தம்பி... என் சர்வீஸ்தான் உங்க வயசு... போலீஸாரை கலாய்த்த திருட்டுத் தாத்தா!

‘‘திருடுவதும் ஒருவித கலை... அதை ரசித்துச் செய்வதால்தான், இந்த 72 வயதிலும் சலிப்பில்லாமல் சுவர் ஏறிக் குதிக்கிறேன்’’ என்று தன் ஐம்பது வருட திருட்டு வாழ்க்கையை விடிய விடியச் சொல்லி, காவல்துறையினரை வியர்க்க வைத்திருக்கிறார் தாத்தா தங்கமுத்து!

அண்மையில் நாகை மாவட்டம், வேதாரண்யம் அருகேயுள்ள தோப்புத்துறையில் பிரகாஷ் என்பவரின் வீட்டிலிருந்த எட்டு பவுன் நகை, எழுபதாயிரம் ரூபாய் ரொக்கப் பணம் கொள்ளைபோனது. வழக்கை விசாரித்த வேதாரண்யம் போலீஸார், சிசிடிவி கேமராக்களை ஆய்வுசெய்தபோது, துணியால் முகத்தை மறைத்துக் கட்டிய நிலையில், ‘உறங்காப் புலி’ ஒன்று சம்பவத்தில் ஈடுபட்டது தெரியவந்தது. மறைத்துக் கட்டிய துணியைத் தாண்டியும் வெளியே தெரிந்த நரைத்த முடியை அடையாளமாகக்கொண்டு, அடுத்த மூன்றே நாள்களில் கொள்ளையனைக் கொத்தாகப் பிடித்தது போலீஸ். வயதைக் கேட்ட போலீஸுக்குக் கடும் அதிர்ச்சி... காரணம், கொள்ளையன் 72 வயது தள்ளாத தாத்தா!

தொடர் விசாரணையில் தூத்துக்குடி மாவட்டம், உடன்குடி பகுதியைச்சேர்ந்த 72 வயதான தங்கமுத்து, ‘‘கொள்ளையடிச்சதுல பாதியை ஜாலியா செலவழிச்சுட்டேன்; இந்தாங்க மீதிப் பணம்’’ என கரன்சியோடு, எட்டு பவுன் நகையையும் பத்திரமாக போலீஸிடம் ஒப்படைத்திருக்கிறார்.

‘‘தம்பி... என் சர்வீஸ்தான் உங்க வயசு... நான் சாதாரணக் கொள்ளையன் கிடையாது. கேரளா, ஆந்திரா, கர்நாடகா, புதுச்சேரினு எல்லா மாநிலத்துலயும் 50 வருஷமா திருடுறேன். என்மேல 250-க்கும் அதிகமான வழக்கு இருக்கு. 200 முறைக்கு மேல சிறைக்குப் போயிருக்கேன்’’ என்று தங்கமுத்து தாத்தா பில்டப் கொடுக்க... ‘‘யப்பா சாமி. உன் அலம்பலை நிறுத்து’’ என அதட்டிய போலீஸார், “உண்மையை மட்டும் சொல்லு” என்று தங்கள் பாணியில் விசாரித்திருக்கிறார்கள். “என்னை டச் பண்ணாதீங்க சார். வலி தாங்க மாட்டேன். அடிக்காம குணமா வாயில கேளுங்க” என்று அழாத குறையாகச் சொல்லியிருக்கிறார். தங்கமுத்து தாத்தாவின் குற்றப் பதிவேடுகளை ஆராய்ந்தபோது, அவர் ஒரு ‘அக்மார்க் திருடர்குலத் திலகம்தான்’ என்ற உண்மை தெரியவந்திருக்கிறது.

தங்கமுத்து தாத்தாவின் ‘பூமர்’ கதையைக் கேட்ட போலீஸார், அதை அப்படியே நம்மிடமும் சொல்லி கிறுகிறுக்க வைத்தனர்...

‘‘ஏழ்மையான குடும்பத்தில் பிறந்தவர் தங்கமுத்து. இளம் வயதான பிறகும் வேலை வெட்டி எதற்கும் போகாமல் சுற்றிக்கொண்டிருந்த தங்கமுத்துவைப் பார்த்து ‘சல்லிப் பய, தம்பிடி காசுக்குத் தேற மாட்டான்’ என்று ஊர்க்காரர் களும், சொந்தக்காரர்களும் திட்டித் தீர்த்திருக் கிறார்கள். யாரோ அவரது தன்மானத்தை ஓவராகச் சீண்டிவிட்டதால், ‘இனிமே காலணா, அரையணாவுக்குக்கூட யார்கிட்டயும் கையேந்தக் கூடாது’ எனத் திருட்டு தொழிலுக்குப் பிள்ளையார்சுழி போட்டிருக்கிறார் தங்கமுத்து.

தூத்துக்குடி மட்டுமன்றி மதுரை, ராமநாதபுரம், சிவகங்கை போன்ற அண்டை மாவட்டங்களிலும் கைவரிசை காட்டி போலீஸிடம் மாட்ட ஆரம்பித்தவர், சில இடங்களில் திருடும்போது பொதுமக்களிடம் சிக்கி சின்னா பின்னமும் ஆகியிருக்கிறார். போலீஸ்காரர்கள் அடிக்கடி வீட்டுக்கு வந்து, இவரைக் கைதுசெய்து இழுத்துக்கொண்டு போனதால், அசிங்கப்பட்டுப் போன தங்கமுத்து குடும்பம், ஊரைவிட்டு திருவாரூர் மாவட்டம், கூத்தாநல்லூர் பகுதிக்கு இடம்பெயர்ந்துவிட்டது. சிறையிலிருந்து வெளியே வந்த தங்கமுத்து, குடும்பத்தைப் பிரிந்த சோகத்தை மறக்க ‘வேலை’யில் கூடுதல் கவனம் செலுத்த ஆரம்பித்திருக்கிறார். பார்ட் டைம் திருடர், ஃபுல் டைம் கொள்ளையராக மாறிவிட்டார்.