Published:Updated:

ஷேர்லக் : தொடர்ந்து விலை ஏற்றத்தில் சர்க்கரைப் பங்குகள்..! சாதகமான மத்திய அரசு விதிமுறைகள்...

ஷேர்லக்
பிரீமியம் ஸ்டோரி
ஷேர்லக்

S H A R E L U C K - ஷேர்லக்

ஷேர்லக் : தொடர்ந்து விலை ஏற்றத்தில் சர்க்கரைப் பங்குகள்..! சாதகமான மத்திய அரசு விதிமுறைகள்...

S H A R E L U C K - ஷேர்லக்

Published:Updated:
ஷேர்லக்
பிரீமியம் ஸ்டோரி
ஷேர்லக்

அதிகாலையிலேயே ஷேர்லக் வாட்ஸ்அப்பில் தகவல் அனுப்பியிருந்தார். “மாலை 3 மணிக்கு வீடியோ கால் பண்ணுங்கள்” என்று. நாம் கேள்விகளைக் குறித்துக்கொண்டு அவர் சொன்ன நேரத்துக்கு வீடியோ கால் செய்தோம். நலம் விசாரிப்புக்குப் பிறகு, நாம் கேள்விகளைக் கேட்க அவர் பதில் சொல்ல ஆரம்பித்தார்.

ஷேர்லக்
ஷேர்லக்

டாக்டர் ரெட்டீஸ் லேபரட்டரீஸ் நிறுவனத்தின் பங்கு விலை அதிகரிக்க என்ன காரணம்?

“ரஷ்யா டைரக்ட் இன்வெஸ்ட் மென்ட் ஃபண்ட் நிறுவனம் தயாரிக்கும் ‘ஸ்புட்னிக் வி’ என்கிற கொரோனா தடுப்பூசியை இந்தியாவுக்கு ரஷ்யாவிலிருந்து இறக்குமதி செய்து, விற்பனை செய்வதற்கான ஒப்பந்தத்தை டாக்டர் ரெட்டீஸ் லேபரட்டரீஸ் நிறுவனத் துடன் செய்துகொண்டுள்ளது. இந்திய மருந்துக் கட்டுப்பாட்டு அமைப்பு, ‘ஸ்புட்னிக் வி’ மருந்துக்கு நடப்பு மாதத்தின் தொடக்கத்தில் அனுமதி அளித்திருந்தது. அதனால் வருகிற மே மாதம் இறுதியில் அல்லது ஜூன் மாதத்தின் தொடக்கத்தில் இந்தியாவில் ‘ஸ்புட்னிக் வி’ மருந்து பயன்பாட்டுக்குக் கொண்டு வருவதற்கான நடவடிக்கைகளை டாக்டர் ரெட்டீஸ் லேபரட்டரீஸ் நிறுவனம் மேற்கொண்டுள்ளது. இதன் காரணமாக, கடந்த வாரம் புதன்கிழமை அன்று இந்த நிறுவனத்தின் பங்கு விலை 4.59% வரை அதிகரித்து 5,198.80 ரூபாய்க்கு வர்த்தகமானது.”

சர்க்கரை பங்குகளின் விலை தொடர்ந்து உயர்ந்து வருகிறதே..!

“சர்க்கரை தயாரிப்பின்போது வாகன எரிபொருள் உபபொருளாகக் கிடைக்கும் எத்தனால் அளவு அதிகரித்திருப்பது (தற்போதைய 8 சதவிகிததிலிருந்து 20 சதவிகிதமாக), கரும்பு விவசாயிகளின் நிலுவைத் தொகையைக் கணிசமாகக் குறைத்திருப்பது போன்றவற்றால் சர்க்கரை நிறுவனங்கள் லாபம் அடைய ஆரம்பித்திருக்கின்றன. மத்திய அரசின் இந்த நடவடிக்கைகள் சர்க்கரைத் துறைக்கு சாதகமாக உள்ளது.

இதைத் தொடர்ந்து சர்க்கரை உற்பத்தி நிறுவனப் பங்குகள் விலை அதிகரித்து வர்த்தகமாகி வருகின்றன. இதனால் 2021-ம் ஆண்டில் இத்துறை சார்ந்த பங்குகளின் விலை வளர்ச்சி இரட்டை இலக்கத்தில் உள்ளதாகத் தரகு நிறுவனங்கள் தெரிவித்துள்ளன. 2021-ம் காலண்டர் ஆண்டில், டால்மியா பாரத் சுகர் அண்டு இண்டஸ்ட்ரீஸ் நிறுவனத்தின் பங்கு விலை 55% வரையும், திரிவேணி இன்ஜினீயரிங் அண்டு இண்டஸ்ட்ரீஸ் பங்கு விலை 50% வரையும், பல்ராம்பூர் சினி மில்ஸ் 45% வரையும் விலை ஏற்றம் கண்டுள்ளன. அதேபோல, தாம்பூர் சுகர் மில்ஸ் பங்கு விலை 18% வரையும், டி.சி.எம் ஸ்ரீராம் இண்டஸ்ட்ரீஸ் 12% வரையும் மற்றும் பண்ணாரி அம்மன் சுகர்ஸ் 12% வரையும் விலை ஏறியுள்ளன. மேலும், கரும்புக்கான குறைந்தபட்ச ஆதரவு விலை அதிகரிப்பு, அவசரகால கையிருப்பு அதிகரிப்பு, ஏற்றுமதி மானியங்கள் போன்றவையும் சர்க்கரை நிறுவனங்களுக்கு சாதக மாக உள்ளன. அதனால், இப்போது சர்க்கரைத் துறை இனிக்கும் துறையாக மாறியிருக்கிறது.”

நிஃப்டி 50 நிறுவனப் பங்குகளின் விலை பெருமளவில் சரிந்திருக்கிறதே?

“கொரோனா வைரஸ் தாக்குதல் திடீரென அதிகரித்ததாலும், நாட்டின் பல பகுதிகளில் ஊரடங்கு கட்டுப்பாடுகள் அமல்படுத்தப் பட்டுள்ளதாலும் இந்தியப் பங்குச் சந்தையில் ஏற்ற இறக்கம் கடந்த இரண்டு வாரங்களில் அதிகரித்தது. நிஃப்டி அதன் 52 வார உயர்வான 15,431-லிருந்து 7% சரிந்து, 14,359-ஆக இருந்தது. இதனால், நிஃப்டி 50 குறியீட்டில் இடம்பெற்றுள்ள ஏழு பங்குகள் அவற்றின் வருடாந்தர உயர்விலிருந்து 20 சதவிகிதத்துக்கும் மேலாக சரிந்தன.

இண்டஸ்இண்ட் பேங்க் பங்கு விலை அதன் 52 வார உயர்வான 1,120 ரூபாயிலிருந்து 26% குறைந்து, 832 ரூபாய்க்கு இறங்கியுள்ளது. கோல் இந்தியா நிறுவனத்தின் பங்கு விலை அதன் 52 வார உயர்வான 163 ரூபாயிலிருந்து 24% குறைந்து 124.60 ரூபாய்க்குக் குறைந்துள்ளது. ஹீரோ மோட்டோ கார்ப் நிறுவனத்தின் பங்கு விலை அதன் 52 வார உயர்வான 3,629 ரூபாயிலிருந்து 23% குறைந்து, 2,785.55 ரூபாய்க்கு இறங்கியது. பஜாஜ் ஃபைனான்ஸ் நிறுவனத்தின் பங்கு விலை 52 வார உயர்வான 5,822 ரூபாயிலிருந்து 23% குறைந்து 4,479.60 ரூபாய்க்கு வர்த்தகமானது. ஸ்டேட் பேங்க் ஆஃப் இந்தியா நிறுவனத்தின் பங்கு விலை இதன் 52 வார உயர்வான 428 ரூபாயிலிருந்து 23% குறைந்து 331.15 ரூபாய்க்கு வர்த்தகமானது. எய்ச்சர் மோட்டார் நிறுவனத்தின் பங்கு விலை இதன் 52 வார உயர்வான 3,307 ரூபா யிலிருந்து 22% குறைந்து 2,370.35 ரூபாய்க்கு வர்த்தகமானது. மாருதி சுஸூகி இந்தியா நிறுவனத்தின் பங்கு விலை இதன் 52 வார உயர்வான 8,329 ரூபாயிலிருந்து 22% குறைந்து 6,511.75 ரூபாய்க்கு வர்த்தக மானது. வியாழக்கிழமையும் சந்தை இறக்கம் கண்டிருப்பதால், இந்தப் பங்கு களின் விலை மேலும் குறைந்திருக்கிறது.”

டி.வி18 பிராட்காஸ்ட் நிறுவனத்தின் லாபம் அபரிமிதமாக அதிகரித்திருக்கிறதாமே?!

“நெட்வொர்க் 18-ன் துணை நிறுவனமான டிவி 18 பிராட்காஸ்ட், கோவிட்-19 தாக்கத்தை மீறி, 2021 மார்ச் மாதத்துடன் முடிவடைந்த காலாண்டில் லாபத்தில் 76.8% வளர்ச்சியைக் கொண்டுள்ளது. கடந்த ஆண்டின் இதே காலகட்டத்தில் 142 கோடி ரூபாயாக இருந்த, இந்த நிறுவனத்தின் லாபம் தற்போது 251 கோடி ரூபாயாக அதிகரித்துள்ளது.

இந்த நிறுவனத்தின் செயல்பாட்டுச் செலவுகள் குறைந்ததும், வரிச் செலவினங்களில் 41.2% ரூ.20 கோடியாக வீழ்ச்சியடைந்ததும் லாபம் அதிகரிக்க காரணமாக அமைந்திருக்கிறது. அதே சமயம், 2021 மார்ச் மாதத்துடன் முடிவடைந்த காலாண்டில் செயல்பாட்டு வருமானம் 5.4% குறைந்து, ரூ.1,348 கோடியாக உள்ளது. கடந்த மார்ச் மாத இறுதியில் இந்தக் குழும நிறுவனங்களின் மொத்த கடன் ரூ.893 கோடியாகக் குறைக்கப்பட்டது. இது 2020-ம் ஆண்டு மார்ச்சில் 1,775 கோடி ரூபாயாக இருந்தது.”

உலக நாடுகளின் பங்குகள் சரிவதற்குக் காரணம் என்ன?

“பல நாடுகளில் கொரோனா தொற்றுப் பரவல் மீண்டும் அதிகரிக்க ஆரம்பித்திருப்பதால், உலக நாடுகளின் வளர்ச்சி குறித்தும், கச்சா எண்ணெயின் தேவை குறித்தும் முதலீட்டாளர் கள் சந்தேகம் கொண்டிருக்கிறார் கள். இதன் காரணமாக, கடந்த வாரம் புதன்கிழமை அன்று, அமெரிக்கா உள்ளிட்ட பல நாடுகளின் பங்குச் சந்தைகளில் பெரும்பாலான பங்குகள் சரிவைச் சந்தித்தன. ஜப்பான் பங்குகள் 0.6% வரை சரிந்தது. ஆஸ்திரேலியா பங்குகள் 1.25% வரை சரிந்தது. சீனா பங்குகள் 0.46% வரை சரிந்தது.

அதேபோல, டோக்கியோ, ஒசாகா மற்றும் சுற்றியுள்ள பகுதிகளில் ஊரடங்கு அறிவிக்கப் படுவதற்கான வாய்ப்புகள் அதிகரித்து வருவதால், டோக்கியோ பங்குகள் 1.79% சரிந்தன.”

டெக்ஃபினோ கேப்பிடல் நிறுவனப் பங்கு கைமாறியிருக்கிறதே?

“பெங்களூரைத் தலைமையக மாகக் கொண்ட, வங்கிசாரா நிதி நிறுவனம் (என்.பி.எஃப்சி.) டெக் ஃபினோ கேப்பிடல். இந்த நிறுவனத்தின் 9% பங்குகளை டி.சி.பி பேங்க் வாங்கியுள்ளது.”

மோதிலால் ஆஸ்வால் தரகு நிறுவனம் சில பங்குகளைக் குறிப்பிட்டுச் சொல்லியிருக்கிறதே?

“தற்போது கோவிஷீல்டு மற்றும் கோவாக்சின் ஆகிய இரண்டு கொரோனா தடுப்பூசிகள் இந்தியாவில் பயன்பாட்டில் இருக்கின்றன. இனிவரும் நாள்களில் மேலும் பல தடுப்பூசிகள் பயன்பாட்டுக்கு வரவிருப்பதால், நாட்டில் கொரோனா பாதிப்பு குறைந்து, பொருளாதார வளர்ச்சி மேம்படும் என எதிர்பார்க்கப் படுகிறது. அதையடுத்து இந்திய பங்குச் சந்தைகளின் வளர்ச்சி நன்றாக இருக்கும் என எதிர் பார்க்கப்படுவதாக மோதிலால் ஆஸ்வால் நிறுவனம் தெரிவித் திருக்கிறது.

அதன் அடிப்படையில் ஐ.சி.ஐ.சி.ஐ பேங்க் நிறுவனப் பங்கின் இலக்கு விலை 770 ரூபாய் எனவும், எஸ்.பி.ஐ கார்ட்ஸ் நிறுவனப் பங்கின் இலக்கு விலை 1,200 ரூபாய் எனவும், அல்ட்ராடெக் சிமென்ட் நிறுவனப் பங்கின் இலக்கு விலை 8,110 ரூபாயாகவும், பிரிட்டானியா இண்டஸ்ட்ரீஸ் நிறுவனப் பங்கின் இலக்கு விலை 4,575 ரூபாயகாவும், டிவிஸ் லேபரட்டரீஸ் நிறுவனப் பங்கின் இலக்கு விலை 4,450 ரூபாயாகவும் கிளென்பார்மா நிறுவனத்தின் பங்கின் இலக்கு 2,900 ரூபாயாகவும் அந்த நிறுவனம் குறிப் பிட்டுள்ளது. அதேபோல, ஹிண்டால்கோ இண்டஸ்ட்ரீஸ், ஹெச்.சி.எல் டெக்னாலஜிஸ், டாடா பவர் மற்றும் ஓரியன்ட் எலெக்ட்ரிக் ஆகிய நிறுவனப் பங்குகள் 21-29% வரை வளர்ச்சியடையும் என மோதிலால் ஆஸ்வால் குறிப்பிட்டி ருக்கிறது.”

ஆதித்ய பிர்லா கேப்பிடல் நிறுவனத்தின் பங்கு விலை அதிகரிக்க என்ன காரணம்?

“ஆதித்ய பிர்லா கேப்பிடல் நிறுவனத்தின் துணை நிறுவனமான ஆதித்ய பிர்லா சன் லைஃப் ஏ.எம்.சி லிமிடெட் நிறுவனம், ஐ.பி.ஓ மூலம் நிதி திரட்டுவதற்கான அனுமதி கேட்டு, செபி அமைப்பிடம் விண்ணப்பித்தது. இதை அடுத்து, கடந்த ஏப்ரல் 20-ம் தேதி இந்த நிறுவனத்தின் பங்கு விலை 6% வரை அதிகரித்தது.”

ஐ.சி.ஐ.சி.ஐ புரூடென்ஷியல் லைஃப் இன்ஷூரன்ஸ் கம்பெனியின் பங்கு விலை அதிகரிக்க என்ன காரணம்?

“கடந்த வாரம் செவ்வாய்க்கிழமை அன்று இந்த நிறுவனம் நான்காம் காலாண்டு முடிவை வெளியிட்டது. நிறுவனத்தின் செயல்பாடுகள் சிறப்பாக இருப்பதை, இந்தக் காலாண்டு முடிவுகள் தெரிவித்ததை அடுத்து அன்றைய தினம் இதன் பங்குகள் 10% வரை அதிகரித்து வர்த்தகமாகின. நான்காம் காலாண்டில் இதன் பிரீமியம் வருவாய் 23% அதிகரித்திருப்பதாக இந்த நிறுவனம் பதிவு செய்திருக்கிறது. இந்த நிறுவனம் நிர்வகித்துவரும் சொத்து மதிப்பு 2.14 டிரில்லியன் ரூபாயாக அதிகரித்துள்ளது. இது கடந்த ஆண்டின் இதே கால கட்டத் துடன் ஒப்பிடும்போது 40% அதிக மாகும்.”

முகந்த் நிறுவனத்தின் பங்கு விலை அதிகரிக்க என்ன காரணம்?

“சிறப்பு வகை ஸ்டீல் தயாரிப்பு நிறுவனமான முகந்த் நிறுவனத்தின் பங்கு விலை கடந்த செவ்வாய்க்கிழமை 7% வரை விலை அதிகரித்து 118.80 ரூபாய்க்கு வர்த்தகமானது. கடந்த ஏழு வர்த்தக தினத்தில் மட்டும் 40% வரை பங்கின் விலை உயர்ந்திருக்கிறது. இந்த நிறுவனப் பங்கின் தற்போதைய விலை 13 ஆண்டுகளுக்கு முன்பிருந்த இதன் பங்கு விலையைவிட 113% அதிகமாகும். அதாவது, கடந்த 2008-ம் ஆண்டில் இந்த நிறுவத்தின் பங்கு விலை 55.80 ரூபாய் என்கிற விலையில் வர்த்தகமானது. இந்த நிறுவனத் தயாரிப்புகளுக்கான தேவை அதிகரித்து காணப்படுவதால், மேலும் இந்நிறுவனத்தின் செயல்பாடு சிறப்பாக இருக்கும் எனவும், இது பங்கு விலையில் எதிரொலிக்கும் எனவும் எதிர்பார்க்கப்படுகிறது. இந்த நிறுவனம் கடன்களைக் குறைக்க பல்வேறு நடவடிக்கைகளை வெற்றிகரமாக முன்னெடுத்து வருகிறது. இதனால் இனி வரும் காலங்களில் இந்த நிறுவனத்தின் வளர்ச்சி நன்றாக இருக்கும் என எதிர்பார்க்கலாம்.

இந்த நிறுவனத்தின் கூட்டு நிறுவனமான முகந்த் சுமி ஸ்பெஷல் ஸ்டீல் (எம்.எஸ்.எஸ்.எஸ்.எல்) பங்குகளை ஜாம்னாலால் சன்ஸ் நிறுவனத்துக்கு விற்பனை செய்ததில், அதற்கான முதல் தவணைத் தொகை ரூ.713.61 கோடி பெறப்பட்டிருக்கிறது. ரூ.500 கோடி மதிப்புள்ள பங்குகளின் இரண்டாவது மற்றும் இறுதித் தவணை 2021-22-ம் நிதியாண்டின் முதல் காலாண்டில் நிறைவடையும்.

இந்தத் தொகையும் நிறுவனத்தின் கடன்களைத் திருப்பிச் செலுத்த பயன்படுத்தப்படும் என தெரிவிக்கப்பட்டுள்ளது” என்றவர், ‘‘இப்போதைக்கு முடிந்தவரை எல்லோரும் வீட்டிலேயே இருப்பது நல்லது. பாதிப்பு மிக அதிகம் இருப்பதால், கவனமாக இருங்கள்’’ என்று சொல்லிவிட்டு, வீடியோ காலை கட் செய்தார் ஷேர்லக்!

 கா.ராமலிங்கம்
கா.ராமலிங்கம்

முதலீட்டில் ரிஸ்க் மேனேஜ்மென்ட்!

நாணயம் விகடன் நடத்தும் ‘முதலீட்டில் ரிஸ்க் மேனேஜ்மென்ட்!’ என்கிற ஆன்லைன் நிகழ்ச்சி 2021, மே 15, சனிக்கிழமை காலை 10.30 மணி முதல் 12 மணி வரை நடக்கிறது. சிறுசேமிப்பு தொடங்கி பங்குச் சந்தை சார்ந்த முதலீடுகள் வரை அனைத்து முதலீடுகளிலும் ரிஸ்க் இருக்கிறது. இதை எப்படி நிர்வகிப்பது என்பது குறித்து இந்த நிகழ்ச்சியில் எடுத்துச் சொல்லப்படும். இந்த நிகழ்வில் இளைஞர்கள், நடுத்தர வயதினர், மூத்த குடிமக்கள் என அனைத்துத் தரப்பினரும் பங்கேற்று பலன் பெற முடியும். நிதி ஆலோசகர் கா.ராமலிங்கம் (இணை நிறுவனர், Holisticinvestment.in) இந்த நிகழ்ச்சியில் சிறப்புரையாற்றுகிறார். கட்டணம் ரூ.350. முன்பதிவு செய்ய https://bit.ly/3mO05XC