Published:Updated:

30% வரை சரிந்த பேடிஎம்... முடிவுக்கு வருகிறதா ஐ.பி.ஓ கொண்டாட்டம்?

ஐ.பி.ஓ
பிரீமியம் ஸ்டோரி
ஐ.பி.ஓ

ஐ.பி.ஓ

30% வரை சரிந்த பேடிஎம்... முடிவுக்கு வருகிறதா ஐ.பி.ஓ கொண்டாட்டம்?

ஐ.பி.ஓ

Published:Updated:
ஐ.பி.ஓ
பிரீமியம் ஸ்டோரி
ஐ.பி.ஓ

கொரோனா நோய் தொற்றுப் பரவல் காரணமாக 2020-ம் ஆண்டில் இந்திய பங்குச் சந்தைகள் பெரும் சரிவைச் சந்தித்த பிறகு, அந்த ஆண்டின் இறுதி மாதங்களில் மிகப் பெரிய எழுச்சியைக் கண்டன. மார்ச் 2020-ல் 25,000 புள்ளிகள் வரை சரிந்த சென்செக்ஸ், படிப்படியாக ஏற்றத்தைச் சந்தித்து அக்டோபர் 2021-ல் 62,000 புள்ளிகள் வரை உயர்ந்தது. இதற்கு இடைப்பட்ட காலத்தில் குறிப்பாக, 2021-ம் ஆண்டின் தொடக்கத்தில் இருந்து சந்தையின் போக்கு ஏற்றத்தில் இருந்ததால், அந்த நேரத்தைப் பயன்படுத்தி, ஸொமேட்டோ, கே.எஃப்.சி, நைகா உள்ளிட்ட நாற்பதுக்கும் மேற்பட்ட நிறுவனங்கள் ஐ.பி.ஓ வெளியிட்டிருக்கின்றன.

ஐ.பி.ஓ வெளியிட்ட பெரும்பாலான நிறுவனங்கள், பங்குகள் பட்டியலிடப்பட்ட முதல் நாளிலேயே அதிக லாபத்தை அள்ளித் தந்ததால், தகுதி வாய்ந்த நிறுவன முதலீட்டாளர்கள் முதல் ரீடெய்ல் முதலீட்டாளர்கள் வரை ‘லிஸ்ட்டிங் கெயின்’ பார்க்க ஐ.பி.ஓ பங்குகளில் போட்டி போட்டுக்கொண்டு முதலீடு செய்தனர். அப்படித்தான் பேடிஎம் ஐ.பி.ஓ-வுக்கும் முதலீட்டாளர்களிடம் அதிக வரவேற்பு காணப்பட்டது. பேடிஎம் ஐ.பி.ஓ வெளியீட்டின்போது, வெளியிடப்பட்ட பங்குகளின் எண்ணிக்கையைவிட 1.89 மடங்குக்கு பங்குகள் வேண்டி முதலீட்டாளர்களிடம் இருந்து விண்ணப்பங்கள் வந்தன.

30% வரை சரிந்த பேடிஎம்... முடிவுக்கு வருகிறதா ஐ.பி.ஓ கொண்டாட்டம்?

இழப்பைக் கொடுத்த ஐ.பி.ஓ லிஸ்டிங்...

ஆனால், பேடிஎம் நிறுவனப் பங்கு பங்குச் சந்தையில் பட்டியல் இடப்பட்ட முதல் நாளன்றே 27% விலை குறைந்து, முதலீட்டாளர் களுக்கு சுமார் ரூ.38,000 கோடி அளவுக்கு நஷ்டத்தை ஏற்படுத்தியது. தற்போது இந்தப் பங்கின் விலை ஏற்றத்தைச் சந்திக்க ஆரம்பித் திருந்தாலும், முதல் நாள் அன்றே மிகப் பெரிய அளவில் வீழ்ச்சியைச் சந்தித்திருப்பதால், முதலீட்டாளர்கள் இப்போது இந்தப் பங்கை வாங்கினால் சரியாக இருக்குமா என்று யோசித்து, ஒதுங்கத் தொடங்கியிருக்கின்றனர்.

ஐ.பி.ஓ வரலாற்றில், பேடிஎம் ஐ.பி.ஓ-வைப் போல, ஒரு சில நிறுவனங்கள் லிஸ்ட்டிங்கின்போது சரிவைச் சந்தித்திருக்கின்றன. அதில் குறிப்பாக, 2007-ல் கெய்ர்ன் இந்தியா ஐ.பி.ஓ வெளியீட்டின்போது முதல் நாளிலேயே 14% சரிவை சந்தித்தது. அதேபோல, 2008-ல் ரிலையன்ஸ் பவர் 17% சரிவையும், 2015-ல் காபி டே 18% சரிவையும் மற்றும் 2018-ல் ஐ.சி.ஐ.சி.ஐ செக்யூரிட்டீஸ் 14% சரிவையும் சந்தித்தன. தற்போது பேடிஎம் பங்கு விலை சரிந்து மிகப் பெரிய நஷ்டத்தை முதலீட்டாளர்களுக்குத் தந்தது.

பேடிஎம் ஐ.பி.ஓ-வில் இருந்து முதலீட்டாளர்கள் கற்றுக் கொள்ள வேண்டிய பாடம் குறித்தும், இனிவரும் நாள்களில் ஐ.பி.ஓ மார்க்கெட் எப்படி இருக்கும் என்பது குறித்தும் பங்குச்சந்தை நிபுணர்கள் சிலரிடம் பேசினோம்.

வ.நாகப்பன்
வ.நாகப்பன்

முதலில் பங்குச் சந்தை நிபுணர் வ.நாகப்பனிடம் இது குறித்துப் பேசினோம். “அண்மைக் காலமாக வெளியிடப்பட்ட ஐ.பி.ஓ-களை பெரும்பாலான முதலீட்டாளர்கள் ‘லிஸ்ட்டிங் கெயின்’ பார்ப்பதற்காக அணுகினார்கள். ஆனால், அது பெரிய தவறு. ஏனெனில், புதிதாக ஒரு நிறுவனம் ஐ.பி.ஓ வெளியிடும்போது, அந்த நிறுவனத்தின் பேலன்ஸ்ஷீட் விவரங்கள் முழுமையாகத் தெரியாது. ஓரிரு காலாண்டு முடிவுகளுக்குப் பிறகே, அந்த நிறுவனத்தின் வரவு, செலவு, கடன் சார்ந்த விவரங்கள் முழுமையாக முதலீட்டாளர் களுக்குத் தெரியும். அப்போது அந்தப் பங்குகளை நீண்டகால நோக்கில் அணுகுவது ஏற்புடைய தாக இருக்கும்.

டிமாண்டு இருக்கும் பங்குகள் கிடைக்காது...

இதற்காக ஐ.பி.ஓ வரும் பங்குகளில் முதலீட்டாளர்கள் முதலீடு செய்யக் கூடாது என்ப தில்லை. நல்ல, தரமான நிறுவனம் ஐ.பி.ஓ வெளியிடுகிறது எனில், அதில் தாராளமாக முதலீடு செய்யலாம். இந்த இடத்தில் முதலீட்டாளர்கள் மிக முக்கிய மாக ஒரு விஷயத்தைப் புரிந்துகொள்ள வேண்டும். ஐ.பி.ஓ வெளியாகும் நிறுவனத்தின் பங்குகள் நல்ல பங்குகளாக இருந்தால், அதற்குக் கூடுதல் டிமாண்ட் இருக்கும். அந்தச் சமயத்தில், முதலீட்டாளர் களிடையே போட்டி அதிகரித்து காணப்படும். அப்போது அந்தப் பங்குகள் கிடைப்பதில் சிரமம் இருக்கும்.

பேடிஎம் ஐ.பி.ஓ வெளியீட்டை பொறுத்தவரை, முதலில் ரூ.16,000 கோடி நிதி திரட்டும் நோக்கில் ஐ.பி.ஓ பங்கு வெளியீட்டின் அளவு இருந்தது. அதன் பிறகு, அதை அந்த நிறுவனம் ரூ.18,300 கோடியாக அதிகரித்தது. இதனால்தான் 2010-ம் ஆண்டில் வெளியான ‘கோல் இந்தியா’ ஐ.பி.ஓ வெளியீட்டுக்குப் பிறகு, மிகப் பெரிய ஐ.பி.ஓ-வாக இதை விளம்பரப்படுத்தினார்கள். இந்த மொத்த பங்கு வெளியீட்டில் புரொமோட்டர்களின் பங்கு விற்பனை மட்டும் ரூ.10,000 கோடி. மீதமிருக்கும் ரூ.8,300 கோடி மட்டும்தான் புதிய பங்கு வெளியீடு. இங்கு கவனிக்க வேண்டிய விஷயம், ஒரு நிறுவனம் நல்ல முறையில் இயங்குகிறது; அந்த நிறுவனத்தின் பிசினஸ் மாடல் சிறப்பாக இருக்கிறது எனில், அந்த நிறுவனத்தின் பங்குகளை புரொமோட்டர்கள் விற்க மாட்டார்கள். ஆனால், பேடிஎம் விஷயத்தில் நடந்தது வேறு.

சரி, இந்த ஒரு ஐ.பி.ஓ மிகப் பெரிய சரிவைச் சந்தித்து விட்டதால், இனி ஐ.பி.ஓ சந்தை முடிவுக்கு வந்துவிடுமா எனில், இனிவரும் ஐ.பி.ஓ வெளியீட்டின் செயல்பாடு களையும், முதலீட்டாளர்கள் அவற்றுக்குக் கொடுக்கும் ஆதரவையும் வைத்துதான் முடிவெடுக்க முடியும். உதாரணமாக, 2008-ம் ஆண்டில் ‘ரிலையன்ஸ் பவர்’ ஐ.பி.ஓ-வுக்கு வந்தபோது இதே நிலைதான் காணப்பட்டது. ஆனால், அதற்குப் பிறகு, பல நூறு ஐ.பி.ஓ-க்கள் வெளியாகின. அவற்றில் பல நிறுவனங்கள் முதலீட்டாளர்களுக்கு நல்ல லாபத்தையும் தந்தன. அதனால் இனிவரும் நாள்களில் வெளி யாகும் ஐ.பி.ஓ-களை வைத்தே ஐ.பி.ஓ மார்க்கெட் எப்படி இருக்கும் என்று சொல்ல முடியும்.

ஆனால், பேடிஎம் ஐ.பி.ஓ முதலீட்டாளர்களுக்கும், ஐ.பி.ஓ வெளியிட தயாராக இருக்கும் நிறுவனங்களுக்கும் மிகப் பெரிய பாடத்தைக் கற்றுக் கொடுத்திருக்கிறது. அதனால் இனி எதிர்வரும் காலத்தில் நிறுவனங்களும் முதலீட்டாளர்களும் எச்சரிக்கை உணர்வுடன் செயல்பட வேண்டும்” என்றார்.

அர்ஜுன் பார்த்த சாரதி
அர்ஜுன் பார்த்த சாரதி

பேடிஎம் பங்கு வெளியீடு குறித்து ஐ.என்.ஆர்பாண்ட்ஸ் டாட்காம் நிறுவனத்தின் நிறுவனர் அர்ஜுன் பார்த்த சாரதியிடம் கேட்டோம். ‘‘அதிகமான வாடிக்கையாளர்களைக் கொண்டிருக்கும் நிறுவனம் பேடிஎம். ஆனாலும், அந்த நிறுவனத்தின் பிசினஸ் மாடல் குறித்த விஷயங்களில் தெளிவு இல்லாமல் இருந்தது. மேலும், பேடிஎம் பங்குகளின் ஐ.பி.ஓ விலை `ஓவர் வேல்யூஷனில்’ பட்டியலிடப்பட்டிருக்கிறது. இதன் காரணமாகப் பங்கின் விலை வீழ்ச்சியைச் சந்தித்திருக்கிறது. இன்னும் சில வாரங்கள் இந்த நிலை நீடிக்கலாம் என எதிர்பார்க்கப்படுகிறது. அதனால் பேடிஎம் பங்கு வர்த்தகத்தில் முதலீட்டாளர்கள் பொறுமை காக்க வேண்டியது அவசியம்.

மேலும், பேடிஎம் நிறுவனத்தின் இந்த மோசமான ஐ.பி.ஓ வெளியீட்டால் முதலீட்டாளர்கள் மத்தியில் ஒருவிதமான பயம் தென்படுகிறது. இது இந்த நிறுவனத்துக்கு மட்டும் அல்லாமல், அடுத்தடுத்து ஐ.பி.ஓ வெளியிடக் காத்திருக்கும் ஸ்டார்ட்அப் நிறுவனங்கள் மற்றும் ஃபின்டெக் நிறுவனங் களை அதிக அளவில் பாதிக்கும்.

பேடிஎம் நிறுவனத்தின் தோல்வியால் ஃபின்டெக் நிறுவனத்தின் மதிப்பீடு குறையுமா என்பதுதான் தற்போது அனைவரின் முக்கியக் கேள்வியாக உள்ளது. இந்திய ஃபின்டெக் நிறுவனங்கள் மத்தியில் பேமென்ட் சேவை மூலம் வருமானம் மற்றும் லாபம் பார்க்கும் வாய்ப்பு மிகவும் குறைவாகவே உள்ளது. இதனாலேயே பேடிஎம் நிறுவனத்தின் பிசினஸ் மாடல் முதலீட்டாளர்கள் மத்தியில் பெரும் கேள்விக்குறியாக விளங்குகிறது.

முதலீட்டாளர்களுக்கு தற்போது ஏற்பட்டிருக்கும் தற்காலிக பயத்தின் காரணமாக, பேடிஎம் ஐ.பி.ஓ-வுக்குப் பிறகு, வெளியாகும் ஒரு சில ஐ.பி.ஓ- களின் நிலை கொஞ்சம் நிலை யற்றதாக இருக்க வாய்ப்புகள் இருக்கிறது.

இருப்பினும், இந்த நிலை சீக்கிரமாகவே சரியாகிவிடும், மீண்டும் சந்தையின் போக்கு ஏற்றத்தைச் சந்திக்கும்போது ஐ.பி.ஓ மார்க்கெட் நன்றாக இருக்கும் என்றே நாம் எதிர்பார்க்கலாம்.

அதனால், இனிவரும் நாள்களில் வெளியாகும் ஐ.பி.ஓ-களில் முதலீட்டாளர் கள் முதலீடு செய்ய முன்வரும் போது, அந்த நிறுவனம் சொல்லும் விஷயங்களை மட்டுமே கணக்கில் எடுத்துக் கொள்ளாமல், அந்த நிறுவனம் குறித்த பல்வேறு விஷயங்களைத் தெரிந்துகொண்டு, அதில் திருப்தி அடைந்தால் மட்டுமே முதலீடு செய்ய வேண்டும்” என்றார்.

பேடிஎம் ஐ.பி.ஓ மூலம் நாம் பல பாடங்களைக் கற்றுக் கொண்டு, தவறுசெய்யாமல் இருக்கலாமே தவிர, ஐ.பி.ஓ-வில் முதலீடே இனி செய்யக் கூ டாது என யாரும் நினைக்கக் கூடாது. முதலீட்டைப் பொறுத்தவரை, அனுபவம்தான் நமக்கு மிகப் பெரிய பாடம் என்று உணர்ந்து நாம் செயல் பட வேண்டும் என்பதில் சந்தேகம் இல்லை!

ஐ.பி.ஓ-வில் முதலீடு செய்பவர்கள் கவனிக்க வேண்டிய விஷயங்கள்..!

* பங்குச் சந்தையில் பட்டியலிடப்படும் அனைத்து நிறுவனங்களின் ஐ.பி.ஓ-களும் லாபத்தை மட்டுமே கொடுக்கும் என எதிர்பார்க்கக் கூடாது. பத்து ஐ.பி.ஓ-களில் ஏதாவது இரண்டு ஐ.பி.ஓ-கள் நல்ல லாபத்தை முதல் நாளிலேயே பதிவு செய்யலாம். அதற்காக எல்லா பங்குகளும் முதல் நாளன்றே நல்ல லாபம் தரும் என்று எதிர்பார்க்கக் கூடாது.

* முதலீட்டாளர்கள் ஐ.பி.ஓ-வில் முதலீடு செய்யும்போது அந்த நிறுவனத்தின் ஃபண்டமென்டல் விஷயங்களைக் கவனிக்க வேண்டும். ஐ.பி.ஓ வெளியிடும் நிறுவனம் சொல்லும் விஷயங்களை மட்டுமே நம்பக் கூடாது.

* நீண்ட கால நோக்கில் ஐ.பி.ஓ-வில் முதலீடு செய்பவர்களுக்கு முதல் முடக்கம் என்பது தவிர, வேறு பெரிய பிரச்னை இல்லை. ஆனால், குறுகிய காலத்தில் லாபம் சம்பாதிக்க நினைப்பவர்களுக்குத்தான் இது மிகப் பெரிய பிரச்னை.

* ஒரு நிறுவனம் ஐ.பி.ஓ வெளியிடும்போது அது ஓ.எஃப்.எஸ் (OFS) முறையில் வெளியிடப்படும் பங்கு ஒதுக்கீடு அதிகமாக இருந்தால், அந்த ஐ.பி.ஓ-வை முதலீட்டாளர்கள் பரிசீலிக்காமல் இருப்பது நல்லது.

* ஐ.பி.ஓ வெளியிடும் நிறுவனம், செபியிடம் அனுமதி கோரும்போது, டி.ஆர்.ஹெச்.பி (DRHP) ஆவணங்களைச் சமர்ப்பிக்கும். இந்த ஆவணங்கள் அதிக பக்கங்களைக் கொண்டிருக்கும் என்பதால், அனைவராலும் படிக்க முடியவில்லை. என்றாலும், அந்த ஆவணத்தில் சொல்லப் பட்டிருக்கும் நிதி சார்ந்த விவரங்களை அவசியம் படித்து தெரிந்துகொள்வது முக்கியம்.

* குறுகிய காலத்துக்குத் தேவையான பணத்தை ஐ.பி.ஓ-வில் போடுவதும் தவறு. குழந்தை களின் படிப்பு, திருமணம், மருத்துவச் செலவுக்கு என வைத்திருக்கும் பணத்தைப் போட்டு, அந்த ஐ.பி.ஒ சரியாகச் செயல்படவில்லை எனில், பெரும் நஷ்டம் வந்துசேர்ந்துவிடும்!

‘லிஸ்ட்டிங் கெயின்’ பார்க்க கடன் வாங்கி முதலீடு செய்யாதீர்கள்..!’’

“சந்தையின் போக்கு ஏற்றத்தில் இருக்கும்போது, பெரும்பாலான தரகு நிறுவனங்கள் முதலீட்டாளர்களுக்குக் கடன் கொடுத்து, அதைப் பங்குச் சந்தையில் முதலீடு செய்ய முதலீட்டாளர்களை ஊக்குவிக்கின்றன. அந்தக் கடன் தொகைக்கு 15% - 18% வட்டியும் வசூலிக்கின்றன. அல்லது லாபத்தில் பாதி என்கிற கணக்கில் பணத்தை வசூலிக்கின்றன. இது ஏற்புடையது அல்ல. கடன் வாங்கி, அதைப் பங்குச் சந்தையில் எப்போதும் முதலீடு செய்யக் கூடாது. உதாரணமாக, பேடிஎம் ஐ.பி.ஓ-வில் ‘லிஸ்ட்டிங் கெயின்’ பார்ப்பதற்காகக் கடன் வாங்கி முதலீடு செய்திருந்தால், பங்கு அலாட்மென்ட்டின்போது ஒரு பங்கை ரூ.2,150 கொடுத்து வாங்கியிருந்தால், அதன் தற்போதைய வர்த்தக மதிப்பு ரூ.1,706-ஆக (24.11.2021-ம் தேதி 12.02 மணியளவில்) இருந்திருக்கும். இதனால் முதலீட்டாளர்களுக்கு நஷ்டம்தான். இந்த பங்கின் மூலம் லாபம் பார்க்கும் வரை, கடன் வாங்கி இதில் போட்ட பணம் பங்குச் சந்தைக்குள் இருக்கும் என்பதால், கடனுக்கான வட்டியை லாபம் பார்க்கும் வரையிலும் முதலீட்டாளர்கள் செலுத்த வேண்டியிருக்கும். இது முதலீட்டாளர்களுக்கு மிகப் பெரிய ரிஸ்க் ஆகும். அதனால் ஐ.பி.ஓ-வில் ‘லிஸ்ட்டிங் கெயின்’ பார்ப்பதற்காகக் கடன் வாங்கி முதலீடு செய்யாதீர்கள்” என்றார் அர்ஜுன் பார்த்தசாரதி.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism