தப்பு செஞ்சவங்க தண்டிக்கப்படணும் சார்! - ஒரு ‘போலீஸ்’ தந்தையின் கதறல்!

பரபரப்பாகக் காணப்படும் தலைமைச் செயலக வளாகம், கடந்த 13-ம் தேதி காலை ஒரு தந்தையின் கோபத்தால் அதிர்ந்தது. காலை 11 மணியளவில் அங்கு வந்த ஓட்டேரி காவல் நிலைய தலைமைக் காவலர் கோதண்டபாணி, திடீரெனத் தன் 10 வயது மகள் பிரதிக்‌ஷாவுடன் சாலைமறியலில் ஈடுபட்டார். “நம்ம ஆளு... நீயே இப்படிச் செய்யலாமா?” என்று அங்கு பாதுகாப்புப் பணியில் இருந்த காவலர்கள் கேட்க, பிரதிக்‌ஷா அணிந்திருந்த சாக்ஸை அவிழ்த்து, குழந்தையின் விரல்களற்ற வலது காலைக் காட்டி, “நான் செய்யுறது தப்புதான். ஆனா, இது தப்பில்லையா... என் பொண்ணுக்கு நீதி கிடைக்க, இந்தக் காக்கிச்சட்டை தடையா இருக்கும்னா, அது எனக்குத் தேவையே இல்லை” என்று கொதித்தார். என்ன நடந்தது என விசாரித்தோம்...

“என் மகள் பிரதிக்‌ஷாவுக்கு 3 வயதாக இருந்தபோது, சிறுநீரகப் பிரச்னை காரணமாக சென்னை எழும்பூர் அரசு குழந்தைகள் நல மருத்துவமனைக்கு அழைத்துச் சென்றேன். அங்கு பரிந்துரைக்கப்பட்ட மாத்திரைகளை, கடந்த ஐந்து ஆண்டுகளாக என் மகளுக்குக் கொடுத்துவந்தேன். 2021-ல் அவளுக்கு வலது காலில் கடுமையான அரிப்பு ஏற்பட்டது. மீண்டும் எழும்பூர் மருத்துவமனைக்கு அழைத்துச் சென்றேன். அங்கிருந்து மேல் சிகிச்சைக்காக, ராஜீவ் காந்தி அரசு மருத்துவமனையில் அனுமதித்தார்கள். இரு மருத்துவமனைகளிலும் அளித்த தவறான சிகிச்சையால், என் மகளின் வலது கால் பாதம் முழுமையாகக் கருகத் தொடங்கியது. எங்களிடம் சொல்லாமலேயே மருத்துவர்கள் அவளுக்கு டயாலிசிஸ் செய்தார்கள்.