‘ஏரித் தண்ணீரிலும் சாராய வாடை...’ - சாத்கர் மலை சாம்ராஜ்ஜியம்... கட்டுப்படுத்த திணறுகிறதா போலீஸ்?

ஐம்பது ஆண்டுகளுக்கும் மேலாக ஒரு மலையையே கட்டுக்குள்வைத்து சாராய ராஜ்ஜியம் நடத்திக்கொண்டிருக்கிறது பெரும் மாஃபியா கூட்டம். இவர்களைக் கூண்டோடு கைதுசெய்ய முடியாமல் காவல்துறையும் திணறிக்கொண்டிருக்கிறது.

வேலூர் மாவட்டம், பேரணாம்பட்டு அருகிலிருந்து ஆந்திர மாநில எல்லை வரை 900 ஹெக்டேருக்கு பரந்து விரிந்திருக்கிறது ‘ஜான்ரஸ்’ என்ற ‘சாத்கர்’ மலை. இந்த மலைக்குள் ஆங்காங்கே வற்றாத நீரோடைகளும், சாராயம் காய்ச்சுவதற்குத் தேவையான மூலப்பொருள்களுள் ஒன்றான குறிப்பிட்ட மரப்பட்டைகளும் அபரிமிதமாகக் காணப்படுகின்றன. இதனால், சட்டவிரோத மாஃபியா கும்பல்கள் சாத்கர் மலைப் பகுதியை ஆக்கிரமித்து, சாராய அடுப்புகளைப் பற்றவைத்திருக்கின்றன. சாத்கர் மலையில், திரும்பிய பக்கமெல்லாம் புகையும் அடுப்புகளும், ஊறல் வடிக்கும் பேரல்களும்தான் காணப்படுகின்றன. வெளியாட்கள் யாரும் அவ்வளவு எளிதாக ஊடுருவவோ, கண்காணிக்கவோ முடியாத அளவுக்கு இந்த மலைப் பகுதியை தங்களின் முழுக்கட்டுப்பாட்டில் வைத்திருக்கிறது சாராய மாஃபியா கும்பல்.

“போலீஸ் படை மலைப் பகுதியின் எந்த மூலையிலிருந்து ஏறினாலும், உடனே சாராயக் கும்பல்களுக்கு எச்சரிக்கை விடுத்து ‘விசில்’ சத்தம் பறக்கும். சத்தம் வரும் திசையை போலீஸார் அண்ணாந்து பார்க்கும் அடுத்த விநாடி மொத்தக் கும்பலும் தப்பிவிடுகிறது. ஒவ்வொரு முறையும் ரெய்டுக்குச் செல்லும் போலீஸார், பல்லாயிரம் லிட்டர் சாராய பேரல்களை அடித்து நொறுக்கிவிட்டு வருகிறார்கள். ஆனாலும், சாராய மாஃபியாவிடமிருந்து சாத்கர் மலையை மீட்க முடியவில்லை. கடந்த ஆண்டு, ஜூலை மாதம் வேலூர் மாவட்ட ஆட்சியர் குமாரவேல் பாண்டியன் அதிரடியாகச் சாராயத் தடுப்பு வேட்டைக்குப் புறப்பட்டார். மலை ஏறிய ஆட்சியருக்கு எச்சரிக்கை விடுக்கும்விதமாக சாராயக் கும்பல்கள் பாறாங்கற்களைத் தள்ளிவிட்டுத் தப்பின. ஆட்சியருக்கே இந்த நிலைதான்” என்று போலீஸாரே சொல்கிறார்கள்.

சாத்கர் மலை, சாராய மாஃபியாக்களின் தனி ராஜ்ஜியத்தில் சிக்குண்டு கிடக்கிறது என்ற தகவலால் அங்கு விரைந்தது நம் ஜூ.வி டீம். மலையின் அடிவாரத்திலேயே வெல்ல மூட்டைகளுடன் நம்மை நோட்டமிட்ட சாராயக் கும்பலைச் சேர்ந்த இரண்டு பேர், நம் புகைப்படக்காரரின் கையில் இருந்த கேமராவைப் பார்த்ததும் பைக்கில் ஏறி, வேகமாகத் தப்பித்துச் சென்றனர். இது குறித்து நம்மிடம் பேசிய சமூக ஆர்வலர்கள், ‘‘சாத்கர் மலையிலிருந்து வரும் நீரோடை, அடிவாரத்திலுள்ள ஜாப்ராபாத் ஏரியில் கலக்கிறது. நீரோடைக்கு அருகிலேயே பெருமளவில் சாராயம் காய்ச்சப்படுகிறது. மலையைச் சுற்றியிருக்கும் நான்கைந்து கிராமங்களைச் சேர்ந்த குறிப்பிட்ட கும்பல்தான் தலைமுறை தலைமுறையாக இந்த சாராயத் தொழிலைச் செய்துவருகிறது. கடந்த 25 ஆண்டுகளுக்கு முன்பு ‘கரடி சேட்டு’ என்ற சாராய கும்பலின் தலைவன் கைதுசெய்யப்பட்டு, வேலூர் மத்திய சிறையில் அடைக்கப்பட்டான். அப்போது அவன் சிறையிலேயே உடல்நலக் குறைவால் இறந்துபோக, ஆத்திரமடைந்த அவரின் ஆதரவாளர்கள், உள்ளூர் காவல் நிலையத்தையே சூறையாடிய சம்பவமும் நிகழ்ந்திருக்கிறது. அந்த அளவுக்குக் கொடூரமான மூடர் கூட்டமாக முந்தைய தலைமுறை சாராய மாஃபியாக்கள் இருந்திருக்கிறார்கள்.

இந்தத் தலைமுறை திருந்தி வாழ, அவர்களின் மறுவாழ்வுக்காக மாநில அரசு பலமுறை உதவி செய்தது. ஆனால், அவர்கள் திருந்தியபாடில்லை. 25 ரூபாய்க்கு சாராயப் பொட்டலங்கள் கிடைப்பதால், டாஸ்மாக் கடையைவிட இந்த மலைச் சாராயத்தைக் குடிக்கத்தான் கூட்டம் படையெடுத்து வருகிறது. இந்தக் குடிநோயால் கணவனை இழந்து, கைக்குழந்தைகளுடன் தவித்துக்கொண்டிருக்கிறார்கள் பல இளம் பெண்கள். இந்தச் சாராயத்தால் குடியாத்தம், பேரணாம்பட்டு மற்றும் சுற்றியுள்ள கிராமங்களில் நூற்றுக்கணக்கான குடும்பங்கள் பெரியளவில் பாதிக்கப்பட்டுள்ளன.