Published:Updated:

வரிக் கணக்கு தாக்கல் செய்வதால் கிடைக்கும் 12 நன்மைகள்..! நீங்களும் தெரிந்துகொள்ளுங்கள்...

T A X F I L I N G

செய்திகளை உடனுக்குடன் தெரிந்துகொள்ள... இங்கே க்ளிக் செய்து இன்றே விகடன் ஆப் இன்ஸ்டால் செய்யுங்கள்!

பிரீமியம் ஸ்டோரி

ஆர்.ஜெகதீஷ், ஆடிட்டர், தேனி

மாதச் சம்பளம் வாங்குபவர்கள், தங்களின் சம்பளம் வரிக்கு உட்பட்ட வருமானத்துக்குக் (Taxable Income) கீழே இருந்தால், வரிக் கணக்கு தாக்கல் (Filing ITR - Filing Income Tax Returns) செய்யத் தேவையில்லை எனப் பலரும் நினைக்கிறார்கள். இது தவறான எண்ணம்.

ஆர்.ஜெகதீஷ் 
ஆடிட்டர், 
தேனி
ஆர்.ஜெகதீஷ் ஆடிட்டர், தேனி

வரிக்கு உட்பட்ட வருமானம், 60 வயதுக்கு உட்பட்டவர்களுக்கு ரூ. 2.5 லட்சம், 60 வயதுக்கு மேல் 80 வயதுக்கு உட்பட்டவர்களுக்கு ரூ.3 லட்சம், 80 வயதுக்கு மேற்பட்டவர் களுக்கு ரூ.5 லட்சம் என இருந்தால், ஒருவர் வரிக் கட்ட வேண்டியிருக்காது என்பதுடன், வரிக் கணக்கும் தாக்கல் செய்ய வேண்டிய அவசியம் இல்லை. ஆனால், ஒருவர் ஒரு நிதி ஆண்டில் மின் கட்டணமாக ரூ.1 லட்சத்துக்கு மேல் செலுத்தும் பட்சத்தில் வருமான வரிக் கணக்கு கட்டாயம் தாக்கல் செய்ய வேண்டும்.

அதேபோல், வெளிநாட்டுச் சுற்றுலாவுக்கு ரூ.2 லட்சத்துக்கு மேல் செலவு செய்திருக்கும்பட்சத்தில், அவர் தனது வருமான வரிக் கணக்கை அவசியம் தாக்கல் செய்ய வேண்டும். ஒருவரின் ஒன்றுக்கு மேற்பட்ட நடப்பு வங்கிக் கணக்குகளில் நிதி ஆண்டில் ரூ.1 கோடிக்கு மேல் பரிவர்த்தனை செய்யப்பட்டிருக்கும் பட்சத்தில் வரிக் கணக்கு தாக்கல் செய்வது கட்டாயம். ஒருவரின் வரிக்கு உட்பட்ட ஆண்டு வருமானம் ரூ.5 லட்சத்துக்குக் கீழே இருந்தாலும் மேற்கண்ட மூன்று நிலைகளில் ஏதாவது ஒன்று நடந்திருந்தாலும் வரிக் கணக்கு தாக்கல் செய்ய வேண்டும். (இது 139 (1)-ன் ஏதாவது பிரிவின்கீழ் வருகிறது.)

வருமான வரிக் கணக்கு தாக்கல் செய்வதால் கிடைக்கும் ஒரு டஜன் நன்மைகளை ஒவ்வொன்றாகப் பார்ப்போம்.

வரிக் கணக்கு தாக்கல் செய்வதால் கிடைக்கும் 12 நன்மைகள்..! நீங்களும் தெரிந்துகொள்ளுங்கள்...

1. முகவரிக்கான ஆதாரம்

ஐ.டி.ஆர் ஒப்புதல் (ITR Acknowledgemen) பதிவு செய்யப்பட்ட முகவரிக்கு அனுப்பப்பட்டிருக்கும் பட்சத்தில் அதைக் குடியிருக்கும் வீட்டுக்கான முகவரி ஆதாரமாகப் பயன்படுத்த முடியும். ஆதார் கார்டை முகவரிக்கான ஆதாரமாகப் பயன் படுத்துவது போல, இந்த ஐ.டி.ஆர் ஒப்புதல் படிவத்தையும் பயன்படுத்தலாம்.

2. முழுமையான வருமான ஆதாரம்

பணிபுரியும் நிறுவனத்தில் வழங்கப் படும் படிவம் 16 என்பது சம்பளம், சம்பளப் பிடித்தம் ஆகிய விவரங்களை மட்டுமே கொண்டிருக்கும். ஆனால், ஐ.டி.ஆர் ஒப்புதல் படிவத்தில் ஒருவரின் இதர வருமானம், மூலதன ஆதாயம் போன்றவை சேர்ந்த முழுமையான வருமானம் இடம் பெற்றிருக்கும். அந்த வகையில் அதை ஒருவரின் முழுமையான வருமான ஆதாரம் எனக் குறிப்பிடலாம். அதிக தொகை கடன் தேவைப்படும் பட்சத்தில் படிவம் 16–ஐவிட ஐ.டி.ஆர் ஒப்புதல் மிகவும் உதவியாக இருக்கும்.

3. தொழில் வல்லுநர்கள், ஃப்ரீலேன்சர்களுக்கு வருமான ஆதாரம்

மருத்துவர்கள், வழக்கறிஞர்கள் போன்ற தொழில் வல்லுநர்கள், வேலைக்குச் செல்லாமல் தனிப்பட்ட முறையில் வருமானம் ஈட்டும் ஃப்ரீலேன்சர்களுக்கு படிவம் 16 கிடையாது. அவர்களுக்கு வருமான வரிக் கணக்கு தாக்கலுக் கான ஒப்புதல் படிவம்தான் வருமான ஆதாரம் ஆகும். இவர்கள் ஐ.டி.ஆர் படிவம் தாக்கல் செய்யவில்லை எனில், பணப் பரிமாற்றம் தொடங்கி கடன் பெறுவது வரையில் பல சிக்கல்களைச் சந்திப்பார்கள்.

4. வீட்டுக் கடன் வட்டி: முழுமையான வரிச் சலுகை

வீட்டுக் கடனுக்குத் திரும்பச் செலுத்தும் வட்டியில் ஓராண்டில் ரூ.2 லட்சத்துக்கு மட்டுமே வரிச் சலுகை பெற முடியும். அதற்கு மேற்படும் வட்டித் தொகைக்கு அடுத்துவரும் ஆண்டுகளில் வரிச் சலுகை பெற முடியும். அதற்கு ஆண்டுதோறும் சரியான தேதிக்குள் வரிக் கணக்கு தாக்கல் செய்வது கட்டாயமாகும்.

5. மூலதன இழப்புகளுக்கான வரிச் சலுகை

பங்கு முதலீடு, ஈக்விட்டி மியூச்சுவல் ஃபண்ட் முதலீடு போன்றவற்றில் குறுகியகாலம் மற்றும் நீண்டகால மூலதன இழப்பு இருக்கும்பட்சத்தில், அதை அடுத்துவரும் ஆண்டுகளின் லாபத்தில் ஈடுகட்ட முடியும். அதற்கு வரிக் கணக்கு தாக்கல் செய்திருப்பது அவசியம். அப்போது மட்டுமே அடுத்து வரும் ஆண்டுகளுக்கு இந்த இழப்பை எடுத்துச் சென்று லாபத்தில் ஈடுகட்டி குறைவாக வரி கட்ட முடியும்.

6. வரி பாக்கி வட்டியைத் தவிர்க்க...

சரியான நேரத்தில் ஒருவர் வரிக் கணக்கை தாக்கல் செய்ய வில்லை என்று வைத்துக் கொள்வோம். அவருக்கு வரி பாக்கி இருக்கிறது எனில், அவர் தாமதமாகும் ஒவ்வொரு மாதத்துக்கும் 1% வட்டி கட்ட வேண்டும்.

7. கூடுதல் வரியைத் திரும்பப் பெற...

வங்கி ஃபிக்ஸட் டெபாசிட் வட்டி 10,000 ரூபாயைத் (மூத்த குடிமக்களுக்கு ரூ.50,000), தாண்டும்போது, மியூச்சுவல் ஃபண்ட் டிவிடெண்ட் மற்றும் பங்கு முதலீடு டிவிடெண்ட் 5,000 ரூபாயைத் தாண்டும்போது வங்கி, மியூச்சுவல் ஃபண்ட் நிறுவனம், பங்குச் சந்தை நிறுவனம் ஆகியவை 10% மூலத்தில் வரிப் பிடித்தம் (டி.டி.எஸ்) செய்யும். ஒருவர் வரிக்குட்பட்ட வருமானத்துகுள் வரவில்லை அல்லது 5% வரி வரம்புக்குள்தான் வருகிறார் எனில், கூடுதலாகப் பிடிக்கப் பட்ட வரியை வரிக் கணக்கு தாக்கல் செய்வதன் மூலம்தான் திரும்பப் பெற முடியும்.

8. கடன் வாங்கும் நடைமுறை எளிது

வீட்டுக் கடன், கார் கடன், தனிநபர் தொடங்கி பல கடன் களுக்கு விண்ணப்பிக்கும்போது கடந்த மூன்று ஆண்டுகளின் வரிக் கணக்கு தாக்கல் விவரங்களை வங்கிகள் மற்றும் நிதி நிறுவனங்கள் கேட்கின்றன. இதை ஒருவர் அளிக்கும்பட்சத்தில் கடனுக் கான நடைமுறை எளிதாக இருக்கும்.

9. கிரெடிட் கார்டு கிடைக்காது

கிரெடிட் கார்டு கேட்டு விண்ணப்பிக்கும்போது, வரிக் கணக்கு தாக்கல் செய்யவில்லை எனில், வங்கிகள் உங்களின் விண்ணப்பத்தை நிராகரிக்க கூடும். எனவே, வரிக் கணக்கு தாக்கலைக் கட்டாயம் செய்து விடுங்கள்.

10. வெளிநாட்டுக்கு விசா சிக்கல் இல்லாமல் கிடைக்க...

விசா வழங்கும் அதிகாரிகள், கடந்த மூன்று ஆண்டுகளில் வரிக் கணக்கு செய்தற்கான ஆதாரங்களைக் கேட்பார்கள். குறிப்பாக, அமெரிக்கா, கனடா, இங்கிலாந்து போன்ற வெளிநாடு களுக்குச் செல்ல விசா பெற ஐ.டி.ஆர் ஆதாரம் தேவைப்படும்.

11. அதிக தொகை முதலீடு

பெரிய மதிப்பு கொண்ட முதலீடுகளை குறிப்பாக, சொத்து வாங்கினால், அதை வருமான வரிக் கணக்கு தாக்கல் மூலம் வருமான வரித் துறைக்குத் தெரிவிக்க வேண்டும். அதில் மூலதன ஆதாய வரி விவரத்தையும் குறிப்பிட வேண்டும்.

12. அதிக தொகைக்கு ஆயுள் காப்பீடு பாலிசி எடுக்க...

கோடிக்கணக்கான ரூபாய்க்கு ஆயுள் காப்பீடு, குறிப்பாக டேர்ம் பிளான் எடுக்கும்போது காப்பீடு நிறுவனங்கள் வரிக் கணக்கு தாக்கல் விவரங்களைக் கேட்கும். வரி ஏய்ப்பு (Tax-evader)செய்பவர்களுக்கு காப்பீட்டு நிறுவனங்கள் அதிக தொகைக்கு பாலிசி வழங்காது என்பதைக் கவனத்தில் கொள்ளுங்கள்.

மேற்சொன்ன 12 நன்மைகளும் உங்களுக்குக் கிடைக்க வேண்டுமெனில் இனி சரியான நேரத்தில் நீங்கள் வரிக் கணக்கைத் தாக்கல் செய்துவிடுங்கள்.

வரிக் கணக்கு தாக்கல் செய்யவில்லை எனில்..?

ஒருவர் சரியான நேரத்தில் வரிக் கணக்கு தாக்கல் செய்யவில்லை எனில், அபராதம் விதிக்கப்படுவதுடன் வருமான வரித் துறையின் கண்காணிப்புக்குள் (Penalties & Scrutiny) கொண்டு வரப்படுவார்.

வரிக்கு உட்பட்ட வருமானம் ரூ.5 லட்சத்துக்குள் எனில், அபராதம் ரூ.1,000. அதற்கு மேற்பட்டிருந்தால் அபராதம் ரூ.5,000, ரூ.10,000 என காலதாமதத்தைப் பொறுத்து அதிகரிக்கும். குறிப்பிட்ட காலத்துக்குப் பிறகு, வரிக் கணக்கு தாக்கல் செய்ய முடியாத நிலை உருவாகிவிடும். இதனால், பல சிக்கல்களைச் சந்திக்க நேரும். எனவே, சரியான நேரத்தில் வரிக் கணக்கு தாக்கல் செய்வது நல்லது.

யார் வரிக் கணக்கு தாக்கல் செய்ய வேண்டாம்?

75 வயதுக்கு மேற்பட்ட மூத்த குடிமக்கள் வரிக் கணக்கு தாக்கல் செய்யத் தேவையில்லை. இதிலும் சில நிபந்தனைகள் இருப்பதைக் கவனிக்க வேண்டும். அதாவது, 75 வயதைத் தாண்டியவர் பென்ஷன் மற்றும் வட்டி வருமானத்தை ஒரே வங்கியிலிருந்து பெறுபவர் களாக இருக்க வேண்டும். புதிய பிரிவான 194P-யின் படி, அந்த வங்கி இந்த மூத்தக் குடிமக்களுக்கான வரியை மூலத்திலிருந்து பிடித்துக்கொள்ளும்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு