Published:Updated:

ஷேர்லக்: உச்சத்தில் அதானி குழுமப் பங்குகள்..! முதலீட்டுக்குக் கவனிக்கலாமா?

ஷேர்லக்
பிரீமியம் ஸ்டோரி
ஷேர்லக்

S H A R E L U C K

ஷேர்லக்: உச்சத்தில் அதானி குழுமப் பங்குகள்..! முதலீட்டுக்குக் கவனிக்கலாமா?

S H A R E L U C K

Published:Updated:
ஷேர்லக்
பிரீமியம் ஸ்டோரி
ஷேர்லக்

உரிய பாதுகாப்புக் கவசங்களுடன் மாலை 4 மணிக்கு நம்மைச் சந்திக்க வந்தார் ஷேர்லக். “பாதிப்பு எண்ணிக்கை மீண்டும் அதிகரித் திருக்கிறது. எனவே, விருந்தோம்பலைத் தவிர்ப்போம்” எனச் சொல்லியபடி, பேச ஆரம்பித்தார்.

கோல் இந்தியா நிறுவனத்தின் பங்கு பரிந்துரைக்கப் பட்டிருக்கிறதே?

“கடந்த மார்ச் மாதத்தில் கோல் இந்தியா நிறுவனத்தின் விற்பனை 12% அதிகரித்திருக்கிறது. கடந்த 2020-21-ம் நிதி ஆண்டின் 660 மெட்ரிக் டன் உற்பத்தி இலக்கை இந்த நிறுவனத்தால் எட்ட முடியாமல் போனாலும், தற்போது வேகமெடுத்திருக்கும் விற்பனையால் இந்த நிறுவனத்தின் லாபம் அதிகரிக்கும். அதை அடுத்து பங்கு விலை உயரும் எனத் தரகு நிறுவனங்கள் நினைக்கின்றன.

குறிப்பாக, டெல்வைஸ் பங்குத் தரகு நிறுவனம், இந்தப் பங்கின் விலை இனிவரும் நாள்களில் 40% வரை உயர வாய்ப்பிருப்பதாகவும், இதன் இலக்கு விலையை 185 ரூபாய் என்கிற அளவில் நிர்ணயித்துள்ளது. இந்தப் பங்கை வாங்கச் சொல்லியும் முதலீட்டாளர்களுக்குப் பரிந்துரை செய்துள்ளது.”

லோதா டெவலப்பர்ஸ் புதிய பங்கு வெளியீடு பற்றி...

“மும்பையைச் சேர்ந்த, பிரபல ரியல் எஸ்டேட் நிறுவனமான ‘லோதா டெவலப்பர்ஸ்’ இப்போது, ‘மேக்ரோடெக் டெவலப்பர்ஸ்’ எனப் பெயர் மாற்றம் செய்துகொண்டு ஐ.பி.ஓ வந்திருக்கிறது. கடந்த ஏப்ரல் 7 முதல் 9-ம் தேதி புதிய பங்கு வெளியீட்டில் களமிறங்கியது. இந்த வெளியீட்டின் மூலம் 2,500 கோடி ரூபாய் நிதியை, முதலீட்டாளர் களிடமிருந்து திரட்ட இந்த நிறுவனம் திட்டமிட்டிருக்கிறது. இதன் பங்கு ஒன்றின் விலை ரூ.483 - ரூ.486 என நிர்ணயம் செய்யப்பட்டிருந்தது.

இந்த ஐ.பி.ஓ-வுக்கு எதிர்பார்த்த அளவு முதலீட்டாளர்களிடம் இருந்து கிடைக்கவில்லை என்றுதான் சொல்ல வேண்டும். இரண்டாம் நாளான இன்று இந்த ஐ.பி.ஓ-வுக்கு 35% பங்குகளுக்கு மட்டுமே விண்ணப்பம் வந்திருந்தது. மீதமுள்ள பங்குகளுக்குமான விண்ணப்பமும் வருமா என்பதை கடைசி நாளான வெள்ளிக்கிழமை அன்று வரும் விண்ணப்பங்களைப் பார்த்துவிட்டுச் சொல்ல முடியும். ஏப்ரல் 16-ம் தேதி அன்று பங்குகள் அலாட்மென்ட் முடிந்து, 22-ம் தேதி அன்று பங்குச் சந்தையில் பட்டியலிடப்படும் எனத் தகவல். பங்குச் சந்தையில் பட்டியலான பின்பு, இந்தப் பங்கின் விலைப் போக்கு எப்படி இருக்கிறது என்று பார்த்துவிட்டு, இந்தப் பங்கு நிறுவனத்தில் முதலீடு செய்யலாமா, கூடாதா என்று முடிவெடுக்கலாம்!”

அதானி குழுமப் பங்குகளின் விலை கணிசமாக ஏற்றம் கண்டிருக்கின்றனவே?

“கடந்த வாரம் செவ்வாய்க்கிழமை அன்று, அதானி குழும நிறுவனங்களான அதானி டோட்டல் கேஸ், அதானி டிரான்ஸ்மிஷன், அதானி பவர், அதானி என்டர்பிரைசஸ், அதானி போர்ட்ஸ், அதானி கிரீன் ஆகியவற்றில் நான்கு நிறுவனங்களின் பங்கு விலை ஏற்றத்தைக் கண்டன. அதானி என்டர்பிரைசஸ் நிறுவனத்தின் பங்கு விலை 8% வரை அதிகரித்து 1,240.45 ரூபாய்க்கும், அதானி டோட்டல் கேஸ் பங்கு விலை 6% வரை அதிகரித்து 1,248 ரூபாய்க்கும், அதானி டிரான்ஸ்மிஷன் பங்கு விலை 5% வரை அதிகரித்து 1,147 ரூபாய்க்கும் மற்றும் அதானி போர்ட்ஸ் அண்டு எக்கனாமிக் ஜோன் நிறுவனத்தின் பங்கு விலை 14% வரை அதிகரித்து 852 ரூபாய்க்கும் வர்த்தக மானது. இதை அடுத்து, அதானி குழுமத்தின் மொத்த பங்குச் சந்தை மதிப்பு 100 பில்லியன் டாலரைத் தாண்டி சாதனை படைத்திருக்கிறது. அதாவது, 106.8 பில்லியன் டாலராக அதிகரித்துள்ளது. இந்திய ரூபாய் மதிப்பில் குறிப்பிட்டால், இது சுமார் ரூ.7.5 லட்சம் கோடியாகும்.

ஷேர்லக்
ஷேர்லக்

அதானி குழுமத்தைச் சேர்ந்த ஆறு நிறுவனங்களின் பங்குகள் பங்குச் சந்தையில் பட்டியலிடப் பட்டுள்ளன. இந்த ஆறு பங்குகளும் கடந்த ஓராண்டு காலத்தில் நன்றாகவே விலை இருக்கின்றன. பணத் தேவை இருப்பவர்கள் மற்றும் எதிர்பார்த்த வருமானம் கிடைத்திருக்கும்பட்சத்தில், இந்தப் பங்குகளிலிருந்து முழு லாபம் அல்லது பகுதி லாபத்தை எடுத்துக் கொள்ளலாம் என்கிறார்கள் அனலிஸ்ட்டுகள். அதே நேரத்தில், நீண்டகால முதலீடாக இந்தப் பங்குகளைப் பார்ப்பவர்கள், பங்கு விலை இறங்கும்போது வாங்கிச் சேர்க்கலாம் என்றும் அவர்கள் சொல்கிறார்கள்.

மத்திய அரசு உள்கட்டமைப்புப் பணிகளுக்கு அதிக முக்கியத்துவம் கொடுத்துவருவது, அதானி குழும நிறுவனங்களுக்குச் சாதகமாக இருக்கிறது. மேலும், மத்திய அரசு தேசிய உள்கட் டமைப்பு கொள்கையை நிறைவேற்ற ரூ.1.10 லட்சம் கோடியை ஒதுக்கீடு செய்திருப்பதும் இந்த நிறுவனங்களுக்கு லாபகரமாக உள்ளது.”

பார்பிகியூ நேஷன் ஹாஸ்பிட்டாலிட்டி பங்கு விலை இறங்கி, ஏற என்ன காரணம்?

“இந்த நிறுவனம் தனது தொழில் விரிவாக்கம் மற்றும் கடன்களைத் திருப்பிச் செலுத்துவதற்கான முதலீட்டைத் திரட்டுவதற்கு ஐ.பி.ஓ-வுக்கு வந்தது. பங்கின் வெளியீட்டு விலையாக ரூ.500 நிர்ணயிக்கப்பட்டிருந்தது. கடந்த வாரம் புதன்கிழமை அன்று இந்த நிறுவனத்தின் பங்குகள் என்.எஸ்.இ சந்தையில் பட்டிய லிடப்பட்டது. காலையில் வர்த்தக ஆரம்பத்தில் இந்தப் பங்கின் வெளியீட்டு விலையைவிட அதாவது, 489.85 ரூபாய்க்கும் குறைவாகப் பட்டியலிடப்பட்டது. இந்தப் பங்குக்கான தேவை அதிக அளவில் இருந்ததால், காலை 10.30 மணிக்கு 20% பங்கு விலை அதிகரித்து, 588 ரூபாய்க்கு வர்த்தக மானது. இது முதலீட்டாளர்களுக்கு மகிழ்ச்சியையும் ஆச்சர்யத்தையும் அளித்தது.”

ஶ்ரீராம் பிராபர்ட்டிஸ் நிறுவனம் ஐ.பி.ஓ வெளியிடுகிறதாமே...

“புதிய பங்கு வெளியீட்டின் மூலம் 800 கோடி ரூபாய் நிதியை முதலீட்டாளர்களிடமிருந்து திரட்ட இந்த நிறுவனம் திட்டமிட்டிருக்கிறது. இந்த வாரம் செபியிடம் விண்ணப்பிக்க வாய்ப்புள்ளது, மேலும், அடுத்த மாதம் இதன் ஐ.பி.ஓ-வைத் தொடங்க செபியிடமிருந்து ஒப்புதல் கிடைக்கும் என்று எதிர்பார்க்கப்படுகிறது.

தற்போது இந்த நிறுவனத்தில் டி.பி.ஜி கேப்பிடல், டாடா கேப்பிடல், வால்டன் ஸ்ட்ரீட் கேப்பிடல் மற்றும் ஸ்டார்வுட் கேப்பிடல் ஆகிய நிறுவனங்கள் முதலீடு செய்திருக்கின்றன. இந்த நான்கு முதலீடுகளின் வசம், ஸ்ரீராம் பிராபர்ட்டீஸ் நிறுவனத்தின் 58% பங்குகள் இருப்பது குறிப்பிடத்தக்கது. இந்த பங்குகளைத்தான் ஐ.பி.ஓ வெளியீட்டின் மூலம் கொஞ்சம் கொஞ்சமாக விற்கலாம் என இந்த நிறுவனம் திட்டமிட்டு இருப்பதாகத் தெரிகிறது.”

சோபா நிறுவனத்தின் பங்கு விலை அதிகரிக்க என்ன காரணம்?

“பெங்களூருவைத் தலைமை யிடமாகக் கொண்டு செயல்படும் இந்த ரியல் எஸ்டேட் நிறுவனம், கடந்த 2020-21-ம் நிதி ஆண்டின் நான்காவது காலாண்டில் ஆயிரம் கோடி ரூபாய்க்கு மேல் மதிப்புள்ள 13,37,707 சதுர அடி அளவிலான பிராபர்ட்டியை விற்பனை செய்துள்ளது. பெங்களூரு, குருகிராம், புனே மற்றும் கொச்சி ஆகிய இடங் களில் அதிக அளவில் விற்பனை ஆகியிருப்பதாக இந்த நிறுவனம் தெரிவித்துள்ளது. இந்த அறிவிப்பை கடந்த வாரம் திங்கள்கிழமை அன்று தெரிவித் ததை அடுத்து, செவ்வாய்க்கிழமை அன்று இந்த நிறுவனத்தின் பங்கு விலை 6.7% அதிகரித்து 458 ரூபாய்க்கு வர்த்தகமானது. வியாழக்கிழமை விலை அதிகரித்து, சுமார் 505 ரூபாய்க்கு வர்த்தகமாகியது.”

டாடா ஸ்டீல் நிறுவனத்தின் மார்க்கெட் கேப்பிடலைசேஷன் அதிகரித்திருக்கிறதே?

“கடந்த வாரம் செவ்வாய்க்கிழமை அன்று, டாடா ஸ்டீல் நிறுவனத்தின் பங்கு விலை 882.30 ரூபாய் வரை அதிகரித்து வர்த்தகமானது. இதன் காரணமான அன்றைய தினத்தின் டாடா ஸ்டீல் நிறுவனத்தின் சந்தை மதிப்பு 105 லட்சம் கோடி ரூபாயாக அதிகரித்தது. இதுவரை டாடா குழும நிறுவனங்களில், மூன்று நிறுவனங்கள் ஒரு லட்சம் கோடி ரூபாய் சந்தை மதிப்பைத் தாண்டியிருக்கின்றன. அந்த வகையில் டாடா ஸ்டீல் நிறுவனம் ஒரு லட்சம் கோடி ரூபாய் மதிப்பைத் தாண்டும் நான்காவது நிறுவனமாகும்.

டாடா ஸ்டீல் நிறுவனத்தைப் போலவே, செவ்வாய்க்கிழமை அன்று பெரும்பாலான மெட்டல் பங்குகள் விலை அதிகரித்து வர்த்தகமாகின. அந்த வகையில் ஜே.எஸ்.டபிள்யூ ஸ்டீல், செயில், ஜே.எஸ்.பி.எல் ஆகிய நிறுவனங்களின் பங்குகள் 1.5 - 2.3% வரை விலை அதிகரித்து வர்த்தகமானது.

ஸ்டீல் துறைப் பங்குகளின் விலையேற்றத்துக்கு முக்கியமான காரணம், வெளிநாட்டு முதலீட்டாளர்கள் இந்தத் துறை சார்ந்த பங்குகளில் அதிகம் முதலீடு செய்ததுதான் என்கிறார்கள் அனலிஸ்ட்டுகள்.”

ஐ.பி.ஓ வந்த பிறகு விலை இறங்கிய கல்யாண் ஜுவல்லர்ஸ் பங்கு, இன்று 4 சதவிகிதத்துக்கும் அதிகமாக விலை உயர என்ன காரணம்?

‘‘இந்த நிறுவனத்தின் இந்தியப் பிரிவின் மூலம் கிடைத்த வருமானம் கடந்த நான்காம் காலாண்டில் 60% உயர்ந்திருப்பதாகத் தகவல் வெளியானதை அடுத்த இந்த நிறுவனப் பங்கின் விலை இன்று 4.22 உயர்ந்தது. இந்த பாசிட்டிவ் செய்தியால் இந்தப் பங்கின் விலை தொடர்ந்து உயருமா, இல்லை மீண்டும் இறங்கத் தொடங்கிவிடுமா என்பதைப் பொறுத்திருந்துதான் பார்க்க வேண்டும். ஐ.பி.ஓ வெளியீட்டின்போது வந்த விலைக்குக் கூட இந்தப் பங்கு விலை வரவில்லை என்பதால், கொஞ்சம் பொறுத்திருந்து பார்த்துவிட்டுத்தான் முதலீட்டு முடிவை எடுக்க வேண்டும்.’’

மீண்டும் நாட்டின் சில மாநிலங்களில் ஊரடங்கு என்கிற பேச்சு கிளம்பியிருக்கிறது. இதனால் பங்குச் சந்தை இறக்கம் காணுமா?

‘‘கடந்த ஆண்டு நடந்ததுபோல பெரிய அளவில் இறக்கம் காணும் என்று சொல்வதற்கு வாய்ப்புகள் குறைவுதான். இப்போதைக்கு கொரோனா நோயைக் கட்டுப்படுத்தும் வழிகள் முழுவீச்சில் இருக்கின்றன. தடுப்பூசிகள் வேகமாகப் போடப்பட்டு வருகின்றன. ஒவ்வோர் அலுவலகத்துக்கும் வந்து தடுப்பூசி போட மத்திய அரசாங்கம் முடிவெடுத்திருப்பது இந்த நோய்ப் பரவலைத் தடுத்து நிறுத்தும் என்று நம்பலாம். எனவே, சந்தை இறங்கினால், அதை முதலீடு செய்வதற்கான ஒரு வாய்ப்பாக நாம் பயன்படுத்திக்கொள்ளலாம். அனைவரும் முகக்கவசம் அணிந்திருப்பது அவசியத்திலும் அவசியம்’’ என்றவர், ‘‘நான் நேற்றுதான் தடுப்பூசி போட்டுக்கொண்டேன்” என்ற தகவலைச் சொல்லியபடி, வீட்டுக்குக் கிளம்பினார்.

ஐ.பி.ஓ வரும் பாலிசிபஜார்..!

இந்தியாவின் ஆன்லைன் இன்ஷூரன்ஸ் தளமான பாலிசிபஜார், வரும் மே மாதத்தில் ஐ.பி.ஓ வெளியிடுவதற்கு செபியிடம் விண்ணப்பிக்கத் திட்டமிட்டிருப்பதாகத் தெரிகிறது. இந்தப் புதிய பங்கு வெளியீட்டின் மூலம் சுமார் 3,725 கோடி ரூபாய் முதலீட்டைத் திரட்ட இந்த நிறுவனம் திட்டமிட்டிருக்கிறது. ஒரு ஸ்டார்ட்அப் நிறுவனம், இவ்வளவு பெரிய தொகையை ஐ.பி.ஓ மூலம் திரட்டுவது, முக்கியமான விஷயமாகப் பார்க்கப்படுகிறது. இந்த வருடத்திலேயே உணவு விநியோக நிறுவனமான ஜொமாட்டோ மற்றும் ஆன்லைன் பியூட்டிகேர் தளமான நைகா இ-ரீடெய்ல் பிரைவேட் லிமிடெட் ஆகிய இரு நிறுவனங்களும் மற்றும் சில டெக்னாலஜி நிறுவனங்களும் ஐ.பி.ஓ வரும் என எதிர்பார்க்கப்படுகிறது.