Published:Updated:

செலவு செய்யுங்கள்... வருமான வரியைச் சேமியுங்கள்..!

வரிச் சலுகை
பிரீமியம் ஸ்டோரி
வரிச் சலுகை

வரிச் சலுகை

செலவு செய்யுங்கள்... வருமான வரியைச் சேமியுங்கள்..!

வரிச் சலுகை

Published:Updated:
வரிச் சலுகை
பிரீமியம் ஸ்டோரி
வரிச் சலுகை

சில அத்தியாவசியத் தேவைகளுக்கு செய்யும் செலவுகளுக்கு வருமான வரிச் சலுகை இருக்கிறது. மத்திய அரசைப் பொறுத்த வரை, பொதுமக்களுக்கு சில அத்தியாவசிய வசதிகள் மற்றும் சேவைகளைச் செய்து கொடுக்க வேண்டும். அதனால், இயலாத இடங் களில் பொதுமக்கள் தாங்களே அந்த வசதி மற்றும் சேவைக்கு ஏற்பாடு செய்துகொள்ளும் போது அந்தச் செலவுகளுக்கு வருமான வரிச் சலுகை அளிக்கிறது.

வருமான வரி செலுத்தும் ஒருவர் செய்யும் செலவு களுக்கு மத்திய அரசு அளிக்கும் வரிச் சலுகை குறித்து விரிவாகப் பார்ப்போம்.

டாக்டர் அபிஷேக் முரளி ஆடிட்டர் & பிரசிடென்ட், 
அகில இந்திய வரி செலுத்துவோர் சங்கம்
டாக்டர் அபிஷேக் முரளி ஆடிட்டர் & பிரசிடென்ட், அகில இந்திய வரி செலுத்துவோர் சங்கம்

ஆயுள் காப்பீடு பிரீமியம்...

குடும்பத்தில் வருமானம் ஈட்டும் நபரின் பெயரில் ஆயுள் காப்பீடு பாலிசி எடுப்பது மிக அவசியமாகும். அப்போதுதான், அவர் இந்த உலகில் இல்லாதபோது அவரை நம்பி இருக்கும் குடும்பம் நிதி ரீதியாகத் திண்டாடாமல் வாழ்க்கையை அடுத்தகட்டத்துக்கு நகர்த்திச் செல்ல முடியும்.

அந்த வகையில், ஆயுள் காப்பீட்டு பாலிசிக்கு கட்டும் பிரீமியச் செலவுக்கு நிதி ஆண்டில் 80C பிரிவின்கீழ் நிபந்தனைக்கு உட்பட்டு ரூ.1.5 லட்சம் வரைக்கும் வரிச் சலுகை அளிக்கப்படுகிறது.

பாரம்பர்யத் திட்டமான எண்டோவ்மென்ட் பிளான், மணிபேக் பாலிசி, வோல் லைஃப் பிளான், பங்குச் சந்தை சார்ந்த காப்பீட்டு திட்டமான யூலிப், முழுக்க முழுக்க காப்பீட்டுத் திட்டமான டேர்ம் பிளான் ஆகியவற்றுக்கு கட்டும் பிரீமியத்துக்கு வரிச் சலுகை கிடைக்கும்.

செலவு செய்யுங்கள்... வருமான வரியைச் சேமியுங்கள்..!

மருத்துவக் காப்பீடு பிரீமியம்...

ஆயுள் காப்பீடு பாலிசியை வருமானம் ஈட்டும் நபரின் பெயரில் எடுக்கும் அதே நேரத்தில் மருத்துவக் காப்பீட்டு பாலிசியைக் குடும்ப உறுப்பினர்கள் அனைவருக்கும் சேர்த்து எடுக்க வேண்டும்.

காரணம், யார் ஒருவருக்கு உடல்நலம் சரியில்லை என்றாலும், பாதிக்கப்படுவது குடும்பத்தின் நிதிநிலைதான். இந்த பாலிசிக்கு கட்டும் பிரீமியச் செலவுக்கும் வருமான வரிச் சலுகை இருக்கிறது.

60 வயதுக்கு உட்பட்ட வரிதாரர் அவர் மற்றும் அவரின் குடும்பத்தினருக்குக் கட்டும் பிரீமியத்துக்கு நிதி ஆண்டில் 80D பிரிவின்கீழ் ரூ.25,000 வரைக்கும் வரிச் சலுகை பெற முடியும். 60 வயதுக்கு மேற்பட்ட மூத்த குடிமக்களுக்கு மருத்துவக் காப்பீட்டுக்கு கட்டும் பிரீமியம் மற்றும் மருத்துவச் செலவுகளுக்கு ரூ.50,000 வரைக்கும் வரிச் சலுகை உண்டு. இந்த பிரீமியத்தை இவர்களின் மகன் அல்லது மகள் கட்டினால் அவர்கள் வரிச் சலுகை பெற முடியும்.

வரிதாரர் மற்றும் அவரின் பெற்றோர் மூத்த குடிமக்களாக இருக்கும்பட்சத்தில் இருவருக்கும் தனித்தனியே மருத்துவச் செலவு மற்றும் மருத்துவக் காப்பீடு பிரீமியத்துக்கு ரூ.50,000 என மொத்தம் ரூ.1 லட்சம் வரைக்கும் வரிச் சலுகை பெற முடியும். இங்கேயும் மூத்த குடிமகனாக இருக்கும் மகன் / மகள், மூத்த குடிமகன்களாக இருக்கும் பெற்றோருக்குக் கட்டும் பிரீமியத்துக்கு வரிச் சலுகை பெற முடியும். இந்தப் பிரிவின் கீழ் வரிதாரர், மனைவி, பிள்ளைகள், பெற்றோர் செய்துகொள்ளும் மருத்துவப் பரிசோதனைக்கு ரூ.5,000 வரைக்கும் வரிச் சலுகை இருக்கிறது.

பிள்ளைகளின் கல்விச் செலவு...

பள்ளிக்கூடம் மற்றும் கல்லூரிகளில் படிக்கும் பிள்ளைகளின் கல்விச் செலவுக்கான தொகைக்கு நிதி ஆண்டில் ரூ.1.5 லட்சம் வரைக்கும் நிபந்தனைக்கு உட்பட்டு 80C பிரிவின் கீழ் வரிச் சலுகை பெற முடியும். ஒருவருக்கு இரண்டு குழந்தைகளின் கல்விச் செலவுக்கான தொகைக்குதான் வரிச் சலுகை கிடைக்கும். கணவன், மனைவி இருவரும் வேலை பார்க்கும் பட்சத்தில், இரண்டு பிள்ளைகள் இருந்தால், ஆளுக்கு ஒரு பிள்ளையின் கல்விச் செலவுக்கு வரிச் சலுகை பெறும்பட்சத்தில் கூடுதல் தொகையை மிச்சப்படுத்த முடியும்.

கல்விக் கடனுக்கான வட்டி...

ஒருவர் தான் பெற்ற கல்விக் கடன், மனைவி மற்றும் பிள்ளைகளின் கல்விக்காகப் பெற்ற கடனுக்கான வட்டிக்கு வரிச் சலுகை பெற முடியும். 80E பிரிவின் கீழ் கல்விக் கடனுக்கான வட்டிக்கு நிதி ஆண்டில் எவ்வளவு தொகைக்கும் வரிச் சலுகை பெற முடியும். இவ்விதமாக எட்டு ஆண்டுகள் வரைக்கும்தான் கல்விக் கடன் வட்டிக்கு வரிச் சலுகை கிடைக்கும். கல்விக் கடனில் திரும்பக் கட்டும் அசலுக்கு எந்த வரிச் சலுகையும் கிடையாது.

உடல் ஊனமுற்றவர் சிகிச்சை செலவு...

வரி கட்டுபவர் ஊனமுற்றவராக இருந்தால், நிதி ஆண்டில் 80U பிரிவின்கீழ் ரூ.75,000 வரைக்குமான மருத்துவச் சிகிச்சை செலவுக்கு வரிச் சலுகை பெற முடியும். இதுவே தீவிரமான உடல் ஊனம் (80 சதவிகிதத்துக்கு மேல்) எனில், ரூ.1,25,000 வரைக்கான செலவுக்கு வரிச் சலுகை உண்டு. இதற்கு மருத்துவ அதிகாரியின் சான்றிதழ் அவசியம்.

செலவு செய்யுங்கள்... வருமான வரியைச் சேமியுங்கள்..!

சார்ந்திருப்பவருக்கான மருத்துவச் சிகிச்சைக்கான செலவு...

வரி கட்டுபவரை சார்ந்திருக்கும் செயல்பட முடியாத அளவுக்கு ஊனமுற்ற உறவினர்களான பிள்ளைகள், துணைவர் (கணவன்/மனைவி), பெற்றோர்கள், சகோதர சகோதரிகள் ஆகி யோருக்கு மேற்கொள்ளும் மருத்துவச் சிகிச்சைக்கு வரிதாரர் செய்யும் செலவுக்கு நிதி ஆண்டில் வரிப் பிரிவு 80DD-யின் கீழ் நிதி ஆண்டில் ரூ.75,000 வரைக்கும் வரிச் சலுகை பெற முடியும். இதுவே பாதிப்பு மிகவும் அதிகமாக இருந்தால், ரூ.1.25 லட்சம் வரைக்கும் வரிச் சலுகை கோரி பெற முடியும். இதற்கும் மருத்துவ அதிகாரியின் சான்றிதழ் அவசியம்.

தீவிர நோய் பாதிப்புக்கான சிகிச்சை செலவு...

வரிதாரரை சார்ந்திருக்கும் ஊனமுற்றவருக்கு தீவிர நோய் களுக்கான கேன்சர், எய்ட்ஸ், நரம்பு மண்டல பிரச்னை உள்ளிட்ட தீவிர நோய்களுக்கு செய்யப்படும் மருத்துவச் செலவில் 80DDB பிரிவின்கீழ் அதிகபட்சம் ரூ.75,000 வரி விலக்கு உள்ளது. ஊனத்தின் பாதிப்பு 80 சதவிகிதத்துக்கு மேல் இருந்தால் ரூ. 1.25 லட்சம் வரைக்கும் வரிச் சலுகை பெற முடியும். இதற்கும் மருத்துவ அதிகாரியின் சான்றிதழ் அவசியம் தேவை.

வீட்டு வாடகை...

வரிதாரர் செலுத்தும் வீட்டு வாடகைக்கு நிபந்தனைக்கு உட்பட்டு 80GG பிரிவின்கீழ் வரிச் சலுகை பெறலாம். அதற்கு அவருக்கு சம்பளத்தின் ஒரு பகுதியாக வீட்டு வாடகைபடி (HRA - House Rent Allowance) கொடுக்கப்பட்டிருக்க வேண்டும்.தவிர, வசிக்கும் நகரம், வீட்டு வாடகை படி, சம்பளம் ஆகிய வற்றுக்கு ஏற்ப வீட்டு வாடகைக்கு வரிச் சலுகை கிடைக்கும். பொதுவாக, மாதம் ரூ.5,000 என்கிற கணக்கில் ஆண்டுக்கு ரூ,60,000 வரைக்கும் வீட்டு வாடகைக்கு கொடுக்கும் வரிச் சலுகை பெற முடியும்.

நீங்களும் மேற்கண்ட செலவு களைச் செய்யும்பட்சத்தில் வருமான வரிச் சலுகையைப் பெறத் தவறாதீர்கள். இந்த சலுகைகளைப் பெறுவது உங்கள் உரிமை என்பதால், இவற்றை இழப்பதைவிட, நன்கு யோசித்து பெறுவதே வரிதாரர்கள் எடுக்கும் புத்திசாலித்தனமான முடிவாக இருக்கும்.