Published:Updated:

பங்கு முதலீட்டில் கவனிக்க வேண்டிய பாசிட்டிவ், நெகட்டிவ் சிக்னல்கள்!

பங்குச் சந்தை

பிரீமியம் ஸ்டோரி

இன்றைய நிலையில் பங்குச் சந்தையில் முதலீடு செய்பவர்களின் எண்ணிக்கை நாளுக்கு நாள் அதிகரித்து வருகிறது. தமிழகத்திலும் இந்த எண்ணிக்கை கணிசமான அளவுக்கு உயர்ந்திருக்கிறது. இந்தியாவில் உள்ள மொத்த பங்குச் சந்தை முதலீட்டாளர்கள் எண்ணிக்கையில் தமிழகம் 48.23 லட்சம் முதலீட்டாளர்களுடன் ஐந்தாவது இடத்தில் இருக்கிறது. 2020 பிப்ரவரியில் இந்தியாவில் டீமேட் கணக்கு எண்ணிக்கை சுமார் 4 கோடி யாக இருந்தது. இது 2021 ஜூன் மாதத்தில் 6 கோடிக்கும் மேலாக அதிகரித்துள்ளது. அண்மைக் காலத்தில் இந்தியப் பங்குச் சந்தை கொடுத்திருக்கும் அதிக வருமானத்தைப் பார்த்துவிட்டு பங்குச் சந்தையில் பலரும் முதலீடு செய்ய ஆரம்பித்திருப்பதே இந்த அதிகரிப்புக்குக் காரணம்.

இந்த நேரத்தில், பங்குச் சந்தையில் களமிறங்கும் முதலீட்டாளர்கள் கவனிக்க வேண்டிய பாசிட்டிவ் சிக்னல்கள் என்னென்ன, தவிர்க்க வேண்டிய நெகட்டிவ் சிக்னல்கள் என்னென்ன என்பதைப் பற்றி பங்குச் சந்தை நிபுணர் ரெஜி தாமஸிடம் கேட்டோம்.

ரெஜி தாமஸ்
ரெஜி தாமஸ்

“பங்குச் சந்தையின் இயற்கை குணம் ஏற்ற இறக்கம் என்பதாகும். எனவே, ஒருவரின் ரிஸ்க் எடுக்கும் திறனுக்கேற்பவே பங்குச் சந்தையில் முதலீடு செய்ய வேண்டும். ஒருவரின் மொத்த முதலீட்டுத் தொகையையும் பங்குச் சந்தையில் போடக் கூடாது. அப்படிச் செய்யும்பட்சத்தில், ஏதாவது ஒரு காரணத்தால் சந்தை அதிக வீழ்ச்சியைச் சந்திக்கும்போது, மூலதனத்தைக் கூட இழக்க நேரிடும் என்பதைப் புதிய முதலீட்டாளர்கள் முதலில் புரிந்துகொள்ள வேண்டும்.

ஏனெனில், கொரோனா பாதிப்பு அதிகரித்து வந்த 2020 மார்ச், ஏப்ரல் மாதங்களில் இந்தியப் பங்குச் சந்தை 50% - 60% வீழ்ச்சி கண்டது. அப்போது பலரும் பதறிப் போய், அதிக இழப்புடன் சந்தையிலிருந்து வெளியேறி னார்கள். அந்த வகையில், இப்போது பங்கு சார்ந்த முதலீடுகளில் அதிக லாபத்தில் இருப்பவர்கள், லாபத்தின் ஒரு பகுதியை வெளியே எடுப்பது மிக நல்லது. அடுத்து, இப்போது மொத்தத் தொகையை ஒரே நேரத்தில் சந்தையில் போடுவதைத் தவிர்த்து, இறக்கங்களின்போது அவ்வப்போது முதலீடு செய்துவருவது நீண்ட காலத்தில் மிகவும் லாபகரமாக இருக்கும்” என்றவர், கவனிக்க வேண்டிய பாசிட்டிவ், நெகட்டிவ் அம்சங்களை எடுத்துச் சொன்னார்.

பங்கு முதலீட்டில் கவனிக்க வேண்டிய பாசிட்டிவ், நெகட்டிவ் சிக்னல்கள்!

லாபம் சம்பாதிக்கும் நிறுவனமா?

“பங்குச் சந்தையில் முதலீடு செய்பவர்கள் யாரும், பங்குச் சந்தையில் லிஸ்ட் ஆகியிருக்கும் நிறுவனத்துக்கு உதவ வேண்டும் என்கிற நோக்கத்தில் முதலீடு செய்வதில்லை. செய்கிற முதலீட்டின் மூலம் லாபம் பார்க்க வேண்டும் என்பது மட்டுமே, முதலீட்டாளர்களின் நோக்கம். அதனால், எந்த நிறுவனத்தில் முதலீடு செய்ய நினைக்கிறீர்களோ, அந்த நிறுவனத்தின் கடந்த மூன்று காலாண்டு முடிவுகளை அலசி ஆராய்ந்து, அந்த நிறுவனம் தொடர்ந்து லாபத்தில் இயங்கு கிறதா என்பதைக் கவனிக்க வேண்டியது அவசியம்.

ஐ.பி.ஓ-வில் முதலீடு செய்யும் முதலீட் டாளர்களாக இருந்தால், ஐ.பி.ஓ வெளியிடும் நிறுவனம், செபியிடம் சமர்ப்பிக்கும் டி.ஆர்.ஹெச்.பி ஆவணங்களில் சொல்லப் பட்டிருக்கும் நிதிசார்ந்த விவரங்களைப் படித்துத் தெரிந்து கொண்ட பிறகு, அந்த நிறுவனத்தில் முதலீட்டை மேற்கொள்வது நல்லது. பிரபலமான நிறுவனம், மக்கள் அனைவருக்கும் பரிச்சயமான நிறுவனம் என்பதற்காக எல்லாம் ஒரு நிறுவனத்தில் முதலீட்டாளர்கள் முதலீடு செய்யக் கூடாது.

எந்த வகையில் லாபம் சம்பாதிக்கிறார்கள்?

ஒரு நிறுவனத்துக்கு லாபம் பல வழிகளில் இருந்துவரும். அதனால் நீங்கள் முதலீடு செய்ய இருக்கும் நிறுவனத்தின் லாபம் எந்த வகையிலிருந்து வருகிறது என்பதைத் தெரிந்து கொள்வது மிக மிக முக்கியமாகும்.

பொதுவாக, ஒரு நிறுவனம் தனது வியாபாரத்தின் மூலம் லாபத்தை ஈட்டலாம். அல்லது இதர சொத்துகள் மூலம் கிடைக்கும் (சொத்துகளை விற்பதன் மூலம், நிலம் அல்லது கட்டடத்தை வாடகைக்கு விட்டிருப்பதன் மூலம்...) வருமானத்தின் மூலம் லாபம் பார்க்கலாம். இவற்றில், வியாபாரத்தின் மூலம் கிடைக்கும் லாபம்தான் அந்த நிறுவனத்தின் நிலையான வளர்ச்சிக்குத் தூண்டுதலாக இருக்குமே தவிர, இரண்டாவதாகச் சொல்லப்பட்டிருக்கும் லாபம், ஏதாவது ஒரு காலாண்டு முடிவில், நிறுவனத்தின் நிகர லாபத்தை அதிகரித்துக் காட்ட மட்டுமே பயன்படும். அதனால், ஒரு நிறுவனத்தின் லாபம் எதிலிருந்து கிடைக்கிறது என்பதை முதலீட்டாளர்கள் கவனிக்க வேண்டும். இப்படிக் கிடைக்கும் லாபம் நிலையானதாக இல்லையெனில், அந்த நிறுவனத்தின் வியாபாரம் சரியாக இல்லை என்றே அர்த்தம். அதனால் அந்த நிறுவனத்தை முதலீட்டாளர்கள் தேர்வு செய்யாமல் இருப்பது நல்லது. நிறுவனங்களின் லாபம் எவ்வளவு, அது கடந்த ஆண்டைவிட அதிகரித்திருக்கிறதா அல்லது குறைந்திருக்கிறதா என்பதை அந்த நிறுவனங்களின் காலாண்டு முடிவுகளில் பதிவு செய்யும்.

லாபத்தில் வளர்ச்சியைச் சந்திக்கும் நிறுவனத்தின் பங்கு களுக்கு முதலீட்டாளர்கள் அதிக முக்கியத்துவம் கொடுக்கலாம். உதாரணமாக, டி.சி.எஸ் நிறுவனத்தை எடுத்துக் கொண்டால், ஐ.டி துறையில் இந்த நிறுவனத்துக்கு இணையாக மற்ற நிறுவனங்கள் ஈட்டும் லாபத்துடன், அதாவது விப்ரோ, ஹெச்.சி.எல், இன்ஃபோசிஸ் போன்ற நிறுவனங்கள் ஈட்டும் லாபத்துடன் ஒப்பிட்டுப் பார்ப்பது முக்கியம்.

டி.சி.எஸ் நிறுவனம் அதற்கு இணையான மற்ற நிறுவனங்கள் ஈட்டும் லாபத்தைவிட கூடுதலான லாபத்தைப் பதிவு செய்யும் நிறுவனமாக இருந்தால், அதை முதலீட்டுக்காகத் தேர்வு செய்யலாம். மாறாக, மற்ற நிறுவனங்கள் ஈட்டும் லாபத்தை விட, குறைவான அல்லது மிகக் குறைவான லாபத்தைதான் ஒரு நிறுவனம் பதிவு செய்கிறது எனில், அந்த நிறுவனத்தை முதலீட்டாளர்கள் தேர்வு செய்யாமல் இருப்பது நல்லது.

நிறுவனத்தின் செலவினங்களும் கடன்களும்...

ஒரு நிறுவனத்தின் லாபத்தைக் கண்காணிப்பதுபோல, அந்த நிறுவனத்தின் செலவினங் களையும் (ஊழியர்களுக்கு வழங்கும் சம்பளம் மற்றும் இதர சலுகைகள் உட்பட...) கவனிக்க வேண்டியது அவசியமாகும்.

பொதுவாக, ஒரு நிறுவனத்தின் செலவினங்கள், அந்த நிறுவனத்தின் மொத்த வருவாயில் 20 - 25 சதவிகிதம்தான் இருக்க வேண்டும். அப்போதுதான் அந்த நிறுவனத்தை ஒரு நல்ல தரமான நிறுவனமாகக் கணக்கில் கொள்ள முடியும். 25 சதவிகிதத்துக்குமேல் செலவினங்களை வைத்திருக்கும் நிறுவனம் எனில், அது முதலீட் டாளர்களுக்கு ரெட் அலர்ட் ஆகும். அது போன்ற நிறுவனப் பங்குகளில் முதலீடு செய்யும் போது மிகுந்த கவனம் தேவை. ஏனெனில், நிறுவனம் சம்பாதிக்கும் வருவாயில் 50% பணம் செலவு களுக்கே போய்விட்டால், அந்த நிறுவனத்தின் முதலீட்டாளர் களுக்குக் கிடைக்கக்கூடிய லாபம் குறையும்.

அதே போல, அதிக கடன்கள் வைத்திருக்கும் நிறுவனப் பங்கு களையும் முதலீட்டாளர்கள் பரிசீலிக்காமல் இருப்பது நல்லது. ஒரு நிறுவனத்தின் கடன் சுமை யானது காலாண்டுக்கு காலாண்டு குறைகிறது எனில், அந்த நிறுவனத்தில் முதலீடு செய்யலாம். மாறாக, கடன் அதிகரித்துக் கொண்டே இருக்கிறது என்றால் முதலீட்டாளர்கள் எச்சரிக்கை யுடன் முடிவெடுக்க வேண்டும்.

மேலும், ஒரு நிறுவனத்தின் கடன் எதன் அடிப்படையில் வாங்கப்பட்டிருக்கிறது, எதற்காக வாங்கப்பட்டிருக்கிறது என்பதைப் பொறுத்தும் அந்த நிறுவனத்தின் ரிஸ்க் அளவு மாறுபடும். ஒரு நிறுவனம் வியாபாரத்துக்காகக் கடன் வாங்கி, அதைச் சரியாக முதலீடு செய்து, லாபத்தில் இயங்கிக்கொண்டிருக்கும் நிறுவனம் எனில், முதலீட் டாளர்கள் கவலை கொள்ளத் தேவையில்லை.

சில நிறுவனங்களிடம் சொத்து அதிகமாக இருக்கும். அதனால் அந்தச் சொத்துகளை அடமான மாக வைத்தும் கடன்களை அந்த நிறுவனம் வாங்கும். கடன்கள் அதிகமாக இருந்தாலும், அந்த நிறுவனத்திடம் சொத்துகளும் அதிகமாக இருக்கிறதே என்று முதலீட்டாளர்கள் யோசிப்பார்கள். இதனால் பிரச்னை எதுவும் இல்லை என்று அவர்கள் நினைக்கவும் வாய்ப்பு உண்டு. நிறுவனம் வாங்கக்கூடிய கடனை எதை வைத்து வாங்குகிறார்கள் என்பது முக்கியமில்லை. ஆனால், எதற்காகக் கடன் வாங்குகிறார்கள் என்பதுதான் முக்கியம். ஓர் இடத்தில் கடன் வாங்கி, அதைக் கொண்டு இன்னொரு இடத்தில் இருக்கும் கடனையும் அடைக்கும் நடவடிக்கையை பல நிறுவனங்கள் செய்கின்றன. அதனால் வாங்குகிற கடன் எதற்காக வாங்கப்படுகிறது என்பதை முதலீட்டாளர்கள் கவனிப்பது அவசியம்.

ஒரு நிறுவனம் கடன் இல்லா நிறுவனமாக இருந்தால்தான், அந்த நிறுவனத்தின் பங்கு விலை தொடர்ந்து அதிகரிக்கும் என்பதற்கு ரிலையன்ஸ் இண்டஸ்ட்ரீஸ் ஒரு மிகச் சிறந்த உதாரணம் ஆகும்” என்றார் தெளிவாக.

தற்போது ஏற்ற, இறக்கத்தில் இருக்கும் பங்குச் சந்தையில் களம் இறங்குபவர்கள் மேலே சொல்லப்பட்டிருக்கும் விஷயங்களையும் கருத்தில்கொண்டு செயல்பட்டால், சரியான பங்குகளைத் தேர்வு செய்ய முடிவதுடன், ஓரளவுக்கு நல்ல லாபத்தையும் சம்பாதிக்க முடியும் என்பதில் சந்தேகமில்லை!

விற்பனையில் வளர்ச்சி!

“எந்தவொரு நிறுவனமாக இருந்தாலும், அந்த நிறுவனம் தயாரிக்கும் பொருள்கள் அல்லது அந்த நிறுவனம் வழங்கும் சேவைகளின் விற்பனை நன்றாக இருக்க வேண்டும். அப்போதுதான் அந்த நிறுவனத்துக்கு வருமானம் வரும். வருமானம் வந்தால்தான், அந்த நிறுவனத்தால் லாபம் ஈட்ட முடியும். விற்பனை விகிதமானது ஒவ்வொரு துறைக்கும் வித்தியாசப்படும். ஆனால், விற்பனையில் தொடர்ந்து வளர்ச்சி இருப்பது அவசியம். காலாண்டுக்கு காலாண்டு நிலையான விற்பனை வளர்ச்சியை ஒரு நிறுவனம் சந்தித்தால், அந்த நிறுவனம் நிச்சயமாகத் தனது முதலீட்டாளர்களுக்கும் லாபத்தைக் கொடுக்கும். முதலீடு செய்த / முதலீடு செய்யப்போகும் நிறுவனத்தின் விற்பனை சரியாக இல்லை என முதலீட்டாளர்களுக்குத் தெரியவந்தால், விற்பனை வளர்ச்சி சீராகும் வரை அந்த நிறுவனத்தில் மேற்கொண்டு முதலீடு செய்யாமல் இருப்பது நல்லது!"

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு