Published:Updated:

பங்குச்சந்தை: செட்டில்மென்ட்டில் மாற்றங்கள் கொண்டுவரும் செபி; முதலீட்டாளர்களுக்கு என்ன நன்மை?

Stock Market
Stock Market ( Photo by Nick Chong on Unsplash )

2003-ம் ஆண்டில் இருந்து டி+2 என்பதுதான் நடைமுறையாக இருக்கிறது. இதை டி+1 எனக் குறைக்க செபி முடிவெடுத்திருக்கிறது. அதாவது, இன்று பங்குகளை வாங்கினால் அடுத்த வேளை நாளில் பங்குகள் நம்முடைய கணக்குக்கு வந்துவிடும்.

பங்குச் சந்தை வர்த்தகத்தை மேம்படுத்தும் பணிகளில் செபி அமைப்பு தொடர்ந்து ஈடுபட்டுவருகிறது. இதன் ஒரு பகுதியாக, தற்போது செட்டில்மென்ட் முறையில் மாற்றம் கொண்டு வர திட்டமிட்டிருக்கிறது. 1990-களில் செட்டில்மென்ட் என்பது 14 நாள்களாக இருந்தது. இது படிப்படியாகக் குறைந்து மூன்று நாள்களானது. 2003-ம் ஆண்டு முதல் டி+2 என்னும் செட்டில்மென்ட் நடைமுறை கொண்டுவரப்பட்டது.

அதாவது, ஒரு பங்கு வாங்குகிறோம் என்றால் இரு நாள்களில் நம்முடைய டிமேட் கணக்குக்கு பங்குகள் வரும். விற்கிறோம் என்றாலும் இரு நாள்களில் பணம் நம் கணக்குக்கு வரும். இதைத்தான் டி+2 செட்டில்மென்ட் என அழைக்கிறோம். ஒரு வேளை இந்த இரு நாள்களில் வாங்கிய பங்குக்கு பணம் செலுத்தவில்லை எனில், பங்குகள் ஏலம் விடப்பட்டு உரியவர்களுக்கு பணம் கொடுக்கப்படும்.

Bombay Stock Exchange (BSE) building in Mumbai, India
Bombay Stock Exchange (BSE) building in Mumbai, India
AP Photo

2003-ம் ஆண்டில் இருந்து டி+2 என்பதுதான் நடைமுறையாக இருக்கிறது. இதை டி+1 எனக் குறைக்க செபி முடிவெடுத்திருக்கிறது. அதாவது, இன்று பங்குகளை வாங்கினால் அடுத்த வேளை நாளில் பங்குகள் நம்முடைய கணக்குக்கு வந்துவிடும். விற்றால் அடுத்தநாள் பணம் நம் கணக்குக்கு வந்துவிடும். வரும் ஜனவரி 1-ம் (2022) தேதி முதல் இந்தப் புதிய உத்தரவு நடைமுறைக்கு வரும் என செபி தெரிவித்திருக்கிறது.

``தொழில்நுட்பம் பெரிதாக மேம்படாத காலத்தில் டி+2 என்பது ஓகே. தற்போது தொழில்நுட்பம் வளர்ந்திருக்கும் சூழலில் இந்தக் காலத்தைக் குறைக்க வேண்டும்" எனப் பல தரப்பில் இருந்து கோரிக்கைகள் வந்திருப்பதாக செபி தெரிவித்திருக்கிறது.

இருந்தாலும் இது முழுமையான டி+1 ஆக இருக்காது. இரண்டும் சேர்ந்தே இருக்கும் எனத் தெரிவிக்கப்பட்டிருக்கிறது. எந்த செட்டில்மென்ட் விதிமுறையைப் பின்பற்றுவது என்பதை பங்குச் சந்தைகள் முடிவெடுக்கலாம். ஆனால், எந்த செட்டில்மென்ட் முறையைப் பின்பற்றினாலும் குறைந்தபட்சம் ஆறு மாதங்களுக்குப் பின்பற்ற வேண்டும். ஒரு வேளை மாறவிரும்பினால் ஒரு மாதத்துக்கு முன்பாகவே அறிவிக்க வேண்டும் என செபி தெரிவித்திருக்கிறது.

Bombay Stock Exchange (BSE)
Bombay Stock Exchange (BSE)
AP Photo
பங்கு வர்த்தகத்தில் புதிதாக ஈடுபடுபவர்கள் கவனிக்க வேண்டியவை என்னென்ன? | Doubt of Common Man

அந்நிய முதலீட்டாளர்கள்?

இந்தியாவில் இருக்கும் முதலீட்டாளர்களுக்கு டி+1 என்பது பெரிய பிரச்னையில்லை. ஆனால், வெளிநாட்டு முதலீட்டாளர்களுக்கு கால நேரம் சிறிது சிக்கலை ஏற்படுத்தும் என்பதால் அவர்களிடையே எதிர்ப்பு இருக்கிறது. உதாரணத்துக்கு, இந்தியாவில் காலையில் பங்குகளை வாங்குகிறார்கள் என்றால் அமெரிக்காவில் அப்போது இரவாக இருக்கும். அந்நிய முதலீட்டாளர்களுக்காக அவர்கள் சார்பில் இந்தியாவில் உள்ளவர்கள் வாங்குவார்கள். எவ்வளவு தொகை என்பதை வெளிநாட்டில் இருப்பவர்களுக்கு தகவல் அனுப்பி அவர்கள் டாலரில் அனுப்பி அதை இந்திய ரூபாயாக மாற்றி செட்டில் செய்ய வேண்டும். ஒரு நாளில் இந்தப் பரிமாற்றத்தைச் செய்வது கடினம் என்பதால் பணத்தைத் தயாராக வைத்துக்கொண்டே வெளிநாட்டு முதலீட்டாளர்கள் இந்திய நிறுவனங்களில் வாங்க வேண்டியிருக்கும். இந்த நடைமுறை சிக்கல் அவர்களை பாதிக்கும் என்பதால் வெளிநாட்டு முதலீட்டாளர்கள் நிதியமைச்சகத்தை அணுகியிருக்கிறார்கள். நிதியமைச்சகமும் செபியிடம் இது குறித்து விசாரித்திருக்கிறது.

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

மற்ற நாடுகளான சிங்கப்பூர், ஜப்பான் ஆஸ்திரேலியா உள்ளிட்ட நாடுகளில் கூட டி+2 செட்டில்மென்ட் என்பதுதான் நடைமுறையில் உள்ளது. தகவல் பரிமாற்றம் மற்றும் கரன்சி பரிமாற்றம் போன்றவற்றை ஒரே நாளில் செய்வது கடினம் என அந்நிய முதலீட்டாளர்கள் கருதுகிறார்கள். மேலும் ஒரே நாளில் வர்த்தக சுழற்சியை முடிக்க முடியுமா என்னும் பதற்றமும் கூடுதல் சுமை. இது மேலும் சிக்கல்களை ஏற்படுத்தும் என தெரிவித்திருக்கிறார்கள். சர்வதேச அளவில் சீனாவைத் தவிர வேறு எங்கும் டி+1 நடைமுறை இல்லை என்றும் அவர்கள் தெரிவித்திருக்கிறார்கள்.

Stock Market
Stock Market
Photo by Mark Finn on Unsplash
`₹2 கோடி லாபம்; ₹50 லட்சத்தை நிவாரண நிதிக்கு கொடுத்துவிட்டேன்!' - அசத்திய பங்குச்சந்தை டிரேடர்

உள்நாட்டு முதலீட்டாளர்களுக்கு?

ஆனால், உள்நாட்டு முதலீட்டாளர்களுக்கு (சிறு மற்றும் நிறுவனம்) இதனால் எந்தச் சிக்கலும் இல்லை. உடனடியாகப் பங்குகள் மற்றும் பணம் கிடைப்பதால் ரிஸ்க் குறைகிறது. மேலும், பணப்புழக்கம் அதிகரிப்பதால் வேறு பங்குகளை வாங்கவோ, முதலீட்டை உடனடியாகச் செய்யவோ முடியும். இது மேலும் வர்த்தகத்தை உயர்த்துவதற்குக் கூட வாய்ப்பு இருக்கிறது. டி+2 என்பதே வேகமாக நடைமுறைதான். இதைக் குறைக்கும்போது மேலும் பங்குச் சந்தையின் திறன் உயரும். முறைகேடுகள் குறையும். கடந்த 18 மாதத்தில் 3 மடங்குக்கு மேல் புதிய முதலீட்டாளர்கள் வந்திருக்கிறார்கள். பணப்புழக்கம் அதிகரித்தால் மேலும் புதிய முதலீட்டாளர்கள் வருவார்கள். இதர சொத்துகளிலிருந்தும் முதலீடுகள் பங்குச் சந்தைக்கு வரும் வாய்ப்பு இருக்கிறது.

இன்றைக்கு விற்கும் பங்குகளுக்கு நாளை பணம் கிடைத்தால் அந்தப் பணத்தை மார்ஜினாக வைத்து அடுத்த நாள் வேறு முதலீடு செய்ய முடியும். மேலும், தற்போது வியாழன் அன்று பங்கை விற்றால் அடுத்த வாரம் திங்கள் கிழமைதான் பணம் கிடைக்கும். இந்த முறையில் அடுத்த நாளே பணம் கிடைப்பதால் நிதி சார்ந்த முடிவுகளை முதலீட்டாளர்கள் வேகமாக எடுக்க முடியும். எனவே உள்நாட்டு முதலீட்டாளர்களுக்கு இந்த முடிவு சாதகமானதுதான்.

2013-ம் ஆண்டில் இருந்தே டி+1 நடைமுறை குறித்து செபி திட்டமிட்டது. சில முதலீட்டாளர்களிடம் எதிர்ப்பு இருந்தாலும் டெக்னாலஜி யுகத்தில் டி+1 என்பது தவிர்க்க முடியாது. எனவே பங்குச்சந்தைகள் மாற வேண்டிய நேரமிது.

அடுத்த கட்டுரைக்கு