Published:Updated:

பங்குச் சந்தை முதலீடு... இவற்றை மனதில்கொண்டு செய்தால் லாபம்தான்..! முதலீட்டு வழிகாட்டல்

முதலீடு
பிரீமியம் ஸ்டோரி
News
முதலீடு

I N V E S T M E N T

பங்குச் சந்தை சார்ந்த முதலீடுகள் என்கிறபோது நிறுவனப் பங்குகள், பங்குச் சந்தை சார்ந்த மியூச்சுவல் ஃபண்டுகள், கலப்பின ஃபண்டுகள் போன்றவற்றைக் குறிப்பிடலாம். இந்த முதலீடுகளில் ஈடுபடும்போது சில விஷயங்களை மனதில்கொண்டு செயல்பட்டால், நீண்டகாலத்தில் நல்ல லாபத்தைப் பெற முடியும்.

ஏற்ற இறக்கம் - ரிஸ்க் இல்லை...

பங்குச் சந்தையின் ஏற்ற இறக்கம் (Volatility) என்பது பெரும்பாலோர் நினைக்கிற மாதிரி ரிஸ்க் கிடையாது. அது நீண்ட கால முதலீட்டாளர்களுக்கு செல்வத்தைப் பெருக்க நல்ல வாய்ப்பு.

அதுவும் இறக்கச் சந்தையில் குறைந்த விலையில் பங்குகள் கிடைக்கும். குறைவான என்.ஏ.வியில் ஈக்விட்டி மியூச்சுவல் ஃபண்ட் யூனிட்கள் கிடைக்கும்.

நெருக்கடியை வீண்செய்யாதீர்கள்...

பொருளாதார நெருக்கடி (Economic crisis) மற்றும் மந்தநிலையை வீணாக்காதீர்கள். இதுபோன்ற சம்பவங்கள் அடிக்கடி நிகழாது. அரிதாகத்தான் நடக்கும். அப்போது பங்குச் சந்தை வீழ்ச்சி கண்டால் நல்ல நிறுவனப் பங்குகள், நல்ல ஈக்விட்டி ஃபண்டுகளில் முதலீடு செய்யத் தவறாதீர்கள்.

ஹசன் அலி 
ஆலோசகர், 
Siptiger.com
ஹசன் அலி ஆலோசகர், Siptiger.com

காளை சந்தையைத் தவறவிடாதீர்கள்...

பங்குச் சந்தை தொடர் ஏற்றத்தில் இருப்பதைக் காளைச் சந்தை என்பார்கள். சந்தை உச்சத்தில் இருக்கும்போது புதிய முதலீட்டை மேற்கொள்ள பலரும் பயப்படு கிறார்கள். பங்குச் சந்தை உச்சத்தில் இருக்கும்போது உங்களின் பங்கு சார்ந்த முதலீடுகளும் நல்ல லாபத்தில் இருக்கும். அந்த நேரத்தில் உங்களின் அஸெட் அலொகேஷன்படி உங்கள் முதலீட்டுக் கலவையைப் (portfolio) பகுப்பாய்வு செய்து சீராக்குங்கள்.

அஸெட் அலொகேஷன் அவசியம்...

உங்களின் வயது மற்றும் ரிஸ்க் எடுக்கும் திறனுக்கேற்ப முதலீட்டைப் பிரித்து மேற்கொண்டு வாருங்கள். இதனை அஸெட் அலொகேஷன் என்பார்கள். தங்கம், ரியல் எஸ்டேட், கடன் சார்ந்த திட்டங்கள் (ஃபிக்ஸட் டெபாசிட், கடன் ஃபண்டுகள்), பங்குச் சந்தை சார்ந்த முதலீடுகள் (நிறுவனப் பங்குகள், ஈக்விட்டி ஃபண்டுகள்) போன்றவற்றில் முதலீட்டைப் பிரித்து மேற்கொள்வது அவசியம்.

சிலர் ரிஸ்க் என்று பங்கு சார்ந்த முதலீடுகளைத் தவிர்க்கிறார்கள். இது தவறு. உங்கள் முதலீட்டுக் கலவையில் பங்குச் சந்தை சார்ந்த முதலீடுகள் இடம்பெறும்போதுதான் பணவீக்கத்தைத் தாண்டி வருமானம் பெற முடியும்.

ஆண்டுக்கு ஒருமுறை மறு சமநிலை...

உங்கள் முதலீட்டை அஸெட் அலொகேஷன்படி செய்துவிட்டு, அந்த முதலீடுகளை ஆண்டுக்கு ஒருமுறை ஆய்வு செய்ய வேண்டும். அதை ஆண்டுக்கொருமுறை மாற்றி (Rebalance) அமைக்க வேண்டும். உதாரணத்துக்கு ஒருவர், தங்கம், கடன் சார்ந்த திட்டங்கள் மற்றும் பங்குச் சந்தை சார்ந்த முதலீடுகளில் முறையை 10%, 30% மற்றும் 60% என முதலீடு செய்திருக்கிறார். ஓராண்டில் 15%, 35% மற்றும் 50% என அது மாறி இருந்தால், அதை 10%, 30% மற்றும் 60% என மாற்ற வேண்டும். அதற்கு லாபத்திலிருக்கும் முதலீட்டை விற்று, இறக்கத்தில் இருக்கும் திட்டத்தில் முதலீடு செய்ய வேண்டும்.

முதலீட்டில் ஒழுங்குமுறை...

பலரும் ஆடிக்கொரு முறை, அமாவாசைக்கு ஒருமுறை என முதலீடு செய்யும் பழக்கத்தைக் கொண்டிருக்கிறார்கள். இது தவிர்க்க வேண்டிய பழக்கம். சம்பளம் வந்ததும் முதலில் சேமிப்பு மற்றும் முதலீட்டுக்கான தொகையை எடுத்து விட்டு, மீதமுள்ள தொகையைத்தான் செலவிட வேண்டும். ஒருவர் அவரின் சம்பளத்தில் குறைந்தபட்சம் 30 சதவிகிதமாவது சேமிக்க வேண்டும்.இந்த முதலீடு உங்களின் ரிஸ்க் எடுக்கும் திறன், தேவை மற்றும் முதலீடுகளைப் புரிந்து கொண்டி ருக்கும் தன்மைக்கேற்ப ஆர்.டி (வங்கி, தபால் அலுவலகம்), எஸ்.ஐ.பி (மியூச்சுவல் ஃபண்ட், பங்குச் சந்தை) போன்ற முறைகளில் மேற்கொள்ளலாம்.

எஸ்.ஐ.பி முதலீட்டு முறை மிக முக்கியம்...

சிஸ்ட்மேட்டிக் இன்வெஸ்ட்மென்ட் பிளான் என்ற எஸ்.ஐ.பி முதலீடு முதலீட்டாளர்களிடம் ஒரு முதலீட்டு ஒழுங்கைக் கொண்டு வருகிறது. மேலும், அது முதலீட்டு மீதான பயம் மற்றும் பேராசையை ஒருசேர போக்குகிறது. இது பங்கு சார்ந்த முதலீடுகளில் சராசரியாக அதிக பங்குகள், அதிக யூனிட்டுகள் கிடைக்க வழிசெய்கிறது. மேலும், மாதந்தோறும் இந்தத் தேதியில் முதலீட்டை மேற்கொள்ள வேண்டும் என்கிற வேலையைச் சுலபமாக்குகிறது.

முதலீட்டு வருமானத்தைத் துரத்த வேண்டாம்...

பங்குச் சந்தைக் குறியீடுகள், நிறுவனப் ஃபண்டுகள், ஈக்விட்டி ஃபண்டுகள் ஏற்ற இறக்கத்துக்கு உட்பட்டவை. இவற்றின் மதிப்பு, வருமானம் அதிகரித்துவிட்டது என்று அவற்றை துரத்திச் சென்று அதிக மதிப்பில் முதலீடு செய்ய வேண்டாம். இந்த முதலீடுகள் எல்லாம் பல வாய்ப்புகளை மீண்டும் மீண்டும் அளித்து வருகின்றன. எனவே, ஒரு வாய்ப்பை தவறவிட்டால், அடுத்த வாய்ப்புக்குக் காத்திருந்து முதலீடு செய்யலாம். அது வரைக்கும் லிக்விட் ஃபண்டுகள் அல்லது கடன் ஃபண்டுகளில் முதலீட்டை வைத்துக்கொள்ளலாம். இதன் மூலமும் சிறிதளவு வருமானம் கிடைக்கும். கூடவே, நல்ல மதிப்பில் முதலீடுகளை வாங்கவும் வாய்ப்பு கிடைக்கும்.

கடன் வாங்கி முதலீடு வேண்டாம்...

எப்போதும் கடன் வாங்கி முதலீடு செய்ய வேண்டாம். அது தங்கமாக இருந்தாலும் வேண்டவே வேண்டாம். காரணம், கடனுக்கு வட்டி கட்ட வேண்டும். திடீரென விலை இறங்கிவிட்டால், இரண்டு இழப்புகளை ஒரே நேரத்தில் சந்திக்க வேண்டிவரும்.

முதலீடு
முதலீடு

கடன் வாங்கி பிரீமியம் கட்டுங்கள்...

உங்களின் ஆயுள் காப்பீடு மற்றும் ஹெல்த் பாலிசிகளுக்கு பிரீமியம் கட்டுவதில் சிக்கல் ஏற்பட்டால், கடன் வாங்கி சரியான நேரத்தில் பிரீமியத்தைக் கட்டலாம். சில ஆயிரம் ரூபாய் கடன் உங்களுக்கு லட்சக் கணக்கான மருத்துவமனை செலவைக் குறைக்க உதவக்கூடும்.

இன்ஷூரன்ஸ் என்றாலே டேர்ம் இன்ஷூரன்ஸ்தான்...

ஆயுள் காப்பீடு என்றால், முழுக்க முழுக்க ஆயுள் கவரேஜ் அளிக்கும் குறைந்த பிரீமியம் உள்ள டேர்ம் பிளானைத்தான் தேர்வு செய்ய வேண்டும். எண்டோவ்மென்ட் பாலிசி, மணிபேக் பாலிசி போன்ற பாலிசிகளைத் தேர்வு செய்வது அவசியம்தானா என்று யோசிக்க வேண்டும். காரணம், இந்த பாலிசிகளில் ஆயுள் கவரேஜ் மிகக் குறைவு. தவிர, ஆண்டுக்கு சராசரியாக 5% வருமானமே கிடைக்கும்.

முதலீட்டைத் தள்ளிப் போடாதீர்கள்

முதலீட்டை இளம் வயதிலேயே ஆரம்பித்து விடுங்கள். எல்லா செலவுகளையும் முடித்துவிட்டு, முதலீட்டை ஆரம்பிப்போம் என்பது ஒருபோதும் நடக்கக் கூடிய காரியமில்லை. மேலும், முதலீட்டை ஆரம்பிக்க பெரிய தொகை தேவையில்லை. ஃபிக்ஸட் டெபாசிட், மியூச்சுவல் ஃபண்டுகளில் ரூ.100/ரூ.500 இருந்தால்கூட முதலீட்டை ஆரம்பித்துவிட முடியும். மாதம் தோறும் முதலீடு செய்யக்கூட இந்தத் தொகையே போதும்.

புரிந்துகொண்டு செய்யுங்கள்...

யாரோ சொல்கிறார்கள் என்பதற்காக எந்த முதலீட்டையும் செய்யக் கூடாது. ஒரு முதலீடு எப்படிப்பட்டதாக இருக்கிறது என்பதைப் புரிந்துகொண்டு செய்யுங்கள். புரியவில்லை எனில், புரிந்துகொண்டுமுதலீடு செய்யுங்கள். இல்லை என்றால், தகுந்த முதலீட்டு ஆலோசகர் களின் உதவியைப் பெறுங்கள்.

சில ஆயிரம் கட்டணம் கொடுப்பது மூலம் சரியான திட்டங்களில் முதலீடு செய்து நல்ல லாபம் பார்க்க முடியும். இல்லாவிட்டால் பல லட்சம் ரூபாயை இழக்க வேண்டிய நிலை ஏற்படும்.

நீண்டகால முதலீடே வேண்டும்...

பங்குச் சந்தையில் குறுகிய கால முதலீட்டாளராக இருப்பதைவிட, நீண்டகால முதலீட்டாளராக இருங்கள். குறுகியகால முதலீடு கவர்ச்சி கரமாகத் தெரியலாம். ஆனால், அதன் மூலம் பெரிதாக லாபம் ஈட்டியவர்கள் மிகவும் குறைவு என்பதை நினைவில் கொள்ளுங்கள். ஆனால், நீண்ட காலத்தில் பணவீக்கத்தைவிட அதிக லாபம் கிடைப்பதற்கு நிறைய வாய்ப்பிருக்கிறது.

செய்திகளின் அடிப்படையில் முதலீடு வேண்டாம்...

இன்றைக்குத் தொலைக்காட்சியைத் திறந்தால், நிமிடத்துக்கு நிமிடம் மாறிக் கொண்டிருக்கும் பங்குச் சந்தையில் முதலீடு மற்றும் வர்த்தகம் செய்வது பற்றி பலரும் பேசிக்கொண்டிருப்பார்கள். அதைப் பின்பற்றி செல்வம் சேர்த்தவர்கள் குறைவுதான். முதலீடு என்பதுநீண்ட காலத்துக்கானது. அதன் வளர்ச்சியைத் தினசரி பார்க்க தேவையில்லை. செய்திகளின் பின்னால் கவனத்தைச் செலுத்தாமல் நிறுவனங்களின் வளர்ச்சியில் கவனம் செலுத்தினால், நஷ்டத்தை நிச்சயம் தவிர்க்கலாம்.

முதலில் மூலதனத்துக்குப் பாதுகாப்பு...

முதலீட்டில் முதலில் கவனிக்க வேண்டியது, மூலதனப் பாதுகாப்பு. அடுத்துதான் வருமானம், லிக்விடிட்டி போன்றவை. மூலதனத்துக்குக் கொஞ்சம்கூட பாதுகாப்பு இல்லாத பொன்ஸி போன்ற ஏமாற்று திட்டங் களிலிருந்து எப்போதும் விலகி இருங்கள். இந்தத் திட்டங்களின் வருமானம் குறுகிய காலத்தில் மிகவும் கவர்ச்சிகரமாக இருக்கும். ஆனால், நீண்டகாலத்தில் ஒன்றும் இல்லாமல் போய்விடும்.

காப்பீடு கட்டாயம்..!

முதலீடு செய்யும்முன், கடன் வாங்கும்முன் கட்டாயம் காப்பீடு செய்துகொள்வது கட்டாயம். வருமானம் ஈட்டும் நபர்களின் பெயரில் அவர்களின் ஆண்டு வருமானத்தைபோல் சுமார் 15 மடங்குக்கு டேர்ம் பிளான் எடுத்துக்கொள்ளுங்கள்.

அடுத்து குடும்ப உறுப்பினர்கள் அனைவரின் பெயரிலும் மருத்துவக் காப்பீடு எடுத்துக்கொள்வது அவசியம். இப்படிச் செய்வதன்மூலம் எதிர்காலத்தில் ஏற்படும் ஆபத்துகளிலிருந்து உங்கள் குடும்ப உறுப்பினர்களை நீங்கள் பாதுகாக்க முடியும்.

உங்கள் குடும்ப உறுப்பினர்கள் கஷ்டப்படாமல் இருக்க வேண்டுமெனில், உங்களுக்குத் தேவையான காப்பீட்டை நீங்கள் அவசியம் எடுத்தாக வேண்டும்!

ரொக்கப் பணத்தின் அவசியம்!

ரொக்கப் பணம் என்பது நமக்கு பல நேரங்களில் அவசியமாகிறது. பணமதிப்பு நீக்கம், கோவிட் பாதிப்பு காலத்தில் ரொக்கப் பணத்துக்கு அதிக தேவை இருந்தது. எனவே, ஒரு மாத செலவு தொகையைப் பணமாக வைத்திருக்க வேண்டும். அதே நேரத்தில், இரண்டு மாத செலவுக்கான தொகையை எளிதில் பணமாக்கும் விதமாக லிக்விட் மியூச்சுவல் ஃபண்ட், வங்கிச் சேமிப்புக் கணக்கு மற்றும் எஃப்.டி-யில் போட்டு வைக்க வேண்டும்!