Published:Updated:

ஸ்பெஷாலிட்டி கெமிக்கல்ஸ் பங்குகள்... இனியும் முதலீடு செய்யலாமா?

பங்கு முதலீடு
பிரீமியம் ஸ்டோரி
News
பங்கு முதலீடு

பங்கு முதலீடு

பெரும்பாலான ஸ்பெஷாலிட்டி கெமிக்கல்களின் விலை 2021-ம் ஆண்டில் பன்மடங்கு அதிகரித்து வர்த்தகமாகின. குறிப்பாக, ‘சப்ளை செயின்’ என்று சொல்லப்படும், உற்பத்தி செய்யப் பட்ட பொருள்களை உற்பத்தி செய்த இடத்திலிருந்து, மற்றோர் இடத்துக்கு எடுத்துச் செல்வதில் தடங்கல் ஏற்பட்டதன் காரணமாக வேதிப்பொருள்களின் விலை தாறுமாறாக அதிகரித்து, வர்த்தக மாகின்றன. இதனால் இந்தத் துறை சார்ந்த பங்குகளில் முதலீடு செய்த முதலீட்டாளர்களுக்கு நல்ல லாபம் கிடைத்தது.

ஷியாம் சுந்தர் 
கமாடிட்டி நிபுணர்
ஷியாம் சுந்தர் கமாடிட்டி நிபுணர்

கடந்த காலத்தில் விலை ஏற்றம் கண்ட இந்தத் துறை பங்குகள், சமீப காலமாக இறக்கத்தைச் சந்தித்து வருகின்றன. இந்த இறக்கத்தைப் பயன்படுத்தி புதிய முதலீடு களை மேற்கொள்ளலாமா என்கிற கேள்விக்கு பதில் காணும்முன், வரும் ஆண்டில் இந்தத் துறை சார்ந்த நிறுவனங் களின் வளர்ச்சி சிறப்பாக இருக்க வாய்ப்பு இருக்கிறதா என்று பார்ப்போம்.

2022-ம் ஆண்டில் கெமிக்கல் துறை எப்படி இருக்கும்?

உலக அளவில், ஒட்டுமொத்த கெமிக்கல் உற்பத்தியானது வரும் 2022-ல் 2.7 சதவிகித மாக இருக்கும் எனக் கணிக்கப்பட்டுள்ளது. நடப்பாண்டில் இது 2021-ல் 7 சதவிகிதமாகக் காணப்பட்ட நிலையில், இனி இந்தத் துறையில் ஒரு விதமான சுணக்கமான, தேக்கநிலையிலேயே வளர்ச்சி இருக்கும் என்று எதிர்பார்க்கப்படுகிறது.

2022-ம் ஆண்டில் சீனாவின் கெமிக்கல் துறை உற்பத்தி 10 சதவிகிதமாக இருக்கும் என எதிர்பார்க்கப்பட்டது; தற்போது அது 4 சதவிகிதமாகக் குறையக்கூடும் எனவும், ஆனால், 2022-ம் ஆண்டில் அமெரிக்காவின் கெமிக்கல் உற்பத்தி முன்பு கணிக்கப்பட்ட 2 சதவிகிதத்திலிருந்து 5 சதவிகிதமாக அதிகரிக்க வாய்ப்பிருப்பதாகவும் செய்திகள் வெளியாகியுள்ளன. அமெரிக்க வேதியியல் கவுன்சில் அறிக்கையின்படி, 2021-ல் 1.4 சதவிகிதமாகக் காணப்பட்ட உற்பத்தி அளவு (வால்யும் அடிப்படையில்), 2022-ல் 3.2 சதவிகிதமாக அதிகரிக்கும் எனவும் தெரிவித்துள்ளது.

போக்குவரத்து இடையூறுகள்...

இந்தியா, சீனா உள்ளிட்ட நாடுகளில் உற்பத்தி செய்யப்பட்ட வேதிப் பொருள் களை ஐரோப்பிய நாடுகளுக்கு ஏற்றுமதி செய்ய வேண்டுமானால், கோவிட்-19-க்கு முன்பிருந்த காலத்தில் திட்டமிட்டதை விட, தற்போது அதிக அளவிலான திட்டமிடல் அவசியமாகிறது. ஏனெனில், துறைமுகத்தில் காணப்படுகிற நெரிசல், காத்திருத்தல், கனரக வாகன ஓட்டுநர்களுக் கான பற்றாக்குறை, கெமிக்கல் பொருள்களை, அந்தந்த நாடுகளின் வானிலை மற்றும் வெப்பநிலைக்கு ஏற்றவாறு கொண்டு செல்லுதல் என்பனவற்றையெல்லாம் கருத்தில் கொள்ளும்போது காலவிரயம் ஏற்படாமல், குறிப்பிட்ட காலத்துக்குள் கொண்டுபோய்ச் சேர்க்கும் கட்டாயம் இருப்பதால் அதிக சிக்கல்கள் ஏற்பட்டுள்ளன.

கடல்சார் போக்குவரத்துக் கட்டணங்கள், கடந்த ஓராண்டில் நான்கு மடங்கு வரை உயர்ந்துள்ளன. இதை உணர்த்தும் விதமாக ‘பால்டிக் ட்ரை இண்டெக்ஸ்’ (Baltic Dry Index) குறியீடு 2020 அக்டோபர் மத்தியில் 1500–ஆக இருந்தது, 2021-அக்டோபர் மத்தியில் 4800-ஆக அதிகரித்துள்ளது.

பொருளாதாரம் மெள்ள பழைய நிலைக்குத் திரும்ப முயற்சி செய்யும்போது, ஒரே நேரத்தில் அதிக தேவை ஏற்படுகிறது. நிறுவனங்களின் கையில் அதிக அளவுக்கான ஆர்டர்கள் இருந்தும், அவற்றை நிறைவேற்றக்கூடிய நிலையில் இருப்பு இல்லாததும், கவலைக்குரிய செய்தியாகப் பார்க்கப்படுகின்றன.

குறிப்பாக, புடாடின் (Butadiene), அம்மோனியா, பென்சைன், அசிட்டோன் (Acetone) போன்ற கெமிக்கல் களுக்கான தேவை அதிகரித்துக் காணப்படுவதால், இந்திய நிறுவனங்கள் கடந்த மூன்று ஆண்டுகளில் மூலதனச் செல வினங்களை சுமார் ரூ.3,800 கோடிகளுக்கு அதிகப்படுத்தி உள்ளன. வரும் ஆண்டுகளிலும், இதே மாதிரியான மூலதனச் செலவினங்கள் செய்யவிருப்பதாக நிறுவனங்கள் முடிவெடுத்திருப்பது, இந்தத் துறைக்கு வலிமை சேர்க்கும் என்று கருதப்படுகிறது.

ஸ்பெஷாலிட்டி கெமிக்கல்ஸ் உற்பத்தியில் இந்தியாவின் பங்கு...

2020-ம் ஆண்டுக்கு முந்திய ஐந்து ஆண்டுகளில், நம் நாட்டில் இந்தத் துறையின் வளர்ச்சி ஒட்டுமொத்தமாக 12% அதிகரித்து, 32 பில்லியன் அமெரிக்க டாலர்களாக உயர்ந்து உள்ளது. வருகிற 2025-ம் ஆண்டுக்குள், உலக அளவிலான ஸ்பெஷாலிட்டி கெமிக்கல்ஸ் துறை இந்திய நிறுவனங்களின் பங்களிப்பு இரண்டு மடங்கு அதிகரித்து 64 பில்லியன் டாலர் களாக இருக்க வாய்ப்பிருக்கிறது. குறிப்பாக, அக்ரோ கெமிக்கல்கள் சிறந்த வளர்ச்சியைக் காணவிருப்பதாக எதிர்பார்க்கப்படுகிறது. (பார்க்க வரைபடம்)

ஸ்பெஷாலிட்டி கெமிக்கல்கள் துறை சார்ந்த சில முக்கிய நிறுவனங்களின் செயல்பாடுகள் எவ்வாறு இருக்கின்றன என்பதை இனி பார்ப்போம்.

ஸ்பெஷாலிட்டி கெமிக்கல்ஸ் பங்குகள்... இனியும் முதலீடு செய்யலாமா?

ஆர்த்தி இண்டஸ்ட்ரீஸ் (Aarthi Industries)

பென்சைனை அடிப்படையாகக் கொண்டு தயாரிக்கப் படும் இந்த நிறுவனத்தின் தயாரிப்புகள் விவசாயம், பார்மா, எரிபொருள் போன்ற துறைகளுக்குப் பயன்படுத்தப்பட்டு வருகின்றன. சென்ற நிதியாண்டில் இந்த நிறுவனத்தின் வருமானம், அதற்கு முந்திய ஆண்டைக்காட்டிலும் 9% அதிகரித்து, 687 மில்லியன் டாலராக அதிகரித்துள்ளது. அடுத்த மூன்று ஆண்டுகளில் 90-க்கும் மேற்பட்ட புதிய பொருள்களை அறிமுகப்படுத்த இருப்பதாக இந்த நிறுவனம் அறிவித்துள்ளது.

ஆல்கைல் அமைன்ஸ் கெமிக்கல்ஸ் (Alkyl Amines Chemicals Ltd)

பார்மா மற்றும் அக்ரோ கெமிக்கல்களைத் தயாரிக்கும் நிறுவனங்களுக்குத் தேவையான அமைன்ஸ்களை உற்பத்தி செய்து தரும் இந்த நிறுவனத்துக்கு மிகப் பெரிய அளவுக்கான தேவை அதிகரித்துள்ளது. இதனால் சென்ற நிதியாண்டில், இந்த நிறுவனத்தின் வருமானம் 25% அதிகரித்து, 12.5 பில்லியன் டாலராக உயர்ந்துள்ளது. இந்த நிறுவனத்தின் பங்கு விலை, கடந்த ஒரு வருடத்தில் 200% ஏற்றத்தைச் சந்தித்துள்ளது.

வினதி ஆர்கானிக்ஸ் (Vinati Organics)

இந்த நிறுவனம் இடைநிலை வேதிப்பொருள்கள் மற்றும் மானோமர் எனப்படும் வேதிச் சேர்மங்களைத் தயாரிப்பதில் முன்னணியில் இருக்கிறது. உலகச் சந்தையில் 65 சதவிகிதமும், உள்நாட்டுச் சந்தையில் 70 சதவிகிதமும் பங்கு வகிக்கிறது. கடந்த பத்து வருடங்களாக ஒட்டுமொத்த வளர்ச்சியானது 16 சதவிகிதமாக இருந்துவருவது முக்கியமான ஒன்று.

அதுல் (Atul)

70 வருடத்துக்கும் மேலான பழைமையான இந்த நிறுவனம், வாசனை, நிறமிகள், பயிர் காப்பான்களில் பயன்படுத்தப் படும் வேதிப்பொருள்கள், பார்மா மற்றும் பாலிமர் ஆகிய வற்றைத் தயாரித்து வருகிறது. இதன் எபிட்டா மார்ஜின் 24% என்ற அளவில் தொடர்ந்து இருக்கிறது.

காலக்ஸி சர்ஃப்பெக்டன்ட்ஸ் (Galaxy Surfactants Ltd)

நுகர்வோர் பொருள்களுக்குத் தேவையான ஸ்பெஷாலிட்டி கெமிக்கல் பொருள்களைத் தயாரிக்கும் இந்த நிறுவனம், 37 பேட்டன்ட் உரிமையைப் பெற்று, அமெரிக்கா, ஜப்பான், ஐரோப்பிய நாடுகள் உள்ளிட்ட நாடுகளில் வர்த்தகத்தை மேற்கொண்டு வருகிறது. இந்த நிறுவனத்தின் வருமானம் 10-க்கும் மேற்பட்ட அதிவிரைவு நுகர்வோர் துறை சார்ந்ததாகவும், அதில் பெரும் பாலானவை எம்.என்.சி நிறுவனங்களிலிருந்து வரக்கூடியதாகவும் இருக்கிறது.

ஃபைன் ஆர்கானிக்ஸ் (Fine Organics Industries Ltd)

உணவு, அழகு சாதனப் பொருள்கள், பெயின்ட், பார்மா, டெக்ஸ்டைல், ரப்பர் உள்ளிட்ட துறைகளில் இதன் பங்களிப்பு அவசியமாக இருக்கிறது. ஒன்பது வகையான பொருள்களுக்கு காப்புரிமைகளைப் பெற்று இந்திய அளவிலும், உலக அளவிலும் வர்த்தகத்தை மேற்கொண்டு வருகிறது.

ஃபைனியோடெக்ஸ் கெமிக்கல்ஸ் (Fineotex Chemical Ltd)

இந்தியாவில் ஜவுளி உற்பத்தி தொடர்பான ஸ்பெஷாலிட்டி கெமிக்கல்ஸ் மற்றும் என்சைம் களைத் தயாரிப்பதில் இரண்டா வது மிகப் பெரிய நிறுவனமாக விளங்குகிறது. சுமார் 400-க்கும் மேற்பட்ட பொருள்களைத் தயாரித்து, 60-க்கும் மேற்பட்ட நாடுகளுக்கு ஏற்றுமதி செய்து வருகிறது. கடன் சுமை இல்லாத, விரிவாக்கம் செய்ய வாய்ப்புள்ள நிறுவனமாக விளங்குகிறது.

ஸ்பெஷாலிட்டி கெமிக்கல்ஸ் பங்குகள்... இனியும் முதலீடு செய்யலாமா?

நிறுவனங்களின் வருங்கால செயல்பாடுகள் சிறப்பாக இருக்குமா?

2014-ம் ஆண்டுக்குப் பிறகு கச்சா எண்ணெய் விலை இறக்கம் கண்டதால், மூலப்பொருள்களின் விலை கணிசமாகக் குறைந்ததாலும், தேவை அதிகரித்ததாலும், நிறுவனங்களின் வருமானம் மற்றும் லாப விகிதம் சிறப்பாகக் காணப்பட்டது. ஆனால், தற்போது கச்சா எண்ணெய் விலை ஒரு பீப்பாய் 75 முதல் 80 டாலர்கள் வரை அதிகரித்திருப்பதால் மூலப்பொருள்களைக் கொண்டு வர அதிகம் செலவு செய்ய வேண்டியிருக்கும். தவிர, கோவிட் தாக்கம் குறைவதன் காரணமாக மருத்துவம் சார்ந்த சுத்திகரிப்புக்குத் தேவையான வேதிப்பொருள்களின் தேவை குறைய வாய்ப்புண்டு.

சென்ற ஆண்டு கோவிட் பாதிப்புக்களால் 2021-ல் ஓரளவுக்கு மீண்டுவந்தாலும், 2022-ம் ஆண்டில் முழுமையாக கோவிட் தாக்கத்துக்கு முன்பிருந்த சகஜநிலைக்குத் திரும்புமா என்பதில் சந்தேகங்கள் இருக்கின்றன. இருந்த போதிலும், கடந்த ஒரு வருடத்தில் இந்தத் துறை சார்ந்த பங்குகள் 2 முதல் 4 மடங்கு வரை விலை அதிகரித்துக் காணப்படுகின்றன.

ஒரு சில நடுத்தர வகை (மிட்கேப்) பங்குகளில் சென்ற இரு காலாண்டுகளின் நிதி அறிக்கை சிறப்பாக இருந்தாலும், வரும் காலாண்டுகளில், இதே மாதிரியாக இருக்குமா என்பதில் சந்தேகங்கள் இருக்கின்றன. எனவே, முதலீட்டாளர்கள் முதலீடு செய்வதற்கு முன், உலக அளவில் கச்சா எண்ணெயின் விலைப்போக்கு, கடல் சார் சரக்கு போக்குவரத்தில் எத்தகைய முன்னேற்றம் காணப்படுகின்றன, கோவிட் தாக்கம் பற்றிய செய்திகளை எல்லாம் கருத்தில்கொண்டு முதலீடு செய்வது அவசியமாகும்.