Published:Updated:

பங்குச் சந்தையின் இன்றைய நிலை... செய்ய வேண்டியதும், செய்யக் கூடாததும்!

வாசு கார்த்தி

பிரீமியம் ஸ்டோரி

பங்குச் சந்தை

சென்செக்ஸ் மற்றும் நிஃப்டி உயர்ந்துகொண்டிருந்தாலும் பங்குச் சந்தையைத் தொடர்ந்து கவனிப்பவர்களுக்கு இது உண்மையான ஏற்றம் அல்ல என்று தெரியும். காரணம், முக்கியக் குறியீட்டில் உள்ள சில பங்குகளைத் தவிர, மிட்கேப் மற்றும் ஸ்மால்கேப் பங்குகள் மிகக் கடுமையாகச் சரிந்திருக்கின்றன. இந்தச் சூழ்நிலையில், இன்றைய பொருளாதாரத்தில் உள்ள சவால்கள், வாய்ப்புகள் மற்றும் சந்தை செல்லும் திசை குறித்து சென்னையில் உள்ள முதலீட்டாளர்களிடம் பேசினார் ஈக்னாமிக்ஸ் ரிசர்ச் அண்டு அட்வைசரி சர்வீசஸ் நிறுவனத்தின் நிறுவனர் ஜி.சொக்கலிங்கம். அவர் பேசியதன் சுருக்கம் இனி...

பங்குச் சந்தையின் இன்றைய நிலை... செய்ய வேண்டியதும், செய்யக் கூடாததும்!

சர்வதேசச் சூழல்

‘‘சர்வதேச அரசியலில் நிச்சயமற்ற சூழல் நிலவுகிறது. கச்சா எண்ணெய் மற்றும் முக்கிய உலோகங்களின் விலை கடுமையாகச் சரிந்திருக்கிறது. துத்தநாகம் விலை 18% சரிந்திருக்கிறது. இதேபோல, அலுமினியம் மற்றும் தாமிரத்தின் விலையும் சரிந்திருக்கிறது. சர்வதேச அளவிலான கடன் பத்திரங்களின் வருமானம் எதிர்மறையில் உள்ளது. ஜெர்மனியின் கடன் பத்திரத்தின் வருமானம் இதுவரை இல்லாத அளவுக்குக் குறைந்திருக்கிறது; பிரான்ஸ் கடன் பத்திரம் எதிர்மறைக்கு மாறியிருக்கிறது. தவிர, சீனா மற்றும் அமெரிக்கா ஆகிய நாடுகளின் கடன் பத்திரங்களின் வருமானமும் குறைந்துள்ளது. (இந்தியாவின் கடன் பத்திரத்தின் வருமானம் கடந்த 20 மாதங்களில் இல்லாத அளவுக்குக் குறைந்துள்ளது.)

பங்குச் சந்தையின் இன்றைய நிலை... செய்ய வேண்டியதும், செய்யக் கூடாததும்!

தவிர, சர்வதேச நாடுகளில் கடந்த சில பத்தாண்டுகளில் இல்லாத அளவுக்குக் குறைந்திருக்கிறது. சீனா 30 ஆண்டுகளில் இல்லாத அளவுக்குக் குறைந்த வளர்ச்சியை (6.2%) அடைந்திருக்கிறது. சர்வதேச வளர்ச்சி விகிதம் 3.5 சதவிகிதத்திலிருந்து 3.3 சதவிகிதமாகக் குறையும் என ஐ.எம்.எஃப் கணித்திருக்கிறது. அமெரிக்க வளர்ச்சி நடப்பாண்டில் 2.1 சதவிகிதமாக இருக்கும். ஆனால், 2020-ம் ஆண்டில் 2 சதவிகிதமாகவும், 2021-ம் ஆண்டில் 1.8 சதவிகிதமாகவும் குறையும் என அமெரிக்க ஃபெடரல் ரிசர்வ் கணித்திருக்கிறது. ஐரோப்பிய யூனியனின் வளர்ச்சியும் 1.9 சதவிகிதத்திலிருந்து 1.2 சதவிகிதமாகக் குறையும் எனக் கணிக்கப்பட்டிருக்கிறது.

சர்வதேசச் சூழலில் வளர்ச்சி குறைவாக இருக்கும் காரணத்தால் அமெரிக்கா மற்றும் ஐரோப்பாவில் நிதிக்கொள்கையில் தளர்வு மற்றும் ஊக்குவிப்பு (Quantitative easing) நடவடிக்கைகள் இருக்கும் என எதிர்பார்க்கப்படுகிறது. ஒட்டுமொத்தமாக, சர்வதேசச் சூழல் சாதகமாக இல்லை.

இந்திய நிலவரம்

இந்திய நிலவரமும் சொல்லிக்கொள்ளும்படி இல்லை. கடந்த ஐந்தாண்டுகளில் குறைவான வளர்ச்சி விகிதத்தில் இந்தியா இருக்கிறது. ரியல் எஸ்டேட், ஐ.டி, பார்மா, ஆட்டோ மற்றும் கட்டுமானம் ஆகிய துறைகளில் மந்தநிலை இருக்கிறது. இதுதவிர, ஒட்டுமொத்த அமைப்பிலும் பணப்புழக்கம் மிகவும் குறைவாக இருக்கிறது. வங்கி அல்லாத நிறுவனங்களுக்கு நிதிச்சிக்கல் உள்ளது. பொதுத்துறை வங்கிகளுக்கு நிதி தேவைப்படுகிறது. ரியல் எஸ்டேட் நிறுவனங்கள் கடும் நிதிநெருக்கடியில் உள்ளன. மும்பையில் சிறுசிறு ரியல் எஸ்டேட் நிறுவனங்களின் உரிமையாளர்கள் தற்கொலை செய்யும் போக்கு அதிகரித்திருக்கிறது. வாராக் கடன் நிறுவனங்கள் தேசிய சட்ட நிறுவனத் தீர்ப்பாயத்திடம் சென்றாலும், அந்த நிறுவனத்தை வாங்க மற்ற நிறுவனங்களிடம் பணம் இல்லை.

ஜி.சொக்கலிங்கம்
ஜி.சொக்கலிங்கம்

சந்தையிலிருந்து ஐ.பி.ஓ மூலம் நிதி திரட்டுவதும், கியூ.ஐ.பி முறையில் பணம் திரட்டுவதும் குறைந்திருக்கிறது. ஒட்டுமொத்தமாக, நிதிப்புழக்கம் குறைவாக இருக்கிறது. தவிர, பருவமழை பெய்வது போலத் தோற்றம் இருந்தாலும், இயல்பைவிட பல பிராந்தியங்களில் மிகக் குறைவாகவே பெய்திருக்கிறது.

மாநில அரசுகளின் பிரச்னை

மாநில அரசுகளின் கடன் பிரச்னை இன்னும் பத்தாண்டுகளில் மிகப் பெரிய பிரச்னையாக உருவெடுக்கும் வாய்ப்பிருக்கிறது. 2014-ம் நிதியாண்டில் இந்திய அரசின் கடன் ரூ.5.63 லட்சம் கோடி யாக இருந்தது. 2019-ம் நிதியாண்டு முடிவில் மிகச் சிறிய அளவுக்கு உயர்ந்து, ரூ.5.71 லட்சம் கோடியாக மட்டுமே உயர்ந்திருக்கிறது.

தவறான பங்குகளில் முதலீடு செய்யாமல் இருப்பதே பெரும் செல்வத்தைச் சேர்ப்பதற்கான வழியாகும். சுமார் 1,860 பங்குகள் தினமும் வர்த்தகமாகின்றன. கடந்த ஜனவரியிலிருந்து இதில் 42% பங்குகள் சுமார் 50% சரிந்திருக்கின்றன.

ஆனால், மாநில அரசுகளின் கடன் மிகவும் அதிகரித்திருக்கிறது. 2014-ம் நிதியாண்டு முடிவில் மாநில அரசுகளின் கடன் ரூ.1.96 லட்சம் கோடியாக இருந்தது, 2019-ம் ஆண்டு முடிவில் ரூ.4.78 லட்சம் கோடியாக அதிகரித்துள்ளது. இப்போதைக்கு இது பெரிய அளவில் இல்லையென்றாலும், மாநில அரசுகள் தங்களின் கடன் அளவினைக் குறைக்கும் முயற்சியில் இறங்கவில்லையெனில், 10 ஆண்டுகளுக்குப் பிறகு மிகப் பெரிய சிக்கலை நாம் சந்திக்கவேண்டியிருக்கலாம்.

சாதகங்கள்

இதையெல்லாம் படிக்கும்போது, இந்தியப் பொருளாதாரத்தில் இத்தனை பிரச்னைகளா என்று நினைக்கத் தோன்றலாம். பாதகமான பல விஷயங்கள் இருக்கும் அதேசமயத்தில், சில சாதகமான சூழலும் நமக்கு இருக்கவே செய்கிறது. அந்நியச் செலாவணிக் கையிருப்பு அதிகளவில் உள்ளது. அரசியல் நிலைத்தன்மை காரணமாக அந்நிய நேரடி முதலீடு வருவதற்கான வாய்ப்புள்ளது. தற்போது வெளியான பட்ஜெட்டில் நிதி அமைச்சர் நிர்மலா சீதாராமன் குறிப்பிட்டதைப் போல, கடந்த ஆண்டில் அந்நிய நேரடி முதலீட்டைப் பெற்ற நாடு இந்தியா. கச்சா எண்ணெய் குறைவது சர்வதேச அளவில் சிக்கலாக இருந்தாலும், இந்தியா இதனால் பயன் பெறமுடியும். மேலும், ஐந்து லட்சம் கோடி டாலர் என்னும் இலக்கை இந்தியா எட்டுவதற்கான சாத்தியங்கள் உள்ளன.

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

என்ன செய்யக் கூடாது?

இந்த நிலைமையில் பங்குச் சந்தையைப் பொறுத்தவரை என்ன செய்ய வேண்டும் என்பதைவிட என்ன செய்யக்கூடாது என்பது முக்கியம். அதைச் சொல்கிறேன்.

பங்குச் சந்தையின் இன்றைய நிலை... செய்ய வேண்டியதும், செய்யக் கூடாததும்!

தவறான பங்குகளில் முதலீடு செய்யாமல் இருப்பதே பெரும் செல்வத்தைச் சேர்ப்பதற்கான வழியாகும். சுமார் 1,860 பங்குகள் தினமும் வர்த்தகமாகின்றன. கடந்த ஜனவரியிலிருந்து இதில் 42% பங்குகள் சுமார் 50% சரிந்திருக்கின்றன. 17% பங்குகள் 70 சதவிகிதத்துக்கு மேல் சரிந்துள்ளன. இந்தச் சரிவுக்கு இரு காரணங்கள்.

முதலாவது, தவறான நிர்வாகம்; அடுத்தது, அளவற்ற கடன் (Leverage). இதன் காரணமாகவே பங்குச் சந்தையில் சரிவு ஏற்பட்டது. இது தவிர, பங்குகளை அடமானம் வைப்பது, அதிக சந்தை மதிப்பு, தொழிலுக்கான சூழல் மாறியிருப்பது உள்ளிட்டவையும் சரிவுக்குக் காரணங்களாகும்.

கெமிக்கல் துறை சார்ந்த பங்குகள் மிகக் கடுமையாகச் சரிந்திருக்கின்றன. இதற்குக் காரணம் முக்கிய கெமிக்கல்களின் விலை 16% முதல் 60% வரை சரிந்திருக்கின்றன. இதனால் இந்தப் பங்குகளில் சரிவு ஏற்பட்டிருக்கிறது. இந்தப் பங்குகள் சரிவிலிருந்து மீள 5 முதல் 10 ஆண்டுகள்கூட ஆகலாம். சில பங்குகள் மீள்வதற்கு வாய்ப்பே கிடையாது. அதனால் இந்தத் துறையை முதலீட்டாளர்கள் தவிர்ப்பது நல்லது.

அதேபோல, அடிக்கடி வரும் செய்திகளுக்கு முக்கியத்துவம் கொடுக்க வேண்டாம். பாம்பே பர்மா பங்கின் நிறுவனர்கள் பங்கினை அடமானம் வைத்துவிட்டனர் என்னும் செய்தி காரணமாக அந்தப் பங்கு கடுமையாகச் சரிந்தது. ஆனால் 5% பங்குகள் மட்டுமே அடமானம் வைக்கப்பட்டி ருந்தது. அவர் வசமுள்ள ரூ.4,122 கோடியில் ரூ.200 கோடிக்கு மட்டுமே அடமானம் வைக்கப் பட்டது. உண்மை தெரியாமல் சந்தையின் போக்குக்கேற்ப செயல்பட்டால் பதற்றத்தில் தவறான விலைக்கு விற்கும் சூழல் உருவாகும்.

என்ன செய்யலாம்?

2001-ம் ஆண்டு மிட்கேப் குறியீடு 30% சரிந்தது. அடுத்த ஆண்டு 24% உயர்ந்தது. அடுத்த மூன்றாண்டு களில் 55% (சி.ஏ.ஜி.ஆர்) உயர்ந்தது. அதேபோல, 2008-ம் ஆண்டு 59% சரிந்தது. அடுத்த ஆண்டு 99% உயர்ந்தது. அடுத்த மூன்றாண்டு சராசரி வளர்ச்சி 18% ஆகும். 2011-ம் ஆண்டும் 31% சரிந்தது. அடுத்த ஆண்டு 39% உயர்ந்தது. அடுத்த மூன்றாண்டுகளில் 27% (சி.ஏ.ஜி.ஆர்) உயர்ந்தது.

இதேபோல, 2018-ம் ஆண்டு மிட்கேப் குறியீடு 18% சரிந்திருக்கிறது. 2019-ம் ஆண்டில் இதுவரையிலும் 6% சரிந்திருக்கிறது. இனி உயர்வதற்கான வாய்ப்புகளே அதிகம். இந்தச் சூழலில் சரியான பங்குகளைத் தேர்வு செய்யும்போது லாபம் பார்க்கும் வாய்ப்பு அதிகம். பழைய தனியார் வங்கிகள், லீஸ் மாடலில் இயங்கும் நிறுவனங்கள், டயர் மற்றும் மொபைல் துறை, பார்மா (எம்.என்.சி) துறை, பெரிய பொதுத்துறை வங்கிகள், மெட்டல் துறையைச் சேர்ந்த பங்குகளில் முதலீட்டாளர்கள் கவனம் செலுத்தலாம்.’’

பங்குச் சந்தை தற்போதிருக்கும் நிலையைப் புரிந்துகொண்டு செயல்பட சொக்கலிங்கத்தின் இந்தப் பேச்சு நிச்சயம் உதவும்!

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு