பங்குச்சந்தையில் டிரேடு செய்ய பொருத்தமான பங்குகள்! #SmartInvestorIn100Days நாள் - 71

``கடைக்குச் சென்று கத்திரிக்காய் வாங்கி வருகிறீர்களா?" என்று கேட்டால் ``ஓ... அதற்கென்ன! வாங்கிவந்துவிட்டால் போயிற்று” என்று கிளம்பிவிடக் கூடாது. ஏன், எதற்கு என்று கேட்க வேண்டும்.

`கத்திரிக்காய் வாங்குவது என்ன அவ்வளவு பெரிய விஷயமா?'

ஆமாம். எதற்கு என்று தெரிந்தால்தான் சரியான வகை காத்திரிக்காய் வாங்க முடியும். கத்திரிக்காயில் பல வகைகள் உண்டு. பெரிசாய், வெளிர் பச்சையாய் இருப்பது கோசுமல்லி எனும் ஒருவகை; சாம்பார் வைக்க ஏற்றது. கத்திரிப்பூ நிறத்திலிருக்கும் குட்டி குட்டி கத்திரிக்காய்கள் பொரிக்க மற்றும் எண்ணெய்யில் வதக்க ஏற்றவை. இன்னும் சில வகைகளும் இருக்கின்றன. கத்திரிக்காய் ஓர் உதாரணம்தான்.

இன்ன சமையலுக்கு இந்த வகை காய் ஏற்றது என்பதுபோல, பங்குகளிலும், முதலீட்டுக்குப் பொருத்தமானவை, டிரேடிங்குக்கு ஒத்துவருபவை என்று வகைகள் உண்டு. பொருத்தம் பார்த்து செய்ய வேண்டும்.

பட்டியலிடப்பட்டிருக்கும் பங்குகள் எல்லாமே டிரேடிங்குக்கு ஏற்றவை அல்ல.

டிரேடிங் என்றாலே, வாங்கி உடனே விற்பது அல்லது விற்றுவிட்டு, உடனே வாங்கிவிடுவது. முதலாவது, `லாங்' போவது. இரண்டாம் வகை, `ஷார்ட்’ போவது.

பியூச்சர்ஸ் & ஆப்ஷன்ஸ் தவிர ஏனைய கேஷ் மார்கெட் வர்த்தகங்களில் வாங்கினால், அன்றே பணம் கொடுக்கவேண்டும். விற்றால் அன்றே பங்கை, `டெலிவரி’ கொடுக்க வேண்டும். இப்படியிருக்கையில் எப்படி ஷார்ட் போக முடியும் என்று சிலருக்கு சந்தேகம் வரலாம்.

முதலில் கையில் இல்லாமலேயே ஒரு குறிப்பிட்ட பங்கை விற்பது. `செல் ஆர்டர்’. பின்பு அன்றைய வர்த்தக நேரம் முடிவதற்குள், விற்ற அதே பங்கை அதே அளவு (குவான்டிட்டி) வாங்கிவிடுவது. இதைப் பங்குச்சந்தைகள் அனுமதிக்கின்றன. விற்றதை வாங்கி நேர் செய்தாயிற்று. Squared off என்பார்கள். நோ பிராப்ளம்.

நேர் செய்தால் நோ பிராப்ளம். நேர் செய்யாவிட்டால்?

ஆ... அது நல்ல கேள்வி. நேர் செய்யாவிட்டால் நிச்சயம் பிரச்னைதான். விற்கும்போது உங்களிடம் பங்கு இருக்கிறதா இல்லையா என்றெல்லாம் கேட்க மாட்டார்கள். `செல் ஆர்டரா? ஓக்கே. போடு’ என்று போட்டு விற்றுவிடுவார்கள். பின்னர், அன்றைய தின வர்த்தகம் முடிவதற்குள், `பை ஆர்டர்’ போடச் சொல்வார்கள் அல்லது டெலிவரி தரமுடியுமா என்று கேட்பார்கள்.

விற்றவர் வசம் அந்தப் பங்கு இருந்தால் சரி. இல்லாவிட்டால், சந்தையில் `பை’ செய்தாக வேண்டும். என்ன விலையாக இருந்தாலும். இல்லாவிட்டால், விற்றவருக்காக அவர்களே, சந்தை நேரத்துக்குப் பின் நடக்கும் ஏலத்தில் விவரம் தெரிவித்து, வேறு எவரிடமிருந்தாவது, கிடைத்த விலைக்கு வாங்கி டெலிவரி கொடுத்து, நேர் செய்துவிடுவார்கள்.

இப்படிச் செய்வதன் பெயர் ஆக்‌ஷன் (Auction).

முன்பு பார்த்த பையர் ஃபிரீஸ் நினைவிருக்குமே. ஒருவர் முதலில் ஷார்ட் போய்விட்டு, பின்பு வாங்கி கவர் பண்ண நினைக்கையில் அந்நிறுவனப் பங்கு பையர் ஃபிரீஸ் ஆகியிருந்தால், என்ன ஆகும்? `பையர் ஃபிரீஸ்’ என்றால் வாங்க ஆட்கள் உண்டு. ஆனால், விற்க ஆட்களில்லை.

விற்க எவருமேயில்லை என்ற நிலையில், காலையில் ஷார்ட் போனவர் எப்படி வாங்கி நேர் செய்வது? முடியாது. அதனால் ஆக்‌ஷன். ஏலம் என்றால் சந்தை விலையைக் காட்டிலும் கூடுதல்.

ஆகவே, இந்த `ஃபிரீஸ்’ ஆகும் பங்குகள் பொதுவாக டிரேடிங்குக்கு, குறிப்பாக, ஷார்ட் அடிக்க ஏற்றவை அல்ல. ஷார்ட் அடிப்பதற்கு முன், குறிப்பிட்ட பங்கின் `மார்க்கெட் டெப்த்’ எப்படி இருக்கிறதென்று தெரிந்துகொள்ள வேண்டும்.

அதற்காக விபரம் தெரிந்த டிரேடர்கள், குறிப்பிட்ட பங்கில் அன்றைக்கு இப்படி `வாங்க / விற்கத் தயாராக இருப்பவர்கள் ஆஃபர் செய்யும் பங்குகள் எண்ணிக்கை' எவ்வளவு என்று தெரிந்துகொள்ள, தரகு நிறுவனங்களில் இருக்கும் டீலர்களிடம் அந்த நேரம் அந்தப் பங்குக்கு `மார்க்கெட் டெப்த்’ எவ்வளவு என்று கேட்பார்கள்.

டீலர்களிடம் கேட்க வேண்டும் என்பதில்லை. வலைதளத்தில் இருந்து எவரும் தெரிந்துகொள்ள முடியும். வாங்க ஆர்டர் போடப்பட்டிருக்கும் பங்குகள் எண்ணிக்கையும், விற்க ஆர்டர்கள் போடப்பட்டிருக்கும் பங்குகளின் எண்ணிக்கையும் சந்தையின் வலைதளத்தில் இருக்கும். அவ்வவ்போது மாறிக்கொண்டேயிருக்கும்.

அன்றைய தினம், அது சமயம், குறிப்பிட்ட பங்கை விற்க நினைப்பவர்கள் என்னென்ன விலைகளில் எவ்வளவு தருவதற்கு தயார் என்றும், வாங்க நினைப்பவர்கள், என்னென்ன விலைகளில் எவ்வளவு வாங்கத் தயார் என்றும் குறிப்பிட்டிருப்பார்கள். அவற்றின் பெயர் `பிட்’ (Bid).

உதாரணத்துக்காக, தேசிய பங்குச் சந்தையில் வர்த்தகமாகும் கோப்ரான் என்ற ஒரு நிறுவனப் பங்கின் `ஆர்டர் புக்’ விவரங்களைப் பார்க்கலாம். இது சில நாள்களுக்கு முன்பிருந்த நிலை.

27.12`2019 அன்று கோப்ரான் பங்குக்கு மாலை 3.28 மணி அளவில் இருந்த மொத்த `பை’ அளவு 70,226 பங்குகள். மொத்த `செல்’ அளவு 27,684 பங்குகள். இதுதான் அதன் அப்போதைய `மார்க்கெட் டெப்த்’.

அப்படியென்றால், அந்தப் பங்கு விலை அதிகரிக்கும் வாய்ப்பு அதிகம். மாறாக விற்க `பிட்’கள் அதிகமாவும் வாங்க குறைவாகவும் இருந்தால்; விலை குறையக்கூடிய வாய்ப்புகள் அதிகம். இப்படி இந்தத் தகவலைப் புரிந்துகொண்டு, `லாங்’ அல்லது `ஷார்ட் டிரேட்’ செய்ய ஆரம்பிப்பார்கள்.

சோம.வள்ளியப்பனிடம் நீங்கள் கேட்க விரும்பும் கேள்விகளை இங்கு பதிவு செய்யுங்கள். தேர்ந்தெடுக்கப்பட்ட கேள்விகளுக்குப் பதிலளிப்பார்.