Published:Updated:

ஷேர்லக்: பங்குச் சந்தை... சபாஷ் சிறு முதலீட்டாளர்கள்..! பாசிட்டிவ் பார்வை

ஷேர்லக்
பிரீமியம் ஸ்டோரி
News
ஷேர்லக்

ஷேர்லக் - SHARELUCK

அதிகாலையிலேயே வாட்ஸ் அப் தகவல் அனுப்பிருந்தார் ஷேர்லக். அவர் தெரிவித்தபடி சரியாக மாலை 4 மணிக்கு நம் அலுவலகம் வந்து சேர்ந்தார். தயாராக பிளாஸ்க்கில் வாங்கி வைத்திருந்த ஏலக்காய் டீயை கப்பில் ஊற்றிக் கொடுக்க, வாங்கிப் பருகிக் கொண்டே நம் கேள்விகளுக்கு, பதில் சொல்ல ஆரம்பித்தார்.

இந்தியப் பங்குச் சந்தையில் சிறு முதலீட்டாளர்களின் பங்களிப்பு கணிசமாக அதிகரித்திருக்கிறதே?

‘‘பங்குச் சந்தை முதலீடு குறித்த விழிப்புணர்வு முன்பைவிட இப்போது இந்தியர்களிடம் குறிப்பாக, இளைஞர் களிடம் அதிகரித்திருக்கிறது. குறிப்பாக, பணவீக்க விகிதம், வருமான வரி ஆகியவற்றைத் தாண்டி அதிக வருமானம் வேண்டும் எனில், பங்குச் சந்தை சார்ந்த முதலீடுகள் (நிறுவனப் பங்குகள் மற்றும் ஈக்விட்டி ஃபண்டுகள்) அவசியம் என்பதைப் பலரும் புரிந்துகொண்டிருக்கிறார்கள்.

இந்தியாவின் முன்னணி பங்குச் சந்தைகளில் ஒன்றான என்.எஸ். இ-யில் 2016-ம் ஆண்டில் தனிநபர் களின் பங்களிப்பு 33 சதவிகிதமாக இருந்தது. இது இப்போது 2021-ம் ஆண்டில் 46 சதவிகிதமாக அதிகரித் துள்ளது. தனிநபர்களில் சிறு முதலீட்டாளர்களின் பங்களிப்பு கணிசமாக இருப்பதற்கு அவர்களுக்கு ஒரு சபாஷ் சொல்லலாம்.

இந்தக் காலகட்டத்தில் அந்நிய நிதி நிறுவனங்களின் பங்களிப்பு 23 சதவிகிதத்திலிருந்து 11 சதவிகிதமாகக் குறைந்துள்ளது. இந்திய நிறுவன முதலீட்டாளர்களின் (மியூச்சுவல் ஃபண்ட் நிறுவனங்கள், காப்பீட்டு நிறுவனங்கள் போன்றவை) பங்களிப்பு 9 சதவிகிதத்திலிருந்து 7 சதவிகிதமாகக் குறைந்துள்ளது.

2016-ல் என்.எஸ்.இ-யில் பட்டிய லிடப்பட்ட நிறுவனங்களின் எண்ணிக்கை 1,228-ஆக இருந்தது. இது இப்போது 1,965-ஆக உயர்ந்து உள்ளது. இந்தக் காலகட்டத்தின் இதன் மார்க்கெட் கேப்பிட்ட லைசேஷன் ரூ.33,67,350 கோடி யிலிருந்து ரூ.1,84,74,450 கோடியாக அதிகரித்துள்ளது.’’

ஷேர்லக்
ஷேர்லக்

டாடா கம்யூனிகேஷன் நிறுவனத்தின் பங்கு விலை அதிகரிக்க என்ன காரணம்?

‘‘டாடா கம்யூனிகேஷன் நிறுவனம், இந்தியாவில் ‘கூகுள் கிளவுட்’ வுடன் கூட்டு சேர்வதாக அறிவிப்பு வெளியானது. இதன்பிறகு, இந்த நிறுவனத்தின் பங்கு விலை கடந்த வாரம் செவ்வாய்க் கிழமை அன்று ஒரே நாளில் 6% வரை அதிகரித்து, 1,056.25 ரூபாய்க்கு வர்த்தகமானது.’’

எஸ்.ஐ.எஸ் நிறுவனப் பங்கு பைபேக்கில் பங்கேற்கலாமா?

‘‘செக்யூரிட்டி இன்டெலி ஜென்ட் சர்வீசஸ் (எஸ்.ஐ.எஸ்) நிறுவனம், 100 கோடி ரூபாய் மதிப்புள்ள 18,18,181 பங்குகளைத் திரும்பப் பெறுவதாக அறிவித்திருக்கிறது. இது இந்த நிறுவனத்தின் பங்கு மூலதனத்தில் 1.24 சதவிகித மாகும்.

இந்த அறிவிப்பின் காரணமாக அந்த நிறுவனத் தின் பங்கு விலை, கடந்த வார திங்கள்கிழமை அன்று 9% வரை அதிகரித்து, 465 ரூபாய்க்கு வர்த்தகமானது. திரும்பப்பெறும் பங்கு ஒன்றுக்கு 550 ரூபாய் கொடுக்க இந்த நிறுவனம் முடிவு செய்துள்ளது. தற்போது இதன் பங்கின் விலை ரூ.425 என்ற அளவில் வர்த்தகமாகி வருகிறது.

இந்த பைபேக்கில் நிறுவனத்தின் நிறுவனர்களும் பங்கேற்பார்கள் என எதிர்பார்க்கப்படுகிறது. இந்த நிறுவனத்தின் நிறுவனர்களின் பங்கு மூலதனம் 73.10சதவிகிதமாக உள்ளது. 14.43% பங்குகள் வெளிநாட்டு நிறுவன முதலீட்டாளர்கள் வசமும் 6.57% பங்குகள் மியூச்சுவல் ஃபண்ட் நிறுவனங்களின் வசமும் உள்ளன.

செபி அமைப்பின் விதிமுறைப்படி, பட்டியலிடப்பட்ட நிறுவனம் ஒன்றில் நிறுவனர்களின் பங்கு மூலதனம் 75% வரை இருக்கலாம் என்பதால், எஸ்.ஐ.எஸ். நிறுவனத்தில் இந்த பைபேக் மூலம் நிறுவனர்கள் தங்களின் பங்கு மூலதனத்தை அதிகரிப்பார்கள் என எதிர்பார்க்கப்படுகிறது. டிசம்பர் காலாண்டில் இதன் நிகர லாபம் 26.5% அதிகரித்துள்ளது. நல்ல பணவரத்து காரணமாக இந்த நிறுவனத்தின் கடன் குறைந்திருக்கிறது.

நடுத்தரக் கால அளவில் இந்தப் பங்கை வாங்கலாம் என மோதிலால் ஆஸ்வாஸ் ஃபைனான்ஷியல் சர்வீசஸ் பரிந்துரை செய்திருக்கிறது. இலக்கு விலையாக ரூ.620–ஐ நிர்ணயித்துள்ளது.

இந்த பைபேக்கில் பங்கேற்பது, அதில் முதலீடு செய்திருக்கும் முதலீட்டாளர் களின் லாப எதிர்பார்ப்பைப் பொறுத் துள்ளது. செக்யூரிட்டி, ரொக்கப் பணத்தை எடுத்துச் செல்லும் மேலாண் மையில் இந்தியா, ஆஸ்திரேலியா உள்ளிட்ட நாடுகளில் இந்த நிறுவனம் முன்னணியில் உள்ளது.’’

அரோஹன் ஃபைனான்ஷியல் நிறுவனம் ஐ.பி.ஓ வெளியிடுகிறதாமே?

‘‘அரோஹன் ஃபைனான்ஷியல் (Arohan Financial) நிறுவனம் புதிய பங்கு வெளியீட்டுக்கு (ஐ.பி.ஓ) திட்டமிட்டிருக்கிறது. இந்தப் புதிய பங்கு வெளியீட்டின் மூலம் 1,750 - 1,800 கோடி ரூபாயை, முதலீட்டாளர்களிடமிருந்து திரட்ட இலக்கு நிர்ணயித்திருக் கிறது.

இதற்கு ஐ.பி.ஓ வெளியீட்டுக்கு அனுமதி வேண்டி, செபி அமைப்பிடம் விண்ணப் பித்திருக்கிறது. இந்த ஐ.பி.ஓ வெளியீட்டில் புதிய பங்குகளை வெளியிடுவதன் மூலம் 850 கோடி ரூபாயைத் திரட்டவும், ஆஃபர் பார் சேல் முறையில் பங்குச் சந்தை விற்பனை மூலம் 27.06 மில்லியன் பங்குகளை விற்பனை செய்யவும் இந்த நிறுவனம் முடிவு செய்திருக்கிறது.’’

லோதா டெவலப்பர்ஸ் நிறுவனம், ஐ.பி.ஓ வெளியிடுகிறதாமே?!

‘‘மும்பையைச் சேர்ந்த லோதா டெவலப்பர்ஸ் நிறுவனம், ஐ.பி.ஓ வெளியீட்டின் மூலம் நிதி திரட்டுவதற்காக, பங்குச் சந்தை கட்டுப்பாட்டு அமைப்பான செபி அமைப்பிடம் விண்ணப் பித்துள்ளது. இந்தப் புதிய பங்கு வெளியீட்டின் மூலம் முதலீட் டாளர்களிடமிருந்து 2,500 கோடி ரூபாய் நிதி திரட்ட இந்த நிறுவனம் முடிவு செய்துள்ளது.

ஐ.பி.ஓ வெளியிடுவதற்காக செபி அமைப்பிடம் இந்த நிறுவனம் மூன்றாவது முறையாக விண்ணப்பிக்கிறது. இதற்கு முன்பாக 2009-ம் ஆண்டின் செப்டம்பர் மாதத்தில் முதன் முறையாக ஐ.பி.ஓ-வுக்காக விண்ணப்பித்திருந்தது. அப்போது, 2,800 கோடி ரூபாய் நிதியைத் திரட்ட இந்த நிறுவனம் முடிவு செய்திருந்தது. செபி அனுமதி அளித்திருந்தாலும், அப்போதிருந்த மார்க்கெட் சூழ்நிலை மற்றும் உலக பொருளாதார வீழ்ச்சி காரண மாக, ஐ.பி.ஓ வெளியிடுவதை இந்த நிறுவனம் கைவிட்டது.

அதேபோல, ஏப்ரல் 2018-ம் ஆண்டில் இரண்டாவது முறையாக ஐ.பி.ஓ வெளியீட்டுக்கு விண்ணப்பித்தது. அப்போது 5,500 கோடி ரூபாயை இலக்காக வைத்திருந்தது. அந்தச் சமயத்திலும் சந்தை சூழ்நிலை சரியில்லாத காரணத்தால், ஐ.பி.ஓ வெளி யிடுவதைத் தள்ளி வைத்தது. அதன்பிறகு, இப்போது 3-வது முறையாக ஐ.பி.ஓ வெளீயீட்டின் மூலம் பணத்தைத் திரட்ட முடிவு செய்திருக்கிறது.’’

ஜி.எம்.எம் நிறுவனம், தனது தாய் நிறுவனத்தின் பங்குகளை வாங்கு கிறதாமே, என்ன விஷயம்?

‘‘ஒழுங்குமுறை ஆணையத்தில் அனைத்து ஒப்புதல்களையும் பெற்ற பின்னர், தனது தாய் நிறுவனமான ஃபாட்லர் (Pfaudler) குழுமத்தில் பெரும் பான்மையான பங்குகளைப் பெறுவதற்கான பரிவர்த் தனையை வெற்றிகரமாக முடித்துவிட்டதாக ஜி.எம்.எம் நிறுவனம் கடந்த வாரம் புதன் கிழமை அன்று அறிவித்தது. இந்த அறிவிப்புக்குப் பிறகு, ஜி.எம்.எம் நிறுவனத்தின் பங்கு விலை 5% வரை அதிகரித்து 3,908.30 ரூபாய்க்கு வர்த்தகமானது.’’

அதானி போர்ட்ஸ் நிறுவனத்தின் பங்கு விலை அதிகரிக்க என்ன காரணம்?

‘‘அதானி போர்ட்ஸ் அண்டு ஸ்பெஷல் எக்கனாமிக் ஜோன் நிறுவனம், டிகி போர்ட்ஸ் (Dighi Ports) நிறுவனத்தை முழுமையாகக் கையகப்படுத்தியிருப்பதாகக் கடந்த வாரம் புதன்கிழமை அன்று அறிவித்தது. இதற்காக இந்த நிறுவனம் 750 கோடி ரூபாயை முதலீடு செய்திருக்கிறது. இந்த அறிவிப்புக்குப் பிறகு இந்த நிறுவனத்தின் பங்கு விலை 52 வார அதிகபட்ச விலையை எட்டியிருக்கிறது.

கடந்த புதன்கிழமை அன்று 2.50% வரை விலை அதிகரித்து, 652.45 ரூபாயாக வர்த்தகமானது. அதானி போர்ட்ஸ், பல்வேறு சரக்குகளைக் கையாளும் துறைமுகமாக இதை மாற்ற ரூ10,000 கோடி முதலீடு செய்ய உள்ளது. மேலும், இந்தத் துறைமுகத்துடன் ரயில் பாதை இணைப்புகளை ஏற்படுத்தும் உள்கட்டமைப்பு வசதிகளையும் ஏற்படுத்த இருக்கிறது.’’

எல் அண்டு டி ஃபைனான்ஸ் ஹோல்டிங் நிறுவனத்தின் உரிமைப் பங்கு வெளியீடு வெற்றியடைந்ததா?

‘‘எல் அண்டு டி ஃபைனான்ஸ் ஹோல்டிங் நிறுவனம் 2,988 கோடி ரூபாய் நிதி திரட்டும் நோக்கில் உரிமைப் பங்கு களை வெளியிட முடிவு செய்திருந்தது. இந்த நிலையில், இதற்காக முதலீட்டாளர் களிடமிருந்து வந்திருக்கும் விண்ணப்ப அளவு, வெளியிடப்படும் பங்கு அளவைவிட 15% அதிகமாக இருக்கிறது.

இந்த வெளியீட்டுக்கான பங்கு ஒதுக்கீடு பிப்ரவரி 23-ம் தேதி வரை நடக்கிறது. என்.எஸ்.இ மற்றும் பி.எஸ்.இ சந்தையில் பிப்ரவரி 26-ல் பட்டியலிடப்படுகிறது.’’

ஃபேர்ஃபாக்ஸ் பேக்டு செவன் ஐலேண்டு ஷிப்பிங் லிமிடெட் நிறுவனம் ஐ.பி.ஓ வெளியிடுகிறதாமே?

‘‘கனடா கோடீஸ்வரர் பிரேம் வாட்சா தலைமையிலான செவன் ஐலேண்டு ஷிப்பிங் நிறுவனம் தனது விரிவாக்கப் பணியை மேற்கொள்ள முடிவு செய்திருக்கிறது. இதற்காகத் தேவைப்படும் 600 கோடி ரூபாய் நிதியை ஐ.பி.ஓ மூலம் திரட்ட இந்த நிறுவனம் முடிவு செய்துள்ளது. இதற்காக செபி அமைப்பிடம் விண்ணப்பித்துள்ளது.

புதிய பங்குகளை வெளியிடுவதன் மூலம் 400 கோடி ரூபாயையும், பங்குச் சந்தையில் பங்குகளை விற்பனை செய்வதன் மூலம் 200 கோடி ரூபாயையும் திரட்டுவதற்கு இந்த நிறுவனம் முடிவு செய்துள்ளது. இந்த 200 கோடி ரூபாயில், 100 கோடி ரூபாய் மதிப்புள்ள எஃப்.ஐ.ஹெச் மொரிஷியஸ் இன்வெஸ்ட்மென்ட் நிறுவனத்தின் பங்குகளும், இந்த நிறுவனத்தின் புரொமோட்டர்களில் ஒருவரான தாமஸ் வில்பிரட் பின்டோவின் 85.64 கோடி ரூபாய் மதிப்புள்ள பங்குகளும், லீனா மெட்டில்டா பின்டோவின் 14.35 கோடி ரூபாய் பங்குகளும் இடம் பெறும்.

இந்தப் புதிய பங்கு வெளியீட்டில், தகுதிவாய்ந்த நிறுவன முதலீட் டாளர்களுக்கு 50% பங்குகளும், நிறுவனம் அல்லாத முதலீட்டாளர் களுக்கு 15% மற்றும் சிறு முதலீட் டாளர்களுக்கு 35% என ஒதுக்கப் படுகிறது.’’

ஹாப்பியஸ்ட் மைண்ட் நிறுவனப் பங்கு விலை அபாரமா உயர்ந்திருக்கிறதே!

‘‘நொமுரா தரச்சான்று நிறுவனம் இந்த நிறுவனப் பங்கை வாங்கப் பரிந்துரை செய்ததன் காரணமாக, இந்த நிறுவனப் பங்கு விலை கடந்த புதன் மற்றும் வியாழன் அன்று கணிசமாக உயர்ந்தது. புதனன்று காலையில் 400 ரூபாய்க்கு வர்த்தக மான இந்தப் பங்கு இரண்டே நாள்களில் 560 வரை சென்று, வியாழன்று வர்த்தகம் முடியும்போது 512 ரூபாய் என்கிற அளவில் இருந்தது. இந்த விலையேற்றத்தை மட்டும் கவனத்தில் கொண்டு இந்தப் பங்கில் முதலீடு செய்ய வேண்டும் என்பதில்லை. பிற விஷயங்களையும் ஆராய்ந்து பார்த்த பின் முதலீடு செய்ய யோசிக்கலாம்.

பட்ஜெட்டுக்குப் பிறகு, கணிசமாக உயர்ந்த பங்குச் சந்தை தற்போது கொஞ்சம் இறங்கியிருக்கிறது. பிராஃபிட் புக்கிங் என்பது தவிர, வேறு பெரிய காரணம் இதற்கில்லை. எனவே, இந்த சந்தை இறக்கத்தைப் புதிய முதலீட்டுக்கான வாய்ப்பாகவே கருதலாம்’’ என்றவர், ‘‘ஆன்லைனில் நீங்கள் நடத்திய பிசினஸ் ஸ்டார்ஸ் அவார்டு வீடியோக்களை யூடியூபில் பலமுறை பார்த்தேன். அருமை’’ என்று புகழ்ந்துவிட்டு, வீட்டுக்குப் புறப்பட்டார்.

ஃப்ராங்க்ளின் மியூச்சுவல் ஃபண்ட்: நிம்மதி பெருமூச்சு விடும் முதலீட்டாளர்கள்..!

ஃப்ராங்க்ளின் மியூச்சுவல் ஃபண்ட் நிறுவனத்தின் கடன் ஃபண்டுகளில் முதலீடு செய்திருந்த முதலீட்டாளர் களுக்கு ரூ.9,122 கோடி திரும்ப வழங்குமாறு உச்ச நீதிமன்றம் உத்தரவிட்டது. இதை அடுத்து, இதற்காக நியமிக்கப்பட்ட எஸ்.பி.ஐ ஃபண்ட் நிறுவனம், மூன்று லட்சம் முதலீட்டாளர்களின் வங்கிக் கணக்கில் அவர்களுக்கான தொகையை வரவு வைத்து வருகிறது. இந்த நடவடிக்கையின் மூலம் மூன்று நாள்களுக்குள் முதலீட்டாளர்களின் கணக்குகளில் வரவு வைக்கப்படும் எனத் தெரிவிக்கப்பட்டுள்ளது. சில கடன் பத்திரங்களில் செய்யப்பட்டிருக்கும் முதலீடு முழுமையாக வந்து சேரவில்லை. அந்த வகையில், ஆறு ஃபண்டுகளில் ஐந்து ஃபண்டுகளில் பாசிட்டிவ் பணவரத்து வந்ததால், அந்த ஃபண்டுகளில் முதலீடு செய்தவர்களுக்கு இப்போது பணம் அளிக்கப்படுகிறது. இன்னும் ஒரு ஃபண்டுக்கு விரைவில் பணம் கிடைக்கும் என எதிர்பார்க்கப்படுகிறது. தங்கள் வங்கிக் கணக்கில் பணம் வராத முதலீட்டாளர்கள் தங்களின் கே.ஒய்.சி புதுப்பிக்கப் பட்டிருக்கிறதா எனக் கவனிக்கவும். வேறு ஏதாவது விவரம் தேவை என்றால் உங்களின் மியூச்சுவல் ஃபண்ட் விநியோகஸ்தர் அல்லது நிதி ஆலோசகரைத் தொடர்பு கொள்ளவும்!

வேல்யூ இன்வெஸ்ட்டிங் – பேசிக்! ஆன்லைன் கட்டணப் பயிற்சி

நாணயம் விகடன், வேல்யூ இன்வெஸ்டிங் – பேசிக் என்ற ஆன்லைன் கட்டணப் பயிற்சி வகுப்பை நடத்துகிறது. இது மார்ச் 6, 2021 , காலை 10.30 மணி முதல் மதியம் 12.30 மணி வரை நடைபெறுகிறது. 30 வருடங்களுக்கும் மேலான பங்குச் சந்தை அனுபவம் கொண்ட ‘கோயம்புத்தூர் கேப்பிடல்’ டாக்டர்எஸ்.கார்த்திகேயன் இந்தப் பயிற்சி வகுப்பை நடத்துகிறார். வேல்யூ இன்வெஸ்ட்டிங் என்றால் என்ன? அதன் அடிப்படையில் முதலீட்டுக்கு பங்கை எப்படி சரியாகத் தேர்வு செய்வது என்பது குறித்த விரிவான கட்டண வகுப்புதான் இது. பயிற்சிக் கட்டணம் ரூ.500 ஆகும். முன் பதிவுக்கு: https://bit.ly/3jE2KRY

பாசப் பிள்ளைகளின் எதிர்காலம்: நிறைவேற்றும் மியூச்சுவல் ஃபண்ட்!

நாணயம் விகடன் மற்றும் ஐ.சி.ஐ.சி.ஐ புரூடென்ஷியல் மியூச்சுவல் ஃபண்ட் நிறுவனம் இணைந்து ‘பாசப் பிள்ளைகளின் எதிர்காலம்: நிறைவேற்றும் மியூச்சுவல் ஃபண்ட்’ என்ற ஆன்லைன் நிகழ்ச்சி, பிப்ரவரி 28-ம் தேதி காலை 10.30 முதல் 11.30 மணி வரை நடைபெறும். இதில் மியூச்சுவல் ஃபண்ட் நிபுணர் ஸ்ரீகாந்த் மீனாட்சி (இணை நிறுவனர், Primeinvestor.in), ஐ.சி.ஐ.சி.ஐ புரூடென்ஷியல் மியூச்சுவல் ஃபண்ட் நிறுவனத்தின் க்ளெஸ்டர் ஹெட் சி.லோகநாதன் ஆகியோர் பேசுகிறார்கள். அனுமதி இலவசம் பதிவு செய்ய: https://bit.ly/NV-ICICIPru