Published:Updated:

ஷேர்லக்: ஃபண்ட் நிறுவனங்கள் வாங்கி விற்ற பங்குகள்..! ஜூ ன் மாதத்தில்...

ஷேர்லக்
பிரீமியம் ஸ்டோரி
ஷேர்லக்

S H A R E L U C K

ஷேர்லக்: ஃபண்ட் நிறுவனங்கள் வாங்கி விற்ற பங்குகள்..! ஜூ ன் மாதத்தில்...

S H A R E L U C K

Published:Updated:
ஷேர்லக்
பிரீமியம் ஸ்டோரி
ஷேர்லக்

கடந்த வாரம் அலுவலகத்துக்கு நேரில் வந்த ஷேர்லக், இந்த வாரம் வீடியோகாலில் வந்தார். ‘‘மும்பையில் முக்கியஸ்தர் ஒருவருடன் ஆன்லைன் மீட்டிங். அவருடன் பேசுவதற்குள் நாம் வீடியோகாலில் பேசி முடித்து விடலாமே” என்றார். நாம் தயாராக வைத்திருந்த கேள்விகளைக் கேட்க ஆரம்பித்தோம்.

ஸொமேட்டோ புது பங்கு வெளியீட்டின் முதல் நாள் ஏலம் எப்படி இருந்தது?

“ஸொமேட்டோவின் புதிய பங்கு வெளியீடு (ஐ.பி.ஓ) ஜூலை 14-ம் தேதி ஆரம்பித்தது. ரூ.9,375 கோடி நிதி திரட்டும் நோக்கில் வெளியான இந்த ஐ.பி.ஓ வெளியீட்டின் முதல் நாளே, தகுதி வாய்ந்த முதலீட்டாளர்கள் பிரிவில் 98% விண்ணப்பங்கள் வந்திருந்தன. சிறு முதலீட்டாளர்கள் தங்களுக்கு ஒதுக்கப்பட்ட பகுதியில், 2.69 மடங்கு அதிகமாக விண்ணப்பித்திருந்தார்கள். நிறுவனம் அல்லாத முதலீட்டாளர்கள் தங்களின் ஒதுக்கப்பட்ட பகுதியில் 13% மட்டுமே விண்ணப்பித்திருந்தார்கள். சிறு முதலீட்டாளர்களிடமிருந்து நல்ல வரவேற்பு கிடைத்த காரணத்தால், வெளியிடப்பட்ட 71.92 கோடி பங்குகளைவிட 75.60 கோடி பங்குகள் கேட்டு விண்ணப்பங்கள் வந்திருக் கின்றன. இந்த நிறுவனத்தின் ஐ.பி.ஓ முடிய இன்னும் இரண்டு நாள் உள்ளன. எனவே, முழுமையான தகவல்களை அடுத்த வாரம் சொல்கிறேன்.”

ஷேர்லக்: ஃபண்ட் நிறுவனங்கள்
வாங்கி விற்ற பங்குகள்..! ஜூ ன் மாதத்தில்...

மைண்ட்ட்ரீ நிறுவனத்தின் பங்கு விலை உச்சத்தைத் தொட்டிருக்கிறதே... என்ன காரணம்?

“ஐ.டி துறையின் மிக முக்கிய நிறுவனமான மைண்ட்ட்ரீயின் பங்கு விலை கடந்த 14-ம் தேதி 8.3% வரை அதிகரித்து, 2,702.15 ரூபாய்க்கு வர்த்தகத்தை முடித்தது. அன்றைய தினத்தில் வர்த்தகம் தொடங்கும் போது ரூ.2,619 என்கிற விலையில் ஆரம்பித்த இந்தப் பங்கின் விலை, ரூ.2,728 வரை அதிகரித்து வர்த்தக மானது. இதுவே இதுவரையிலான உச்சபட்ச விலையாகும். ஜூலை 13-ம் தேதி, இந்த நிறுவனம் ஜூன் காலாண்டு முடிவுகளை வெளியிட்டது. அதில், இந்த நிறுவனத்தின் நிகர லாபம் 61.2% அதிகரித்து, ரூ.343.4 கோடியாக இருப்பதாகப் பதிவு செய்துள்ளது. அதேபோல, வருமானமும் 20.1% அதிகரித்துள்ளது. சிறப்பான ஜூன் காலாண்டு முடிவுகளை வெளியிட்ட தன் காரணமாகவே, பங்கின் விலை உச்சத்தைத் தொட்டி ருக்கிறது. பங்கு விலையின் ஏற்றப் போக்கு, ஜூலை 15-ம் தேதி வியாழக்கிழமையும் தொடர்ந்தது. அன்றைய காலை வர்த்தகத்தில், ஒரு பங்கின் விலை ரூ.2,739 வரை அதிகரித்து வர்த்தக மானது.”

அண்மையில் வெளியிடப்பட்ட ஐ.பி.ஓ-க்களின் செயல்பாடு எப்படி இருக்கிறது?

“அண்மையில் வெளியிடப்பட்ட ஏஞ்சல் புரோக்கிங், சி.ஏ.எம்ஸ், கிளண்ட் பார்மா, ஹேப்பியஸ்ட் மைண்ட்ஸ் டெக்னாலஜீஸ், லட்சுமி ஆர்கானிக்ஸ் அண்டு மேக்ரோடெக் டெவலப்பர்ஸ், ரூட் மொபைல்ஸ் மற்றும் எம்.டி.ஏ.ஆர் டெக்னாலஜீஸ் ஆகிய நிறுவனங்களின் ஐ.பி.ஓ செயல்பாடு சிறப்பான முறையில் இருக்கிறது. இதன் காரணமாக, பி.எஸ்.இ ஐ.பி.ஓ இண்டெக்ஸ் கடந்த 14-ம் தேதி 3% வரை அதிகரித்து, 12201 என்கிற நிலையில் வர்த்தகமானது. கடந்த ஒரு மாதத்தில் பி.எஸ்.இ சென்செக்ஸ் மற்றும் மிட்கேப் இண்டெக்ஸ் 0.7% மற்றும் ஸ்மால்கேப் இண்டெக்ஸ் 4.8% மட்டுமே அதிகரித்திருக்கும் நிலையில், ஐ.பி.ஓ இண்டெக்ஸ் 14% வரை அதிகரித்திருக்கிறது.

குறிப்பாக, கடந்த ஒரு மாதத்தில் ஹேப்பியஸ்ட் மைண்ட்ஸ் டெக்னாலஜீஸ் மற்றும் எம்.டி.ஏ.ஆர் டெக்னாலஜீஸ் நிறுவனங்களின் பங்கு விலை முறையே 42% மற்றும் 40% வரை அதிகரித்துள்ளன. அதேபோல, ரூட் மொபைல், ஏஞ்சல் புரோக்கிங், லட்சுமி ஆர்கானிக்ஸ் மற்றும் கிளண்ட் பார்மா ஆகிய நிறுவனங் களின் பங்கு விலை 20 - 30% வரை அதிகரித்துள்ளன.”

இந்தியப் பங்குச் சந்தை உச்சத்தில் இருந்த நிலையிலும் ஜூன் மாதத்தில் மியூச்சுவல் ஃபண்ட் நிறுவனங்கள் பங்குகளில் கணிசமாக முதலீடு செய்திருக்கிறதே?

“ஈக்விட்டி ஃபண்ட் மேஜேனர்கள் மே மாதத்தில் பங்குகளில் அதிகம் முதலீடு செய்யாமல் இருந்தார்கள். இதற்கும் சேர்த்ததுபோல் ஜூன் மாதத்தில் அதிக முதலீட்டை, அதாவது ரூ.6,437 கோடி முதலீடு மேற்கொண்டிருக்கிறார்கள். வாகன உதிரி பாக உற்பத்தி நிறுவனமான சோனா பி.எல்.டபிள்யூ நிறுவனப் பங்கில் ரூ.2,469 கோடி முதலீடு செய்யப்பட்டிருக் கிறது. இந்த நிறுவனம் அண்மையில்தான் புதிய பங்கு வெளியீட்டை (ஐ.பி.ஓ) மேற்கொண்டது. தற்போது இந்தப் பங்கின் விலை அதன் ஐ.பி.ஓ விலையை விட சுமார் 40% அதிகமாக வர்த்தகமாகிக் கொண்டிருக்கிறது.

கோவிட் பாதிப்பு குறையத் தொடங்கியதை அடுத்து மியூச்சுவல் ஃபண்ட் நிறுவனங்கள் நுகர்வு சார்ந்த நிறுவனப் பங்கு களில் முதலீட்டை அதிகரித்திருக்கின்றன. உதாரணமாக, ஐ.டி.சி, டி.வி.எஸ் மோட்டார்ஸ் ஆகிய நிறுவனப் பங்குகளை குறிப்பிடலாம். டி.வி.எஸ் மோட்டார் நிறுவனப் பங்கில் ரூ.1,275 கோடியும், ஐ.டி.சி-யில் ரூ.1,210 கோடியும் முதலீடு செய்யப் பட்டிருக்கிறது.

ஹெச்.டி.எஃப்.சி பேங்க் பங்கில் நிகரமாக ரூ.1,190 கோடி முதலீடு செய்யப்பட்டிருக்கிறது. இவை தவிர , ரிலையன்ஸ் இண்டஸ்ட்ரீஸ் (ரூ.1,038 கோடி), ஐ.சி.ஐ.சி.ஐ பேங்க் (ரூ.1,021 கோடி) ஆகிய நிறுவனப் பங்குகளில் தலா ரூ.1,000 கோடிக்கு மேல் முதலீடு செய்திருக்கின்றன.

ஶ்ரீராம் டிரான்ஸ்போர்ட் (ரூ.918 கோடி), புதிதாக பட்டிய லிடப்பட்ட கிருஷ்ணா இன்ஸ்டி டியூட் ஆஃப் மெடிக்கல் சயின்ஸ் (ரூ. 863 கோடி), எஸ்.பி.ஐ கார்ட்ஸ் அண்ட் பேமென்ட் (ரூ.834 கோடி) மற்றும் டெக் மஹிந்திரா (ரூ.830 கோடி) ஆகிய பங்குகளில் அதிக முதலீடு செய்யப்பட்டிருக்கிறது.

இன்ஃபோசிஸ் பங்குகளை ஃபண்ட் நிறுவனங்கள் அதிக அளவில் அதாவது, ரூ.3,081 கோடி மதிப்புக்கு விற்றிருக்கின்றன. இதைத் தொடர்ந்து ஓ.என்.ஜி.சி (ரூ.636 கோடி) மற்றும் என்.டி.பி.சி (ரூ.600 கோடி) ஆகிய பங்குகள் அதிகம் விற்பனை செய்யப் பட்டிருக்கின்றன. இந்த விவரங் கள் எடில்வைஸ் நிறுவனத்தின் பகுப்பாய்வில் தெரிய வந்துள்ளது.”

பி.வி.ஆர் நிறுவனத்தின் பங்கு விலை அதிகரிக்க என்ன காரணம்?

“கடந்த ஜூலை 14-ம் தேதி இந்த நிறுவனத்தின் பங்கு விலை 3% வரை அதிகரித்து வர்த்தக மானது. மியூச்சுவல் ஃபண்ட் நிறுவனங்கள், இந்த நிறுவனத்தில் முதலீட்டை அதிகரித்ததுதான் இதற்குக் காரணம். அதாவது, கடந்த மார்ச் காலாண்டில், மியூச்சுவல் ஃபண்ட் நிறுவனங்கள் 99,04,573 பங்குகளில் முதலீடு செய்திருந்தன. இதை ஜூன் காலாண்டு முடிவில் பங்கு எண்ணிக்கையை 1,10,54,351 ஆக அதிகரித்துள்ளன. அதாவது, இந்த நிறுவனத்தின் மீதான முதலீட்டை 16.30 சதவிகிதத்திலிருந்து 18.19 சதவிகிதமாக அதிகரித்துள்ளன.”

பிரபல முதலீட்டாளரான ஆஷிஷ் கச்சோலியா, அடார் வெல்டிங் நிறுவனப் பங்கு முதலீட்டை அதிகரித்திருப்பது பற்றி...

“கடந்த ஜூலை 14-ம் தேதி, அடார் வெல்டிங் நிறுவனத்தின் பங்கு விலை 6% வரை அதிகரித்து, 775 ரூபாய்க்கு வர்த்தகமானது. இது இந்த நிறுவனத்தின் உச்சபட்ச விலையாகும். கடந்த மூன்று மாதங்களில், பி.எஸ்.இ சென்செக்ஸ் 8.6% அதிகரித்திருக்கும் நிலையில், இந்த நிறுவனத்தின் பங்கு விலை சுமார் 148% அதிகரித்துள்ளது. பிரபல முதலீட்டாளர்களில் ஒருவரான ஆஷிஷ் கச்சோலியா, இந்த நிறுவனத்தில் தனது முதலீட்டை அதிகரித்திருப்பதும், பங்கு விலை ஏற்றத்துக்குக் காரணமாகச் சொல்லப்படுகிறது.

ஜூன் காலாண்டு இறுதியில், இந்த நிறுவனத்தில் இவருடைய பங்கு முதலீடு நிறுவனத்தின் மொத்தப் பங்கு மூலதனத்தில் 1.13% ஆக இருக்கிறது. அதாவது 1,53,402 பங்குகளில் ஆஷிஷ் கச்சோலியா முதலீடு செய்திருக் கிறார். மார்ச் காலாண்டில் இது 1 சதவிகிதமாக இருந்தது. ஏற்கெனவே ஐ.சி.ஐ.சி.ஐ செக்யூரிட்டீஸ் பங்கு தரகு நிறுவனம், அடார் வெல்டிங் நிறுவனத்தின் பங்கு இலக்கு விலையை 735 ரூபாயாக நிர்ணயித்திருந்த நிலையில், அந்த இலக்கு விலையைத் தாண்டி தற்போது ரூ.755.45 (ஜூலை 15) என்ற விலையில் வர்த்தகமாகி வருகிறது.”

கெசோரம் இண்டஸ்ட்ரீஸ் நிறுவனத்தின் உரிமைப் பங்குகள் வெளியீடு குறித்து...

“பி.கே பிர்லா குழும நிறுவனமான கெசோரம் இண்டஸ்ட்ரீஸ் நிறுவனம், நிலுவையிலிருக்கும் கடனை கொஞ்சமாகக் குறைப்பதற்கான நடவடிக்கையை மேற்கொண்டு வருகிறது. அதற்கு ஏதுவாக, இந்த நிறுவனத்தின் இயக்குநர் குழு பல்வேறு வகையில் முதலீட்டாளர்களிடமிருந்து ரூ.600 கோடி நிதியைத் திரட்ட ஒப்புதல் அளித்திருந்தது. அதன் அடிப்படையில், இந்த நிறுவனம் நடப்பு ஆண்டின் நவம்பர் மாதத்துக்குள் தனது 200 கோடி உரிமைப் பங்குகள் வெளியீட்டை நிறைவு செய்ய திட்டமிட்டிருப்பதாகத் தெரிகிறது. தற்போதைய நிலையில் இந்த நிறுவனத்தின் நிகர கடன் ரூ.1,890 கோடியாக இருக்கிறது. இது கடந்த 2020-ம் ஆண்டின் அக்டோபர் மாத முடிவில் ரூ.2,000 கோடியாக இருந்தது. அடுத்த ஓராண்டுக்குள் இந்தக் கடனானது மேலும் ரூ.150 - 160 கோடி வரை குறைக்கப்படும் என எதிர்பார்க்கப் படுகிறது.”

ஐ.ஆர்.சி.டி.சி பங்கு விலை அதிகரித் திருக்கிறதே..!

“பொதுத்துறை ரயில்வே நிறுவன மான ஐ.ஆர்.சி.டி.சி நிறுவனத்தின் பங்கு விலை, ஜூலை மாதத்தில் இதுநாள் வரையில் மட்டுமே 12% வரை அதிகரித்திருக்கிறது. 52 வார குறைந்தபட்ச விலையுடன் ஒப்பிடும் போது 77% அதிகரித்து வர்த்தகமாகிறது. நடப்பு 2021-ம் ஆண்டில் பி.எஸ்.இ சென்செக்ஸ் 10% அதிகரித்திருக்கும் நிலையில், இந்தப் பங்கின் விலை மட்டும் 59% அதிகரித்துள்ளது. ஏனெனில், தற்போதைய நிலையில் மற்ற போக்குவரத்தைக் காட்டிலும், அதிக அளவில் ரயில் போக்குவரத்து இயக்கத்தில் இருப்பது பங்கு விலை ஏற்றத்துக்குக் காரணமாக இருக்கிறது.”

ரிலையன்ஸ் இண்டஸ்ட்ரீஸ், நிறுவனம் ஜஸ்ட் டயல் நிறுவனத்தை வாங்குகிறதாமே?

“ரிலையன்ஸ் இண்டஸ்ட்ரீஸ், ஜஸ்ட் டயல் நிறுவனத்தை சுமார் ரூ.5,957 - 6,702 கோடி கொடுத்து வாங்குவதாகத் தகவல்கள் வெளியாகி யுள்ளன. இந்த நிலையில், ஜஸ்ட் டயல் பங்கு விலை, கடந்த ஜூலை 15-ம் தேதி 3% வரை அதிகரித்து, ரூ.1,115 என்ற நிலையில் வர்த்தக மானது.”

பங்குச் சந்தைகள் மீண்டும் வரலாற்று உச்சத்தைத் தொட்டிருக்கிறதே!

‘‘நமது பொருளாதாரம் நல்ல நிலையில் இருப்பது, அமெரிக்கப் பொருளாதாரம் சார்ந்த நல்ல பல அறிவிப்புகளை வெளியிட்டிருப்பதே இந்த வளர்ச்சிக்குக் காரணம். நீண்ட காலத்தில் பங்குச் சந்தை மூலம் லாபம் சம்பாதிக்க நாணயம் விகடன் யூடியூபில் நீர் சொன்ன வீடியோ சூப்பர். புதிய முதலீட்டாளர்கள் அனைவரும் அந்த வீடியோவைப் பார்க்க வேண்டும்’’ என்று சொல்லிவிட்டு, வீடியோகாலை கட் செய்தார்!

ஐ.பி.ஓ வரும் மொபிக்விக்..!

டிஜிட்டல் பணப்பரிவர்த்தனை நிறுவனமான மொபிக்விக் நிறுவனம், ஐ.பி.ஓ வெளியிடுவதற்காக அனுமதி கேட்டு செபி அமைப்பிடம் விண்ணப்பித்துள்ளது. இந்த ஐ.பி.ஓ வெளியீட்டின் மூலம் ரூ.1,900 கோடி நிதியை முதலீட்டாளர்களிடமிருந்து திரட்ட முடிவு செய்திருக்கிறது. புதிய பங்கு வெளியீட்டின் மூலம் ரூ.1,500 கோடியையும், ஓ.எஃப்.எஸ் முறையில் ரூ.400 கோடியையும் திரட்ட திட்டமிட்டிருக்கிறது. ஓ.எஃப்.எஸ் முறையில் அமெரிக்கன் எக்ஸ்பிரஸ் டிராவல் ரிலேட்டடு சர்வீசஸ் நிறுவனத்தின் ரூ.9.98 கோடி பங்குகளையும், பஜாஜ் ஃபைனான்ஸ் நிறுவனத்தின் ரூ.68.98 கோடி மதிப்புள்ள பங்குகளையும், கிஸ்கோ சிஸ்டம்ஸ் நிறுவனத்தின் ரூ.11.48 கோடி மதிப்புள்ள பங்குகளையும், ட்ரீலைன் ஆசியா மாஸ்டர் ஃபண்ட் நிறுவனத்தின் ரூ.24.41 கோடி மதிப்புள்ள பங்குகளையும், மொபிக்விக் நிறுவனத்தின் இணை நிறுவனர் பிபின் ப்ரீத் சிங்குக்கு சொந்தமான ரூ.113.33 கோடி மதிப்புள்ள பங்குகளையும் மற்றும் உபசனா தாகுவுக்கு சொந்தமான ரூ.78.82 கோடி மதிப்புள்ள பங்குகளையும் விற்பனை செய்ய மொபிக்விக் நிறுவனம் முடிவு செய்திருப்பதாகத் தெரிகிறது.

ஐ.சி.ஐ.சி.ஐ புரூ. ஃப்ளெக்ஸிகேப் ஃபண்ட்: நிறுவனம் என்.எஃப்.ஓ மூலம் ரூ.10,000 கோடி..!

ஐ.சி.ஐ.சி.ஐ புரூ. மியூச்சுவல் ஃபண்ட் நிறுவனம், அதன் ஃப்ளெக்ஸிகேப் ஃபண்ட் புதிய வெளியீடு (என்.எஃப்.ஓ) மூலம், சுமார் ரூ.10,000 கோடி முதலீட்டை ஈர்த்திருக்கிறது. மியூச்சுவல் ஃபண்ட் வரலாற்றிலேயே இவ்வளவு பெரிய தொகையை என்.எஃப்.ஓ மூலம் ஈர்த்த முதல் ஃபண்ட் இதுதான். கடந்த ஜனவரி முதல் ஜூன் வரையிலான காலகட்டத்தில் என்.எஃப்.ஓ மூலம் முதலீட்டாளர்கள் அதிக அளவில் முதலீடு செய்திருக்கின்றன. அந்த வகையில், இந்தக் காலகட்டத்தில் என்.எஃப்.ஓ மூலம் முதலீட்டாளர்கள் முதலீடு செய்த தொகை ரூ.19,300 கோடியாக இருக்கிறது. கடந்த ஒரு மாதத்தில் மட்டும், 1,087 கோடி ரூபாய் ஃப்ளெக்ஸிகேப் ஃபண்ட் பிரிவில் முதலீடு செய்யப்பட்டுள்ளது. தற்போதைய நிலையில் இந்த ஃப்ளக்ஸிகேப் ஃபண்ட் பிரிவு மூலம் நிர்வகித்து வரும் மொத்த சொத்து மதிப்பு ரூ.1.76 லட்சம் கோடியாக உள்ளது. லார்ஜ்கேப் பிரிவுக்கு அதிகம் முதலீடு செய்யப்பட்டிருப்பது இந்தப் பிரிவில்தான்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism