Published:Updated:

ஷேர்லக்: எஃப்.ஐ.ஐ-க்கள், நிறுவனர்கள் முதலீட்டை அதிகரித்த பங்குகள்..! நான்காம் காலாண்டில்...

S H A R E L U C K

பிரீமியம் ஸ்டோரி

இன்று வியாழக்கிழமை ரம்ஜான் பண்டிகை என்பதால், பங்குச் சந்தை களுக்கு விடுமுறை. எனவே, வீட்டில் ரிலாக்ஸாக இருந்த ஷேர்லக்கை வாட்ஸ்அப்பில் பிடித்தோம். அவர் கேட்டுக்கொண்டபடி கேள்விகளை அனுப்பி வைத்தோம். மதியம் சுமார் 4 மணிக்கு அவர் நமக்கு பதில்களை அனுப்பினார்.

ஷேர்லக்: எஃப்.ஐ.ஐ-க்கள், நிறுவனர்கள் முதலீட்டை அதிகரித்த பங்குகள்..! நான்காம் காலாண்டில்...

டிஷ்மென் கார்போஜென் நிறுவனத்தின் பங்கு விலை குறைய என்ன காரணம்?

“கடந்த வாரம் இந்த நிறுவனம் மார்ச் காலாண்டு முடிவுகளை வெளியிட்டது. அதில் இந்த நிறுவனத்தின் நிகர இழப்பு 135.02 கோடி ரூபாய் எனப் பதிவு செய்திருக் கிறது. கடந்த ஆண்டின் இதே காலகட்டத்தில் நிகர லாபம் 50.19 கோடி ரூபாயாக இருந்தது. இதன் காரணமாக, மே 12-ம் தேதி இந்த நிறுவனத்தின் பங்கு விலை 10.52% வரை சரிந்து, 170.10 ரூபாய்க்கு விற்பனையானது. மார்ச் காலாண்டு முடிவுகளின்படி, இந்த நிறுவனத்தின் விற்பனை 3.36% அதிகரித்து 529.32 கோடி ரூபாயாக உள்ளது. இது இதற்கு முந்தைய நிதி ஆண்டின் இதே காலகட்டத்தில் 512.11 கோடி ரூபாயாக இருந்தது.”

ஸ்டீல் பங்குகளின் போக்கு எப்படி இருக்கிறது?

“உலக அளவில் கமாடிட்டிப் பொருள்களின் விலை உயர்ந்து கொண்டிருக்கிறது. அந்த வகையில் ஸ்டீல்களின் விலையும் அதிகரித்துள்ளன. இதன் காரணமாக இந்தியாவின் என்.சி.டி.எக்ஸ் ஸ்டீல் ஃப்யூச்சர் விலை கடந்த மூன்று மாதங்களில் 25 சதவிகிதத்துக்கும் மேலாக உயர்ந்துள்ளது. அதே சமயம், 11 ஸ்டீல் மற்றும் அயர்ன் நிறுவனங் களின் பங்குகளின் விலை கடந்த மூன்று மாதங்களில் 75 சதவிகிதத் துக்கும் மேலாக அதிகரித்துள்ளன.

மூன்று மாதங்களுக்கு முன்பு 5.20 ரூபாயாக இருந்த ஜெயஸ்வால் நெக்கோ இண்டஸ்ட்ரீஸ் நிறுவனத்தின் பங்கு விலை 236% அதிகரித்து, மே 10-ம் தேதி 17.49 ரூபாய்க்கு வர்த்தகமானது. 43.40 ரூபாயாக இருந்த டாடா ஸ்டீல் நிறுவனத்தின் பங்கு விலை 140% அதிகரித்து, 104.35 ரூபாய்க்கு வர்த்தக மானது. 26.20 ரூபாயாக இருந்த ஜே.எஸ்.டபிள்யூ இஸ்பட் ஸ்பெஷல் புராடக்ட்ஸ் நிறுவனத்தின் பங்கு விலை 61.35 ரூபாய்க்கு வர்த்தகமானது. 66.65 ரூபாயாக இருந்த ஸ்டீல் அத்தாரிட்டி ஆஃப் இந்தியா நிறுவனத்தின் பங்கு விலை 119% அதிகரித்து, 146.25 ரூபாய்க்கு வர்த்தகமானது. 495.05 ரூபாயாக இருந்த கோதாவரி பவர் அண்ட் இஸ்பட் நிறுவனத்தின் பங்கு விலை 113% அதிகரித்து, 1,053.70 ரூபாய்க்கு வர்த்தகமானது. 49.30 ரூபாயாக இருந்த பிரகாஷ் இண்டஸ்ட்ரீஸ் நிறுவனத்தின் பங்கு விலை 102% அதிகரித்து, 99.75 ரூபாய்க்கு வர்த்தகமானது. 568.75 ரூபாயாக இருந்த ராஜஸ்தான் குளோபல் ஒயர் நிறுவனத்தின் பங்கு விலை 86% அதிகரித்து 1,058.95 ரூபாய்க்கு வர்த்தகமானது. 410.70 ரூபாயாக இருந்த ஜே.எஸ்.டபிள்யூ ஸ்டீல் நிறுவனத்தின் பங்கு விலை 85% அதிகரித்து 758.70 ரூபாய்க்கு வர்த்தகமானது. 66.25 ரூபாயாக இருந்த முகந்த் நிறுவனத்தின் பங்கு விலை 81% அதிகரித்து 119.75 ரூபாய்க்கு வர்த்தகமானது. 690.25 ரூபாயாக இருந்த டாடா ஸ்டீல் நிறுவனத்தின் பங்கு விலை 76% அதிகரித்து 1,216.55 ரூபாய்க்கு வர்த்தகமானது. 30.65 ரூபாயாக இருந்த உஷா மார்ட்டின் நிறுவனத்தின் பங்கு விலை 75% அதிகரித்து 53.75 ரூபாய்க்கு வர்த்தகமானது.”

இந்தியப் பங்குகளில் எஃப்.ஐ.ஐ-க்கள் முதலீடு எப்படி இருக்கிறது?

“முடிந்த 2020-21–ம் நிதி ஆண்டின் நான்காம் காலாண்டில் நிஃப்டி 500 நிறுவனங்களில் வெளிநாட்டு நிதி நிறுவனங்களின் (FII) முதலீட்டு விகிதம் முந்தைய மூன்றாம் காலாண்டுடன் ஒப்பிடும்போது 0.20% குறைந்துள்ளது. அதே நேரத்தில் முந்தைய நிதி ஆண்டின் இதே நான்காம் காலாண்டுடன் ஒப்பிடும் போது 1.6% அதிகரித்து 22.3 சதவிகிதமாக உள்ளது. இதே காலகட்டத்தில் இந்திய உள்நாட்டு நிறுவனங்களின் (மியூச்சுவல் ஃபண்ட் நிறுவனங்கள், இன்ஷூரன்ஸ் நிறுவனங் கள்) முதலீடு முந்தைய காலாண்டுடன் ஒப்பிடும்போது 0.10% குறைந்தும், முந்தைய ஆண்டின் நான்காம் காலாண் டுடன் ஒப்பிடும்போது 0.50% குறைந்து 14.2 சதவிகிதமாகவும் உள்ளது.

நான்காம் காலாண்டில் எஃப்.ஐ. ஐ-க்கள், நிஃப்டி 500 நிறுவனங்களில் சுமார் 55% நிறுவனங்களில் முதலீட்டை அதிகரித்திருக்கிறார்கள். இவர்களே நிஃப்டி 50 நிறுவனங்களில் 65% நிறுவனங்களில் முதலீட்டை அதிகரித் திருக்கிறார்கள். அதே நேரத்தில், இந்திய நிறுவனங்கள் நிஃப்டி 500 மற்றும் நிஃப்டி 50 நிறுவனங்களில் முதலீட்டைக் குறைத் திருக்கிறார்கள்.”

ஷேர்லக்: எஃப்.ஐ.ஐ-க்கள், நிறுவனர்கள் முதலீட்டை அதிகரித்த பங்குகள்..! நான்காம் காலாண்டில்...

எஃப்.ஐ.ஐ-க்கள், உள்நாட்டு நிதி நிறுவனங்கள் மற்றும் நிறுவனங்களின் நிறுவனர்களின் முதலீடு அதிகரித்திருக்கும் நிறுவனங்கள் பட்டியல் ஏதாவது..?

“பொதுவாக, ஒரு குறிப்பிட்ட நிறுவனப் பங்கில் அதன் நிறு வனர்கள் மற்றும் எஃப்.ஐ.ஐ-க்கள், உள்நாட்டு நிதி நிறுவனங்கள் என மூன்று பிரிவினரின் முதலீடு அதிகரிக்கிறது எனில், அந்தப் பங்கு விலை ரீதியாக வலிமை அடைகிறது எனலாம். டியூப் இன்வெஸ்ட்மென்ட்ஸ், நீல்கமல், சி.ஜி பவர், அதுல், மோதிலால் ஆஸ்வால் ஃபைனான்ஷியல் சர்வீசஸ், ஐ.ஐ.எஃப்.எல் செக் யூரிட்டீஸ் உள்ளிட்ட நிறுவனங் களில் இந்த மூன்று பிரிவினரின் முதலீடும் கணிசமாக அதிகரித் திருக்கிறது. அதற்காக இப்போது அந்தப் பங்குகளில் முதலீடு செய்யலாமா என்பதை முதலீட் டாளர்கள்தான் அலசி ஆராய்ந்து முடிவு செய்ய வேண்டும். இது தொடர்பாக உங்கள் நிதி ஆலோச கருடன் கலந்து ஆலோசியுங்கள்.’’

கோத்ரேஜ் கன்ஸ்யூமர் நிறுவனத்தின் பங்கு விலை அதிகரிக்க என்ன காரணம்?

“இந்த நிறுவனம் மார்ச் காலாண்டு முடிவுகளை தற்போது வெளியிட்டிருக்கிறது. இந்த முடிவுகளின்படி, நிறுவனம் சிறப்பாகச் செயல்பட்டுக் கொண்டிருப்பது தெரியவந்திருக் கிறது. இதன் காரணமாக கடந்த மே 12-ம் தேதி, இதன் பங்கு விலை 9.99% விலை அதிகரித்து 787.50 ரூபாய்க்கு வர்த்தகமானது. மார்ச் காலாண்டில் இந்த நிறுவனத்தின் ஒருங்கிணைந்த நிகர லாபம் 59.13% அதிகரித்து, 365.84 கோடி ரூபாயாக அதிகரித்துள்ளது. இதற்கு முந்தைய ஆண்டின் இதே காலாண்டில், இது 229.90 கோடி ரூபாயாக இருந்தது. இந்த நிறுவனத்தின் நிகர விற்பனை 26.87% அதிகரித்து 2,705.69 கோடி ரூபாயாக இருந்தது. இது இதற்கு முந்தைய ஆண்டின் இதே காலகட்டத்தில் 2,132.69 கோடி ரூபாயாக இருந்தது.

இந்த நிறுவனப் பங்கின் இலக்கு விலையை சில தரகு நிறுவனங்கள் அதிகப்படுத்தி யிருக்கின்றன. சி.எல்.எஸ்.ஏ இந்தப் பங்கின் இலக்கு விலை யாக 800 ரூபாயைக் குறிப்பிட் டுள்ளது. கிரெடிட் சூசே 875 ரூபாயை இலக்கு விலையாகவும், ஜெஃபெரிஸ் 1,000 ரூபாயாகவும் குறிப்பிட்டுள்ளது. இதற்கு முன்பாக குறிப்பிட்ட 840 ரூபாயிலிருந்து அதிகப்படுத்தி 1,000 ரூபாய் என நிர்ணயம் செய்துள்ளது. மோதிலால் ஆஸ்வால் 870 ரூபாயை, இலக்கு விலையாகக் குறிப்பிட்டுள்ளது.

மேலும், வருகிற அக்டோபர் 2021-ல், கோத்ரேஜ் கன்ஸ்யூமர் புராடக்ஸ் நிறுவனத்தின் நிர்வாக இயக்குநர் மற்றும் முதன்மை செயல் அதிகாரியாக சுதிர் சீதாபதி பொறுப்பேற்பார் என்ற அறிவிப்பு கடந்த வாரம் புதன்கிழமை அன்று வெளியானது. இதன் காரண மாகவும், இந்த நிறுவனத்தின் பங்கு விலை 15% வரை விலை அதிகரித்து 823.30 ரூபாய்க்கு வர்த்தகமானது. ஜி.பி.சி.எல் நிறுவனத்தின் புதிய பதவிக்காக, தான் 20 ஆண்டுகளுக்கும் மேலாக வேலை செய்த ஹிந்துஸ்தான் யூனிலீவர் நிறுவனத்தின் எஃப்.ஆர் (foods and refreshment) பிரிவின் நிர்வாக இயக்குநர் பதவியில் இருந்து சுதிர் சீதாபதி விலகுகிறார்.”

கடந்த சில ஆண்டுகளாகவே விலை இறக்கம் கண்டுவந்த சவுத் இண்டியன் பேங்க் பங்கு விலை இப்போது திடீரென உயர்ந்து வர என்ன காரணம்?

‘‘பெரிய காரணம் எதுவும் இருக்கிற மாதிரி தெரியவில்லை. கடந்த சில ஆண்டுகளில் ஏற்பட்ட வெள்ளப்பெருக்கு இந்தக் கேரளா வங்கியைக் கடுமையாகப் பாதித்தது. இப்போதும் கேரளாவில் கொரோனா நோய்த்தொற்று அதிகமாகத்தான் இருக்கிறது. என்றாலும் சவுத் இண்டியன் பேங்க் பங்கு விலை கடந்த ஒரு வாரத்தில் 37% விலை அதிகரித்திருக்கிறது. இந்த விலையேற்றம் இன்னும் தொடருமா என்பதைப் பார்த்துவிட்டுத்தான் முதலீடு செய்யும் முடிவை எடுக்க வேண்டும். ரூ.8-க்குள் இந்தப் பங்கை வாங்கியவர்கள் விரும்பினால் இந்தப் பங்கில் செய்த முதலீட்டிலிருந்து ஒரு பகுதியை, இந்தப் பங்கு விலை ஒரு குறிப்பிட்ட அளவைக் கடந்து இறங்கும்பட்சத்தில் விற்றுவிடலாம்.’’

இந்திய பங்குச் சந்தைகளிலிருந்து வெளிநாட்டு முதலீட்டாளர்கள் பெருமளவில் பணத்தை எடுத்து வருகிறார்களே?

‘‘இந்தியாவில் கொரோனாவின் இரண்டாவது அலை வேகமெடுத் திருப்பதால், வெளிநாட்டு முதலீட் டாளர்கள் கடந்த மே 3-7-ம் தேதிக்குள் 5,936 கோடி ரூபாயை, இந்தியப் பங்குச் சந்தைகளிலிருந்து வெளியில் எடுத்திருக்கிறார்கள். கடந்த ஏப்ரல் மாதத்தில் இவர்கள் வெளியில் எடுத்த தொகையின் மதிப்பு 9,659 கோடி ரூபாயாக இருக்கிறது.

அதே சமயம், அக்டோபர் 2020 முதல் மார்ச் 2021 வரை வெளிநாட்டு முதலீட்டாளர்கள் இந்திய பங்குகளில் ரூ.1.97 லட்சம் கோடிக்கு மேல் முதலீடு செய்திருக்கின்றனர். இதில் இந்த ஆண்டின் முதல் மூன்று மாதங்களில் மட்டும் ரூ.55,741 கோடி நிகர முதலீடாக இருக்கிறது.

இறுதியாக ஒரு வார்த்தை... சந்தை இறங்கிக்கொண்டிருக்கிறதே என்கிற பதற்றம் வேண்டாம். நல்ல லார்ஜ் கேப், மிட்கேப், ஸ்மால்கேப் பங்குகளை வாங்கி உங்கள் போர்ட் ஃபோலியோவை பலப்படுத்திக் கொள்ளுங்கள். மியூச்சுவல் ஃபண்ட் எஸ்.ஐ.பி முதலீட்டை எக்காரணம் கொண்டும் நிறுத்திவிட வேண்டாம்.’’

இந்தியாவின் ஜி.டி.பி வளர்ச்சி: மூடிஸ் மறுமதிப்பீடு..!

இந்தியாவில் கொரோனாவின் இரண்டாம் அலை மிக வேகமாகப் பரவி வருவதால், பல்வேறு தரக் குறியீட்டு நிறுவனங்கள் இந்தியாவின் ஜி.டி.பி வளர்ச்சி விகிதத்தை ஏற்கெனவே குறைத்தன. அப்போது மூடிஸ் நிறுவனமும் ஜி.டி.பி வளர்ச்சி விகிதத்தைக் குறைத்தது. தற்போது 2021-2022-ம் நிதி ஆண்டுக்கான விகிதத்தை மீண்டும் 13.7 சதவிகிதத்திலிருந்து 9.3 சதவிகிதமாகக் குறைத்துள்ளது. மேலும், தீவிரமான கொரோனா பரவல் பொருளாதார வளர்ச்சியை தடை செய்யும் என்றும், இதன் காரணமாக இந்தியாவின் நிதிப் பற்றாக்குறை 11.8 சதவிகிதமாக அதிகரிக்கும் என்றும் மூடிஸ் தெரிவித்துள்ளது. இதற்கு முன்பாக நிதிப்பற்றாக்குறை விகிதத்தை 10.8% என மூடிஸ் கணித்திருந்தது. இந்தியாவின் ஜி.டி.பி வளர்ச்சி விகிதத்தை கோல்டுமேன் சாக்ஸ் 11.1%, நோமுரா 10.8%, ஸ்டேட்பேங்க் ஆஃப் இந்தியா 10.4%, கேர் ரேட்டிங்ஸ் 9.2% மற்றும் ஐ.சி.ஆர்.ஏ 10-10.5% இருக்கும் எனக் கணித்திருக்கின்றன!

பி.ஹெச்.இ.எல்: 8 நாள்களில் பங்கு விலை 60% உயர்வு..!

கடந்த வாரம் செவ்வாய்க்கிழமை அன்று பி.எஸ்.இ சென்செக்ஸ் 0.69% சரிந்து வர்த்தகமானாலும், பி.ஹெச்.இ.எல் நிறுவனத்தின் பங்கு விலை 14% வரை அதிகரித்து 75.15 ரூபாய்க்கு வர்த்தகமானது. இது கடந்த 21 மாதங்களில் இல்லாத அதிக விலையாகும். ஏப்ரல் 29-ம் தேதி 47.20 ரூபாய்க்கு வர்த்தகமாகி வந்த இதன் பங்கு விலை, கடந்த 8 வர்த்தக தினத்தில் மட்டும் 59% வரை விலை அதிகரித்துள்ளது.

மோதிலால் ஆஸ்வால் நிறுவனம் இந்த நிறுவனத்தின் மார்ச் காலாண்டு முடிவுகளை முன்னதாகவே கணித்துள்ளது. இந்தத் தரகு நிறுவனம், பி.ஹெச்.இ.எல் நிறுவனத்தின் ஒருங்கிணைந்த லாபம் 820 கோடியாக இருக்கும் என எதிர்பார்க்கிறது. நிறுவனத்தின் திறன்வாய்ந்த செயல்பாடுகள் மற்றும் வட்டி செலவினக் குறைப்பு காரணமாக இது சாத்தியமாகும் எனத் தரகு நிறுவனம் தெரிவித்துள்ளது. இது கடந்த ஆண்டின் இதே காலகட்டத்தில் 1,532 கோடி ரூபாயை நிகர இழப்பாக பி.ஹெச்.இ.எல் நிறுவனம் பதிவு செய்திருந்தது.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு