Published:Updated:

ஷேர்லக்: நீண்டகால முதலீட்டுக்கு ஏற்ற இந்தியப் பங்குச் சந்தை..! கொரோனா பாதிப்பு தற்காலிகம்தான்...

ஷேர்லக்
பிரீமியம் ஸ்டோரி
ஷேர்லக்

S H A R E L U C K

ஷேர்லக்: நீண்டகால முதலீட்டுக்கு ஏற்ற இந்தியப் பங்குச் சந்தை..! கொரோனா பாதிப்பு தற்காலிகம்தான்...

S H A R E L U C K

Published:Updated:
ஷேர்லக்
பிரீமியம் ஸ்டோரி
ஷேர்லக்

"நேரில் சந்திப்போமா..?” என ஊரடங்கு முடிந்த உற்சாகத்தில் நாம் ஷேர்லக்கிடம் வாட்ஸ் அப்பில் கேட்க, “அவசரப்படாதீர்கள்... இப்படி, பலரும் அவசரப்பட்டதால்தான் இரண்டாம் அலையை குறுகிய காலத்தில் நாம் எதிர்கொள்ள வேண்டியிருந்தது. நாம் ஆன்லைனில் பேசிக்கொண்டாலும், நேரில் பேசிக்கொண்டாலும் ஒரே விஷயம்தான்; ஒரே தரம்தான். தொழில்நுட்பத்தைப் பயன்படுத்துவோம். அவசியம் இல்லாத சந்திப்புகளை அறவே தவிர்ப்போம்’’ என தீர்க்கமான முடிவை நமக்கு பதிலாக அனுப்பியிருந்தார் ஷேர்லக். அவர் சொன்னபடி மாலை 4 மணிக்கு ஆன்லைனில் ஆஜரானார்.

ஷேர்லக்: நீண்டகால முதலீட்டுக்கு ஏற்ற இந்தியப் பங்குச் சந்தை..! கொரோனா பாதிப்பு தற்காலிகம்தான்...

“ஈக்விட்டி ஃபண்டுகளில் கடந்த 14 மாதங்களில் இல்லாத அளவுக்கு அதிக முதலீடு செய்யப்பட்டிருக்கிறதே?

“கடந்த மே மாதத்தில், ஈக்விட்டி ஃபண்டுகளில் நிகரமாக 10,082 கோடி ரூபாய் முதலீடு செய்யப்பட்டிருக்கிறது. இதற்கு முந்தைய ஏப்ரல் மாதத்தில் ஈக்விட்டி ஃபண்டுகளில் செய்யப் பட்ட முதலீடு 3,437 கோடி ரூபாயாக மட்டுமே இருந்தது. கடந்த மே மாத ஈக்விட்டி ஃபண்டில் செய்யப்பட்ட நிகர முதலீடு கடந்த 14 மாதங்களில் மிக அதிகமாகும்.

அதே சமயம், கடன் திட்டங் களிருந்து 44,512 கோடி ரூபாய் நிகரமாக வெளியேறியிருக்கிறது. ஆனால், இதற்கு முந்தைய ஏப்ரல் மாதத்தில், இந்த வகை ஃபண்டுகளில் 1,00,903 கோடி ரூபாய் நிகரமாக முதலீடு செய்யப்பட்டது குறிப்பிடத் தக்கது. இந்திய மியூச்சுவல் ஃபண்ட் துறை நிர்வகித்துவரும் சொத்து மதிப்பு ரூ.32.37 லட்சம் கோடியி லிருந்து, ரூ.33.05 லட்சம் கோடியாக அதிகரித்துள்ளது. தங்கம், ரியல் எஸ்டேட் முதலீடுகளைத் தாண்டி, மியூச்சுவல் ஃபண்ட் முதலீட்டை மக்கள் ஏற்றுக்கொள்ளத் தொடங்கியிருக்கிறார்கள் என்பதையே இது காட்டுகிறது.”

இந்தியாவின் ஜி.டி.பி வளர்ச்சி குறித்து உலக வங்கி என்ன சொல்லியிருக்கிறது?

“கொரோனாவின் இரண்டாவது அலை இந்தியாவில் மிக வேகமாகப் பரவிவரும் நிலையில், சென்ற ஆண்டைப் போலவே நடப்பு ஆண்டிலும் பல்வேறு தொழில் துறைகள் பாதிக்கப்பட்டுள்ளன. ஏற்றுமதி, இறக்குமதியில் தேக்கம் நிலவுகிறது. இந்த நிலையில், முன்பு இந்தியாவின் பொருளா தார வளர்ச்சி 10.1 சதவிகிதமாக இருக்கும் என்று கணித்திருந்த உலக வங்கி, தற்போது 2021-2022-ம் நிதியாண்டில் இந்தியாவின் பொருளாதார வளர்ச்சி 8.3 சதவிகிதமாக இருக்கும் என்றும், உலகத்தின் பொருளாதார வளர்ச்சி 5.6 சதவிகிதமாக இருக்கும் என்றும் தெரிவித்துள்ளது.”

வி.ஏ.டெக் வபாக் நிறுவனப் பங்கில் ரேகா ஜுன்ஜுன்வாலாவின் முதலீடு அதிகரித்திருப்பது பற்றி?

“வி.ஏ டெக் வபாக் நிறுவனப் பங்கில் முன்னணி முதலீட்டாளர் ராகேஷ் ஜுன்ஜுன்வாலாவின் மனைவி ரேகா செய்துள்ள முதலீடு கடந்த ஒன்பது மாதங்களில் இரண்டு மடங்காக அதிகரித்திருக்கிறது. கடந்த மார்ச் 31-ம் தேதி நிலவரப்படி, இந்த நிறுவனத்தில் ரேகா வைத்திருந்த பங்கு விகிதம் 8.04%. மொத்தம் 50 லட்சம் பங்குகளை வைத்திருந்தார். கடந்த வாரம் புதன்கிழமை அன்று, இந்த நிறுவனத்தின் பங்கு விலை 3% அதிகரித்து, 317 ரூபாய்க்கு வர்த்தகமானது. கடந்த செப்டம்பர் 29-ம் தேதி, இந்த நிறுவனம், ரேகா உட்பட முதலீட்டாளர்களுக்கு உரிமைப் பங்கு வெளியீட்டின் மூலம் 160 ரூபாய் என்கிற விலையில் 75 லட்சம் பங்கு களை ஒதுக்கியது குறிப்பிடத் தக்கது.”

இந்தியப் பங்குச் சந்தை ஏற்றத்தில் தொடர என்ன காரணம்?

“சிறு சிறு இறக்கங்கள் இருந்தாலும் இந்தியப் பங்குச் சந்தை ஏற்றத்தில் இருக்கிறது. இதற்கு முக்கியமான காரணம், இந்தியப் பங்குச் சந்தை நீண்டகால பன்னாட்டு முதலீட்டாளர் களுக்கு கவர்ச்சிகரமாக இருப்பதாகும். கோவிட பாதிப்பு என்பது தற்காலிக மானதுதான் என சர்வதேச முதலீட் டாளர்கள் நம்புகிறார்கள்

இந்தியாவின் அடிப்படை மிகவும் வலிமையானதாக இருக்கிறது. திறமையான பணியாளர்கள் இந்தியாவில் மிக அதிகம். அதிக மக்கள் தொகை, அதிக உற்பத்தி, உள்நாட்டிலேயே நுகர்வுக்கான வாய்ப்பு ஆகியவை இந்தியாவுக்கு சாதகமான அம்சங்கள். அடுத்து, லாபம் தராத பொதுத்துறை நிறுவனங்களை மத்திய அரசு துணிச் சலாகத் தனியாரிடம் ஒப்படைக்கத் திட்டமிட்டுச் செயல்பட்டு வருகிறது. இந்தப் பட்டியலில் இரு வங்கிகளும் அடக்கம். மேலும், வேலைவாய்ப்பை மேம்படுத்த மத்திய அரசு தீவிரமாகக் களமிறங்கி இருக்கிறது. பல்வேறு விஷயங்கள் டிஜிட்டல் மயமாக்கப்பட்டு வருவதால், அரசின் செலவும், மக்களின் செலவும் பெருமளவு குறையும். இது சேமிப்பு மற்றும் முதலீடாக மாறக்கூடும். கோவிட் பாதிப்பு தற்காலிகம்தான். இதிலிருந்து நாடு மீண்டதும் பொருளாதார வளர்ச்சி முன்பைவிட வேகமாக இருக்கும் என மதிப்பிடப்பட்டிருக் கிறது. எனவே, ஒவ்வொரு இறக்கத் தையும் முதலீட்டுக்கான வாய்ப் பாகப் பயன்படுத்திக் கொள்ள லாம் என்கிறார்கள் மும்பையைச் சேர்ந்த அனலிஸ்ட்கள். அடுத்து, ஈக்விட்டி ஃபண்டுகளைப்போல, பங்கு களிலும் எஸ்.ஐ.பி முறையில் முதலீடு செய்துவருவது லாபகர மாக இருக்கும் என்கிறார்கள் அவர்கள். உங்களுக்கென ஒரு பங்கு போர்ட்ஃபோலியோவை உருவாக்கி, அதை நீண்ட காலத்துக்குக் கண்ணும் கருத்து மாக பராமரித்து வந்தால், நல்ல லாபம் கிடைக்கும் என்பதில் சந்தேகமில்லை. நாணயம் வாசகர்கள் அனைவரும் ஒரு போர்ட்ஃபோலியோவை உருவாக்கி வைத்திருக்கிறீர்கள் தானே!”

டீம்லீஸ் சர்வீசஸ் நிறுவனத்தின் பங்கு விலை உயர்ந்து ஆச்சர்யம் தந்திருக்கிறதே!

“டீம்லீஸ் சர்வீசஸ் நிறுவனம் மார்ச் காலாண்டு முடிவுகளை வெளியிட்டிருக்கிறது. இந்த நிறுவனத்தின் நிகர லாபம் 18.9 கோடி ரூபாயாக அதிகரித்திருக்கிறது. இதற்கு முந்தைய நிதி ஆண்டின் இதே காலாண்டில் இந்த நிறுவனம் 29.4 கோடி ரூபாயை நிகர இழப்பாகச் சந்தித்திருந்தது. அதேபோல இந்த நிறுவனத்தின் வருமானமும் 1,340.5 கோடி ரூபாயாக அதிகரித்திருக்கிறது. இதன் காரணமாக, கடந்த ஜூன் 9-ம் தேதி இந்த நிறுவனத்தின் பங்கு விலை 7% வரை அதிகரித்து, 3,661 ரூபாய்க்கு வர்த்தகமானது. இந்தப் பங்கின் விலை கடந்த ஒரு வருடத்தில் 100% ஏற்றம் கண்டுள்ளது.”

வெல்ஸ்பன் கார்ப் நிறுவனத்தின் பங்கு விலை அதிகரிக்க என்ன காரணம்?

“வெல்ஸ்பன் கார்ப் நிறுவனத் தின் பங்கு விலை, கடந்த ஜூன் 9-ம் தேதி, 52 வார உட்சபட்ச விலையைத் தொட்டு வர்த்தக மானது. அன்றைய தினத்தில் 6% வரை விலை அதிகரித்து 165 ரூபாய்க்கு வர்த்தகமானது. இந்த நிறுவனம் 1,725 கோடி ரூபாய் மதிப்பிலான பல்வேறு ஆர்டர்களைப் பல்வேறு நிறுவனங்களிடமிருந்து பெற்றிருப்பதை முதலீட்டாளர் களிடையே தெரிவித்ததை அடுத்து, இந்த விலை ஏற்றம் நடந்திருக்கிறது.”

ரெலிகேர் என்டர்பிரைசஸ் நிறுவனத்தின் பங்கு விலை குறைந்தது ஏன்?

“ஏற்கெனவே இந்த நிறுவனத் தின் பங்குகளில் முதலீடு செய்திருக்கும் முதலீட்டாளர் களிடமிருந்தும், புதிய முதலீட் டாளர்களிடமிருந்தும் இந்த நிறுவனம் முன்னுரிமை பங்கு வெளியீட்டின் மூலம் 570 கோடி ரூபாய் நிதியைத் திரட்ட முடிவு செய்திருக்கிறது. இதற்கான ஒப்புதலையும் இந்த நிறுவனத்தின் இயக்குநர் குழு வழங்கியிருக்கிறது. இந்த வெளியீட்டின் மூலம் வெளியிடப்படும் பங்கு ஒன்றின் விலை 105.25 ரூபாய் என நிர்ணயம் செய்யப்பட்டுள்ளது. இதன் காரணமாக, இந்த நிறுவனத்தின் பங்கு விலை கடந்த ஜூன் 9-ம் தேதி 5% வரை குறைந்து, 141.60 ரூபாய்க்கு வர்த்தகமானது.”

ஷியாம் மெடாலிக்ஸ் அண்டு எனர்ஜி நிறுவனம் ஐ.பி.ஓ வெளியாகிறதே, முதலீடு செய்யலாமா?

“இந்த நிறுவனம் 909 கோடி ரூபாய் நிதி திரட்டும் நோக்கத்துடன், புதிய பங்குகளை வெளியிட முடிவு செய்திருக் கிறது. ஐ.பி.ஓ வெளியீடு ஜூன் 14-ம் தேதி தொடங்கி, ஜூன் 16-ம் தேதி முடிகிறது. இந்த வெளியீட்டில் வெளியிடப்படும் பங்கு ஒன்றின் விலை ரூ.303-306. இதன் லாட் சைஸ் 45 பங்குகள். இதன் மடங்கில் வாங்கலாம். புதிய பங்குகளை வெளியிடு வதன் மூலம் 657 கோடி ரூபாயும், புரமோட்டர் களின் பங்குகளை சலுகை விலையில் விற்பதன் மூலம் 252 கோடி ரூபாயும் திரட்ட இந்த நிறுவனம் முடிவு செய்துள்ளது.

கோவிட் இரண்டாம் அலை உருவானபின், புதிய ஐ.பி.ஓ-க்கள் வருவது முற்றிலும் போய், இப்போது இந்த நிறுவனம் முதன்முதலாக ஐ.பி.ஓ வருகிறது. இந்த நிலையில், பலரும் இந்த ஐ.பி.ஓ-வில் பங்குகளைக் கேட்டு விண்ணப்பிக்க வாய்ப்புண்டு. இந்த ஐ.பி.ஓ-வில் நீங்கள் கட்டாயம் பங்கு பெற வேண்டுமெனில், முதல் இரண்டு நாள்களில் வரவேற்பு எப்படி இருக்கிறது என்பதைப் பார்த்து முடிவு செய்யுங்கள். அவசரப்பட்டு எந்த முடிவையும் எடுக்க வேண்டாம்.”

சோனா கம்ஸ்டார் நிறுவனம் ஐ.பி.ஓ வெளியிடுகிறதாமே?

“நாட்டில் முக்கியமான மாநிலங் களில் ஊரடங்கு நடவடிக்கைகள் ஓரளவு முடிந்துள்ள நிலையில், ஐ.பி.ஓ வெளியீடும் களைகட்டிவிட்டது. ஆட்டோமொபைல் உதிரிபாகங் களைத் தயாரித்து விற்கும் நிறுவனங் களில் ஒன்றான சோனா கம்ஸ்டார் நிறுவனம் ஐ.பி.ஓ மூலம் 5,550 கோடி ரூபாய் நிதியை முதலீட்டாளர்களிட மிருந்து திரட்ட முடிவு செய்திருக் கிறது. இதற்கான ஒப்புதலை செபி கொடுத்துள்ள நிலையில், வருகிற ஜூன் 14-ம் தேதி தொடங்கி ஜூன் 16-ம் தேதி வரைக்கும் புதிய பங்குகளை வெளியிடுகிறது. பங்கு ஒன்றின் விலை ரூ.285-291.

திரட்டப்படும் நிதியை நிறுவனத் தின் கடனை அடைக்கவும், நிறுவனத் தின் விரிவாக்கத்துக்கும் பயன் படுத்தப்போவதாகத் தெரிகிறது. இதன் லாட் சைஸ் 51 பங்குகள். அதன் மடங்குகளில் வாங்கலாம்.’’

கடன் ஃபண்ட் விவகாரத்தில் ஃப்ராங்க்ளின் டெம்பிள்டன் மியூச்சுவல் ஃபண்ட் நிறுவனத்துக்கு ரூ.5 கோடி அபராதம் விதிக்கப்பட்டிருக்கிறதே?

“கடன் ஃபண்ட் விவகாரத்தில் ஃப்ராங்க்ளின் டெம்பிள்டன் மியூச்சுவல் ஃபண்ட் நிறுவனத்துக்கு செபி ரூ.5 கோடி அபராதம் விதித் துள்ளது. மேலும், இரண்டு ஆண்டு களுக்கு கடன் ஃபண்டுகளை வெளியிடவும் தடை விதிக்கப்பட்டுள்ளது.

இது தவிர, விவேக் குத்வாவை ஓர் ஆண்டுக்கு பங்குச் சந்தை சார்ந்த வர்த்தகத்தில் ஈடுபடக்கூடாது என செபி உத்தரவிட்டுள்ளது. இவர், ஃப்ராங்க்ளின் டெம்பிள்டன் நிறுவனத்தின் ஆசியா பசிபிக் பிரிவின் தலைவராக இருந்தவர்.ஃப்ராங்க்ளின் டெம்பிள்டன் நிறுவனம் ஆறு கடன் சார்ந்த ஃபண்டுகளை மூடுவதாக அறிவிப்பதற்கு முன் சுமார் 30 கோடி ரூபாயை இந்தக் கடன் திட்டங்களிலிருந்து வெளியே எடுத்திருக்கிறார்.

இன்சைடர் டிரேடிங் விதி முறையின் படி, செபி தடைவிதித்தது மட்டுமல்லாமல் ரூ.7 கோடி ரூபாய் அளவுக்கு அபராதமும் விதித்துள்ளது. ஆனால், ‘பொது வெளியில் கிடைத்த தகவல்களை வைத்துதான் பணத்தை வெளியே எடுத்தேன்’ என விவேக் தெரிவித்தாலும் இந்த விளக்கத்தை செபி ஏற்கவில்லை” என்றவர், ‘‘சந்தை உச்சத்தில் இருக்கும் இந்த வேளையில் வாசகர்கள் சரியாகப் புரிந்துகொள்ள வேண்டிய ஒரு விஷயம், தொடர்ந்து சந்தையுடன் தொடர்பு வைத்திருப்பதே. நேரடியாக பங்கு வாங்குவதோ, மியூச்சுவல் ஃபண்ட் மூலம் வாங்குவதோ முக்கியம். இது நீண்ட காலத்தில் பணவீக்கத்தைத் தாண்டிய வருமானம் பார்க்க ஒரே வழி’’ என்று முடித்தார் ஷேர்லக்!

பெருந்தொற்றும் மன ஆரோக்கியமும்!

நாணயம் விகடன், ஹெச்.டி.எஃப்.சி பேங்க் இணைந்து ‘பெருந்தொற்றும் மன ஆரோக்கியமும்’ என்கிற தலைப்பில் ஆன்லைனில் கட்டணமில்லா கருத்தரங்கை நடத்துகின்றன.

ஜூன் 19, மாலை 4.00 மணி முதல் 5.30 மணி வரை நடக்கும் இந்தக் கருத்தரங்கில் உளவியல் ஆலோசகர் டாக்டர் சித்ரா அரவிந்த் மற்றும் ஹெச்.டி.எஃப்.சி பேங்கின் மூத்த மண்டல தலைவர் ராம்தாஸ் பரதன் ஆகியோர் சிறப்புரை ஆற்றுகிறார்கள். முன் பதிவு செய்ய: https://bit.ly/3uXyyp6

எல்.ஐ.சி சேர்மன் எம்.ஆர்.குமார் பதவிக் காலம் நீடிப்பு..!

தற்போது எல்.ஐ.சி நிறுவனத்தின் சேர்மனாக எம்.ஆர்.குமார் பதவி வகிக்கிறார். இவருடைய பதவிக் காலம் வருகிற ஜூன் 30-ம் தேதியுடன் முடிகிறது. இந்த நிலையில் அமைச்சரவையின் நியமனக் குழு (ஏ.சி.சி), இவருடைய பதவிக்காலத்தை 2022-ம் ஆண்டு மார்ச் 13-ம் தேதி வரை அதிகப்படுத்தியிருக்கிறது. அதனால் இவர் இன்னும் சுமார் 9 மாதங்கள் பதவியில் இருப்பார்.

கடந்த மத்திய பட்ஜெட் உரையின்போது நிதியமைச்சர் நிர்மலா சீதாராமன் 2021-22-ம் நிதி ஆண்டில், எல்.ஐ.சி நிறுவனத்தின் புதிய பங்கு வெளியீடு (ஐ.பி.ஓ) வெளியாகும் என அறிவித்திருந்தார். இதனால்தான், எம்.ஆர்.குமாரின் பதவிக்காலம் நீட்டிக்கப்பட்டிருப்பதாகச் சொல்லப்படுகிறது

டிஜிட்டல் வழியில் தங்கத்தில் முதலீடு..!

நாணயம் விகடன் மற்றும் ஐ.சி.ஐ.சி.ஐ புரூடென்ஷியல் மியூச்சுவல் ஃபண்ட் நிறுவனம் இணைந்து நடத்தும் ‘டிஜிட்டல் வழியில் தங்கத்தில் முதலீடு..!’ (கோல்டு சேவிங்ஸ் ஃபண்ட் & கோல்டு இ.டி.எஃப்) என்ற ஆன்லைன் நிகழ்ச்சியை நடத்துகிறது. ஜூன் 20-ம் தேதி காலை 10.30 to 11.30 மணிக்கு நடைபெறும். இந்தக் கூட்டத்தில் முதலீட்டு ஆலோசகர் வ.நாகப்பன், ஐ.சி.ஐ.சி.ஐ புரூடென்ஷியல் மியூச்சுவல் ஃபண்ட் நிறுவனத்தின் பிராந்திய தலைவர் ஜீவன் கோஷி தரியன் ஆகியோர் சிறப்புரையாற்றுகிறார்கள். அனுமதி இலவசம் பதிவு செய்ய: https://bit.ly/NV-ICICIPru

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism