Published:Updated:

ரூ.1 லட்சம் கோடி சந்தை மதிப்பை எட்டிய 13 புதிய நிறுவனங்கள்..! இந்தப் பங்குகளை வாங்கலாமா..?

S H A R E M A R K E T

பிரீமியம் ஸ்டோரி

கடந்த 2020-ம் ஆண்டு ஏப்ரல் மாதத்தில் கொரோனா வைரஸ் தொற்றுப் பரவல் தொடங்கியதிலிருந்து இந்திய பங்குச் சந்தையின் போக்கு வேகமாக ஏற்றத்தைக் கண்டாலும் கடந்த சில மாதங்களாகத் தொடர்ந்து மேலே செல்ல முடியாமல் திணறிக்கொண்டிருக்கிறது. சென்செக்ஸ் சில ஆயிரம் புள்ளிகள் ஏறுவதும் இறங்குவது மாகவும் உள்ள நிலையில், ஓர் ஆச்சர்யமான நிகழ்வு நடந்துள்ளது. 13 புதிய நிறுவனப் பங்குகள் ரூ.1 லட்சம் கோடி என்கிற சந்தை மதிப்பைத் தாண்டியிருப்பதுதான் அந்த ஆச்சர்யமான நிகழ்வு.

அதானி டோட்டல் கேஸ், அதானி என்டர்பிரைசஸ், அதானி டிரான்ஸ் மிஷன், அதானி போர்ட்ஸ், ஜே.எஸ்.டபிள்யூ ஸ்டீல், டாடா ஸ்டீல், வேதாந்தா, டாடா மோட்டார்ஸ், பஜாஜ் ஆட்டோ,  சிமென்ட்ஸ், பவர்கிரிட் கார்ப்பரேஷன் ஆஃப் இந்தியா, எஸ்.பி.ஐ லைஃப் மற்றும் என்.டி.பி.சி ஆகியவையே அந்த 13 நிறுவனங்கள் ஆகும். ஏற்கெனவே 29 நிறுவனங்கள் இருந்த நிலையில், தற்போது இந்த 13 நிறுவனங்களுடன் சேர்ந்து மொத்தம் 42 நிறுவனங்கள் ரூ.1 லட்சம் கோடி சந்தை மதிப்பைத் தாண்டி வர்த்தகமாகி வருகின்றன.

புதிதாக 13 நிறுவனங்கள் ரூ.1 லட்சம் கோடி சந்தை மதிப்பை எட்டியிருப்பது எதைக் காட்டுகிறது, என்ன காரணங்களால் இந்த நிறுவனங்களின் சந்தை மதிப்பு ரூ.1 லட்சம் கோடியை எட்டி யிருக்கிறது, இந்த முக்கியமான காரணத்துக்காக இந்தப் பங்குகளை வாங்கி முதலீடு செய்யலாமா, இந்தப் பங்குகளைப் பொறுத்தவரை, கவனிக்க வேண்டிய விஷயங்கள் என்னென்ன என்பது பற்றி பங்குச் சந்தை நிபுணர் மற்றும் ஐ.டி.பி.ஐ நிறுவனத்தின் ரிசர்ச் ஹெட் ஏ.கே.பிராபகரிடம் கேட்டோம். விளக்கமான பதிலைத் தந்தார் அவர்.

ஏ.கே.பிராபகர்
ஏ.கே.பிராபகர்

அதானியின் நான்கு நிறுவனங்கள்...

“அதானி குழுமத்திலிருந்து மொத்தம் நான்கு நிறுவனங்கள் இந்தப் பட்டியலில் இடம் பெற்றுள்ளன. அதானி டோட்டல் கேஸ் லிமிடெட் நிறுவனத்தின் தற்போதைய மார்க்கெட் கேப்பிட்ட லைசேஷன் ரூ.1,43,987 கோடியாக உயர்ந்திருக்கிறது. இதற்கு முன்பாக இது ரூ.41,232 கோடியாக இருந்தது. இந்த நிறுவனத்தின் பங்கு விலை டிசம்பர் 31, 2020-ல் 347.90 ரூபாய்க்கு வர்த்தகமாகி வந்தது. கடந்த மே 7-ம் தேதி இதன் பங்கு விலை 1,309.20 ரூபாய். 249% அதிகரித்திருக்கிறது.

அதேபோல, அதானி என்டர் பிரைசஸ் நிறுவனத்தின் தற்போதைய மார்க்கெட் கேப்பிட்டலைசேஷன் ரூ.1,42,805 கோடி. இதற்கு முன்பாக இது ரூ.52,681 கோடியாக இருந்தது. இந்த நிறுவனத்தின் பங்கு விலை டிசம்பர் 31, 2020-ம் தேதி அன்று 479 ரூபாய்க்கு வர்த்தகமானது. மே 7, 2021-ம் தேதியில் இதன் பங்கு விலை 1,298.45 ரூபாய். 171% அதிகரித்திருக்கிறது.

அதானி டிரான்ஸ்மிஷன் நிறுவனத்தின் தற்போதைய மார்க்கெட் கேப்பிட்டலைசேஷன் ரூ.1,29,387 கோடி. இது இதற்கு முன்பாக 48,139 கோடி ரூபாயாக இருந்தது. இதன் பங்கு விலை டிசம்பர் 31, 2020-ம் ஆண்டு 437.70 ரூபாயாக இருந்தது. கடந்த மே 7-ம் தேதி இதன் பங்கு விலை 1,176.45 ரூபாயாக வர்த்தக மானது. 169% அதிகரித்திருக்கிறது.

இந்த மூன்று நிறுவனங்களும் அரசு மற்றும் அரசியல் ஆதாயத்தால் அபரிமிதமான ஏற்றத்தைச் சந்தித்திருக்கின்றன. தற்போதைய விலையிலிருந்து இனிவரும் காலங் களில் ஏற்றம் இருக்குமா என்பது சந்தேகம்தான். இன்றைய நிலையில், அரசின் ஆதாரவால், பெரும்பாலான வர்த்தக ஒப்பந்தங்கள் இந்த நிறுவனங்களுக்கு வழங்கப்பட்டு வருகின்றன. இதன் காரணமாகவே இந்த நிறுவனங்களின் மார்க்கெட் கேப்பிட்டலைசேஷனும் அதிகரித் திருக்கிறது. இது நிலையானதாக இருக்கும் என்பதற்கு எந்த உத்தர வாதமும் கிடையாது. மத்தியில் ஆட்சி மாற்றம் நிகழும்போது, இந்த நிறுவனங்களின் வளர்ச்சிப் போக்கு திசை மாறலாம். அதனால் இந்த மூன்று நிறுவனங்களின் பங்குகளில் முதலீடு செய்பவர்கள் கவனமாக இருப்பது அவசியம். இந்த நிறுவனங்களின் மார்க்கெட் கேப் அதிகமாகியிருக்கிறது என்கிற காரணத்தை மட்டுமே வைத்து இந்தப் பங்குகளை வாங்க நினைப்பது சரியாக இருக்காது.

பங்குச் சந்தை
பங்குச் சந்தை

அதானி போர்ட்ஸ்

அதானி குழும நிறுவனங்களில், துறைமுக மேலாண்மையில் சிறந்த நிறுவனமாக விளங்கும் அதானி போர்ட்ஸ் அண்டு ஸ்பெஷல் எக்கனாமிக் ஜோன் நிறுவனம் மிகச் சிறப்பாக செயலாற்றி வருகிறது. தற்போதைய நிலையில் இதன் வர்த்தகம் நன்றாக இருக்கிறது. இந்தியாவில் இருக்கும் மொத்த துறைமுகங்களில் 25% துறைமுகங்களை இந்த நிறுவனம்தான் கட்டுப் பாட்டுக்குள் வைத்திருக்கிறது. இனி வரும் நாள்களிலும் இந்த நிறுவனத்தின் செயல்பாடுகள் நன்றாக இருக்கும் என எதிர்பார்க்கப்படுகிறது. இதனால், இந்த நிறுவனத்தின் மீது முதலீட்டாளர்கள் கவனம் வைக்கலாம்.

தற்போதைய நிலையில், இதன் மார்க்கெட் கேப் 1,56,807 கோடி ரூபாயாக அதிகரித்திருக்கிறது. இது இதற்கு முன்பாக 98,245 கோடி ரூபாயாக இருந்தது. இதன் பங்கு விலை டிசம்பர் 31, 2020-ம் தேதி அன்று 483.55 ரூபாய்க்கு வர்த்தகமானது. கடந்த மே 7-ம் தேதி 768 ரூபாய்க்கு வர்த்தகமானது. 59% விலை அதிகரித்திருக்கிறது. அதானி போர்ட்ஸ் தவிர்த்து, மேலே குறிப்பிட்டுள்ள மற்ற மூன்று அதானி குழும நிறுவனங்களின் பங்கு விலை ஏற்றத்தைத் தற்காலிக சூழலில் கணிக்க முடியாததாக இருப்பதால், இந்த நிறுவனத்தின் பங்குகளைப் பரிசீலிக்க முடியாது.

எஸ்.பி.ஐ லைஃப்

எஸ்.பி.ஐ லைஃப் இன்ஷூரன்ஸ் கம்பெனியின் தற்போதைய மார்க்கெட் கேப்பிட்டலை சேஷன் ரூ.1,00,057 கோடியாக அதிகரித்துள்ளது. இதற்கு முன்பாக 90,430 கோடி ரூபாயாக இது இருந்தது. டிசம்பர் 31, 2020-ம் தேதியில் இதன் பங்கு விலை 904.25 ரூபாயாக வர்த்தக மானது. கடந்த மே 7-ம் தேதி 1,000.50 ரூபாயாக வர்த்தகமானது. 11% அதிகரித்திருக்கிறது. இந்த நிறுவனத்தைப் பொறுத்தவரை, பொதுத்துறை இன்ஷூரன்ஸ் நிறுவனமான எல்.ஐ.சி-ஐவிடவும் சிறப்பாகச் செயல்பட்டுக் கொண்டிருக்கும் நிறுவனம். இந்திய அளவில் 23,000 கிளை களைக் கொண்டிருக்கிறது. இந்த நிறுவனத்தின் பிசினஸ் மாடல் நன்றாக இருக்கிறது. இன்றிலிருந்து இன்னும் 3-5 ஆண்டுகளுக்குள் இதன் பங்கு விலை ஏற்றம் நன்றாக இருக்கும் என எதிர்பார்க்கப் படுகிறது. அதனால் இந்தப் பங்கையும் முதலீட்டாளர்கள் பரிசீலிக்கலாம்.

பஜாஜ் ஆட்டோ

பஜாஜ் ஆட்டோ நிறுவனத் தைப் பொறுத்தவரை, தான் உற்பத்தி செய்யும் வாகனங்களில் 60% வாகனங்களை ஏற்றுமதி செய்கின்றன. இருசக்கர வாகனங் களை ஏற்றுமதி செய்வதில், உலககிலேயே இந்த நிறுவனம்தான் முன்னணியில் இருக்கிறது. இந்த நிலையை, இந்த நிறுவனம் என்றைக்குமே தக்க வைத்துக் கொள்ளும் அளவுக்கு இந்த நிறுவனத்தின் பிசினஸ் மாடல் நன்றாகவே இருக்கிறது. அதனால் இந்த நிறுவனத்தின் பங்குகள் மீதும் முதலீட்டாளர்கள் கவனம் வைக்கலாம். தற்போதைய நிலையில் இந்த நிறுவனத்தின் மார்க்கெட் கேப்பிட்டலை சேஷன் 1,11,901 கோடி ரூபாயாக அதிகரித்துள்ளது. இதற்கு முன்பாக 99,751 ரூபாயாக இது இருந்தது. டிசம்பர் 31, 2020-ம் தேதி அன்று, இதன் பங்கு விலை 3,447.20 ரூபாயாக இருந்தது. கடந்த மே 7-ல் இதன் பங்கு விலை 3,867.10 ரூபாயாக வர்த்தக மானது. 12% வரை விலை அதிகரித்திருக்கிறது.

பவர் பங்குகள்

உலகிலேயே அதிக பவர் கெப்பாசிட்டி உள்ள மின் உற்பத்தி நிறுவனம் என்.டி.பி.சி. இதன் மொத்த ஒருங்கிணைந்த பவர் கெப்பாசிட்டி 65,000 மெகாவாட். இந்த நிறுவனத்தின் பங்கு விலை, இந்த நிலையில் இருக்கும் மற்ற நிறுவனங் களுடன் ஒப்பிடும் போது மிகக் குறைவு. அதனால் ஏற்ற இறக்கங்களைச் சந்தித்தாலும், நீண்டகால அடிப்படையில் நல்ல லாபத்தை பதிவு செய்யும் நிறுவனமாக இது இருக்கிறது. அதனால்தான் இந்தப் பட்டியலிலுள்ள பங்குகளில் முதலீட்டாளர்கள் கவனிக்க வேண்டியதாக இது இருக்கிறது.

தற்போதைய நிலையில், இதன் மார்க்கெட் கேப் 1,01,863 கோடி ரூபாயாக அதிகரித்திருக்கிறது. இதற்கு முன்பாக இது ரூ.96,288 கோடியாக இருந்தது. டிசம்பர் 31, 2020-ம் தேதி நிலவரப்படி, இந்த நிறுவனத்தின் பங்கு விலை 99.30 ரூபாயாக இருந்தது. கடந்த மே 7-ம் தேதி அன்று 105.05 ரூபாயாக வர்த்தகமானது. 6% வரை அதிகரித்திருக்கிறது.

அதே போல, பவர்கிரிட் கார்ப்பரேஷன் ஆஃப் இந்தியா நிறுவனத்தின் பிசினஸ் மாடலும் நிலையான மற்றும் நீடித்து இருக்கக்கூடிய மாடல். சமீபத்தில்கூட, இந்த நிறுவனம் ‘பவர்கிரிட் இன்விட்’ ஐ.பி.ஓ-வை வெளியிட்டது. இது இந்த நிறுவனத்தின் செயல்பாட்டுக்கும், நிறுவனத்தின் வளர்ச்சிக்கும் ஒரு சாதக மான விஷயம். இந்த நிறுவனத்துக்கு தற்போது 1,30,000 கோடி ரூபாய் கடன் இருக்கிறது. இன்விட் ஐ.பி.ஓ வந்திருப்பதன் மூலம், இந்தக் கடனுக்கான வட்டிவிகிதம் குறைய வாய்ப்புள்ளது. இதனால் நிறுவனத்தின் செலவினங்கள் குறையும், ரிட்டர்ன் ரேஷியோ அதிகரிக்கும். தற்போதைய நிலையில், இந்த நிறுவனத்தின் மார்க்கெட் கேப்பிட்ட லைசேஷன் 1,12,270 கோடி ரூபாயாக அதிகரித்துள்ளது. இதற்கு முன்பாக 99,296 கோடி ரூபாயாக இது இருந்தது. டிசம்பர் 31, 2020-ம் தேதி நிலவரப்படி, இதன் பங்கு விலை 189.80 ரூபாய்க்கு வர்த்தகமானது. மே 7-ம் தேதி அன்று 214.60 ரூபாய்க்கு வர்த்தகமானது. 13% வரை அதிகரித்திருக்கிறது.

மெட்டல் பங்குகள்!

டாடா ஸ்டீல் (மார்க்கெட் கேப் ரூ. 1,42,369 கோடி), ஜே.எஸ்.டபிள்யூ ஸ்டீல் (மா.கேப் - ரூ.1,83,008 கோடி) மற்றும் வேதாந்தா (மா.கேப் - ரூ.1,05,271 கோடி) ஆகிய மூன்று மெட்டல் பங்குகள் இந்தப் பட்டியலில் இடம்பெற்றுள்ளன.

இந்த நிறுவனங்களின் இன்றைய நிலை, இப்படியே தொடரும் என்கிற உத்தரவாதம் இல்லை. தவிர, இதன் வர்த்தகம் நிலையானதாக இருக்காது. தற்போதைய நிலையில் இந்த நிறுவனங் களின் பங்குகளை முதலீட்டாளர்கள் பரிசீலிக்காமல் இருப்பது நல்லது” என்றார் தெளிவாக.

முதலீட்டாளர்கள் இந்த விஷயங்களைக் கவனத்தில் கொண்டு நடப்பது நல்லது!

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு