Published:Updated:

வேல்யூ பங்குகள் தேர்வுக்கான பெஞ்சமின் கிரகாமின் 7 அளவுகோல்கள்..!

வேல்யூ பங்குகள்
பிரீமியம் ஸ்டோரி
வேல்யூ பங்குகள்

முதலீடு

வேல்யூ பங்குகள் தேர்வுக்கான பெஞ்சமின் கிரகாமின் 7 அளவுகோல்கள்..!

முதலீடு

Published:Updated:
வேல்யூ பங்குகள்
பிரீமியம் ஸ்டோரி
வேல்யூ பங்குகள்

மதிப்பு பங்கு முதலீட்டின் தந்தை (Father of Value Investing) என பெஞ்சமின் கிரகாம் புகழப்படுகிறார். 1920-ம் ஆண்டு களிலேயே அவர் வேல்யூ பங்கு முதலீடு பற்றி நிறைய உத்திகளைச் சொல்லியிருக்கிறார். இன்றைக்கு அவர் உயிருடன் இல்லை என்றாலும், அவரின் ‘புத்திசாலித்தனமான முதலீட்டாளர் (The Intelligent Investor)’ என்கிற நூல் அவரின் பங்கு முதலீட்டு உத்திகளை உலகுக்கு பறைசாற்றிக்கொண்டிருக்கிறது. மதிப்பு முதலீடு என்பது நிறுவனத்தின் வணிக அடிப்படைகள் (Fundamentals) சார்ந்ததாகும்; பங்குச் சந்தை மற்றும் பங்கு விலை சார்ந்த காரணிகள் குறைவாக அலசப்படும். எளிமையாகச் சொல்வது என்றால் இந்த மதிப்பு முதலீட்டு முறையில் அதிக உள்ளார்ந்த அல்லது புத்தக மதிப்பை கொண்ட நிறுவனம் முதலீட்டுக்குத் தேர்வு செய்யப்படும். இந்த முறையில் ஒரு நிறுவனப் பங்கில் தள்ளுபடி விலையில் முதலீடு செய்யும் வாய்ப்பு கிடைக்கிறது. அந்த வகையில் பாதுகாப்பான முதலீடு என்றுகூட சொல்லலாம். மதிப்பு பங்குகளைத் தேர்வு செய்ய பெஞ்சமின் கிரகாம் பயன்படுத்திய 7 முக்கிய அளவுகோல்கள் பற்றி விரிவாகப் பார்ப்போம்.

ஜி.எஸ்.ராஜேஷ் குமார் 
ஈக்விட்டி அனலிஸ்ட், 
Rkgcapitalgains.com
ஜி.எஸ்.ராஜேஷ் குமார் ஈக்விட்டி அனலிஸ்ட், Rkgcapitalgains.com

1. நிறுவனத்தின் தரம்

முதலீட்டுக்கு ஒரு நிறுவனப் பங்கைத் தேர்வு செய்யும் போது அது சார்ந்த நிறுவனம். முன்னணி நிறுவனமாக, மிகவும் தரமான நிறுவனமாக இருக்க தேவையில்லை. ஓரளவுக்கு நல்ல நிறுவனமாக இருந்தால் போதும். கடந்த 5 ஆண்டு, 10 ஆண்டுக் காலங்களில் இந்த நிறுவனம் சிறப்பாகச் செயல்பட்டு வந்திருக்க வேண்டும். மேலும், எதிர்காலத்தில் வளர்ச்சிக்கான வாய்ப்புகளுடன் இருக்க வேண்டும் என்பதை முக்கியமாகப் பார்த்தால் போதும்.

2. கடன்

நிறுவனத்தின் தற்போதைய சொத்தைவிட அதிகமாகக் கடன் இருக்கும் நிறுவனப் பங்கில் முதலீடு செய்வதை எப்போதும் தவிர்க்கவும். குறைவான கடன் இருக்கும் நிறுவனமே தொடர்ந்து நிலையாக வளர்ச்சி காண அதிக வாய்ப்பிருக்கிறது. பெஞ்சமின் கிரகாம், ‘உற்பத்தி நிறுவனம் என்றால் அதன் தற்போதைய சொத்து மதிப்பில் கடன் என்பது 110 சதவிகிதத்துக்கு அதிகமாக இருக்கக் கூடாது’ என்று ஆலோசனை வழங்கியுள்ளார். அதிக கடன் இருக்கும்போது, நிறுவனத்தின் நிகர லாபத்தில் வட்டிக்கு செல்லும் தொகையே பெரிதாக இருக்கும். குறிப்பாக, கொரோனா 19 போன்ற தொழில் முடக்கக் காலத்தில் மிகவும் பாதிப்புக்கு உள்ளானது அதிக கடன் உள்ள நிறுவனங்கள்தான். அதிலிருந்து மீண்டு வரவே பல ஆண்டுகள் ஆகும். எனவே, கடன் இல்லாத நிறுவனம் அல்லது குறைவான கடன் உள்ள நிறுவனத்தின் பங்கில் முதலீடு செய்வது லாபகரமாக இருக்கும். நிறுவனத்தின் மொத்தக் கடனுக்கும் நடப்பு சொத்துகளுக்குமான (Current Assets) விகிதம் 1.1-க்கு கீழே இருப்பதுதான் வேல்யூ முதலீட்டுச் சூத்திரமாகும்.

வேல்யூ பங்குகள் தேர்வுக்கான 
பெஞ்சமின் கிரகாமின் 7 அளவுகோல்கள்..!

3. நிறுவனத்தின் லிக்விடிட்டி

நிறுவனத்தின் நடப்பு சொத்து மதிப்பு மற்றும் அதன் நடப்பு கடனுக்குமான விகிதம் குறைந்த பட்சம் 1.5 மடக்காக இருக்க வேண்டும். இதைவிட அதிகமாக இருந்தால் நல்லது. இந்த விகிதம் அதிகமாக இருக்கும்போது, அந்த நிறுவனம் அதன் குறுகிய கால கடன்களை சுலபமாக அடைத்துவிடும் என்பதாகும்.

4. வருமான வளர்ச்சி

நல்ல வருமான வளர்ச்சி (Earings Growth) உள்ள நிறுவனங் களின் பங்குகளைத்தான் முதலீட்டுக்குத் தேர்வு செய்ய வேண்டும் என பெஞ்சமின் கிரகாம் வலியுறுத்துகிறார். குறைந்தபட்சம் கடந்த ஐந்து ஆண்டுகளாக நிறுவனத்தின் வருமான வளர்ச்சி தொடர்ந்து அதிகரித்து வந்திருக்க வேண்டும். இப்படி செய்யும்போது பங்கு முதலீட்டின் மீதான ரிஸ்க் மிகவும் குறைகிறது.

5. பி/இ விகிதம்

முதலீட்டுக்குப் பங்கைத் தேர்வை செய்யும்போது, பிரைஸ் டு எர்னிங்ஸ் ரேஷியோ (Price to Earnings Ratio) என்கிற பி/இ (P/E) விகிதத்தை முக்கியமாகக் கவனிக்க வேண்டும்.

பி/இ விகிதம் = ஒரு பங்கு வருமானம் (EPS) / நிறுவனப் பங்கின் சந்தை விலை

இந்த விகிதம் 9 மற்றும் அதற்குக் குறைவாக உள்ள நிறுவனப் பங்குகளில் முதலீடு செய்வது லாபகரமாகவும் பாதுகாப்பாகவும் இருக்கும் என்பது பெஞ்சமின் கிரகாமின் ஆலோசனையாகும். இன்றைய நிலையில் அதிக வளர்ச்சி கொண்ட நிறுவனங்களின் பி/இ விகிதம் மிகவும் அதிகமாக உள்ளது. மேலும், இந்த விகிதம் துறைக்கு துறை மாறுபடும். எனவே, ஒரே துறையில் இருக்கும் போட்டி நிறுவனங்களுடன் பி/இ விகிதத்தை ஒப்பிட்டு குறைவாக இருக்கும் நிறுவனப் பங்கில் முதலீடு செய்வது லாபகரமாகவும் பாதுகாப்பாகவும் இருக்கும்.

6. பி / பிவி விகிதம்

பங்கின் விலைக்கும் புத்தக மதிப்புக்கும் (price to book value -P/BV) உள்ள விகிதம் 1.2-க்குக் குறைவாக உள்ள நிறுவனப் பங்குகளில் முதலீடு செய்வது லாபகரமாக இருக்கும்.

பி / பிவி விகிதம் = பங்கின் சந்தை மதிப்பு சமீபத்திய புத்தக மதிப்பு

புத்தக மதிப்பு என்பது நிறுவனத்தின் மதிப்பை சுட்டிக் காட்டும் ஓர் முக்கிய அம்சமாகும். பங்கின் விலையைவிட புத்தக மதிப்பு அதிகமாக இருந்தால் தாராளமாக முதலீடு செய்யலாம்; குறைவாக இருந்தால் அந்தப் பங்கை விற்றுவிடலாம். பொதுவாக, புத்தக மதிப்பு என்பது ஒரு நிறுவனத்தை விற்றால் ஒரு பங்குக்கு என்ன தொகை கிடைக்கும் என்பதைச் சுட்டிக் காட்டுவதாக உள்ளது.

7. தொடர் டிவிடெண்ட்

ஒரு நிறுவனம், அதன் முதலீட்டாளர்களுக்கு லாபத்தில் எவ்வளவு திரும்ப அளிக்கிறது என்பதை அது முதலீட்டாளர்களுக்கு எவ்வளவு டிவிடெண்ட் வழங்கி வருகிறது என்பதிலிருந்து தெரிந்துகொள்ள முடியும். தொடர்ந்து டிவிடெண்ட் வழங்கி வரும் நிறுவனம் மூலம் ஒரு முதலீட்டாளருக்கு செயலற்ற வருமானம் என்கிற பாசிவ் இன்கம் கிடைத்து வரும். பெஞ்சமின் கிரகாமின் மாணவரான முன்னணி முதலீட்டாளர் வாரன் பஃபெட் இதன் அடிப்படையில் தான் ஒரு நிறுவனப் பங்கை முதலீட்டுக்குத் தேர்வு செய்கிறார்.

இந்தியாவில் ஒரு காலத்தில் டிவிடெண்ட் வருமானத்துக்கு பங்கு முதலீட்டாளர்கள் வருமான வரி எதுவும் கட்ட வேண்டியதில்லை என இருந்தது. இப்போது டிவிடெண்ட் வருமானத்துக்கு முதலீட்டாளர்கள் அவர்களின் வருமான வரி வரம்புக்கு ஏற்ப வரிக்கட்ட வேண்டும். உதாரணத்துக்கு 30% வரி வரம்பில் வரும் முதலீட்டாளர் ஒருவருக்கு நிதி ஆண்டில் ரூ.1 லட்சம் டிவிடெண்ட் வருமானம் கிடைக்கிறது என்றால், அவர் ரூ.30,000 டிவிடெண்ட் வரியாகக் கட்ட வேண்டும். இந்த வரியைத் தவிர்க்கும் விதமாகப் பல முன்னணி நிறுவனங்கள் முதலீட்டாளர்களிடமிருந்து பங்குகளை அதிக விலைக்கு திரும்ப வாங்கிக் கொள்கின்றன. இந்த நடைமுறை பங்கு பைபேக் (Share Buy-back) எனப்படும். இப்படி பைபேக் செய்யும் நிறுவனங் களின் பங்குகளில் முதலீடு செய்வது லாபகரமாக அமையும்.

மதிப்பீட்டு அடிப்படையில் முதலீட்டுக்கு பங்குகளைத் தேர்வு செய்யும்போது மேற்கண்ட ஏழு அம்சங்களை இனி கவனிப்பீர்கள் தானே?

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism