Published:Updated:

ரூபா & கோ லிமிடெட்! (NSE SYMBOL: RUPA, BSE CODE: 533552)

அறிவோம் பங்கு நிறுவனம்... - K N O W Y O U R C O M P A N Y

பிரீமியம் ஸ்டோரி

கொல்கத்தாவைத் தலைமை யகமாகக் கொண்டு இயங்கும் ரூபா & கோ லிமிடெட் எனும் பின்ன லாடை நிறுவனத்தைப் பற்றித்தான் நாம் இந்த வாரம் தெரிந்துகொள்ளப் போகிறோம்.

நிறுவனத்தின் வளர்ச்சி...

1968-ம் ஆண்டில் ‘ரூபா’ எனும் பிராண்டு உருவாக்கப்பட்டது பின்னர் 1985-ம் ஆண்டில் ரூபா & கம்பெனி பிரைவேட் லிமிடெட் என்ற நிறுவனம் பதிவு செய்யப் பட்டது. 1995-96-களில் பினோத் ஹோய்சரி எனும் நிறுவனத்தைக் கையகப்படுத்திய இந்த நிறுவனம், பிரைவேட் லிமிடெட் என்ற நிலையில் இருந்து பப்ளிக் லிமிடெட் நிறுவனமாக மாற்றப்பட்டு பொதுப் பங்குகளை வெளியிட்டு கொல்கத்தா மற்றும் ஜெய்ப்பூர் பங்குச் சந்தைகளில் பட்டியலிடப்பட்டது.

1997-2000-ம் ஆண்டுகளில் கேஷுவல் ஆடைகளை உற்பத்தி செய்ய ஆரம்பித்த இந்த நிறுவனம், அதே காலத்தில் ஏற்றுமதி வர்த்தகத்திலும் கால்பதித்தது. மேலும், மேற்கு வங்கத்தில் உள்ள டோம்ஜீர் எனும் இடத்தில் சாயம் இடும் ஆலையை இதே காலகட்டத்தில் ஆரம்பித்த இந்த நிறுவனம் ‘தெர்மோகாட்’ என்னும் பிராண்டில் தெர்மல்வேர்களையும் உற்பத்தி செய்ய ஆரம்பித்தது.

2003-09-ம் ஆண்டுகளில் இந்த நிறுவனம் ‘யூரோ’ எனும் பிராண்டைக் கையகப்படுத்தியது. அத்துடன் ’மேக்ரோமேன் எம்சீரிஸ்’ எனும் பிரீமியம் பிராண்டை அறிமுகம் செய்தது. 2010-11-ம் ஆண்டுகளில் தேசியப் பங்கு சந்தை மற்றும் மும்பை பங்குச் சந்தையில் பட்டியலிடப் பட்டது இந்த நிறுவனம். இதே காலத்தில் `இமோஜி’ என்னும் சிறார் களுக்கான பிராண்ட்டை அறிமுகப் படுத்தியது. 2012-ம் ஆண்டில் லெக்கிங்ஸ் தயாரிப்பில் கால்பதித்த இந்த நிறுவனம் ’பெம்மோரா’ என்ற பிராண்டில் தன்னுடைய தயாரிப்பை அறிமுகப்படுத்தியது.

2013-15-ம் ஆண்டுகளில் ‘மேக்ரோ வுமன் எம் சீரிஸ்’ மற்றும் `டோரிடோ தெர்மல் வேர்’ எனும் பிராண்டுகளை அறிமுகப்படுத்தியது. 2016-18-ம் ஆண்டு காலகட்டத்தில் ‘எஃப்.சி.யு.கே’ என்னும் பிராண்டில் பின்ன லாடைகளை உற்பத்தி செய்வதற்கான அனுமதியைப் பெற்றது. மேலும், ‘ப்ரூட் ஆஃப் த லூம் இங்க்’ எனும் நிறுவனத்திடம் இருந்தும் அதனுடைய பிராண்டில் பின்னலாடைகளை உற்பத்தி செய்யும் அனுமதியைப் பெற்றது.

ரூபா & கோ லிமிடெட்! (NSE SYMBOL: RUPA, BSE CODE: 533552)

நிறுவனத் தயாரிப்புகள்...

இதன் தயாரிப்புகள் என்று பார்த்தால், உள்ளாடைகள் (பனியன்கள், ப்ரீஃப்கள்/டிராயர்கள் உள்ளிட்டவை), தெர்மல் வேர் (உடலில் இடுப்புக்கு மேல்பகுதியில் அணியும் வகை மற்றும் இடுப்புக்கு கீழே அணியப்படும் வகை என இரண்டு பிரிவிலும்), கேஷுவல் (லெக்கிங்ஸ், கேஷிவல்ஸ், சாக்ஸ், டி-ஷர்ட்ஸ், பெர்முடாஸ், டிராக்ஸ், குளிர்காலத்தில் அணியும் பேஷன் துணிவகைகள் உள்ளிட்ட பல தயாரிப்புகள்) என்ற மூன்று பெரும் பிரிவுகளில் இயங்கிவருகிறது இந்த நிறுவனம்.

பல்வேறு விலைகளில் விற்கப்படும் தயாரிப்புகளை உற்பத்தி செய்வது, இன்னர் வியர், தெர்மல் வியர் மற்றும் ஆக்டிவ் வியர் எனப் பல்வேறுதரப் பட்ட உபயோகத்துக்கான பின்ன லாடைகளை உற்பத்தி செய்வது, மிட் - பிரீமியம் மற்றும் சூப்பர் பிரீமியம் பிரிவில் தன்னுடைய தயாரிப்புகளைக் கொண்டிருப்பது மற்றும் இன்டர்நேஷனல் பிராண்டு களை உற்பத்தி செய்து விற்பதற்கான உரிமத்தைப் பெற்றிருப்பது போன்ற வற்றை இந்த நிறுவனத்தின் தனிச் சிறப்பாகச் சொல்லலாம்.

பின்னலாடைத் தொழிலில் தயாரிப்புகளை வடிவமைத்தல், உற்பத்தி செய்தல் மற்றும் வாடிக்கை யாளர்களிடம் கொண்டு சேர்ப்பதற் கான லாஜிஸ்டிக்ஸ்க்கை நிர்வகித்தல் என்ற மூன்றுமே பெரும்பங்கு வகிக்கும் நடைமுறையில் கவனம் செலுத்த வேண்டிய செயல்களாகும். நிட்டிங், பிராசஸிங் (டையிங் மற்றும் ப்ளீச்சிங்), கட்டிங், ஸ்டிச்சிங், வேர் ஹவுஸிங் மற்றும் விநியோகம் போன்ற இந்தத் துறையின் பல்வேறு படிநிலைகளில் முக்கியமானதாக இருக்கும் கட்டிங், வேர்ஹவுஸிங் மற்றும் விநியோகப் பிரிவுகளை பெரும்பாலும் இந்த நிறுவனம் சொந்த மாக நிர்வகித்து வருவது குறிப்பிடத் தக்கதொரு விஷயமாகும்.

மேலும், செலவினங்களைக் குறைவாக இருக்கும் வண்ணம் பார்த்துக் கொள்ளுதல், இயந்திரங்கள் மற்றும் பணியாளர்கள் குறைவாக இருக்கும் வண்ணம் பார்த்துக்கொள்ளுதல், அதிக தரம் கொண்ட பொருள்களை உற்பத்தி செய்தல் போன்றவையும் இந்த நிறுவனத்துக்கே உரித்தான தனிச் சிறப்பு.

ரூபா & கோ லிமிடெட்! (NSE SYMBOL: RUPA, BSE CODE: 533552)

நிறுவனத்தின் உற்பத்தி மையங்கள்...

இந்த நிறுவனத்தின் உற்பத்தி மையங்கள் என்று பார்த்தால், மேற்கு வங்கத்தில் உள்ள டோம்ஜீர், தமிழகத்தில் திருப்பூர், கர்நாடகாவில் பெங்களூரு மற்றும் நேஷனல் கேப்பிடல் ரீஜனில் உள்ள காசியாபாத் என்ற இடத்திலும் இருக்கிறது.

நாளொன்றுக்கு 25 டன் அளவிலான துணிகளுக்கான சாயம் போடும் மையத்தையும், நாளொன்றுக்கு மூன்று டன் அளவிலான நூலுக்கு சாயம் போடும் மையத்தையும், நாளொன்றுக்கு ஏழு லட்சத்துக்கும் மேலான முடிக்கப் பட்ட பின்னலாடை ஜவுளிகளை உற்பத்தி செய்யும் மையத்தையும் கொண்டிருக்கிறது இந்த நிறுவனம்.

கிழக்கு இந்தியாவில் மிகப் பெரியதொரு பிராண்டாகவும், அதைத் தொடர்ந்து வடக்கு மற்றும் மேற்கிந்தியாவில் பிரசித்தி பெற்ற ஒரு பிராண்டாகவும் இந்த நிறுவனம் இருந்துவருகிறது. இந்த நிறுவனத்தின் தயாரிப்புகள் 1,200-க்கும் மேற்பட்ட டீலர்கள் மூலமாக 1,25,000 சில்லறை வணிகர்கள் வாயிலாக அதனுடைய வாடிக்கையாளர் களைச் சென்று சேர்கிறது. இந்த நிறுவனம் இந்தியாவில் மீதம் உள்ள புதிய சந்தைகளில் கால்பதிக்கும் நோக்குடன் அந்தப் பகுதிகளில் புதிய விநியோகஸ்தர்களை நியமித்துக் கொண்டிருப் பது குறிப்பிடத்தக்க விஷயமாகும்.

சமீபத்தில் தென் இந்தியாவில் தன்னுடைய விரிவாக்கத்தைச் செய்யும் நோக்கத்துடன் செயல்பட்டுவரும் இந்த நிறுவனம், இது தவிர்த்து மத்திய கிழக்கு நாடு களான யு.ஏ.இ, சவுதி அரேபியா, குவைத், ஈராக் போன்றவற்றிற்கும், மியான்மர், உக்ரைன், அல்ஜீரியா, இந்தோனேசியா, நைஜீரியா, காங்கோ, ரஷ்யா, அமெரிக்கா மற்றும் சிங்கப்பூர் உள்ளிட்ட பல நாடுகளுக்கும் தன்னுடைய தயாரிப்புகளை ஏற்றுமதி செய்து வருகிறது.

தன்னுடைய தயாரிப்புகளை மேம்படுத்திக்கொள்ளத் தேவை யான ஆராய்ச்சி மையங்களையும் கொண்டுள்ள இந்த நிறுவனம். இதனாலேயே உலக அளவில் இருக்கும் பல்வேறு நாடுகளுக்கும் மிகச் சிறந்த தொழில்நுட்பம் மற்றும் தரத்துடன்கூடிய தயாரிப்புகளை உற்பத்தி செய்து விற்பனை செய்து வருகிறது.

கடந்த 10 ஆண்டுகளில் தன்னுடைய பிராண்டை வலுப் படுத்த கிட்டத்தட்ட ரூ.1,000 கோடியைச் செலவழித்துள்ளதாகச் சொல்கிறது இந்த நிறுவனம்.

இதன் தயாரிப்புகள் நவீன ரீடெயில் நிறுவனங்களான வால் மார்ட், மெட்ரோ, லைஃப்ஸ்டைல், பாண்டலூன்ஸ், விமார்ட் போன்ற வகையிலான சுமார் 150-க்கும் மேற்பட்ட ஷோரூம்களிலும், 11 எக்ஸ்க்ளூசிவ் பிராண்ட் அவுட் லெட்டுகளிலும், அமேசான், ஃப்ளிப் கார்ட், ஸ்னாப்டீல், மிந்த்ரா, பேடீஎம் மற்றும் ரூபா ஆன்லைன் ஸ்டோர் போன்ற ஆன்லைன் இணைய தளங்களிலும் விற்கப்படுவதன் மூலம் வாடிக்கையாளர்களைச் சென்றடைகிறது.

ரிஸ்க்குகள் ஏதும் உண்டா?

ஜவுளி மற்றும் பின்னலாடை துறையில் செயல்படும் நிறுவனங் களுக்கு உரித்தான அனைத்து ரிஸ்க்குகளும் இந்த நிறுவனத்துக்கும் உண்டு. மூலப்பொருள்கள் விலை உயர்வு, அந்நியச் செலாவணி மதிப்பு மாறுதல், போட்டி, தொழில்நுட்ப மாறுதல்கள், வாடிக்கையாளர்களின் ரசனை மாறுதல்கள் மற்றும் அரசின் சுற்றுச்சூழல் கொள்கையில் உருவாகக் கூடிய மாற்றங்கள் (சாயப்பட்டறை சார்ந்தவை) போன்றவையும் இந்த நிறுவனத்துக்கான ரிஸ்க்குகளே ஆகும்.

பொருளாதார வளர்ச்சியைச் சார்ந்து இயங்கும் துறை என்பதால், எதிர்பார்த்த அளவு பொருளாதார வளர்ச்சி இல்லாதுபோனாலோ, தேக்கநிலை வந்தாலோ அதுவும் இந்த நிறுவனத்தின் செயல்பாட்டை ஓரளவுக்கு பாதிக்கவே செய்யும்.

ரூபா & கோ லிமிடெட்! (NSE SYMBOL: RUPA, BSE CODE: 533552)

முதலீட்டாளர்கள் என்ன செய்ய வேண்டும்?

இந்தப் பகுதி பங்குகளைப் பரிந்துரை செய்யும் பகுதி அல்ல. முதலீட்டாளர்களுக்குப் பங்குகளை அறிமுகப்படுத்துதல் மற்றும் கல்வியே இந்தப் பகுதியின் நோக்கம். பங்கு முதலீடுகள் சந்தை அபாயத்துக்கு உட்பட்டது என்பதால், எந்தவொரு பங்கை வாங்கும் முன்னும் செபி பதிவு பெற்ற முதலீட்டு ஆலோசகரைக் கலந்தாலோசித்து, அந்தப் பங்கில் முதலீடு செய்வதில் இருக்கும் ரிஸ்க் உங்களுக்கு உகந்தது தானா என்பதை முடிவுசெய்த பின்னரே முதலீட்டு நடவடிக்கைகளை எடுக்க வேண்டும்!

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு