Published:Updated:

பான்கோ புராடெக்ட்ஸ் (இந்தியா) லிமிடெட்!

பான்கோ புராடெக்ட்ஸ் (இந்தியா)
பிரீமியம் ஸ்டோரி
பான்கோ புராடெக்ட்ஸ் (இந்தியா)

அறிவோம் பங்கு நிறுவனம்...

பான்கோ புராடெக்ட்ஸ் (இந்தியா) லிமிடெட்!

அறிவோம் பங்கு நிறுவனம்...

Published:Updated:
பான்கோ புராடெக்ட்ஸ் (இந்தியா)
பிரீமியம் ஸ்டோரி
பான்கோ புராடெக்ட்ஸ் (இந்தியா)

பான்கோ புராடெக்ட்ஸ் (இந்தியா) லிமிடெட் 1961-ம் ஆண்டில் ஒரு பிரைவேட் லிமிடெட் நிறுவனமாக ஆரம்பிக்கப்பட்டது. இன்றைக்கு மோட்டார் வாகனங்கள் மற்றும் தொழிற்சாலைகளில் பயன்படுத்தப்படும் இன்ஜின்களை கூலிங் செய்வதற்கான கூலிங் சிஸ்டம்கள் மற்றும் சீலிங் சிஸ்டம்கள் (sealing systems) உற்பத்தியில் ஒரு முன்னணி நிறுவனமாகத் திகழ்கிறது. இயங்கிவரும் துறையில் தொழில்நுட்ப ரீதியாகப் புதுமைகளைத் தொடர்ந்து புகுத்திக் கொண்டே இருத்தல் மற்றும் தரத்துக்கு முக்கியத்துவம் அளித்தல் என்ற இரண்டு விஷயங்களுமே இந்த நிறுவனத்தின் தனிச்சிறப்பு என்று பெருமையுடன் சொல்கிறது இந்த நிறுவனம்.

தொழில் பிரிவுகள்...

1967-ம் ஆண்டில் இந்திய பங்குச் சந்தையில் பட்டியலிடப்பட்ட இந்த நிறுவனம், இன்றைக்கு மத்திய அரசால் அங்கீகரிக்கப்பட்ட ஸ்டார் ஏற்றுமதி நிறுவனமாக விளங்குகிறது.

தொழில் பிரிவுகள் என்ற வகையில் பார்த்தால், இன்ஜின் கூலிங் சிஸ்டம்ஸ் மற்றும் இன்ஜின் சீலிங் சிஸ்டம்ஸ் என்ற இரண்டு பெரும் பிரிவுகளில் செயல்பட்டுவருகிறது இந்த நிறுவனம். அலுமினியம் மற்றும் செம்பினால் செய்யப்பட்ட ரேடியேட்டர்கள், சார்ஜ் ஏர்கூலர்கள், ஆயில் கூலர்கள் (விசையைக் கடத்துதல் மற்றும் திரவம் கொண்டு இயக்கப்படுகிற இன்ஜின்களுக்கான), எரிபொருள்களைக் குளிர்விப்பது, மின்சாரம் சேமிக்கும் பேட்டரிகளைக் குளிர்விப்பது, இன்வர்ட்டர்களைக் குளிர்விப்பது, இந்த வகை குளிர்விப்பான்களில் இயங்கும் ஃபேன் மோட்டார் அசெம்ப்ளிகளைச் செய்வது போன்றவற்றை இன்ஜின் கூலிங் சிஸ்டம்ஸ் பிரிவில் உற்பத்தி செய்து விற்பனை செய்துவருகிறது இந்த நிறுவனம்.

இன்ஜின் சீலிங் சிஸ்டம்ஸ் பிரிவில் இன்ஜின் சிலிண்டர் ஹெட் உள்ளிட்ட பல்வேறு வகையான கேஸ்கட்கள், வெப்ப தடுப்பான்கள் (Heat shield), தொழிற்சாலைகளில் பயன்படுத்தப் படும் பல்வேறு வகை அளவு மற்றும் தடிமன் கொண்ட கேஸ்கட்கள் போன்றவற்றை உற்பத்தி செய்துவருகிறது. மல்ட்டி லேயர்டு ஸ்டீல் கேஸ்கட்கள், கிராபைட் காம்போசைட் கேஸ்கட்கள், ஸ்டீல் மற்றும் பைபர் கொண்ட காம்போசைட் கேஸ்கட்கள், அழுத்தப்பட்ட பைபர்களால் ஆன இணைப்பு கேஸ்கட்கள், ரப்பர் கார்க்கினால் ஆன கேஸ்கட்கள், தேவையான ரூபத்தில் முனைகளுடன் கூடிய வார்ப்பின் மூலம் வடிவமைக்கப்பட்ட கேஸ்கட்கள், காப்பர் கேஸ்கட்கள் என பல்வேறு வகையான தயாரிப்புகளை உற்பத்தி செய்து விற்பனை செய்யும் இந்த நிறுவனம் இந்த இரண்டு தொழில் பிரிவிலுமே ஸ்திரமானதொரு சந்தைப் பங்களிப்பைக் கொண்டிருக்கிறது.

பான்கோ புராடெக்ட்ஸ் (இந்தியா) லிமிடெட்!

நிறுவனத்தின் தயாரிப்புகள்...

இந்த நிறுவனத்தின் தயாரிப்புகள் 4x4 வாகனங்கள் மற்றும் ஸ்போர்ட்ஸ் யுட்டிலிட்டி வாகனங்கள் (ரேடியேட்டர்கள், சார்ஜ் ஏர்கூலர்கள், கன்டென்சர்கள், டிரான்ஸ்மிஷன் ஆயில் கூலர்கள் – ப்ளேட்டுகள் வாயிலாக), பேருந்துகள் மற்றும் லாரிகள் (ரேடியேட்டர்கள், சார்ஜ் ஏர்கூலர்கள், டிரான்ஸ்மிஷன் மற்றும் டார்க் கன்வர்ட்டர் ஆயில் கூலர்கள், எரிபொருள்/டீசல் கூலர்கள்), சாலையில் செல்லாத வாகனங்கள் (Off-high way – ரேடியேட்டர்கள், ஹைடிராலிக் ஆயில் கூலர்கள், டிரான்ஸ்மிஷன் மற்றும் டார்க் கன்வர்ட்டர் ஆயில் கூலர்கள், டீசல் எரிபொருள் கூலர்கள், இன்ஜின்லூப் ஆயில் கூலர்கள்), டிராக்டர்கள் மற்றும் விவசாயத்துக்கு உதவும் இயந்திரங்கள், கட்டுமானத் துறையில் பயன்படுத்தப்படும் மெட்டீரியல் ஹேண்டிலிங் இயந்திரங்கள், டீசல் மற்றும் மின்சார ரயில் இன்ஜின்கள், ஜெனரேட்டர் களுக்கான கூலர்கள், காற்றாலைகள் (கியர் பாக்ஸ்களுக்கான அலுமினியம் பிளேட் மற்றும் பார் டிசைனிலான ஆயில் கூலர்கள்), மோட்டார் சைக்கிள்கள் (அலுமினியம் ரேடியேட்டர்கள், டிரான்ஸ்மிஷன் ஆயில் கூலர்கள், இன்ஜின் ஆயில் கூலர்கள், கம்ப்ரஸர்கள் (ஹீட் எக்ஸ்சேஞ்சர்கள், ஆயில் கூலர்கள் – 10 கிலோவாட் முதல் 150 கிலோவாட் வரை – ப்ளே மற்றும் பார் டிசைன்) போன்றவற்றில் பயன்படுத்தப்பட்டு வருகிறது.

நிறுவனத்தின் சிறப்புகள்...

இந்த நிறுவனத்தின் முக்கிய சாதனைகள் என்ற அளவீட்டில் பார்த்தால், 1969-ம் ஆண்டில் மூவாயிரம் குதிரை சக்தி கொண்ட லோகோமோட்டிவுக்கான இன்ஜினைக் குளிர்விக்கும் சிஸ்டத்தை உற்பத்தி செய்தது.

2003-ம் ஆண்டில் அலுமினியத்தாலான ரேடியேட்டர்களை உற்பத்தி செய்ய ஆரம்பித்த இந்த நிறுவனம், 2007-ம் ஆண்டில் ஒரு ஸ்டார் எக்ஸ்போர்ட் ஹவுஸாக மத்திய அரசால் அங்கீகரிக்கப்பட்டது. இந்த நிறுவனம் 2010-ம் ஆண்டில் நெதர்லாண்ட்ஸ் நிறுவனமான என்.ஆர்.எஃப் பி.வி எனும் நிறுவனத்தைக் கையகப்படுத்தியது. 2012-ம் ஆண்டில் முழுவதும் ஏற்றுமதிக்கான சிறப்பு மண்டலத்தில் ஒரு மில்லியன் ரேடியேட்டர்கள் உற்பத்தி செய்யும் அளவுக்கான உற்பத்தி வசதியை நிர்மாணித்தது. 2013-ம் ஆண்டில் உள்நாட்டு ஓ.இ.எம் (புதிய வாகனங்கள் உற்பத்தியாளர்களுக்காக) மற்றும் தேய்மானத்துக்குப் பிறகு மாற்றும் வகை உபயோகத்துக்கான அலுமினியம் ரேடியேட்டர்களை உற்பத்தி செய்யும் வசதியை நிறுவியது.

2014-ம் ஆண்டில் அலுமினியத் தால் ஆன ரேடியேட்டர் மற்றும் கூலிங் சிஸ்டத்தில் அனைத்து உதிரிபாகங்களையும் உற்பத்தி செய்யும் மையத்தை நிறுவியது. 2015-ம் ஆண்டில் அமெரிக்காவில் என்.ஆர்.எஃப் நிறுவனத்தை நிறுவுவதற்கான பூர்வாங்க பணிகளை ஆரம்பித்தது இந்த நிறுவனம். 2016-ம் ஆண்டில் புகைப் போக்கிகள் போன்ற வற்றில் (Exhaust) இருந்து குறிப்பிட்ட வாயுக்களை மீட்டெடுக்கும் பணியில் ஈடுபடும் இயந்திரங்களுக்கான கூலிங் சிஸ்டத்தை வடிவமைத்து உற்பத்தி செய்ய ஆரம்பித்தது இந்த நிறுவனம்.

கடந்த காலகட்டங்களில் இந்த நிறுவனம் தொடர்ந்து தன்னுடைய தயாரிப்புகளுக்குத் தேவையான அத்தனை உதிரி பாகங்களையும் சொந்தமாகவே உற்பத்தி செய்துகொள்வதற்கான அதி நவீன உற்பத்தி மையங்களை நிறுவி வந்துள்ளது. இப்படி உற்பத்திக்குத் தேவையான அத்தனை முக்கியமான உதிரி பாகங்களையும் சொந்த உற்பத்தி வசதியிலேயே உற்பத்தி செய்து கொள்வதால், வாடிக்கையாளர் களின் மாறும் தேவைக்கேற்ப உடனடியாக மாறுதல்களைத் தன்னுடைய தயாரிப்பில் இந்த நிறுவனத்தால் கொண்டு வர முடிகிறது.

மேலும், இந்த விதமான சொந்த உற்பத்தி செய்துகொள்வதன் மூலம் வாடிக்கையாளர்கள் தங்களுக்குத் தேவைப்படும் மாற்றங்களைத் தெரிவித்த நாளிலிருந்து மிகவும் குறுகிய காலத்திலேயே மாற்றங்களை உள்ளடக்கிய தயாரிப்புகளை உற்பத்தி செய்து தர முடிவதால், வாடிக்கையாளர்கள் மிகவும் திருப்திகரமாக இருப்பதுடன், போட்டியாளர்களைவிட மிகவும் முன்னணி நிலைமையில் இந்த நிறுவனம் திகழவும் உதவுகிறது. இதை எல்லாம் தாண்டி தரத்திலும் இந்த நிறுவனத்தின் தயாரிப்புகள் சிறப்பாக இருப்பதற்கும் இந்த வித அனைத்து பாகங்களுக்குமான சொந்த உற்பத்தி மையங்களைக் கொண்டிருப்பது மிகவும் உதவியாக இருக்கிறது.

இந்த நிறுவனத்துக்கு அசோக் லேலாண்ட், கேட்டர்பில்லர், கும்மின்ஸ், எஸ்கார்ட்ஸ், எய்ஷர், ஃபோர்ஸ் மோட்டார்ஸ், கோத்ரெஜ், ஹார்லி டேவிட்சன், இந்திய ரயில்வே, ஜே.சி.பி, ஜான் டீர், கிர்லோஸ்கர், மிட்சுபிஷி, மஹிந்திரா, மஹிந்திரா-ஸ்வராஜ், சோனாலிகா இன்டர்நேஷனல், டாஃபே, ஸ்வராஜ்-மஸ்தா, டாடா, டி.வி.எஸ், வோல்வோ-எய்ஷர் உள்ளிட்ட பல முன்னணி நிறுவனங்கள் வாடிக்கையாளர்களாக இருக்கின்றன.

பான்கோ புராடெக்ட்ஸ் (இந்தியா) லிமிடெட்!

ரிஸ்க்குகள் என்னென்ன?

ரேடியேட்டர்கள் மற்றும் கூலிங் இயந்திரங்கள் துறையில் செயல்படும் நிறுவனங்களுக்கு உரித்தான அனைத்து ரிஸ்க்குகளும் இந்த நிறுவனத்துக்கும் உண்டு. மேலும், இந்த நிறுவனத்தின் தயாரிப்புகள் பயன்படுத்தப்படும் இயந்திரங்கள் பலவும் பொருளாதார வளர்ச்சியைச் சார்ந்தே அதிக அளவில் விற்கும் இயந்திரங்களாகும். எனவே, ஏதாவது ஒரு காரணத்தால் பொருளாதார வளர்ச்சி எதிர்பார்த்த அளவு இல்லாதுபோனாலோ, தேக்கநிலையைச் சந்தித்தாலோ அதுவும் இந்த நிறுவனத்தின் செயல்பாட்டை பாதிக்கும். மூலப்பொருள்கள் விலை உயர்வு, போட்டி, புதிய தொழில்நுட்பம், வாகனங்களின் அடிப்படை இயக்கமுறை மாறுதல் (எரிபொருளில் இயக்கப்படுவதில் இருந்து மின்சாரத்தில் இயக்கப்படுவது போன்ற), அந்நியச் செலாவணி மதிப்பு மாறுதல், அரசாங்கத்தின் கொள்கை முடிவுகள் போன்றவையும் இந்த நிறுவனத்துக்கான ரிஸ்க்குகளே.

பான்கோ புராடெக்ட்ஸ் (இந்தியா) லிமிடெட்!

முதலீட்டாளர்கள் என்ன செய்ய வேண்டும்?

இந்தப் பகுதி பங்குகளைப் பரிந்துரை செய்யும் பகுதி அல்ல. முதலீட்டாளர்களுக்குப் பங்குகளை அறிமுகப் படுத்துதல் மற்றும் கல்வியே இந்தப் பகுதியின் நோக்கம். பங்கு முதலீடுகள் சந்தை அபாயத்துக்கு உட்பட்டது என்பதால், எந்தவொரு பங்கை வாங்கும் முன்னும் செபி பதிவு பெற்ற முதலீட்டு ஆலோசகரைக் கலந்தாலோசித்து, அந்தப் பங்கில் முதலீடு செய்வதில் இருக்கும் ரிஸ்க் உங்களுக்கு உகந்ததுதானா என முடிவு செய்த பின்னரே முதலீட்டு நடவடிக்கைகளை நீங்கள் எடுக்க வேண்டும்!

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism