவருகிறது இந்த நிறுவனம்.

சார்ட்
சார்ட்

ரிஸ்க்குகள் ஏதும் உண்டா?

பேக்கேஜிங் துறையில் செயல்பட்டு வரும் நிறுவனங்களுக்கே உரித்தான அனைத்து வகை ரிஸ்க்குகளும் இந்த நிறுவனத்துக்கும் உண்டு. சுற்றுச்சூழல், மாசுக் கட்டுப்பாடு, அரசாங்கத்தின் கொள்கைகள், தொழில் ரீதியிலான போட்டி, புதிய தொழில்நுட்பம், பேக்கேஜிங் துறையில் வரக்கூடிய புதிய கண்டுபிடிப்புகள், மூலப் பொருள்கள் விலை உயர்வு போன்ற வையும் பொருளாதார வளர்ச்சியில் திடீரென்று உருவாகக்கூடிய தேக்க/மந்தநிலையும் இந்த நிறுவனத்துக்கான ரிஸ்க்குகளே ஆகும்.

புள்ளிவிவரம்
புள்ளிவிவரம்

முதலீட்டாளர்கள் என்ன செய்ய வேண்டும்?

இந்தப் பகுதி பங்குகளைப் பரிந்துரை செய்யும் பகுதி அல்ல. முதலீட்டாளர்களுக்குப் பங்குகளை அறிமுகப்படுத்துதல் மற்றும் கல்வியே இந்தப் பகுதியின் நோக்கம். பங்கு முதலீடுகள் சந்தை அபாயத்துக்கு உட்பட்டது என்பதால், எந்தவொரு பங்கை வாங்கும்முன்னும் செபி பதிவு பெற்ற முதலீட்டு ஆலோசகரைக் கலந்தாலோசித்து, அந்தப் பங்கில் முதலீடு செய்வதில் இருக்கும் ரிஸ்க் உங்களுக்கு உகந்ததுதானா என்பதை முடிவு செய்த பின்னரே முதலீட்டு நடவடிக்கைகளை நீங்கள் எடுக்க வேண்டும்!