Published:Updated:

பாலியல் புகார்: "அனைத்துக் கட்சிகளும் போராட்டத்துக்கு வரவேற்கப்படுகின்றன" - மல்யுத்த வீராங்கனைகள்

பஜ்ரங் புனியா, வினேஷ் போகட் - மல்யுத்த வீராங்கனைகள்
News
பஜ்ரங் புனியா, வினேஷ் போகட் - மல்யுத்த வீராங்கனைகள்

பிரிஜ் பூஷண் சரண் சிங்குக்கு எதிராக எஃப்.ஐ.ஆர் பதிவுசெய்யக் கோரி வினேஷ் போகட் உள்ளிட்ட ஏழு மல்யுத்த வீராங்கனைகள் உச்ச நீதிமன்றத்தில் மனுத்தாக்கல் செய்திருக்கின்றனர்.

Published:Updated:

பாலியல் புகார்: "அனைத்துக் கட்சிகளும் போராட்டத்துக்கு வரவேற்கப்படுகின்றன" - மல்யுத்த வீராங்கனைகள்

பிரிஜ் பூஷண் சரண் சிங்குக்கு எதிராக எஃப்.ஐ.ஆர் பதிவுசெய்யக் கோரி வினேஷ் போகட் உள்ளிட்ட ஏழு மல்யுத்த வீராங்கனைகள் உச்ச நீதிமன்றத்தில் மனுத்தாக்கல் செய்திருக்கின்றனர்.

பஜ்ரங் புனியா, வினேஷ் போகட் - மல்யுத்த வீராங்கனைகள்
News
பஜ்ரங் புனியா, வினேஷ் போகட் - மல்யுத்த வீராங்கனைகள்

காமன்வெல்த் விளையாட்டுப் போட்டிகள், ஆசிய விளையாட்டுப் போட்டிகள் என இரண்டிலும் தங்கம் வென்ற முதல் இந்தியப் பெண் மல்யுத்த வீராங்கனையான வினேஷ் போகட், தேசிய பயிற்சியாளர்கள், வீராங்கனைகள் பாலியல் துன்புறுத்தலுக்கு ஆளாவதாகக் கடந்த ஆண்டு குற்றச்சாட்டை முன்வைத்திருந்தார். மேலும், இந்த விவகாரத்தில் இந்திய மல்யுத்த கூட்டமைப்பின் (WFI) தலைவரும், பா.ஜ.க எம்.பி-யுமான பிரிஜ் பூஷண் சரண் சிங்கைப் பதவி விலக வலியுறுத்தி, 30-க்கும் மேற்பட்ட மல்யுத்த வீரர்கள், வீராங்கனைகள் டெல்லி ஜந்தர் மந்தர் பகுதியில் போராட்டம் நடத்தினர்.

பிரிஜ் பூஷன் சரண் சிங்
பிரிஜ் பூஷன் சரண் சிங்
ANI

இதை மறுத்த பிரிஜ் பூஷண் சரண் சிங், பாலியல் துன்புறுத்தல் எதுவும் நடக்கவில்லை என்றும், எந்த விசாரணைக்கும் நான் தயார் என்றும் கூறியிருந்தார். இந்த விவகாரத்தில் வீராங்கனைகளுக்குப் பல்வேறு தரப்புகளிலிருந்தும் ஆதரவுகள் குவிந்தன. அதேமயம் போராட்டத்துக்கு ஆதரவு தெரிவித்து களத்துக்கு வந்த கம்யூனிஸ்ட் கட்சியின் மூத்த தலைவர் பிருந்தா காரத்திடம், `இதை அரசியலாக்க வேண்டாம்’ என்று வீராங்கனைகள் கூறிவிட்டனர். இந்த நிலையில், `எந்த அரசியல் கட்சியாக இருந்தாலும் போராட்டத்துக்கு வரவேற்கிறோம்’ என வீராங்கனைகள் நேற்று தெரிவித்திருக்கின்றனர்.

இது குறித்து டெல்லியில் போராட்டத்தின்போது ஊடகத்திடம் பேசிய மல்யுத்த வீராங்கனை வினேஷ் போகட், ``நாங்கள் யாரையும் கண்மூடித்தனமாக நம்ப மாட்டோம். கடந்த முறை நாங்கள் தவறாக வழிநடத்தப்பட்டோம். இந்த முறை இதில் அரசியல் இருக்காது என்று நாங்கள் நம்புகிறோம்" என்று தெரிவித்தார்.

அதேபோல் ஒலிம்பிக் பதக்கம் வென்ற பஜ்ரங் புனியா, ``பா.ஜ.க-வோ, காங்கிரஸோ, ஆம் ஆத்மியோ அல்லது வேறு எந்த அரசியல் கட்சியாக இருந்தாலும் சரி, எங்களின் போராட்டத்தில் சேர அனைத்துக் கட்சிகளும் வரவேற்கப்படுகின்றன. அதேசமயம் எந்த அரசியல் கட்சியோடும் நாங்கள் இணைந்திருக்கவில்லை" என்று கூறினார்.

மல்யுத்த வீராங்கனை வினேஷ் போகட்
மல்யுத்த வீராங்கனை வினேஷ் போகட்

மேலும், மத்திய டெல்லியிலுள்ள கனாட் பிளேஸ் காவல் நிலையத்தில், கூட்டமைப்புத் தலைவர் பிரிஜ் பூஷண் சரண் சிங் மீது பாலியல் துன்புறுத்தல் புகாரளித்திருப்பதாகக் கூறிய வீராங்கனைகள் இதுவரை அதில் எந்த நடவடிக்கையும் எடுக்கப்படவில்லை என்றும், போலீஸார் எஃப்.ஐ.ஆர் பதிவுசெய்யும்வரை போராட்டம் தொடரும் என்றும் டெல்லியில் நேற்று கூறினர்.

அதோடு, இந்த விவகாரத்தில் பிரிஜ் பூஷண் சரண் சிங்குக்கு எதிராக எஃப்.ஐ.ஆர் பதிவுசெய்யக் கோரி வினேஷ் போகட் உள்ளிட்ட ஏழு மல்யுத்த வீராங்கனைகள் உச்ச நீதிமன்றத்தில் மனுத்தாக்கல் செய்தனர் என்பது குறிப்பிடத்தக்கது.