Published:Updated:

ஷேர்லக்: அமெரிக்கப் பங்குகளில் இந்திய நிறுவனங்கள்... முதலீட்டை அதிகரிக்கும் காரணங்கள்..!

ஷேர்லக்
பிரீமியம் ஸ்டோரி
News
ஷேர்லக்

அமெரிக்க டெக்னாலாஜி நிறுவனங்களின் செயல்பாடு மேம்பட்டு, அவற்றின் பங்கு விலையும் உயர்ந்து வருகிறது.

காலையில் ஷேர்லக் வாட்ஸ்அப்பில் தகவல் அனுப்பியபடியே, சரியாக மாலை 5:00 மணிக்கு அவருக்கு போன் செய்தோம். நாம் கேள்விகளைக் கேட்க, அவர் போனிலேயே பதில் சொல்ல ஆரம்பித்தார்.

இண்டஸ்இண்ட் பேங்க்கின் பங்கு விலை திடீர் உயர்வுக்கு என்ன காரணம்?

“இந்த வங்கியின் பங்கு விலை கடந்த வாரம் புதன்கிழமை அன்று 7% வரை அதிகரித்து வர்த்தகமானது. அமெரிக்காவைச் சார்ந்த நிறுவனமான ரூட் ஒன் இன்வெஸ்ட்மென்ட் நிறுவனம், இண்டஸ்இண்ட் வங்கியில் தனது மூலதனத்தை அதிகரிக்கப் போவதாக அறிவித்ததே இதற்குக் காரணம். தற்போதைய நிலையில் இந்த நிறுவனம் இண்டஸ்இண்ட் வங்கியில் 5.41% பங்கு மூலதனத்தைக்கொண்டிருக்கிறது. இதை 9.9 சதவிகிதமாக அதிகரிக்க இந்த நிறுவனம் திட்டமிட்டிருக்கிறது.”

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz
ஷேர்லக்: அமெரிக்கப் பங்குகளில் இந்திய நிறுவனங்கள்... முதலீட்டை அதிகரிக்கும் காரணங்கள்..!

பார்மா பங்குகளின் விலை நிலவரம் எப்படி இருக்கிறது?

“கடந்த வாரம் புதன்கிழமை அன்று, பார்மா இண்டெக்ஸ் ஏற்றத்தில் வர்த்தகமானதைத் தொடர்ந்து, அந்தத் துறை சார்ந்த பங்குகள் விலை அதிகரித்து வர்த்தகமாகின. அவற்றில் அதிகபட்சமாக அரபிந்தோ பார்மா நிறுவனத்தின் பங்கு விலை 3.38% அதிகரித்து வர்த்தகமானது. அல்கெம் லெபாரட்டரீஸ் 2.37%, டாக்டர் ரெட்டீஸ் லெபாரட்டரீஸ் 2.31%, பயோகான் 2%, சன் பார்மா 1.21%, டாரன்ட் பார்மா 2%, கெடில்லா ஹெல்த்கேர் 0.46%, சிப்லா 0.35% மற்றும் லூபின் 0.32% எனப் பங்குகளின் விலை அதிகரித்து வர்த்தகமாகின. அன்றைய தினத்தில் நிஃப்டி பார்மா இண்டெக்ஸ் 1.18% அதிகரித்து 9994.35 என்ற நிலையில் வர்த்தகமானது.”

உங்கள் அன்றாட தேவைகளின் அனைத்து பொருட்களையும் சிறந்த தள்ளுபடியில் வாங்க

VIKATAN DEALS

மெட்டல் பங்குகள் விலையும் ஏற ஆரம்பித்திருக்கிறதே..?

“கடந்த வாரத்தில் மெட்டல் பங்குகள் ஏற்றத்துடன் வர்த்தகமாகின. குறிப்பாக, ஹிந்துஸ்தான் காப்பர் மற்றும் ஸ்டீல் அத்தாரிட்டி ஆஃப் இந்தியா ஆகிய இரண்டு பங்குகளின் விலை சுமார் 10 சதவிகிதத்துக்கு மேல் அதிகரித்து வர்த்தகமானது. இந்தப் பங்குகளின் ஏற்ற விகிதம் முறையே 15.26% மற்றும் 13.56 சதவிகிதம்.

இவ்விரு பங்குகளைத் தொடர்ந்து நேஷனல் அலுமினியம் கம்பெனி 7.16%, ஜே.எஸ்.டபிள்யூ ஸ்டீல் 5.53%, வேதாந்தா 5.07%, என்.எம்.டி.சி 5.02%, வெல்ஸ்பன் கார்ப் 4.97%, டாடா ஸ்டீல் 3.83%, ஹிண்டால்கோ இண்டஸ்ட்ரீஸ் 3.09%, ஜிண்டால் ஸ்டீல் அண்டு பவர் 2.57% விலை அதிகரித்து வர்த்தகமாகின. அன்றைய தினத்தில் நிஃப்டி மெட்டல் இண்டெக்ஸ் 3.57% அதிகரித்து வர்த்தகம் ஆனது.”

ஷேர்லக்: அமெரிக்கப் பங்குகளில் இந்திய நிறுவனங்கள்... முதலீட்டை அதிகரிக்கும் காரணங்கள்..!

ஜூன் மாதத்தில் எஸ்.ஐ.பி முதலீடு குறைந்திருக்கிறதே..?

“மியூச்சுவல் ஃபண்ட் திட்டங்களில் டிசம்பர் 2018 முதல், எஸ்.ஐ.பி முறையில் ஒவ்வொரு மாதமும் சுமார் ரூ.8,000 கோடிக்கும் அதிகமாக முதலீடு செய்யப்பட்டது. ஆனால், கடந்த 18 மாதங்களில் இல்லாதவிதமாக ஜூன் மாதத்தில் இந்த முதலீட்டுத் தொகை 7,927 கோடி ரூபாயாகக் குறைந்திருக்கிறது. கொரோனா பாதிப்பால் முதலீட்டாளர்கள் சில மாதங்களுக்கு எஸ்.ஐ.பி முதலீட்டை நிறுத்திவைத்திருப்பதே இதற்குக் காரணமாகப் பார்க்கப்படுகிறது.”

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

அமெரிக்கப் பங்குகளில் இந்திய மியூச்சுவல் ஃபண்ட் நிறுவனங்கள் முதலீட்டை அதிகரிக்க என்ன காரணம்?

“அண்மை ஆண்டுகளில் அனைத்துத் துறைகளிலும் தொழில்நுட்பப் பயன்பாடு மேம்பட்டுவருகிறது. கொரோனா வைரஸ் பரவல், தொழில்நுட்பப் பயன்பாட்டை முன்பைவிட மிகவும் அதிகரித்துள்ளது. அந்த வகையில் அமெரிக்காவைச் சேர்ந்த டெக்னாலாஜி நிறுவனங்களின் செயல்பாடு மேம்பட்டு, அவற்றின் பங்கு விலையும் கணிசமாக உயர்ந்து வருகிறது. இதைத் தொடர்ந்து அமெரிக்க டெக் நிறுவனப் பங்குகளில் இந்திய மியூச்சுவல் ஃபண்டுகள் முதலீடு செய்வது மிகவும் அதிகரித்துள்ளது.

பொதுவாக, இந்திய மியூச்சுவல் ஃபண்ட் நிறுவனங்கள் ஃபண்டுகளின் ரிஸ்க்கைக் குறைக்க வெளிநாடுகளைச் சேர்ந்த நிறுவனப் பங்குகளில் முதலீடு செய்வது வழக்கம். இதையொட்டியே அவை `குளோபல் ஃபண்ட்’ என்ற பிரிவை வைத்திருக்கின்றன. `அமெரிக்காவைச் சேர்ந்த டெக் நிறுவனங்களின் எதிர்காலம் பிரகாசமாக இருக்கும்’ என்ற கணிப்பில் அவற்றில் ஃபண்ட் நிறுவனங்களால் முதலீடு அதிகரிக்கப்படுகிறது.

அமெரிக்காவைச் சேர்ந்த ஃபேஸ்புக், அமேஸான், ஆப்பிள், நெட்ஃபிளிக்ஸ், அல்பபெட் ஆகிய பங்குகளில் இந்திய மியூச்சுவல் ஃபண்டுகள் மற்றும் முதலீட்டாளர்கள் முதலீடு செய்வது வழக்கம். இந்தப் பட்டியலில் இப்போது மைக்ரோ சாஃப்ட், டெல்சா, ஜூம் ஆகிய நிறுவனப் பங்குகளும் சேர்ந்திருப்பதாக மார்னிங்ஸ்டார் இந்தியா தெரிவிக்கிறது.

அண்மை மாதங்களில், நாஸ்டாக் இ.டி.எஃப் மூலம் சிறு முதலீட்டாளர்கள் அமெரிக்கப் பங்குகளில் முதலீட்டை அதிகரித்திருக்கிறார்கள். அண்மைக் காலத்தில் சுமார் 6,000 கோடி ரூபாய் அமெரிக்க டெக் பங்குகளில் இந்திய நிறுவனங்கள் மற்றும் முதலீட்டாளர்களால் முதலீடு செய்யப்பட்டிருக்கிறது.”

இந்தியப் பங்குச் சந்தையின் ஏற்றத்துக்கு வெளிநாட்டு மற்றும் உள்நாட்டு முதலீட்டு நிறுவனங்கள்தான் காரணமா?

“ஜூன் மாதம் இந்தியப் பங்கு முதலீட்டு நிலவரத்தைப் பார்க்கும் போது ‘ஆம்’ என்று சொல்லலாம். மார்ச் 2020 இறக்கத்துக்குப் பிறகு கடந்த மூன்று மாதங்களாக கொரோனா பாதிப்பையும் தாண்டி, இந்தியப் பங்குச் சந்தை ஏற்றம் காண ஆரம்பித்திருக்கிறது.

ஜூன் மாதத்தில் மொத்தம் 22 வர்த்தக தினங்கள். இவற்றில், 10 நாள்களில் `நிகர விற்பனையாளர்க’ளாக இருந்திருக்கிறார்கள். ஆனால், ஒட்டுமொத்த மாதத்தை எடுத்துக்கொண்டால், வெளிநாட்டு மற்றும் உள்நாட்டு முதலீட்டாளர்கள் `நிகர வாங்குபவர்க’ளாக இருக்கிறார்கள். இது போன்ற நிலைதான் மே மாதத்திலும் காணப்பட்டது.

ஜூன் மாதத்தில் அந்நிய நிதி நிறுவனங்கள் (எஃப்.ஐ.ஐ-க்கள்) ரூ.1,55,215 கோடி மதிப்புள்ள பங்குகளை வாங்கியுள்ள நிலையில் ரூ.1,49,723 கோடி மதிப்புள்ள பங்குகளை விற்றுள்ளன. எனவே, நிகர முதலீடு ரூ. 5,493 கோடியாக உள்ளது. இதேபோல், உள்நாட்டு முதலீட்டாளர்கள் (டி.ஐ.ஐ-க்கள் – மியூச்சுவல் ஃபண்ட் நிறுவனங்கள், இன்ஷூரன்ஸ் நிறுவனங்கள் போன்றவை) ரூ.1,00,174 கோடி மதிப்புள்ள பங்குகளை வாங்கியுள்ள நிலையில், ரூ.97,740 கோடி மதிப்புள்ள பங்குகளை விற்றிருக்கிறார்கள். அந்த வகையில், நிகர முதலீடு ரூ.2,434 கோடியாக உள்ளது. `இந்த நிலை நடப்பு ஜூலையிலும் தொடரும்’ என்கிறார்கள் பகுப்பாய்வாளர்கள்.”

கொரோனா காலத்தில் துணிச்சலாக ரோசாரி பயோடெக் (Rossari Biotech) நிறுவனம் புதிய பங்கு வெளியீட்டில் இறங்குகிறதே..?

“கொரோனா பரவல் காரணமாக மருந்துப் பொருள்களுக்கு முன்பைவிட அதிக தேவை ஏற்பட்டிருக்கிறது. இதனால், பார்மா நிறுவனங்களின் லாபம் கூடியிருக்கிறது. மியூச்சுவல் ஃபண்டுகள், இன்ஷூரன்ஸ் நிறுவனங்கள் என அனைத்துத் தரப்பினரும் பார்மா பங்குகளில் முதலீட்டை அதிகரித்திருக்கிறார்கள். அந்தத் துணிச்சலில்தான் ரோசாரி பயோடெக் நிறுவனம் புதிய பங்கு வெளியீட்டில் களமிறங்குகிறது.

ஆறு மாதங்களுக்குப் பிறகு பிரதான பங்கு வெளியீடாக இது ஜூலை 13-ம் தேதி ஆரம்பிக்கிறது. இந்த நிறுவனம் இந்தியாவின் முன்னணிச் சிறப்பு வகை ரசாயனம் தயாரிக்கும் நிறுவனமாக உள்ளது. இந்த நிறுவனத்தின் வருமானம் மற்றும் லாப வரம்பு தொடர்ந்து அதிகரித்து வருகிறது.

`அதிக ரிஸ்க் எடுக்கக்கூடிய முதலீட்டாளர்கள் இந்த நிறுவனப் பங்குகளில் முதலீடு செய்யலாம்’ என்கிறார்கள் பகுப்பாய்வாளர்கள். இந்த நிறுவனத்துக்கு எஃப்.எம்.சி.ஜி., ஆடைத் தயாரிப்பு, கோழிப்பண்ணை, கால்நடை உணவு, ஜவுளி உள்ளிட்ட துறைகளில் பரவலாக வாடிக்கை நிறுவனங்கள் உள்ளன. வியட்நாம், வங்களாதேசம் உள்ளிட்ட 17 நாடுகளில் இயங்கி வருகிறது.

பங்குகள் வேண்டி ஜூலை 15 வரை விண்ணப்பிக்கலாம். பங்கு ஒன்றின் முகமதிப்பு ரூ.2. பங்கு விலைப்பட்டை ரூ.423-425. குறைந்தபட்சம் 35 பங்குகளுக்கு விண்ணப்பிக்க வேண்டும். அதாவது, குறைந்தபட்ச முதலீட்டுத் தொகை ரூ.14,805. அதிகபட்சமாக ரூ.496 கோடி திரட்டப்படுகிறது” என்றவர், ‘‘இது கடைசிச் செய்தி... கோவிட்-19 காரணமாக டி.சி.எஸ் நிறுவனத்தின் லாபம் முதலாம் காலாண்டில் 13% குறைந்திருக்கிறது’’ என்றபடி போனை வைத்தார்.

ஷேர்லக்: அமெரிக்கப் பங்குகளில் இந்திய நிறுவனங்கள்... முதலீட்டை அதிகரிக்கும் காரணங்கள்..!

எழுச்சி பெறும் துறைகளும் பங்குகளும்..!

ஆன்லைன் பயிற்சி வகுப்பு

கொரோனாவுக்குப் பிறகு எந்தெந்தத் துறைகள் எழுச்சி பெறும், இதனால் வளர்ச்சி பெறும் நிறுவனங்கள் எவையெவை என்பது குறித்து நாணயம் விகடன் ஆன்லைன் பயிற்சி வகுப்பு நடத்துகிறது. இதில் முன்னணி பங்குச் சந்தை நிபுணர் ஏ.கே.பிரபாகர் விளக்க உரையாற்றுகிறார்.

பயிற்சி வகுப்பு ஜூலை 26, 2020, மாலை 6 மணி முதல் இரவு 8 மணி வரை இரண்டு மணி நேரம் நடக்கிறது. இந்தப் பயிற்சி வகுப்பில் பங்கேற்கக் கட்டணம் ரூ.350. ஜூலை 25 மாலை 6 மணிக்கு (இந்திய நேரம்) பதிவு நிறைவு பெறுகிறது. முன் பதிவுக்கு: https://bit.ly/2NvntZg

ஷேர்லக்: அமெரிக்கப் பங்குகளில் இந்திய நிறுவனங்கள்... முதலீட்டை அதிகரிக்கும் காரணங்கள்..!

பெண்களுக்கான முதலீடுகள்!

விழிப்புணர்வு ஆன்லைன் நிகழ்ச்சி

‘பெண்களுக்கான முதலீடுகள்..!’ என்ற தலைப்பில், நாணயம் விகடன் ஒரு முதலீட்டு விழிப்புணர்வு நிகழ்ச்சியை நடத்தவிருக்கிறது. நிதிச் சேவையில் சுமார் 20 ஆண்டுகள் அனுபவம் கொண்ட நிதி ஆலோசகர் வித்யா பாலா (இணை நிறுவனர், Primeinvestor.in) பேசுகிறார். ஜூலை 13, 2020 மாலை 4 முதல் 5:30 மணி வரை. அனுமதி இலவசம்.

முன்பதிவு செய்ய:

https://bit.ly/3f5JjOQ

ஷேர்லக்: அமெரிக்கப் பங்குகளில் இந்திய நிறுவனங்கள்... முதலீட்டை அதிகரிக்கும் காரணங்கள்..!

டிரேடர் பக்கங்கள் மற்றும் எஃப் & ஓ பகுதியைப் படிக்க:

https://bit.ly/2Covexx