Published:Updated:

இந்த ஆண்டில் ஐ.பி.ஓ வந்த பங்குகள்... இப்போது வாங்கலாமா?

ஐ.பி.ஓ
பிரீமியம் ஸ்டோரி
ஐ.பி.ஓ

ஐ.பி.ஓ

இந்த ஆண்டில் ஐ.பி.ஓ வந்த பங்குகள்... இப்போது வாங்கலாமா?

ஐ.பி.ஓ

Published:Updated:
ஐ.பி.ஓ
பிரீமியம் ஸ்டோரி
ஐ.பி.ஓ

நடப்பு 2021-ம் ஆண்டில் இதுவரை 39 நிறுவனங்கள் என்.எஸ்.இ மற்றும் பி.எஸ்.இ சந்தைகளில் ஐ.பி.ஓ மூலம் புதிய பங்குகளை வெளியிட்டிருக்கின்றன. இதில் எந்தெந்தப் பங்குகள் சிறப்பாகச் செயல் படுகின்றன, எந்தப் பங்குகள் நஷ்டத்தில் இருக்கின்றன, இந்த பங்குகளில் இனி முதலீடு செய்யலாமா என்பவை முக்கியமான கேள்வி களாக இருக்கின்றன. இந்தக் கேள்விகளை பங்குச் சந்தை நிபுணர் ஏ.கே.பிரபாகரிடம் கேட்டோம். அவர் விரிவான விளக்கத்தைத் தந்தார்.

‘‘புதிய பங்கு வெளியீடான ஐ.பி.ஓ (Initial public offer) மீது பங்குச் சந்தை சிறு முதலீட் டாளர்களின் கவனம் தற்போது அதிக அளவில் குவிந்திருக்கிறது. நடப்பு 2021-ம் ஆண்டில் ஜனவரி மாதத்திலிருந்து பல நிறுவனங்கள் ஐ.பி.ஓ வெளியிடுவதில் மும்முரமாக இருக்கின்றன. ஆனால், ஐ.பி.ஓ வந்த பங்குகள் எல்லாமே தற்போது லாபத்தில் வர்த்தகம் ஆவதாகச் சொல்ல முடியாது.

2007-ம் ஆண்டில் 100 நிறுவனங்களுக்கு மேல் ஐ.பி.ஓ-வுக்கு வந்தன. ஆனால், அனைத்து நிறுவனங்களும் லாபத்தைப் பதிவு செய்ய வில்லை. 25 நிறுவனங்களின் ஐ.பி.ஓ-க்கள் மட்டும்தான் தனது முதலீட்டாளர்களுக்கு பாசிட்டிவ் வருமானத்தைக் கொடுத்தன. மற்ற பங்குகள் நஷ்டத்தையும், அதிலும் சில பங்குகள் இருக்கிற இடம்தெரியாமல் போய்விட்டன. அதனால், ஐ.பி.ஓ-வுக்கு வரும் அனைத்து பங்குகளும் லாபத்தைத் தரும் எனச் சொல்ல முடியாது.

இந்த ஆண்டில் ஐ.பி.ஓ வந்த பங்குகள்... இப்போது வாங்கலாமா?

ஐ.பி.ஓ-வைப் பொறுத்தவரை, 2007-ல் ஏற்பட்டது போன்ற மோசமான நிலை இந்த ஆண்டில் உருவாகாது. ஏனெனில், இன்றைய நிலையில், முதலீட்டாளர்களுக்கு பங்குச் சந்தை சார்ந்த அறிவு வளர்ந்திருப்பதைத் தெளிவாகப் பார்க்க முடிகிறது. அது மட்டு மல்லாமல், பங்குதாரர்களின் உரிமைகள் என்ன என்பதும் அனைவருக்கும் தெரிந்திருக்கிறது.

ஒரு நிறுவனம் பங்குச் சந்தையில் ஐ.பி.ஓ பட்டியலிடுகிறது எனில், அந்த நிறுவனத்தின் வரலாறு, முதலீட்டாளர்களுக்கு நிச்சயம் தெரிந்திருக்க வேண்டும். ஐ.பி.ஓ-வுக்கு வரும் ஒவ்வொரு நிறுவனமும் செபியிடம் அனுமதி பெற வேண்டியது கட்டாயம். ஒரு நிறுவன மானது ஐ.பி.ஓ-வெளியீட்டுக்கு செபியிடம் அனுமதி கேட்கும்போது, ஐ.பி.ஓ-மூலம் எவ்வளவு நிதி திரட்டப் போகிறோம், எப்படி திரட்டப் போகிறோம் என்கிற விவரங்கள் உள்பட நிறுவனம் சார்ந்த இதர விவரங்களையும் ஒரு ஆவணமாக செபியிடம் சமர்ப்பிக்கும். அதை ‘டி.ஆர்.ஹெச்.பி’ (Draft Red Herring Prospectus - DRHP) என்பார்கள். இந்த ஆவணத்தை ஐ.பி.ஓ-வில் முதலீடு செய்ய கவனம் செலுத்தும் அனைத்து முதலீட்டாளர்களும் படிக்க வேண்டும். அப்போதுதான் அந்த நிறுவனம் சார்ந்த முழு விவரங்களையும் அவர்களால் தெரிந்துகொள்ள முடியும்.

மேலும், ஒரு நிறுவனம் ஐ.பி.ஓ-வுக்கு வந்த பிறகு, குறைந்தபட்சம் மூன்று காலாண்டு முடிவுகளைப் பார்க்க வேண்டியது அவசியம். நிறுவனத்தின் செயல்பாடுகளும், உள் விவகாரங்களும் அந்த நிறுவனத்தின் பங்கு வளர்ச்சிக்கு உறுதுணையாக இருக்கும் என்பதால், அந்த நிறுவனத்தின் செயல்பாடுகள் எப்படி இருக்கிறது என்பதை முதலீட்டாளர்கள் தொடர்ந்து கவனிக்க வேண்டும். மேலும், இந்திய பங்குச் சந்தைகள் ஏற்றத்தில் வர்த்தகமாகிவரும் இந்த வேளையில், நடப்பு ஆண்டில் வெளியான ஐ.பி.ஓ-க்கள் பலவும் அதிக மதிப்பீட்டு விலையில் பட்டியலிடப்பட்டிருக்கின்றன. இதனால், ஐ.பி.ஓ பங்குகளைத் தேர்ந்தெடுக்கும்போது கூடுதல் கவனம் தேவை.

இந்த ஆண்டில் வெளியான ஐ.பி.ஓ-க்களில் இருந்து முதலீட்டாளர்கள் தெரிந்துகொள்வதற்காக, இரண்டு பங்குகளை உதாரணம் காட்டி விளக்குகிறேன். ஒன்று, ‘கார் டிரேடு டெக்’ நிறுவனத்தின் எஃப்.பி.ஓ வெளீயீடு. இந்த நிறுவனத்தின் பிசினஸ் மாடல், ஆன்லைனில் கார் வாங்கி விற்பனை செய்வது. ஆகஸ்ட் 11-ம் தேதி இந்த நிறுவனத்தின் பங்குகள் ரூ.1,618-க்கு பட்டியலானது. இந்த வெளியீட்டின் மூலம் தனது வியாபாரத்துக்காகவோ, நிறுவனத்தின் இதர தேவைகளுக்காகவோ நிதி திரட்டுவது இந்த நிறுவனத்தின் நோக்கம் இல்லை. எஃப்.பி.ஓ முறையில் புரொமோட்டார்களின் பங்குகளை விற்பனை செய்து, நிதி திரட்டுவது மட்டுமே இந்த நிறுவனத்தின் நோக்கமாக இருந்தது. இதன் மூலம் இந்த நிறுவனம் பார்த்த லாபம் ரூ.4,000 கோடி.

இன்னொரு நிறுவனம், ‘இண்டிகோ பெயின்ட்ஸ்’. பெயின்ட் தயாரிப்பு நிறுவனங்களில் ஐந்தாவது இடத்தில் இருக்கும் இந்த நிறுவனத்தின் விற்பனை ரூ.774 கோடி. ஆனால், முதல் இடத்தில் இருக்கும் ஆசியன் பெயின்ட்ஸ் நிறுவனத்தின் விற்பனை ரூ.24,375 கோடி. இந்த நிறுவனம் ஆசியன் பெயின்ட்ஸ் நிறுவனத்தைவிட 31 மடங்கு குறைவான விற்பனையைக் கொண்டிருக்கிறது. இருப்பினும் பங்கு மதிப்பீட்டு அளவில் இண்டிகோ நிறுவனத்தின் பி.இ விகிதம் 166. ஆனால், ஆசியன் பெயின்ட்ஸ் பி.இ விகிதம் 88.

அதிக விலையில் பங்குகளை லிஸ்ட் செய்து, அதிக லாபத்தை இந்த இரு நிறுவனங்களும் பார்த்தன. இது போன்ற பல நிறுவனங்கள் அதிக விலை மதிப்பீட்டில் ஐ.பி.ஓ-க்களை வெளியிட்டதை முதலீட்டாளர்கள் கவனிக்கத் தவறிவிட்டார்கள்.

‘லிஸ்ட்டிங் கெயின்’ என்று சொல்லப்படுகிற, குறுகிய கால வர்த்தகத்துக்கு ஐ.பி.ஓ-வில் முதலீடு செய்பவர்கள் அதிகம். ஆனால், நீண்ட கால அடிப் படையில் ஐ.பி.ஓ-வில் பங்குகளை வாங்குபவர்கள், மேலே சொல்லியிருக்கும் அனைத்து விஷயங்களையும் கவனிக்க வேண்டியது அவசியமாகும்.

கடந்த சில மாதங்களில் வங்கித்துறை சார்ந்த பங்குகள் அதிக ஏற்றம் பெறாமல் இருக் கின்றன. அதே போல, ஆட்டோ மொபைல் துறை, ஹோட்டல் நிறுவனங்களின் பங்குகள், லைஃப் இன்ஷூரன்ஸ் நிறுவனங் களின் பங்குகள், மீடியா நிறுவனங்களின் பங்குகள் போன்றவை அதிக விலை ஏற்றத்தைச் சந்திக்கவில்லை. இந்தத் துறைகளில் இருக்கும் சிறந்த பங்குகளைத் தேர்ந்தெடுத்து அதிலும் ரீடெய்ல் முதலீட்டாளர்கள் முதலீடு செய்யலாம்” என்றார்.

ஏ.கே.பிரபாகர், ரெஜி தாமஸ்
ஏ.கே.பிரபாகர், ரெஜி தாமஸ்

பங்குச் சந்தை நிபுணர் ரெஜி தாமஸிடம் இது குறித்து பேசினோம். “கடந்த ஏப்ரல் மாதத்தில் இருந்து மட்டும் 22 நிறுவனங்கள், ஐ.பி.ஓ-வுக்கு வந்திருக்கின்றன. அதில் 10 நிறு வனங்கள் நெகட்டிவ் வருமானத் தைத் தந்துள்ளன. ஆனால், நெகட்டிவ் வருமானத்தைக் கொடுத்த பங்குகள், எதிர்காலத்தில் சிறப்பாகச் செயல்பட வாய்ப்பு இல்லை என்றோ, பாசிட்டிவ் வருமானம் கொடுத்த பங்குகள், தொடர்ந்து பாசிட்டிவ் வருமானம் மட்டுமே தரும் என்றோ சொல்ல முடியாது. ஐ.பி.ஓ வந்த பங்குகள் சந்தைக்கு புதியவை என்பதால், இந்தப் பங்குகளுக்கு அதிக வரலாறு இருக்காது. அதனால் ஐ.பி.ஓ பங்குகளின் விலை போக்கைக் கணிப்பது முதலீட் டாளர்களுக்கு சிரமமாக இருக்கும்.

கடந்த ஏப்ரல், மே, ஜூன், ஜூலை மாதங்களில் பட்டிய லிடப்பட்ட பங்குகளின் காலாண்டு முடிவுகளை இனிதான் நாம் பார்க்க வேண்டும். அவற்றின் செயல்பாடுகள், அவர்கள் பெற்றிருக்கும் பிசினஸ் ஆர்டர்கள், ஈட்டியிருக்கும் நிகர லாபங்கள் என்ன என்பதை எல்லாம் பார்த்த பிறகு, அந்த நிறுவனத்தின் பங்கு செயல்பாட்டை முதலீட்டாளர்கள் ஓரளவுக்கு கணிக்கலாம். அதன் பிறகு, அந்த ஐ.பி.ஓ பங்குகளில் முதலீடு செய்யலாமா, வேண்டாமா என்பதை முடிவு செய்யலாம். நிறுவனம் பற்றி ஓரளவுக்கு மட்டுமே தெரிந்துகொண்டு, முதலீடு செய்வது சரியான முதலீட்டு யுக்தியாக இருக்காது. லாபம் கிடைத்தால் விற்றுவிட்டு வெளியே வந்துவிடலாம் என்று நினைப்பது டிரேடர்கள் மனநிலையே தவிர, முதலீட்டாளர்கள் செய்யும் செயலல்ல.

இந்த ஆண்டில் ஐ.பி.ஓ வந்த பங்குகள்... இப்போது வாங்கலாமா?

ஐ.பி.ஓ என்பது பங்குச் சந்தையில் சிறு முதலீட்டாளர்கள் நுழைவதற்கான முதல் வாசல்படி. இதில் அதிக அளவில் முதலீடு செய்ய நினைப்பது ஆரோக்கியமான வளர்ச்சிதான். ஆனால், மிகக் குறுகிய காலத்தில் எக்கச்சக்கமாக லாபம் கிடைக்கும் என்ற எதிர்பார்ப்பில் ஐ.பி.ஓ-க்களில் முதலீடு செய்வது ஏற்புடையதல்ல. ரீடெய்ல் முதலீட்டாளர்கள் ஐ.பி.ஓ-க்களில் மட்டுமே முதலீடு செய்ய வேண்டும் என்கிற எந்தக் கட்டாயமும் இல்லை. பல துறை சார்ந்த நல்ல நிறுவனங்களின் பங்குகள் சந்தையில் நியாயமான விலைகளில் கிடைக்கின்றன. அவற்றிலும் அவர்கள் தங்களின் முதலீட்டை ஆரம்பிக்கலாம்” என்றார்.

ஐ.பி.ஓ பங்குகளில் முதலீடு செய்ய நினைப்பதில் தவறில்லை. ஆனால், முதலீடு செய்ய நினைக்கும் ஐ.பி.ஓ பங்கு குறித்த விவரங்களை முழுமையாகத் தெரிந்து கொள்ளாமல், அதை நீண்டகால நோக்கில் வாங்கி வைப்பது உகந்ததல்ல!