Published:Updated:

குரோத் ஸ்டாக்ஸ் Vs வேல்யூ ஸ்டாக்ஸ் பங்குகளைத் தேர்ந்தெடுக்க உதவும் பளிச் டெக்னிக்!

ஒட்டுமொத்த விகடனுக்கும் ஒரே ஷார்ட்கட்

Use App
குரோத் ஸ்டாக்ஸ் Vs வேல்யூ ஸ்டாக்ஸ்
குரோத் ஸ்டாக்ஸ் Vs வேல்யூ ஸ்டாக்ஸ்

கவர் ஸ்டோரி

பிரீமியம் ஸ்டோரி

ஜி.எஸ்.ராஜேஷ்குமார், ஈக்விட்டி அனலிஸ்ட், Rkgcapitalgains.com

பங்குச் சந்தை முதலீட்டாளர்களில் பலருக்கு எந்தப் பங்குகளில் முதலீடு செய்வது என்கிற குழப்பம் நிறையவே இருக்கும். பலர் முதலீடு செய்யும் பங்குகள் மூலம் நல்ல லாபம் கிடைக்க வேண்டும் என எதிர்பார்ப்பார்கள். இன்னும் சிலர், நல்ல பங்கை அடையாளம் கண்டு கம்மியான விலையில் வாங்கி, வைத்திருந்து நல்ல லாபம் பார்க்க வேண்டும் எனத் திட்டமிடுவார்கள்.

பொதுவாக, பங்குகளை அவற்றின் பங்குச் சந்தை மதிப்பின் அடிப்படையில் பெரிய நிறுவனப் பங்குகள் (Large Cap Stocks), நடுத்தர நிறுவனப் பங்குகள், சிறிய நிறுவனப் பங்குகள், என செபி அமைப்பு பிரித்து வைத்திருக்கிறது. இந்தப் பங்குகளைப் பகுப்பாய்வாளர்கள் வளர்ச்சிப் பங்குகள் (Growth Stocks), மதிப்புப் பங்குகள் (Value Stocks) என இரண்டாகப் பிரித்து வைத்திருக்கிறார்கள். இந்த இரு வகைப் பங்குகள் பற்றி விரிவாகப் பார்ப்போம்.

ஜி.எஸ்.ராஜேஷ்குமார் 
ஈக்விட்டி அனலிஸ்ட், 
Rkgcapitalgains.com
ஜி.எஸ்.ராஜேஷ்குமார்  ஈக்விட்டி அனலிஸ்ட், Rkgcapitalgains.com

வளர்ச்சிப் பங்குகள்...

வளர்ச்சிப் பங்கு என்பது தொடர்ந்து நல்ல வருமானம் கொடுத்துக்கொண்டிருக்கிற நிறுவனத்தின் பங்கு ஆகும். இந்த நிறுவனங்கள், பெரும்பாலும் முதலீட்டாளர்களுக்கு அதிக டிவிடெண்ட் கொடுக்காது. காரணம், இந்த நிறுவனங்களின் முக்கிய நோக்கமே அவற்றின் பங்குகளின் விலையைத் தொடர்ந்து உயர வைப்பதாக உள்ளது. இந்த நிறுவனங்கள் அவற்றின் லாபத்தை அதன் வளர்ச்சி, விரிவாக்கம் மற்றும் தொழில்நுட்ப வசதிக்காகத் திரும்பவும் முதலீடு செய்வதாக இருக்கும்.

இந்தப் பங்குகளில் முதலீடு செய்பவர்கள், இந்த நிறுவனம் சார்ந்த துறையைச் சேர்ந்த இதர பங்குகளைவிட, பங்குச் சந்தையைவிட இந்தப் பங்கு அதிக வருமானம் தரும் என்கிற நோக்கத்தில் முதலீடு செய்கிறார்கள். இதனால், இந்தப் பங்குகளின் விலை அதிக ஏற்றத்துக்கு உட்பட்டதாக இருக்கும். இந்த நிறுவனங்கள் விரைவான விரிவாக்கத்தில் இருப்பதால், அடிக்கடி பத்திரிகை செய்திகளில் அடிபடும். அப்போது பங்கின் விலை ஏற்ற இறக்கத்துக்கு உட்படும்.

‘குரோத் பாணி’ முதலீடு என்பது மொமென்டம் யுக்தி எனப்படுகிறது. இது பங்கு விலைப் போக்குகளைத் துரத்துவதாகும். ஏற்கெனவே சிறப்பாகச் செயல்படும் சில பங்குகள் எதிர்காலத்திலும் சிறப்பாகச் செயல்படும் என்கிற எதிர்பார்ப்பில் முதலீடு செய்வதும் வளர்ச்சிப் பாணியில் வரும். பங்குச் சந்தையின் ஏற்றத்துக்கு வளர்ச்சிப் பங்குகள் உந்துதலாக இருக்கின்றன.

நீண்ட காலத்தில் மூலதன அதிகரிப்பை விரும்பும் முதலீட்டாளர்கள் இந்த முறையில் கவனம் செலுத்துகிறார்கள். பங்கு மதிப்பீடு மற்றும் பங்கின் பி.இ விகிதம் அதிகமாக இருந்தாலும், நிறுவனம் எதிர்காலத்தில் நல்ல வளர்ச்சி அடையும் எனில், குரோத் பங்குகளில் முதலீட்டாளர்கள் முதலீடு செய்கிறார்கள்.

குரோத் ஸ்டாக்ஸ் Vs வேல்யூ ஸ்டாக்ஸ் பங்குகளைத் தேர்ந்தெடுக்க உதவும் பளிச் டெக்னிக்!

மதிப்புப் பங்குகள்...

இந்த நிறுவனப் பங்குகளின் விலை மலிவாகக் கிடைக்கும். இந்த நிறுவனங்கள் அடிப்படையில் மிக வலிமையாக இருக்கும். பங்குச் சந்தை சூழல் அல்லது நிறுவனம் சார்ந்த பிரச்னைகளால் பங்கின் விலை மிகவும் தற்போது வீழ்ச்சி அடைந்து, மலிவான விலையில் வர்த்தகமாகி வரும்.

உதாரணமாக, நெஸ்லே நிறுவனத்தின் மேகியில் அதிகமாக பூச்சிக்கொல்லி மருந்து கலந்திருக்கிறது என்கிற குற்றச் சாட்டின்போது பங்கின் விலை வேகமாக வீழ்ச்சி கண்டது. ஆனால், நிறுவனம் அடிப்படையில் வலுவாக இருந்ததால், பங்கின் விலை விரைவிலேயே மீண்டுவந்தது. இந்த மதிப்பு நிறுவனங்கள், அடிக்கடி லாபத்தை முதலீட்டாளர்களுக்கு டிவிடெண்டாகப் பிரித்துக் கொடுக்கும். மேலும், பங்கின் விலை அதிக ஏற்ற இறக்கத்துக்கு உள்ளாகாது.

மதிப்பு முதலீட்டின் தந்தை (Father of Value Investing) பெஞ்சமின் கிரஹாம், “மளிகைப் பொருள்களை வாங்குவதுபோல் நிறுவனப் பங்குகளை வாங்குங்கள்; வாசனைத் திரவியங்களை வாங்குவதைப் போல் பங்குகளை வாங்காதீர்கள்” என்று குறிப்பிட்டுள்ளார்.

அதாவது, காய்கனி, மளிகைப் பொருள்களை வாங்கும் போது நாம் நம் குடும்பத்தின் ஆரோக்கியத்துக்கு அதிக முக்கியத்துவம் கொடுத்து அதன் தரத்தை ஆராய்வோம், அதன்பின்பு அதன் விலையைக் கேட்போம். ஏனென்றால் நாம் நம்முடைய குடும்பத்தின் ஆரோக்கியத்தை எப்போதுமே முக்கியத்துவமாகக் கருதுவோம். ஆனால், வாசனைத் திரவியங்களை வாங்கும்போது அதனுடைய தரம், விலைக்கு முக்கியத்துவம் கொடுக்க மாட்டோம். அதன் வாசனை மற்றும் கவர்ச்சியை மட்டும்தான் கவனிப்போம்.

பங்குகள் குறித்த கவர்ச்சிகரமான செய்திகளைப் பார்த்து ஏமாந்துவிடாமல் மளிகைப் பொருள்களை எப்படி ஆராய்ந்து அறிந்து வாங்கு கிறோமோ, அதேபோல் பங்கு களையும் ஆராய்ந்து வாங்க வேண்டும் என்று பெஞ்சமின் கிரஹாம் சொல்கிறார்.

மதிப்புப் பங்கை எப்படிக் கண்டறிவது?

நல்ல வணிகம், திறமையான நிர்வாகம் மற்றும் அடிப்படையில் வலுவான நிறுவனம், இப்போது குறைத்து மதிப்பிடப்பட்டு இருக்கும். இதனால், அந்தப் பங்கின் விலை மலிவாக இருக்கும். பங்கு முதலீட்டாளர் கள் அனைவருக்கும் பி/இ விகிதம் (P/E Ratio) பற்றித் தெரியும். இது பங்கின் விலைக்கும் அதன் மூலமான வருமானத்துக்கும் இடையிலான விகிதம் ஆகும். இந்த பி/இ விகிதம் அடிப்படை யில் ஒரு மதிப்பு பங்கை எப்படித் தேர்வு செய்வது என்று பார்ப்போம்.

உதாரணமாக, ‘A’ என்கிற பங்கை ஒருவர் 100 ரூபாய் கொடுத்து வாங்குகிறார். இந்தப் பங்கு முதலீடு மூலமான வருமானம் ரூ.20 என்று வைத்துக் கொள்வோம். அந்த முதலீட் டாளர் பங்கின் வருமானத்தைப் போல் 5 மடங்கு தொகையைக் கொடுத்து வாங்கி இருக்கிறார். இந்த பி.இ விகிதம் எவ்வளவுக்கு எவ்வளவு குறைவாக இருக்கிறதோ, அந்த அளவுக்குப் பங்கு முதலீட்டில் அதிக லாபம் கிடைக்க வாய்ப்பு இருக்கிறது.

இரண்டு நிறுவனப் பங்குகளை எடுத்துக்கொள்வோம். ‘B’ மற்றும் ‘C’ பங்குகள் இரண்டும் ஒரே விலையில் அதாவது, 100 ரூபாய்க்கு வர்த்தகமாகிறது. ‘B’ பங்கின் பி.இ விகிதம் 10, ‘C’ பங்கின் பி.இ விகிதம் 14. இங்கே பங்கு ‘B’-யின் மதிப்பீடு கவர்ச்சியாக இருக்கிறது என்ப தால், அதை முதலீட்டுக்குக் கவனிக்கலாம். மேலும், பங்கின் பி.இ விகிதத்தை அந்தத் துறையின் பி.இ விகிதத்துடன் ஒப்பிட்டுப் பார்க்க வேண்டும்.

உதாரணமாக, இன்ஃபோசிஸ் நிறுவனப் பங்கின் பி.இ விகிதம் 35 ஆக இருக்கிறது. ஐ.டி துறையின் சராசரி பி.இ விகிதம் 41 ஆக இருக்கிறது. துறையின் பி.இ-யுடன் ஒப்பிடும்போது, இன்ஃபோசிஸ் பி.இ குறைவாக இருப்பதால், அது மதிப்பு மற்றும் கவர்ச்சிகரமான பங்காக இருக்கிறது.

புகழ்பெற்ற முதலீட்டாளர் வாரன் பஃபெட்டின் மதிப்பு முதலீட்டுப் பாணியை ஆதரிப்பவர். அவர் வேல்யூ இன்வெஸ்ட்டிங் பற்றி, ‘பங்கின் விலை என்பது நீங்கள் கொடுக்கும் பணம். அதன் மதிப்பு என்பது நீங்கள் பெறுவதாகும். தரமான நிறுவனப் பங்குகளை மலிமான விலையிலேயே வாங்க நான் விரும்புகிறேன்’ என அவர் குறிப்பிட்டுள்ளார். இதைவிட எளிமையாக யாராலும் மதிப்பு முதலீட்டின் அம்சத்தை விளக்க முடியாது.

வேல்யூ இன்வெஸ்ட்டிங் முறையில் ஒரு பங்கை முதலீட்டுக்குத் தேர்வு செய்திருக்கும்பட்சத்தில், நிறுவனத்தின் வருவாய் எதிர்பார்ப்பு குறைவாக இருக்கும் எனக் கணிக்கப்பட்டால், பங்கின் விலை இறக்கம் என்பது குறைவாக இருக்கும். வேல்யூ இன்வெஸ்ட்டிங் முறையில் ‘மார்ஜின் ஆஃப் சேஃப்டி’ (Margin of Safety) என்பது மிக அதிகமாக இருக்கும்.

‘மார்ஜின் ஆஃப் சேஃப்டி’ என்பது ஒரு பங்கை முதலீடு செய்யத் தேர்வு செய்யும்போது அதன் அடுத்த வருட நியாயமான விலை நிர்ணயிக்கப்படும். இந்த விலையிலிருந்து 15 - 20% விலையைக் குறைத்து, இப்போது வாங்கக்கூடிய விலை நிர்ணயம் செய்யப்படும். இப்படிக் குறைந்த விலையில் வாங்குவது பாதுகாப்பானதாக இருக்கும்.

மேலும், மதிப்பு அடிப்படையிலான பங்கு முதலீடு, பங்குச் சந்தை இறக்கத்தில் இருக்கும் காலத்தில் ஒருவரின் முதலீட்டுக் கலவை (போர்ட்ஃபோலியோ) அதிக வீழ்ச்சியைச் சந்திக்கவிடாமல் பாதுகாப்பானதாக இருக்கும்.

மதிப்பு இண்டெக்ஸ்...

மதிப்புகளைக் கண்டறிய எளிய வழிமதிப்பு பங்குகளைக் கொண்டிருக்கும் குறியீடுகளைத் தேடிப் பிடிப்பதுதான். உதாரணமாக, நிஃப்டி50 வேல்யூ20 இண்டெக்ஸைக் (NIFTY50 Value 20 Index) குறிப்பிடலாம். இதில், நிஃப்டி 50 குறியீட்டில் இடம்பெற்றிருக்கும் 50 நிறுவனங்களில் 20 மதிப்புப் பங்குகளைத் தேர்வு செய்திருப்பதுதான் நிஃப்டி50 வேல்யூ 20 இண்டெக்ஸ் ஆகும். இந்த இண்டெக்ஸில் இடம் பெற்றிருக்கும் நிறுவனப் பங்குகள், பி.இ விகிதம், பிரைஸ் டு புக் வேல்யூ, டிவிடெண்ட் யீல்டு, பங்கு மூலதனம் மூலமான வருமானம் ஆகியவற்றின் அடிப்படையில் தேர்வு செய்யப்பட்டிருக்கின்றன.

கோல் இந்தியா, ஓ.என்.ஜி.சி, பவர் கிரிட், சன் பார்மா, ஜே.எஸ்.டபிள்யூ ஸ்டீல், யூ.பி.எல், ஹீரோ மோட்டோகார்ப், பஜாஜ் ஆட்டோ, கிராசிம் இண்டஸ்ட்ரீஸ், விப்ரோ, ஹெச்.யூ,எல், ஐ.டி.சி, எல் அண்ட் டி, ஹெச்.சி.எல் டெக், இன்ஃபோசிஸ், டெக் மஹிந்திரா, இண்டஸ்இண்ட் பேங்க், ஹிண்டால்கோ, டி.சி.எஸ், என்.டி.பி.சி ஆகியவை இந்தக் குறியீட்டில் இடம்பிடித்துள்ளன.

எம்.எஸ்.சி.ஐ இந்தியா வேல்யூ இண்டெக்ஸ்...

இதேபோல், எம்.எஸ்.சி.ஐ இந்தியா வேல்யூ இண்டெக்ஸ் (MSCI India Value Index) குறியீடும் குறிப்பிடத்தக்கது. இது 1997 முதல் செயல்பட்டு வருகிறது. இதில், லார்ஜ் மற்றும் மிட் கேப் பிரிவைச் சேர்ந்த வேல்யூ பங்குகள் இடம் பெற்றுள்ளன. 2021 ஆகஸ்ட்31-ம் நிலவரப்படி, இன்ஃபோசிஸ், ஹெச்.டி.எஃப்.சி, ஆக்ஸிஸ் பேங்க், பார்தி ஏர்டெல், ஹெச்.டி.எல் டெக்னாலஜிஸ், டி.சி.எஸ், எல் அண்ட் டி, மாருதி சுஸூகி இந்தியா, டெக் மஹிந்திரா, டாடா ஸ்டீல் போன்ற நிறுவனங்கள் இடம்பெற்றுள்ளன.

குறியீடுகளிலிருந்து வேல்யூ ஃபண்டுகளைத் தேர்வு செய்தாலும் நீங்களும் ஒருமுறை அலசி ஆராந்து அதன் பிறகு, முதலீட்டு முடிவை எடுப்பது நல்லது. அதில், ஏதாவது சிக்கல் இருந்தால் பங்குச் சந்தை நிபுணர் அல்லது பங்குச் சந்தை தரகரிடம் ஆலோசனை கேட்கத் தயங்கக் கூடாது.

குரோத் ஸ்டாக்ஸ் Vs வேல்யூ ஸ்டாக்ஸ் பங்குகளைத் தேர்ந்தெடுக்க உதவும் பளிச் டெக்னிக்!

குரோத் பங்கா, வேல்யூ பங்கா..?

* வளர்ச்சிப் பங்கு, மதிப்புப் பங்கு எதில் முதலீடு செய்வதாக இருந்தாலும், அது நீண்ட கால முதலீடாக இருக்கட்டும். அடுத்து அந்த நிறுவனம் அடிப்படையில் வலிமையானதாக இருப்பது அவசியம்.

* பல நேரங்களில் அடிப்படை வலிமையாக இல்லாமல் விலை வீழ்ச்சி கண்டுள்ள பைசாப் பங்குகளை (Penny stocks) மதிப்புப் பங்குகள் என முதலீட்டாளர்கள் தவறாகத் தேர்வு செய்துவிடுகிறார்கள். இந்த விஷயத்தில் மிகவும் எச்சரிக்கையாக இருக்க வேண்டும். உங்களுக்கு சந்தேகம் இருந்தால் நிபுணரின் உதவியை நாடத் தவறக் கூடாது.

* முதலீட்டுக்கு முன் அந்தப் பங்கின் விலைப்போக்கு எப்படி இருக்கிறது என்பதைக் கவனிப்பது அவசியம். இதை அறியாமல் முதலீடு செய்வது மிகவும் ஆபத்தாகும்.

* பங்குச் சந்தை சார்ந்த முதலீடு என்கிறபோது அது நீண்ட காலத்தில் உங்களின் நிதி இலக்குகளை நிறைவேற்ற உதவுவதுடன், செல்வம் சேர்க்கவும் உதவுகிறது. அந்த வகையில் குரோத் பங்குகள், வேல்யூ பங்குகள் எவற்றில் முதலீடு செய்தாலும் தவறில்லை.

நீண்ட காலம் காத்திருந்து நல்ல லாபம் பார்க்க விரும்புபவர்கள் வேல்யூ பங்குகளில் அதிக முதலீட்டை மேற்கொள்ளலாம். மற்றவர்கள் கலந்துகட்டி முதலீடு செய்யலாம்.

இந்த இரு முதலீடுகளும் பங்குச் சந்தையின் பல்வேறு நிலைகளில் லாபம் தரக்கூடியவை தான். எனவே, ஒரு முதலீட்டாளர் அது வளர்ச்சிப் பங்கா, மதிப்புப் பங்கா என்பது குறித்து அதிகம் கவலைப்படத் தேவையில்லை.

சில சிக்கல்கள் காரணமாக மதிப்புப் பங்காக இருந்த ஒரு பங்கு, வளர்ச்சிப் பங்காக மாற வாய்ப்பு நிறையவே இருக்கிறது. இதே போல், எதிர்பாராத சில சிக்கல்களால் வளர்ச்சிப் பங்காக ஒரு பங்கு, மதிப்புப் பங்காக மாற வாய்ப்பிருக்கிறது.

பொதுவாக, ஒரு பங்கு முதலீட்டுக் கலவை என்பது வளர்ச்சிப் பங்குகள் மற்றும் மதிப்புப் பங்குகள் ஆகிய இரண்டும் சமமாக இருந்தால் நல்ல லாபம் கொடுக்க வாய்ப்பு இருக்கிறது. இந்த சமனை அடையத் தேவையான முயற்சி களை முதலீட்டாளர்கள் தொடர்ந்து செய்ய வேண்டும்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு